Nawẹ A Sọgan Nọgbẹ̀ po Akuẹ Vude po Gbọn?
Nawẹ A Sọgan Nọgbẹ̀ po Akuẹ Vude po Gbọn?
OBED tindo visunnu awe. E wazọ́n na owhe ao to hotẹli nukundeji de to tòhò Aflika tọn de mẹ, podọ e ma nọ vẹawuna ẹn paali nado penukundo nuhudo whẹndo etọn tọn lẹ go. Sọn ojlẹ de mẹ jẹ devo mẹ, e tlẹ nọ tọ́nwhẹ̀n po whẹndo etọn po yì kanlinpọntẹn otò etọn tọn lẹ mẹ. Ṣigba, enẹ lẹpo doalọte to whenue ahisinọ hotẹli lọ tọn lẹ jẹ didepo ji bọ azọ́n gble do e.
Stephen wazọ́n na owhe 22 linlán to akuẹsẹdotẹn daho de bo wá lẹzun dopo to ogán azọ́nwhé lọ tọn lẹ mẹ. Enẹwutu, azọ́nwhé lọ họ̀ owhe daho de na ẹn, yí mọto dopo gọna azọ́nwatọ whégbè tọn lẹ na ẹn bosọ ze ovi etọn lẹ do wehọ dahodaho lẹ mẹ. Ṣigba, to whenue azọ́nwhé lọ jẹ tito etọn lẹ vọ́ basi ji, azọ́n gble do Stephen. Nuhe e dọ die: “Yẹn po whẹndo ṣie po jẹflumẹ taun. Apọṣi mi bọ n’nọ to adidu bosọ nọ hanú.”
To egbehe, enẹ nọ jọ do mẹsusu go. Doyiyi akuẹzinzan tọn he tin lẹdo aihọn pé zọ́n bọ azọ́n ko gble do gbẹtọ livi susu he tindo agbasazọ́n he pekuẹ lẹ. Susu yetọn wẹ gbọ bo kẹalọyi azọ́n he ma pekuẹ sọmọ lẹ podọ to ojlẹ dopolọ mẹ yé sọ dona diahi hẹ ahivivẹ nulẹ tọn. Otò depope ma vò sọn nuhahun he doyiyi akuẹzinzan tọn nọ hẹnwa lẹ si.
Yí Nuyọnẹn Zan
Hiẹ sọgan jẹflumẹ eyin azọ́n gble do we kavi hiẹ masọ nọ mọ akuẹ di dai ba. Nugbo wẹ dọ mẹdepope ma sọgan dapana nuhe nọ hẹnmẹ gbọjọ lẹ mlẹnmlẹn. Ṣigba dawe nuyọnẹntọ de dọ to gbèdopo dọmọ: “Eyin nuṣikọna we to azán nukunbibia tọn gbè, huhlọn towe ma sọtẹ́n gba.” (Howhinwhẹn lẹ 24:10) Kakati nado dike ayiha towe ni gbàdo na ninọmẹ akuẹzinzan tọn towe diọ wutu, e na yọ́n hugan dọ hiẹ ni lẹhlan Ohó Jiwheyẹwhe tọn nado mọ “nuyọnẹn” yí.—Howhinwhẹn lẹ 2:7.
Biblu ma yin anademẹwe akuẹzinzan tọn, ṣigba ayinamẹ yọ́n-na-yizan etọn do whẹho enẹ ji lẹ ko gọalọna gbẹtọ livi susu lẹdo aihọn pé. Mì gbọ mí ni gbadopọnna nunọwhinnusẹ́n tangan Biblu tọn delẹ do whẹho enẹ ji.
