Linlinnamẹwe he hia a te ehe ko to yinyin zinzinjẹgbonu sọn juillet 1879 gbọ́n. Nususu ko diọ sọn whenẹnu podọ linlinnamẹwe ehe lọsu ko diọ whlasusu. (Pọ́n yẹdide he to aga lẹ.) Bẹsọn zinjẹgbonu ehe ji, hiẹ nasọ doayi diọdo devo lẹ go gando Atọ̀họ̀-Nuhihọ́ lọ Tọn go. Etẹlẹ wẹ diọ?

To otò susu mẹ, mẹsusu wẹ yiwanna nado nọ dín nudọnamẹ lẹ to Internet ji. Po awubibọ po, yé sọgan mọ nudọnamẹ susu lẹ he ma tin to fidevo depope adavo to Internet ji. Owe po linlinwe susu lẹ po wẹ sọgan yin hihia to Internet ji.

Enẹwutu to agọe, mí vọ́ nọtẹn Internet tọn mítọn www.pr418.com jlado, na e nido dọnmẹdogo dogọ bosọ bọawu nado yin yiyizan. Mẹhe nọ yì nọtẹn Internet tọn lọ ji lẹ sọgan hia owe he yin zinzinjẹgbonu to ogbè 430 linlán mẹ. Ṣigba bẹsọn osun ehe mẹ, hosọ he nọ yin zinzinjẹgbonu to linlinnamẹwe mítọn lẹ mẹ delẹ na nọ sọawuhia to nọtẹn Internet tọn mítọn kẹdẹ ji. a

Na hosọ susu na nọ yin didetọn to nọtẹn Internet tọn mítọn ji wutu, bẹsọn zinjẹgbonu ehe ji, Atọ̀họ̀-Nuhihọ́ lọ Tọn gbonutọ lẹ tọn ma nasọ tindo weda 32 ba, ṣigba weda 16. To alọnu din, Atọ̀họ̀-Nuhihọ́ lọ Tọn nọ yin lilẹdo ogbè voovo 195 mẹ. Todin he weda linlinnamẹwe ehe tọn lẹ ko depò, e yọnbasi dọ e ni yin lilẹdo ogbè susu devo lẹ mẹ dogọ.

Todido mítọn wẹ yindọ diọdo ehelẹ na gọalọna mí nado hẹn owẹ̀n gbẹwhlẹngán tọn he tin to Biblu mẹ jẹ gbẹtọ susu dè dogọ. Gbemima mítọn wẹ nado nọ wleawuna nudọnamẹ họakuẹ he dọnmẹdogo lẹ to owe mítọn lẹ mẹ podọ to nọtẹn Internet tọn mítọn ji, nado hẹn ale wá na wehiatọ mítọn he yiwanna Biblu bo jlo na yọ́n nuhe e plọn mí taun lẹ.

Zinjẹgbonutọ lẹ