Plọnnu sọn Ohó Jiwheyẹwhe Tọn Mẹ

Naegbọn Klistiani lẹ Nọ Yí Baptẹm?

Hosọ ehe fọ́n kanbiọ he hiẹ sọgan ko nọ kanse lẹ dote bo do fihe hiẹ sọgan mọ gblọndo lọ lẹ te to Biblu mẹ hia. Homẹ Kunnudetọ Jehovah tọn lẹ tọn na hùn nado dọhodopọ hẹ we do gblọndo ehelẹ ji.

1. Etẹwẹ baptẹm Klistiani tọn zẹẹmẹdo?

Baptẹm yin obiọ he nọ yin bibasi hlan Jiwheyẹwhe nado tindo haṣinṣan dagbe de hẹ ewọ. Enẹwutu, Klistiani de dona yí baptẹm eyin e ko whẹ́n jẹ obá lọ mẹ nado plọnnu gando Jiwheyẹwhe go bo lẹzun devi Jesu tọn, e ma yin to whenue e yin viyẹyẹ de gba. (Owalọ lẹ 8:12; 1 Pita 3:21) Mí nọ lẹzun devi Jesu tọn to whenue mí plọn bo nọ wà nuhe e degbe etọn na mí lẹ.—Hia Matiu 28:19, 20.

To azán apọsteli Jesu tọn lẹ tọn gbè, mẹsusu yinuwa madọngbàn nado plọnnu gando Jiwheyẹwhe po Jesu po go. Di apajlẹ, to whenue dawe de sè dọ okú Jesu tọn ko hùn dotẹnmẹ whlẹngán tọn dote, e lẹzun devi to afọdopolọji. To egbehe, gbẹtọ ahunjijlọnọ susu ko de nado lẹzun hodotọ Jesu tọn lẹ.—Hia Owalọ lẹ 8:26-31, 35-38.

2. Naegbọn Jesu do yí baptẹm?

Jesu tindo nudi owhe 30 to whenue Johanu Baptizitọ ylọn ẹn do osin Tọ̀sisa Jọdani tọn mẹ. Baptẹm Jesu tọn nọtena nudide etọn nado wà nuhe Jiwheyẹwhe jlo dọ ni wà. (Heblu lẹ 10:7) Ehe na biọ dọ ewọ ni yí ogbẹ̀ etọn do sanvọ́ na ylando gbẹtọvi lẹ tọn. Jesu yiwanna Otọ́ etọn Jehovah bo nọ setonuna ẹn to whepoponu, etlẹ yin whẹpo e do wá nọgbẹ̀ to aigba ji.—Hia Malku 1:9-11; Johanu 8:29; 17:5.

  3. Naegbọn Klistiani de dona yí baptẹm?

Na mí yin jiji po ylando po wutu, ninọmẹ mítọn gbọnvona Jesu tọn. Ṣigba okú avọ́sinsan tọn Jesu tọn hẹn ẹn yọnbasi na mí nado tindo haṣinṣan dagbe de hẹ Jiwheyẹwhe. (Lomunu lẹ 5:10, 12; 12:1, 2) Na taun tọn, mí tindo dotẹnmẹ hundote lọ nado yin etọn bo lẹzun hagbẹ whẹndo etọn tọn. (2 Kọlintinu lẹ 6:18) Nawẹ mí nọ tindo lẹblanulọkẹyi enẹ gbọn? To odẹ̀ mẹdetiti tọn mẹ, mí nọ klan míde do wiwe na Jehovah bo nọ dopà nado yí pipotọ gbẹzan mítọn tọn do wà ojlo etọn. To enẹgodo, mí nọ yí baptẹm nado do klandowiwe mọnkọtọn hia to gbangba.—Hia Matiu 16:24; 1 Pita 4:2.

4. Etẹwẹ hiẹ sọgan wà nado pegan na baptẹm?

Kunnudetọ Jehovah tọn lẹ nọ plọn Biblu hẹ mẹdepope he jlo na dọnsẹpọ Jiwheyẹwhe. Biblu pinplọn po opli Klistiani tọn lẹ yìyì po na hẹn owanyi he a tindo na Jiwheyẹwhe sinyẹn deji bo hẹn yise he a tindo to ewọ mẹ lodo. Mọwiwà nasọ gọalọna we nado wleawuna walọ po aṣa dagbe lẹ po. Awuwiwlena owanyi, yise po jẹhẹnu devo he nọ hẹn homẹ Jiwheyẹwhe tọn hùn lẹ po na gọalọna we nado nọgbẹ̀ sọgbe hẹ opà towe nado sẹ̀n Jehovah kakadoi.—Hia Johanu 17:3; Heblu lẹ 10:24, 25.

[Yẹdide to weda 17]

Na nudọnamẹ dogọ, pọ́n weta 18 owe lọ Etẹwẹ Biblu Plọn Mí Taun? tọn, he Kunnudetọ Jehovah tọn lẹ zinjẹgbonu.