Ayinamẹ lẹ Na Ayajẹ Whẹndo Tọn

Hiẹ Sọgan Vọ́ Awuwlena Jidide Do Alọwlemẹ Towe Go

Steve a: “N’ma lẹn pọ́n gbede dọ Jodi sọgan deayọ. N’masọ dejidego paali ba. N’ma sọgan dọ obá he mẹ e vẹawuna mi jẹ nado jona ẹn.”

Jodi: “N’mọnukunnujẹemẹ dọ nuhe n’wà wẹ zọ́n bọ Steve masọ dejido go e ba. Owhe susu juwayi whẹpo e do mọdọ nuhe n’wà lọ vẹna mi.”

SỌGBE hẹ Biblu, eyin alọwlemẹ de deayọ, omẹ awetọ tindo jlọjẹ nado basi gbẹdai kavi lala. b (Matiu 19:9) Steve, he go mí donù to aga, de ma nado basi gbẹdai. Ewọ po Jodi po magbe nado hẹn alọwle yetọn dote. Ṣigba, yé wá mọdọ enẹ bẹ nususu hẹn hugan pọninọ poun. Etẹwutu? Dile hodidọ yetọn lẹ dohia do, ayọdide Jodi tọn zọ́n bọ jidide depope masọ tin to ṣẹnṣẹn yetọn ba. Na jidide do ode awetọ go yin dandannu nado tindo ayajẹ to alọwle mẹ wutu, yé dona dovivẹnu taun nado vọ́ awuwlena jidide enẹ.

Eyin nuhahun sinsinyẹn taidi ayọdide wẹ wá aimẹ to alọwle towe mẹ bọ hiẹ po alọwlemẹ towe po to vivẹnudo nado hẹn alọwle mìtọn dote, e họnwun dọ ninọmẹ sinsinyẹn mẹ jugbọn wẹ mì te. To whenue hiẹ yọnẹn dọ alọwlemẹ towe deayọ, e yọnbasi dọ osẹ kavi osun he na bọdego lẹ ma na bọawuna we. Ṣigba hiẹ sọgan duto ninọmẹ enẹ ji! Todin, nawẹ hiẹ sọgan vọ́ awuwlena jidide do alọwlemẹ towe go gbọn? Nuyọnẹn he tin to Biblu mẹ sọgan gọalọ. Lẹnnupọndo ayinamẹ ẹnẹ he bọdego ehelẹ ji.

1 Mì Nọ Dọ Nugbo Na Ode Awetọ. “Todin he mì ko klọ́n lalodido dai, dopodopo mìtọn ni nọ dọ nugbo,” wẹ apọsteli Paulu wlan. (Efesunu lẹ 4:25) Lalodido, nugbo-daa didọ kavi abọẹninọ nọ saba hẹn jidide he dona tin to alọwlemẹ lẹ ṣẹnṣẹn gble. Enẹwutu, nujọnu wẹ e yin dọ mì ni nọ voawu nado  dọho hẹ ode awetọ bosọ nọ dọ nugbo na mìde.

Nugbo wẹ dọ to bẹjẹeji, e sọgan vẹawuna hiẹ po alọwlemẹ towe po taun nado dọhodo ayọdide lọ ji. Ṣigba yigodo-yinukọn, mì dona dọ hójọhó na mìde gando nuhe jọ lọ go. Mì sọgan de ma nado dọhodo nuhe gando whẹho lọ go lẹpo ji, ṣigba e ma na yin nuyọnẹnnu nado dapana whẹho lọ mlẹnmlẹn. Jodi dọmọ: “To tintan whenu, hodidọ do nuhe jọ lọ ji nọ vẹawu bosọ hiọawu na mi taun. Nuhe n’wà lọ vẹna mi jẹ otẹn godo tọn mẹ, podọ onú dopo he nọ jlo mi wẹ nado zẹhudo nuhe jọ lọ ji bo masọ flinnu jẹ e ji ba.” Ṣigba, abọẹninọ etọn hẹn ninọmẹ lọ ylan dogọ. Etẹwutu? Steve dọmọ: “Na Jodi ma nọ jlo na dọhodo ayọdide etọn ji wutu, n’gbẹ́ nọ vẹnudo e.” Jodi lọsu wá yigbe dọmọ: “Awugbopo nado dọhodopọ hẹ asu ṣie do ayọdide lọ ji glọnalina mí nado yawu didẹ nuhahun lọ.”

