Hodọdopọ hẹ Whétọ de—Be Jesu Yin Jiwheyẹwhe Wẹ Ya?

HOMẸ Kunnudetọ Jehovah tọn lẹ tọn nọ hùn nado dọhodo Biblu ji hẹ kọmẹnu yetọn lẹ. Be kanbiọ sinai do Biblu ji de tin he nọ duahunmẹna we ya? Be nuyise kavi aṣa sinsẹ̀n tọn Kunnudetọ Jehovah tọn lẹ tọn depope tin he mẹ a jlo na mọnukunnujẹ ya? Eyin mọ wẹ, ma whleawu nado fọ́n whẹho lọ dote to whedevonu he a na dukosọ hẹ Kunnudetọ de blo. Homẹ etọn na hùn nado dọhodopọ hẹ we do whẹho mọnkọtọn lẹ ji.

Hodọdopọ he bọdego yin dehe Kunnudetọ Jehovah tọn de sọgan tindo hẹ whétọ de. Mí ni dọ dọ Kunnudetọ de he nọ yin Pẹdetin wá owhé nawe de he nọ yin Mausi tọn gbè.

Be Nugbo Wẹ Dọ Mì Ma Tindo Yise to Jesu mẹ Ya?

Pẹdetin: Mì fọ́n dagbe ya? N’nọ yin Pẹdetin, n’to hodọna gbẹtọ lẹ do Biblu ji.

Mausi: Mí fọ́n kẹdẹ, Mausi wẹ yẹn nọ yin. Sinsẹ̀ngán ṣie nọ dọ dọ Kunnudetọ Jehovah tọn lẹ ma tindo yise to Jesu mẹ. Be nugbo wẹ ya?

Pẹdetin: Nugbo lọ wẹ yindọ mí tindo yise to Jesu mẹ. Mí kudeji dọ yise tintindo to Jesu mẹ yin dandannu na whlẹngán.

Mausi: Nuhe yẹnlọsu yise niyẹn.

Pẹdetin: E dohia dọ mí omẹ awe lẹ tindo nuyise dopolọ gando whẹho ehe go. Ṣigba, hiẹ sọgan kanse dewe dọ, ‘Eyin Kunnudetọ Jehovah tọn lẹ tindo yise to Jesu mẹ nugbonugbo, naegbọn gbẹtọ lẹ nọ dọ nudevo?’

Mausi: Mọwẹ, kanbiọ he wá ayiha ṣie mẹ niyẹn.

Pẹdetin: To kleun mẹ, mí tindo yise dolido to Jesu mẹ, ṣigba mí ma yí nuhe gbẹtọ lẹ nọ dọ gando ewọ go lẹpo sè.

Mausi: Taidi etẹ?

Pẹdetin: Eyọn. Mẹdelẹ nọ dọ dọ gbẹtọ dagbe de poun wẹ Jesu yin. Ṣigba mí ma kọngbedopọ hẹ linlẹn enẹ.

Mausi: Yẹnlọsu ga.

Pẹdetin: E dohia dọ mí omẹ awe lẹpo wẹ sọ tindo nuyise dopolọ gando whẹho ehe go. Apajlẹ devo wẹ yindọ Kunnudetọ Jehovah tọn lẹ ma kọngbedopọ hẹ nuplọnmẹ he jẹagọdo nuhe Jesu lọsu dọ gando haṣinṣan he tin to ewọ po Otọ́ lọ po ṣẹnṣẹn go lẹ.

Mausi: Etẹ na dọ a wẹ te?

Pẹdetin: Sinsẹ̀n susu wẹ nọ plọnmẹ dọ Jesu yin Jiwheyẹwhe. Vlavo nuhe hiẹ lọsu ko plọn niyẹn.

Mausi: Mọwẹ, sinsẹ̀ngán ṣie dọ dọ nudopolọ wẹ Jiwheyẹwhe po Jesu po yin.

Pẹdetin: Be hiẹ ma kẹalọyi dọ aliho dagbe hugan nado yọ́n nugbo lọ gando Jesu go wẹ nado gbadopọnna nuhe ewọ lọsu dọ ya?

Mausi: Mọwẹ.

Etẹwẹ Jesu Dọ?