Basi tito akuẹzinzan tọn. Lẹnnupọndo hogbe Jesu tọn he tin to Luku 14:28 mẹ lẹ ji dọmọ: “Mẹnu to mì mẹ wẹ na jlo nado gbá atọ̀họ̀ de he ma na sinai bo lẹn akuẹ etọn whẹ́, nado pọ́n eyin e tindo nuhe pé nado dotana ẹn?” Nunọwhinnusẹ́n enẹ yíyí-do-yizan mẹ na biọ dọ hiẹ ni basi tito do lehe hiẹ na zan akuẹ towe do ji bosọ tẹdo tito enẹ go. Ṣigba, sọgbe hẹ nuhe Obed dọ, mọwiwà sọgan nọma bọawu. E dọmọ: “Whẹpo azọ́n do gble do mi, mí tindo aṣa nado nọ họ̀ nususu he ma yin dandan tọn to nusatẹn dahodaho lẹ. Na akuẹ tin bọ mí sọgan họ̀ nudepope he jlo mí wutu, mí ma nọ basi tito depope gando akuẹzinzan mítọn lẹ go.” Tito-bibasi jẹnukọn do lehe hiẹ na zan akuẹ pẹẹde he a tindo do ji na gọalọna we nado penukundo nuhudo tangan whẹndo towe tọn lẹ go.
Diọada. E ma nọ bọawu nado diọada bo wá nọgbẹ̀ po akuẹ pẹvide po, ṣigba nuyọnẹnnu wẹ nado wàmọ. Howhinwhẹn Biblu tọn de dọmọ: “Omẹ zinzin ko mọ oylan donukọn, bo yí ede whlá.” (Howhinwhẹn lẹ 22:3) Stephen dọmọ: “Nado de akuẹzinzan pò, yẹn po whẹndo ṣie po gbọ bo sẹtẹn yì owhe mítọn titi gbè dile etlẹ yindọ mí ma ko fó e bọ e masọ klo sọ dehe mẹ mí nọ dai. Mí de ovi mítọn lẹ sọn wehọ dahodaho he mẹ yé tin te lẹ bo ze yé do wehọ he nọ plọnnumẹ ganji bo ma vẹakuẹ lẹ mẹ.”
Hodọdopọ dagbe hẹ whẹndo towe yin nujọnu eyin vivẹnudido towe lẹ nado diọada na pà we. Austin he wazọ́n to akuẹsẹdotẹn de na owhe ṣinẹnẹ whẹpo azọ́n do gble do e dọmọ: “Yẹn po asi ṣie po sinai bo basi kandai nuhe sin hudo mí tindo taun lẹ tọn. Mí wá mọdọ mí masọ dona nọ zan akuẹ mítọn do núdùdù he vẹahi lẹ, whẹ̀ntintọ́n he nọ biọ akuẹ susu lẹ po avọ̀ yọyọ he ma yin dandan tọn lẹ po mẹ ba. Homẹ ṣie hùn dọ whẹndo ṣie kọngbedopọ hẹ mi to ojlẹ diọdo tọn enẹ lẹpo mẹ.” E sọgan nọma bọawuna ovi pẹvi lẹ nado mọnukunnujẹ nuhewutu e do yin dandan nado basi diọdo enẹlẹ mẹ to gigọ́ mẹ, ṣigba taidi mẹjitọ lẹ, mì sọgan gọalọna yé nado mọnukunnujẹemẹ.
Wleawufo nado kẹalọyi azọ́n he a mọ. Eyin azọ́n wesetọ tọn wẹ hiẹ nọ wà dai, e sọgan vẹawuna we nado kẹalọyi alọnuzọ́n de todin. Austin dọ dọ: “Na ogántẹn he mẹ n’ko nọ dai lẹ wutu, e vẹawuna mi taun nado kẹalọyi alọnuzọ́n he n’mọ lẹ.” E bọawu taun nado mọnukunnujẹ pọndohlan enẹ mẹ, na Biblu dọ to Howhinwhẹn lẹ 29:25 mẹ dọmọ: “Obu gbẹtọ tọn wẹ nọ hẹn omọ̀ wá.” Ṣigba, nulinlẹnpọn mapote do nuhe mẹdevo lẹ sọgan lẹn ji ma na hẹn akuẹ wá na we nado penukundo whẹndo towe go. Eyin mọ wẹ, etẹwẹ sọgan gọalọna we nado duto pọndohlan agọ̀ enẹ ji?