E họnwun dọ hodidọ do ayọdide lọ ji ma na bọawu paali. Debbie, mẹhe asu etọn Paul deayọ hẹ yọnnu he yin wekantọ etọn, dọmọ: “Kanbiọ susu wẹ wá ayiha mẹ na mi. Nawẹ onú mọnkọtọn sọgan jọ gbọn? Etẹwutu? Etẹ dọ wẹ yé te kakajẹ finẹ? N’jẹflumẹ pete bo nọ to nulẹnpọn do e ji mapote, podọ dile osẹ susu tlẹ juwayi, n’gbẹ́ nọ to kanbiọ voovo lẹ kanse dee.” Paul dọmọ: “To whedelẹnu, hodọdopọ yẹn po Debbie po tọn nọ lẹzun ojlẹ̀. Ṣigba mí nọ tẹnpọn to whelẹponu nado vẹvẹna ode awetọ to godo mẹ. Hodọdopọ ahundopo tọn enẹlẹ zọ́n bọ mí sọ vẹ́ dogọ.”

Etẹwẹ mì sọgan wà ma nado dike hodọdopọ mìtọn gando ayọdide lọ go ni lẹzun ojlẹ̀? Flindọ yanwle towe tintan ma yin nado yiahọsu to alọwlemẹ towe go gba, ṣigba nado plọnnu sọn ninọmẹ sinsinyẹn enẹ mẹ bo hẹn haṣinṣan alọwle tọn mìtọn lodo. Di apajlẹ, Chul Soo po asi etọn Mi Young po vọ́ nulẹnpọn do haṣinṣan alọwle tọn yetọn ji to whenue Chul Soo deayọ. Chul Soo dọmọ: “N’wá doayi e go dọ yanwle ṣie titi lẹ kẹdẹ wẹ n’nọ na ayidonugo hugan to dai. Podọ pekọ hinhẹnwa na ojlo mẹdevo lẹ tọn bo mọ nukundagbe yetọn wẹ nọ duahunmẹna mi hugan. Yewlẹ tamẹ wẹ n’nọ yí suhugan whenu po huhlọn ṣie lẹ po tọn zan do. Enẹ zọ́n bọ n’ma nọ yí whenu susu zan hẹ asi ṣie.” To whenue Chul Soo po Mi Young po wá mọnukunnujẹ enẹ mẹ, yé basi diọdo he jẹ lẹ, podọ enẹ zọ́n bọ alọwle yetọn wá lodo dile ojlẹ to yìyì.

TẸ́N EHE PỌ́N: Eyin hiẹ wẹ alọwlemẹ he deayọ lọ, tẹnpọn ma nado nọ dín whẹjijọ kavi gblewhẹdo alọwlemẹ towe. Kakatimọ, kẹalọyi nuṣiwa towe bo wà nuhe go a pé lẹpo nado jla ninọmẹ lọ do. Ṣigba, eyin hiẹ wẹ alọwlemẹ homẹvọnọ lọ, ma nọ wadán do alọwlemẹ towe ji kavi zùn in blo. Enẹ na zọ́n bọ alọwlemẹ towe na nọ voawu nado dọho hẹ we.—Efesunu lẹ 4:32.

2 Mì Nọ Wazọ́n Dopọ. “Omẹ awe pọnte hú omẹ dopo,” wẹ Biblu dọ. Etẹwutu? “Na yé tindo ale dagbe de na magbọjẹ yetọn. Na eyin yé jai, mẹde na ze ogbẹ́ etọn dote.” (Yẹwhehodọtọ 4:9, 10) Hogbe Biblu tọn enẹlẹ yin nugbo titengbe to whenue asu po asi po de to vivẹnudo nado vọ́ awuwlena jidide do ode awetọ go.