Pẹdetin: Gbọ mí ni pọ́n wefọ de he na gọalọna mí nado mọnukunnujẹ whẹho ehe mẹ. Jaale, doayi nuhe mí na hia to Johanu 6:38 mẹ go. Jesu dọmọ: “Yẹn ko jẹte sọn olọn mẹ wá, e ma yin nado wà ojlo ṣie gba, ṣigba ojlo  ewọ he do mi hlan tọn.” Hodidọ enẹ na hẹnmẹ biọ bẹwlu mẹ eyin Jesu yin Jiwheyẹwhe.

Mausi: Etẹ na dọ a te?

Pẹdetin: Eyọn, doayi e go dọ Jesu dọ dọ emi ma jẹte sọn olọn mẹ wá nado wà ojlo emitọn titi.

Mausi: Nugbo wẹ, e dọ dọ emi wá nado wà ojlo Ewọ he do emi hlan tọn.

Pẹdetin: Ṣigba, eyin Jesu yin Jiwheyẹwhe, mẹnu wẹ do e hlan sọn olọn mẹ? Podọ naegbọn Jesu do yigbe nado wà ojlo Mẹlọ tọn?

Mausi: N’mọ nuhe dọ a te. Amọ́, wefọ enẹ kẹdẹ ma ko pé nado dohia dọ Jesu ma yin Jiwheyẹwhe.

Pẹdetin: Eyọn, sọ pọ́n nuhe Jesu dọ to nujijọ devo whenu. E dọ onú mọnkọtọn de to weta he bọdego mẹ. Be a sọgan hia Johanu 7:16 ya?

Mausi: Gbau. “Jesu sọ gblọnna yé bo dọmọ: ‘Nuhe yẹn to pinplọnmẹ ma yin ṣie gba, ṣigba ewọ he do mi hlan tọn wẹ.’”

Pẹdetin: A wanu. Sọgbe hẹ wefọ ehe, be Jesu plọnmẹ linlẹn etọn titi lẹ wẹ ya?

Mausi: Lala, e dọ dọ nuplọnmẹ emitọn lẹ yin Ewọ he do emi hlan tọn.

Pẹdetin: Mọwẹ. Podọ ehe fọ́n kanbiọ devo lẹ dote taidi: ‘Mẹnu wẹ do Jesu hlan? Podọ mẹnu dè wẹ nugbo he e plọnmẹ lẹ wá sọn?’ Be Mẹlọ ma na ko yiaga hugan Jesu ya? Nugbo lọ wẹ yindọ mẹhe domẹhlan nọ yiaga hugan mẹhe e dohlan.

Mausi: Enẹ jẹna ayidego. N’ma ko hia wefọ enẹ pọ́n.

Pẹdetin: Sọ pọ́n nuhe Jesu dọ to Johanu 14:28 mẹ dọmọ: “Mì ko sè bọ yẹn dọna mì dọ, Yẹn jei bo nasọ lẹkọwa mì dè. Eyin mì yiwanna mi, mì na jaya dọ yẹn jei Otọ́ lọ dè, na Otọ́ klohugan mi wutu.” Sọgbe hẹ wefọ enẹ, nukun tẹwẹ Jesu nọ yí do pọ́n ede yijlẹdo Otọ́ lọ go?

Mausi: E dọ dọ Otọ́ lọ klohugan emi. Enẹwutu, n’lẹndọ e nọ pọ́n Jiwheyẹwhe hlan taidi mẹhe yiaga hugan ẹn.

Pẹdetin: Nulọ pẹpẹ niyẹn. Apajlẹ devo sọ die. Doayi nuhe Jesu dọna devi etọn lẹ to Matiu 28:18 mẹ go. Wefọ enẹ hia dọmọ: “Aṣẹ lẹpo ko yin nina mi to olọn mẹ podọ to aigba ji.” Be didọ wẹ Jesu te dọ emi ko tindo aṣẹ lẹpo sọn dowhenu ya?

Mausi: Lala, e dọ dọ e yin nina emi wẹ.

Pẹdetin: Ṣigba eyin Jesu yin Jiwheyẹwhe, nawẹ aṣẹ sọgan yin nina ẹn dogọ gbọn? Podọ mẹnu wẹ na ẹn?

