Plọnnu sọn Ohó Jiwheyẹwhe Tọn Mẹ

Naegbọn Mí Dona Yí Yinkọ Jiwheyẹwhe Tọn Zan?

Hosọ ehe fọ́n kanbiọ he hiẹ sọgan ko nọ kanse lẹ dote bo do fihe hiẹ sọgan mọ gblọndo lọ lẹ te to Biblu mẹ hia. Homẹ Kunnudetọ Jehovah tọn lẹ tọn na hùn nado dọhodopọ hẹ we do gblọndo ehelẹ ji.

1. Naegbọn Jiwheyẹwhe do yinkọ de na ede?

Matin ayihaawe, e nọ vivi na we dọ yè ni yí yinkọ towe titi do ylọ we kakati nido yin gbọn tẹnmẹ-yinkọ de dali taidi “dawe ehe,” “mẹdaho,” “whési” kavi “nawe ehe.” Yinkọ towe nọ gọalọ nado yọ́n we dovo na mẹdevo lẹ. Jiwheyẹwhe tindo tẹnmẹ-yinkọ lẹ taidi “Oklunọ,” “Jiwheyẹwhe Ganhunupo” kavi “Mẹdatọ.” (Gẹnẹsisi 15:2; 17:1; Yẹwhehodọtọ 12:1) Ṣigba, e sọ do yinkọ de na ede na mí nido wleawuna haṣinṣan pẹkipẹki de hẹ ẹ. To Gungbe mẹ, yinkọ etọn nọ yin Jehovah.—Hia Eksọdusi 6:3.

Dile etlẹ yindọ lẹdogbedevomẹ-basitọ Biblu tọn susu ko yí tẹnmẹ-yinkọ lẹ taidi “Jiwheyẹwhe” po “Oklunọ” po do diọ yinkọ Jiwheyẹwhe tọn, yinkọ enẹ sọawuhia nudi whla 7000 to alọnuwe-hihia Heblugbe tọn hohowhenu tọn Biblu tọn lẹ mẹ. E họnwun dọ Jiwheyẹwhe jlo dọ gbẹtọ lẹ ni yọ́n oyín etọn.—Hia Isaia 12:4.

2. Naegbọn e do yin nujọnu nado yọ́n yinkọ Jiwheyẹwhe tọn?

Nado yọ́n oyín Jiwheyẹwhe tọn bẹ nususu hẹn hugan nado yọ́n lehe e nọ yin yiylọ do. Enẹ zẹẹmẹdo nado tindo haṣinṣan pẹkipẹki de hẹ Jiwheyẹwhe. Yinkọ lọ Jehovah zẹẹmẹdo “E Nọ Hẹn Nado Lẹzun.” Zẹẹmẹ yinkọ lọ tọn dohia dọ Jiwheyẹwhe na lẹzun nudepope he e biọ dọ e ni lẹzun nado hẹn lẹndai etọn di. Enẹwutu, yinkọ Jiwheyẹwhe tọn yinyọnẹn nọ biọ dọ mí ni yise dọ ewọ na hẹn opagbe etọn lẹ di. (Psalm 9:10) Yise mẹhe yọ́n yinkọ Jiwheyẹwhe tọn bo nọ yí i zan lẹ tọn nọ whàn yé nado dejido e go bo ze e do otẹn tintan mẹ to gbẹzan yetọn mẹ. Jehovah Jiwheyẹwhe na basi hihọ́na omẹ mọnkọtọn lẹ.—Hia Psalm 91:14.

  3. Naegbọn Jiwheyẹwhe jlo dọ gbẹtọ lẹ ni yọ́n yinkọ etọn?

Jiwheyẹwhe jlo dọ gbẹtọ lẹ ni yọ́n yinkọ emitọn na enẹ nọ hẹn ale wá na yé wutu. E nọ zọ́n bọ yé nọ lẹzun họntọn Jiwheyẹwhe tọn bo tindo todido lọ nado nọgbẹ̀ kakadoi. Abajọ Jehovah do jlo dọ mí ni hẹn yinkọ emitọn zun yinyọnẹn!—Hia Johanu 17:3; Lomunu lẹ 10:13, 14.

Nado hẹn yinkọ Jiwheyẹwhe tọn zun yinyọnẹn, Jesu plọnnu gbẹtọ lẹ gando nuyiwa Jiwheyẹwhe tọn lẹ, osẹ́n Etọn lẹ po opagbe Etọn lẹ po go. To egbehe, hodotọ Jesu tọn lẹ zindonukọn nado to yinkọ Jiwheyẹwhe tọn hẹn zun yinyọnẹn to akọta lẹpo ṣẹnṣẹn. Yé nọ wàmọ to pọmẹ taidi akọta he tin “na oyín [Jiwheyẹwhe] tọn.”—Hia Owalọ lẹ 15:14; Johanu 17:26.

4. Nawẹ Jiwheyẹwhe na pagigona yinkọ etọn gbọn?

Jehovah Jiwheyẹwhe jlo na pagigona oyín etọn, na gbẹtọ lẹ ko kọ̀n masin do oyín lọ go wutu. Di apajlẹ, mẹdelẹ nọ dọ dọ nutogbẹ̀ lẹ ma yin didá podọ e ma yin dandan nado setonuna ẹn. Mẹdevo lẹ nọ dọ dọ e ma nọ hò mítọn pọ́n podọ ewọ wẹ nọ hẹn yajiji wá. Omẹ enẹlẹ to masin kọ̀n dọ oyín Jiwheyẹwhe tọn go. Ṣigba yé ma na wàmọ kakadoi. Jiwheyẹwhe na và yé sudo.—Hia Psalm 83:17, 18.

Jehovah na pagigona yinkọ etọn to whenue Ahọluduta etọn na hẹn opodo wá na gandudu gbẹtọvi tọn lẹpo bo na gọ̀ jijọho po hihọ́ po wá aigba ji. (Daniẹli 2:44) To madẹnmẹ, mẹlẹpo na wá yọnẹn dọ Jehovah wẹ Jiwheyẹwhe nugbo lọ.—Hia Ezekiẹli 36:23; Matiu 6:9.

Etẹwẹ hiẹ dona wà? Dọnsẹpọ Jiwheyẹwhe gbọn Ohó etọn pinplọn po gbẹdido hẹ mẹhe yiwanna ẹn lẹ po dali. To whenue Jehovah na pagigona yinkọ etọn, e na flin devizọnwatọ nugbonọ etọn lẹ.—Malaki 3:16.

Na nudọnamẹ dogọ, pọ́n weta 1 owe ehe Etẹwẹ Biblu Plọn Mí Taun tọn, he Kunnudetọ Jehovah tọn lẹ zinjẹgbonu.

[Yẹdide to weda 26]

Yinkọ Jiwheyẹwhe tọn to alọnuwe-hihia Heblugbe dowhenu tọn mẹ