Eyin hiẹ po alọwlemẹ towe po nọ wanu dopọ, mì sọgan vọ́ haṣinṣan mìtọn jlado. Enẹwutu, mì omẹ awe lẹ wẹ dona magbe nado hẹn alọwle mìtọn dote. Ṣigba, eyin hiẹ tẹnpọn nado pehẹ ninọmẹ lọ na dewe, a sọgan hẹn ninọmẹ lọ vantan. Mì dona nọ pọ́n ode awetọ hlan taidi họntọn bo nọ wanu dopọ to whepoponu.

Steve po Jodi po mọdọ ayinamẹ ehelẹ sọgbe. “E yí whenu, ṣigba yẹn po Steve po wazọ́n dopọ bo hẹn alọwle mítọn lodo,” wẹ Jodi dọ. E yidogọ dọmọ: “N’magbe ma nado vọ́ awufiẹsa mọnkọtọn hẹnwa e ji gbede ba. Podọ dile etlẹ yindọ Steve jẹflumẹ, e magbe nado hẹn alọwle mítọn dote. Egbesọegbesọ, n’nọ dín aliho lẹpo nado vọ́ jide na ẹn dọ n’jlo na yin nugbonọ na ẹn, podọ e nọ do owanyi etọn hia mi to whepoponu. N’nọ yọ́n pinpẹn enẹ tọn na ẹn taun.”

TẸ́N EHE PỌ́N: To pọmẹ, mì magbe nado wazọ́n nado vọ́ awuwlena jidide to alọwle mìtọn mẹ.

 3 Dovivẹnu Nado Diọ Jijọ Towe. To whenue Jesu na avase hosetọ etọn lẹ sọta ayọdide godo, e na ayinamẹ dọmọ: “Todin, eyin nukun towe adusiwhé tọn lọ to hinhẹn we dahli, sún in sẹ̀ bo ze e dlan sọn dewe go.” (Matiu 5:27-29) Eyin hiẹ wẹ alọwlemẹ he ṣinuwa lọ, e na yọ́n dọ hiẹ ni lẹnnupọndo diọdo he hiẹ sọgan basi lẹ ji na dagbe alọwle towe tọn.

E họnwun dọ hiẹ dona sánkanna kanṣiṣa he hiẹ tindo hẹ mẹhe a deayọ hẹ lọ. c (Howhinwhẹn lẹ 6:32; 1 Kọlintinu lẹ 15:33) Paul he yin nùdego wayi, diọ azọ́n gànmẹ etọn po sọha alokan apòmẹ tọn etọn po ma nado vọ́ kanṣiṣa depope tindo hẹ yọnnu he e deayọ hẹ lọ. Mahopọnna vivẹnudido enẹ lẹpo, e gbẹ́ vẹawu nado sánkanna kanṣiṣa lọ mlẹnmlẹn. Na Paul magbe nado vọ́ awuwlena jidide to ewọ po asi etọn po ṣẹnṣẹn wutu, e gbọ bo jo azọ́n lọ do. Gbọnvona enẹ, alokan apòmẹ tọn asi etọn tọn kẹdẹ wẹ e nọ zan bo jo etọn lọ do. Be avọ́sinsan enẹlẹ hẹn ale wá ya? Asi etọn Debbie dọmọ: “E ko basi owhe ṣidopo todin, ganṣo n’gbẹ́ nọ dibu to whedelẹnu dọ yọnnu lọ nasọ tẹnpọn nado vọ́ asu ṣie mọ. Amọ́, n’deji todin dọ Paul ma nasọ joawuna whlepọn enẹ.”