Mausi: N’na gbẹ́ lẹnnupọndeji dogọ.

Mẹnu Wẹ E to Hodọna?

Pẹdetin: Onú devo sọ tin he na hẹnmẹ biọ bẹwlu mẹ eyin Jesu yin Jiwheyẹwhe nugbonugbo.

Mausi: Etẹwẹ?

Pẹdetin: Enẹ wẹ nuhe jọ to whenue Jesu yí baptẹm. Pọ́n kandai lọ to Luku 3:21, 22 mẹ. Be a sọgan hia ẹ ya?

Mausi: “Todin, to whenue gbẹtọ lọ lẹpo ko yin bibaptizi, Jesu lọsu yin bibaptizi podọ, dile e to dẹ̀ho, olọn hùndonuvo podọ gbigbọ wiwe he sọawuhia taidi apoe de jẹte do e ji, ogbè de sọ wá sọn olọn dọmọ: ‘Hiẹ wẹ Visunnu ṣie, mẹyiwanna lọ; yẹn ko kẹalọyi we.’”

Pẹdetin: Be a doayi nuhe Jesu to wiwà to baptẹm etọn whenu go ya?

Mausi: E to dẹ̀ho.

Pẹdetin: Mọwẹ. Ṣigba mí sọgan kanse dọ, ‘Eyin Jesu yin Jiwheyẹwhe, mẹnu wẹ e to dẹ̀ho hlan?’

Mausi: Kanbiọ dagbe de niyẹn. N’dona kanse sinsẹ̀ngán ṣie.

Pẹdetin: Mí sọ dona lẹnnupọndo nudevo ji: doayi e go dọ to whenue Jesu tọ́n sọn osin lọ mẹ, mẹde dọhona ẹn sọn olọn mẹ. Be a doayi nuhe Mẹlọ dọ go ya?

Mausi: E dọ dọ Jesu wẹ Visunnu Emitọn, mẹhe emi yiwanna bosọ kẹalọyi.

Pẹdetin: A wanu. Amọ́, eyin Jesu yin Jiwheyẹwhe, mẹnu wẹ dọ ohó enẹlẹ sọn olọn mẹ?

Mausi: N’ma ko lẹnnupọndeji to aliho enẹ mẹ pọ́n.

 Naegbọn Haṣinṣan He Tin to Jiwheyẹwhe po Jesu po Ṣẹnṣẹn Do Yin Yiyijlẹdo “Otọ́” po “Visunnu” po Tọn Go?

Pẹdetin: Nudevo sọ jẹna ayidego: Mí hia dọ Jesu dọho gando Jiwheyẹwhe go taidi Otọ́ olọn mẹ tọn emitọn. Podọ to whenue Jesu yí baptẹm, ogbè de sọn olọn mẹ dohia dọ Jesu yin Visunnu Emitọn. Na nugbo tọn, Jesu lọsu ylọ ede dọ Visunnu Jiwheyẹwhe tọn. Todin, eyin hiẹ jlo na plọn mi dọ omẹ awe delẹ sọzẹn, kanṣiṣa whẹndo tọn tẹwẹ a sọgan yizan nado basi zẹẹmẹ etọn na mi?

Mausi: N’sọgan yí apajlẹ nọvisunnu awe tọn zan.

Pẹdetin: Mọwẹ—vlavo etlẹ yin apajlẹ ahoho tọn. Ṣigba, Jesu dọho gando Jiwheyẹwhe go taidi Otọ́ podọ gando ede go taidi Visunnu. Enẹwutu, etẹwẹ a lẹndọ Jesu jlo na plọn mí?

Mausi: N’mọnukunnujẹ nuagokun lọ mẹ. Jesu to didohia dọ mẹdopo yiaga bo tindo aṣẹ hugan omẹ awetọ.

Pẹdetin: Nulọ niyẹn. Lẹnnupọndo ehe ji: Hiẹ mọ apajlẹ he sọgbe de nado basi zẹẹmẹ zẹ́nsisọ tọn, enẹ wẹ apajlẹ nọvisunnu awe kavi ahoho tọn. Eyin Jesu yin Jiwheyẹwhe nugbonugbo, be ewọ taidi Mẹplọntọ Daho lọ ma na ko yí nuyijlẹdonugo dopolọ zan—kavi tlẹ yí apajlẹ zẹ́nsisọ tọn he họnwun hugan mọ de zan ya?