Whiwhẹ yin nujọnu. To whenue azọ́n gble do Obed to fie e nọ wazọ́n te dai, azọ́nwatọgbẹ́ hoho etọn de he tindo azọ́nwhé he nọ jla ohún do de basi oylọna ẹn nado wá wazọ́n hẹ ẹ. Azọ́n lọ biọ dọ ewọ ni nọ zọ̀nafọ gbọn ali afínfínnọ lẹ ji sọyi fidindẹn lẹ nado họ̀ osẹ̀n po nuhe gando mọto go devo lẹ po. Obed dọmọ: “N’ma yiwanna azọ́n lọ sọmọ, ṣigba n’dona doakọnna ninọmẹ lọ. Dile etlẹ yindọ sunmẹ-kuẹ he n’nọ mọ todin whè hugan mado-ẹnẹ dehe n’nọ mọ dai tọn, whiwhẹ gọalọna mi nado kẹalọyi azọ́n enẹ, podọ enẹ zọ́n bọ n’sọgan penukundo nuhudo whẹndo ṣie tọn lẹ go.” Be e ma yin apajlẹ dagbe he hiẹ sọgan hodo de niyẹn ya?
Nọ tindo pekọ. Mẹhe tindo pekọ nọ mọ ayajẹ to ninọmẹ etọn mẹ podọ onú pẹẹde he e tindo nọ pé e. Eyin hiẹ tindo nuhahun sinsinyẹn akuẹ tọn, e sọgan vẹawuna we nado kẹalọyi pọndohlan ehe. Ṣigba, lẹnnupọndo nuhe apọsteli Paulu, mẹdehlan de he mọ ede to ninọmẹ matindo tọn mẹ whlasusu dọ ji. E dọmọ: “Yẹn ko plọn nado tindo pekọ mahopọnna ninọmẹ depope he mẹ yẹn tin te. Na nugbo tọn, yẹn yọ́n lehe yẹn sọgan nọgbẹ̀ po onú vude po do, na nugbo tọn, yẹn yọ́n lehe yẹn sọgan nọgbẹ̀ po onú susugege po do.”—Filippinu lẹ 4:11, 12.
Po lehe ogbẹ̀ to didiọ do po to egbé, onú sọgan gble do mẹhe tlẹ tindo alọnu. Nulinlẹnpọn do ayinamẹ gbọdo Paulu tọn ji sọgan gọalọna mí nado pehẹ ninọmẹ mọnkọtọn, na e wlan dọmọ: “Nugbo wẹ dọ e nọ hẹn ale daho wá, eyin mẹdezejo na Jiwheyẹwhe ehe yin tintindo to pọmẹ po pekọ po. Enẹwutu, eyin mí tindo núdùdù, avọ̀ po adọtẹn po, onú ehelẹ na pekọna mí.” Paulu ma to didọ dọ mí ni yin adidọnọ gba, ṣigba dọ mí ni tindo pọndohlan jlẹkaji tọn gando nuhudo mítọn lẹ go.—1 Timoti 6:6, 8.
Nuhe Ji Ayajẹ Nujọnu Tọn Sinai Do
Ayajẹ nujọnu tọn ma sinai do nuhe jlo mí lẹpo bibẹpli kavi gbẹzan fẹẹmẹninọ tọn zinzan ji gba. Jesu lọsu wẹ dọmọ: “Ayajẹ sù to nunamẹ mẹ hú to mimọyi mẹ.” Na nugbo tọn, nado yí nuhe mí tindo lẹ do gọalọna mẹdevo lẹ bo yin asisa tulinamẹ tọn na yé ji wẹ ayajẹ nujọnu tọn sinai do.—Owalọ lẹ 20:35.
Jehovah Jiwheyẹwhe he yin Mẹdatọ mítọn yọ́n nuhudo mítọn lẹpo to gigọ́ mẹ. To Ohó etọn Biblu mẹ, e wleawuna ayinamẹ dagbe lẹ he ko gọalọna mẹsusu nado hẹn gbẹzan yetọn pọnte bo mọ pọngbọ sọn magbọjẹ yetọn lẹ mẹ. Nugbo wẹ dọ ayinamẹ Biblu tọn lẹ hihodo ma na de nuhahun akuẹ tọn towe lẹ sẹ̀ to azọ́njiawu-liho. Amọ́ Jesu na jide mẹhe “zindonukọn nado to ahọluduta lọ po dodowiwa [Jiwheyẹwhe tọn] po dín whẹ́” lẹ dọ nuhe yé tindo nuhudo etọn egbesọegbesọ lẹpo wẹ na yin yíyí na yé.—Matiu 6:33.