Eyin hiẹ wẹ alọwlemẹ he deayọ lọ, vlavo e na biọ dọ hiẹ ni diọ walọ towe delẹ. Di apajlẹ, e sọgan yindọ hiẹ nọ daihun gblewa tọn lẹ kavi nọ to nulẹnpọn do haṣinṣan owanyi tọn tintindo hẹ mẹhe ma yin alọwlemẹ towe lẹ ji mapote. To popolẹpo mẹ, “de gbẹtọ-yinyin hoho lọ po nuyiwa etọn lẹ po sẹ̀ sọn ogo.” Dovivẹnu nado diọ jijọ towe bo wleawuna walọ he na zọ́n bọ alọwlemẹ towe na nọ dejido gowe. (Kọlọsinu lẹ 3:9, 10) Be lehe mẹjitọ towe lẹ plọn we do nọ zọ́n bọ e nọ vẹawuna we nado do owanyi hia wẹ ya? Eyin etlẹ nọ vẹawuna we to bẹjẹeji, ma nọ whleawu nado do owanyi hia alọwlemẹ towe bo nọ hẹn ẹn deji dọ mẹvivẹ wẹ e yin na we blo. Steve flin dọmọ: “Jodi nọ saba do owanyi hia mi gbọn alọdido go e dali, podọ e tlẹ nọ dọna mi whẹwhẹ dọ ‘N’yiwanna we.’”

Nuyọnẹnnu wẹ e na yin dọ na ojlẹ de, hiẹ ni nọ dọ nuwiwa egbesọegbesọ tọn towe lẹpo na alọwlemẹ towe. Mi Young he go mí donù wayi dọmọ: “Chul Soo nọ dọ nuhe e wà to azán dopodopo ji lẹpo na mi kakajẹ onú flinflin lẹ ji nado dohia mi dọ emi ma to nudepope whlá do mi.”

TẸ́N EHE PỌ́N: Mì nọ kanse ode awetọ nuhe mì sọgan wà nado vọ́ awuwlena jidide do ode awetọ go. Mì basi kandai nulọ lẹ tọn, podọ enẹgodo mì wazọ́n do yé ji. Humọ, mì nọ doalọ to nuwiwa he mẹ mì omẹ awe lẹ sọgan mọ awuvivi te lẹ mẹ.

4 Ojlẹ de Tin Nado Johodo. Ma yawu wá tadona lọ kọ̀n dọ, todin emi dona yinuwa taidi dọ nude ma jọ wẹ nkọ blo. Howhinwhẹn lẹ 21:5 na avase dọmọ: “Dopodopo mẹhe yawu tọn, hlan matindo mẹ wẹ.” E na yí whenu—vlavo owhe lẹ—nado vọ́ awuwlena jidide do ode awetọ go.

Eyin hiẹ wẹ alọwlemẹ homẹvọnọ lọ, na whenu dewe nado jona alọwlemẹ towe to gigọ́ mẹ. Mi Young flin dọmọ: “N’nọ lẹn dai dọ yọnnu dona jona asu etọn eyin e deayọ. N’nọ mọdọ e ma sọgbe eyin yọnnu ma jlo na jona asu etọn. Ṣigba, to whenue asu ṣie wá deayọ, n’wá mọdọ e nọ vẹawu nado jona.” Nado jona—podọ nado vọ́ awuwlena jidide do alọwlemẹ mẹtọn go—nọ saba yí whenu.

Etomọṣo, Yẹwhehodọtọ 3:1-3 dohia dọ “whenu hinhẹn jẹgangan tọn” tin. To bẹjẹeji, hiẹ sọgan lẹndọ numọtolanmẹ towe lẹ zizewhla do alọwlemẹ towe wẹ yọ́n hugan. Ṣigba, mọwiwà na ojlẹ dindẹn ma na gọalọna we nado vọ́ awuwlena jidide do alọwlemẹ towe go. Nado vọ́ haṣinṣan mìtọn jlado, jona alọwlemẹ towe bo do enẹ hia ẹ gbọn homẹ didọna ẹn dali. Humọ, na ẹn tuli nado nọ dọ nuhe hẹn ayajẹ kavi ayimajai wá na ẹn lẹ na we.

