Plọnnu Sọn Ohó Jiwheyẹwhe Tọn Mẹ

Nawẹ Nudida Gbigbọnọ lẹ Nọ Yinuwado Mí Ji Gbọn?

Hosọ ehe fọ́n kanbiọ he hiẹ sọgan ko nọ kanse lẹ dote bo do fihe hiẹ sọgan mọ gblọndo lọ lẹ te to Biblu mẹ hia. Homẹ Kunnudetọ Jehovah tọn lẹ tọn na hùn nado dọhodopọ hẹ we do gblọndo ehelẹ ji.

1. Mẹnu wẹ angẹli lẹ yin?

Angẹli lẹ yin nudida gbigbọnọ lẹ he nọ nọ̀ olọn mẹ. Yé yin wunmẹ ogbẹ̀ tọn he yiaga hugan gbẹtọvi lẹ tọn. Jiwheyẹwhe nugbo lọ lọsu yin gbigbọ de, podọ e dá angẹli lẹ whẹpo do dá aigba. (Job 38:4, 7; Matiu 18:10) Angẹli nugbonọ livi susu lẹ wẹ lẹdo Jehovah.—Hia Psalm 103:20, 21; Daniẹli 7:9, 10.

2. Be angẹli lẹ nọ gọalọna gbẹtọvi lẹ ya?

Angẹli lẹ gọalọna dawe dodonọ de he nọ yin Lọti. E nọgbẹ̀ to tòdaho he Jiwheyẹwhe magbe nado vasudo de mẹ, na ylanwiwa tòmẹnu lọ lẹ tọn wutu. Angẹli awe na avase Lọti po whẹndo etọn po nado họnyi. Mẹdelẹ mọdọ fànfún wẹ avase lọ yin bo dovọ́na ẹn. Ṣigba Lọti po viyọnnu etọn lẹ po yin whinwhlẹngán na yé setonuna avase he Jiwheyẹwhe na gbọn angẹli lẹ gblamẹ lọ wutu.—Hia Gẹnẹsisi 19:1, 13-17, 26.

Biblu dohia dọ angẹli lẹ to alọgọna gbẹtọvi lẹ to egbehe gbọn anadidena mẹhe to wẹndagbe Ahọluduta Jiwheyẹwhe tọn lá po nugbonọ-yinyin po lẹ dali. (Matiu 24:14) Wẹndagbe lọ bẹ avase de hẹn. Taidi avase he yin nina Lọti, e ma dona yin pinpọn di fànfún. Jiwheyẹwhe wẹ na avase enẹ gbọn angẹli lẹ gblamẹ.—Hia Osọhia 1:1; 14:6, 7.

Jiwheyẹwhe sọgan yí angẹli lẹ zan nado hẹn mí lodo eyin mí pehẹ whlepọn lẹ. E yí angẹli de zan nado na hẹn Jesu lodo.—Hia Luku 22:41-43.

To madẹnmẹ Jiwheyẹwhe na yí angẹli lẹ zan to aliho devo mẹ—enẹ wẹ nado de mẹylankan he nọ hẹn yajiji wá lẹ sẹ̀. Enẹ na hẹn kọgbọ ayajẹ tọn wá na gbẹtọvi lẹ.—Hia 2 Tẹsalonikanu lẹ 1:6-8.

 3. Nawẹ aovi lẹ nọ yinuwado mí ji gbọn?

Kẹdẹdile mẹsusu yinuwa po kanyinylan po to aigba ji gbọn tolivivẹ na Jiwheyẹwhe dali do, mọdopolọ wẹ angẹli susu to olọn mẹ ṣiatẹ sọta Jiwheyẹwhe do niyẹn. (2 Pita 2:4) Angẹli tolivẹtọ lẹ nọ yin yiylọdọ aovi lẹ. Mẹhe yin tọ́ntlọ́ngbọ́n to yé mẹ wẹ Satani Lẹgba. Satani po aovi etọn lẹ po to gbẹtọvi lẹ klọ.—Hia Osọhia 12:9.

Satani nọ yí ajọwiwa he ma sọgbe lẹ, gandudu gbẹtọvi tọn lẹ po sinsẹ̀n lalo lẹ po zan nado klọ gbẹtọ lẹ podọ nado gọkọna yé sọn Jiwheyẹwhe dè. Enẹwutu, Satani wẹ yin adọ̀ whẹdida mawadodo, danuwiwa po yajiji he to yasana gbẹtọvi lẹ po tọn.—Hia 1 Johanu 5:19.

4. Nawẹ aovi lẹ nọ klọ gbẹtọvi lẹ gbọn?

Satani ko klọ mẹsusu gbọn pinplọn yé dọ oṣiọ lẹ nọ lẹzun gbigbọ he sọgan dọho hẹ yé dali. Ṣigba Biblu dọ dọ oṣiọ lẹ ma sọgan wà nudepope. (Yẹwhehodọtọ 9:5) Etomọṣo, aovi lẹ nọ saba klọ gbẹtọ lẹ gbọn ogbè mẹyiwanna yetọn he ko kú lẹ tọn yiyizan dali. (Isaia 8:19) Yé nọ klọ mẹdevo lẹ gbọn afinyọnnuwatọ lẹ, dọṣẹdọtọ lẹ po sunwhlẹvu-pọntọ lẹ po gblamẹ. Ohó Jiwheyẹwhe tọn na mí avase nado dapana nuyiwa enẹlẹ. Enẹwutu, mí dona bẹ nutindo mítọn depope he tindo kanṣiṣa hẹ aovi lẹ po afinyọnnuwiwa po dlan.—Hia Deutelonomi 18:10, 11; Owalọ lẹ 19:19.

Eyin mí yiwanna Jehovah, mí ma dona nọ dibuna aovi lẹ. Gbọn Ohó Jiwheyẹwhe tọn pinplọn po nuhe e dọ lẹ wiwà po dali, mí nọ diọnukunsọ Lẹgba bo nọ dọnsẹpọ Jiwheyẹwhe. Jehovah tindo huhlọn hugan aovi lẹ. Angẹli nugbonọ etọn lẹ sọgan hẹn mí lodo to whenue mí to nuhudo mẹ.—Hia Psalm 34:7; Jakọbu 4:7, 8.

Na nudọnamẹ dogọ, pọ́n weta 10tọ owe Etẹwẹ Biblu Plọn MÍ Taun? tọn, he Kunnudetọ Jehovah tọn lẹ zinjẹgbonu.