Mausi: Gbau.

Pẹdetin: Ṣigba, kakatimọ e yí hogbe lọ lẹ “Otọ́” po “Visunnu” po zan nado basi zẹẹmẹ haṣinṣan he tin to ewọ po Jiwheyẹwhe po ṣẹnṣẹn tọn.

Mausi: Hójọhó wẹ a dọ.

Etẹwẹ Hodotọ Dowhenu Tọn Jesu Tọn lẹ Dọ?

Pẹdetin: Whẹpo n’na do yì, e jlo mi nado dọhodo adà whẹho ehe tọn devo ji hẹ we, eyin a tindo whenu.

Mausi: Dọho bo, n’tindo whenu vude.

Pẹdetin: Eyin Jesu yin Jiwheyẹwhe nugbonugbo, be devi Jesu tọn lẹ ma na ko dọ mọ tlọlọ ya?

Mausi: Mọwẹ.

Pẹdetin: Ṣigba, fidepope ma dohia to Owe-wiwe lẹ mẹ dọ yé plọnmẹ onú mọnkọtọn. Kakatimọ, doayi nuhe dopo to hodotọ dowhenu tọn Jesu tọn lẹ mẹ, yèdọ apọsteli Paulu wlan go. To Filippinu lẹ 2:9 mẹ, e dọ nuhe Jiwheyẹwhe wà to okú po fọnsọnku Jesu tọn po godo dọmọ: “Jiwheyẹwhe ze e [Jesu] daga do otẹn he yiaga de mẹ bo gbọn homẹdagbe dali na ẹn oyín lọ he yiaga hú oyín devo lẹpo.” Sọgbe hẹ wefọ ehe, etẹwẹ Jiwheyẹwhe wà na Jesu?

Mausi: E dọ dọ Jiwheyẹwhe ze e daga do otẹn he yiaga de mẹ.

Pẹdetin: Mọwẹ. Ṣigba eyin Jesu sọzẹn hẹ Jiwheyẹwhe jẹnukọnna okú etọn bọ Jiwheyẹwhe wá ze e daga do otẹn he yiaga de mẹ, be enẹ ma na zọ́n bọ Jesu na yiaga hugan Jiwheyẹwhe ya? Be e yọnbasi dọ mẹde ni yiaga hugan Jiwheyẹwhe ya?

Mausi: Gbede pọ́n. E ma sọgan yọnbasi.

Pẹdetin: N’kọngbedopọ hẹ we. Enẹwutu, sọgbe hẹ kunnudenu ehe lẹpo, be Biblu plọnmẹ dọ Jesu yin Jiwheyẹwhe ya?

Mausi: Lala, e ma plọnmẹ do mọ. Biblu dọ dọ ewọ yin Visunnu Jiwheyẹwhe tọn.

Pẹdetin: A wanu. Nugbo lọ wẹ yindọ, Kunnudetọ Jehovah tọn lẹ nọ na sisi Jesu taun. Mí yise dọ e kú taidi Mẹsia dopagbe lọ bo hùn aliho whlẹngán tọn dote na gbẹtọvi nugbonọ lẹpo.

Mausi: Yẹnlọsu yí ehe sè.

Pẹdetin: Todin, hiẹ sọgan kanse dọ, ‘Nawẹ mí sọgan dohia Jesu dọ mí yọ́n pinpẹn etọn dọ e ze ogbẹ̀ etọn jo do ota mítọn mẹ gbọn?’ a

Mausi: Whẹho enẹ nọ duahunmẹna mi.

Pẹdetin: Vlavo n’sọgan lẹkọwa nado dọhodo gblọndo he Biblu na do whẹho lọ ji hẹ we. Be a na tin to whégbè to ogàn ehelẹ nkọ mẹ to osẹ he ja ya?

Mausi: Mọwẹ, n’na tin tofi.

Pẹdetin: A basi taun, e yì osẹ he ja.

[Nudọnamẹ odò tọn]