Dovivẹnu ma nado nọ duadi. (Efesunu lẹ 4:32) Ayihamẹlinlẹnpọn do apajlẹ Jiwheyẹwhe tọn ji sọgan gọalọna we. E vẹna Jiwheyẹwhe taun to whenue Islaelivi lẹ dogodo e. Jehovah Jiwheyẹwhe tlẹ yí ede jlẹdo asu he asi etọn deayọ de go. (Jelemia 3:8, 9; 9:2) Amọ́ e  ma “whlá adi kakadoi.” (Jelemia 3:12) Whenue yé lẹnvọjọ sọn ahun mẹ bo lẹkọwa e dè, e jona yé.

To whenue mì omẹ awe lẹ ko basi diọdo voovo he yin dandan nado vọ́ haṣinṣan mìtọn jlado godo, ayimajai mìtọn na depò taun. To whenẹnu, kakati nado nọ ze ayiha mìtọn lẹpo do alọwle mìtọn hinhẹn dote ji, mì sọgan doafọna yanwle devo lẹ to pọmẹ. Etomọṣo, mì gbẹ́ nọ basi tito dagbe nado nọ dọhodo lehe mì to nukọnyiyi basi do ji. Mì nọ to haṣinṣan mìtọn hẹn pọnte zọnmii. Mì nọ didẹ nuṣiwa flinflin he gando nuhe jọ lọ go lẹ bo nọ vọ́ jide na ode awetọ gando gbemima mìtọn nado hẹn alọwle mìtọn dote go.—Galatianu lẹ 6:9.

TẸ́N EHE PỌ́N: Kakati nado tẹnpọn nado gọ̀ alọwle mìtọn wá lehe e te do to bẹjẹeji, yanwle mìtọn ni yin nado vọ́ awuwlena haṣinṣan yọyọ he lodo taun de.

E Sọgan Pà We

To whedelẹnu, hiẹ sọgan nọ mọdọ ninọmẹ lọ ma na pà emi; ṣigba nọ flin nugbo ehe: Jiwheyẹwhe wẹ Dowatọ alọwle tọn. (Matiu 19:4-6) Enẹwutu, po alọgọ etọn po, alọwle towe sọgan de sinsẹ́n dagbe tọ́n. Asu po asi po he go mí donù lẹpo wẹ yí ayinamẹ dagbe Biblu tọn lẹ do yizan mẹ bo gbọnmọ dali hẹn alọwle yetọn dote.

E ko basi owhe 20 linlán todin he alọwle Steve po Jodi po tọn dán. Steve dọ nuhe gọalọna yé nado vọ́ haṣinṣan alọwle tọn yetọn jlado to kleun mẹ dọmọ: “Whenue mí jẹ Biblu plọn ji hẹ Kunnudetọ Jehovah tọn lẹ wẹ mí basi diọdo daho hugan lẹ. Mí mọ alọgọ mayọnjlẹ yí. Enẹ hẹn mí penugo nado jugbọn ojlẹ sinsinyẹn enẹlẹ mẹ.” Jodi dọmọ: “Ayajẹ daho wẹ e yin na mi dọ mí penugo nado doakọnna ojlẹ sinsinyẹn enẹlẹ. Biblu pinplọn dopọ gọna vivẹnu he mí do lẹ gọalọna mí nado tindo ayajẹ to alọwle mítọn mẹ todin.”

[Nudọnamẹ odò tọn]

KANSE DEWE DỌ . . .

▪ Mahopọnna ayọdide lọ, whẹwhinwhẹ́n tẹlẹ wutu wẹ n’de nado hẹn alọwle ṣie dote?

▪ Jijọ dagbe alọwlemẹ ṣie tọn tẹlẹ ji wẹ n’sọgan ze ayiha do to alọnu din?

▪ To whenue mí to họntọn mẹ, nawẹ n’nọ do owanyi hia alọwlemẹ ṣie to onú flinflin lẹ mẹ gbọn, podọ nawẹ n’sọgan gbẹ́ wàmọ gbọn todin?

[Yẹdide to weda 20]