Biblu Nọ Diọ Gbẹzan Mẹtọn

“Yé jlo dọ yẹnlọsu ni dindona nuhe Biblu plọnmẹ taun”

Dile e yin didọ gbọn Luis Alifonso dali

OWHE HE MẸ N’YIN JIJI: 1982

OTÒ HE MẸ N’WÁ SỌN: RÉPUBLIQUE DOMINICAINE

OTÀN ṢIE: N’YIN PINPLỌN WHẸ́N TO SINSẸ̀N MORMON TỌN MẸ

NUHE N’YIN DAI: N’yin jiji to Saint-Domingue, République dominicaine, bo yin pòdevi to ovi ẹnẹ he mẹjitọ ṣie lẹ ji mẹ. Mẹjitọ ṣie lẹ sewé taun podọ yé jlo na plọn ovi yetọn lẹ whẹ́n to gbẹtọ walọ dagbenọ lẹ ṣẹnṣẹn. Owhe ẹnẹ jẹnukọnna jiji ṣie, mẹjitọ ṣie lẹ dukosọ hẹ mẹdehlan sinsẹ̀n Mormon tọn lẹ. Na nusisọ́ po walọ dagbe jọja sinsẹ̀n lọ tọn lẹ po tọn yinuwado mẹjitọ ṣie lẹ ji wutu, e ma dẹn bọ yé basi dide dọ whẹndo mítọn na yin dopo to whẹndo tintan he na kọnawudopọ hẹ Église de Jésus-Christ des saints des derniers jours kavi Ṣọṣi Mormon tọn lẹ mẹ to République dominicaine.

Dile n’to whinwhẹ́n, n’nọ duvivi ayidedai lẹ tọn to ṣọṣi mẹ bosọ nọ na sisi nuplọnmẹ sinsẹ̀n Mormon tọn gando whẹndo po nujinọtedo walọ dagbe tọn lẹ po go. N’nọ doawagun dọ n’tin to sinsẹ̀n Mormon tọn mẹ podọ yanwle ṣie wẹ nado lẹzun mẹdehlan sinsẹ̀n lọ tọn de.

To whenue n’tindo owhe 18, whẹndo mítọn sẹtẹn yì États-Unis po linlẹn lọ po dọ enẹ na hùn dotẹnmẹ dote na mi nado yì wehọmẹ alavọ tọn dagbe de. To nudi owhe dopo godo, nafẹ ṣie po asu etọn po he yin Kunnudetọ Jehovah tọn lẹ wá dla mí pọ́n to Floride. Yé basi oylọna mí nado hodo yé yì plidopọ agbegbe tọn de. Nuhe yinuwado ji e to finẹ wẹ yindọ mẹhe lẹdo mi lẹpo nọ hùn Biblu yetọn bo nọ hodo hodọtọ lọ dile e to wefọ lẹ hia bosọ nọ basi kandai kleun kleun lẹ. Enẹwutu, n’biọ wekantin de po wema po nado sọgan wà nudopolọ.

To plidopọ lọ godo, nafẹ ṣie po asu etọn po dọna mi dọ yé sọgan gọalọna mi nado plọn Biblu to whenuena e yindọ n’tindo ojlo nado lẹzun mẹdehlan. N’mọdọ linlẹn enẹ sọgbe, na to ojlẹ lọ mẹ, n’jẹakọ hẹ Owe Mormon tọn hugan Biblu.

LEHE BIBLU DIỌ GBẸZAN ṢIE DO: Eyin n’to hodọdopọ hẹ nafẹ ṣie po asu etọn po do Biblu ji to alokan ji, yé nọ dotuhomẹna mi to whelẹponu nado yí nuyise ṣie lẹ jlẹdo nuplọnmẹ Biblu tọn lẹ go. Yé jlo dọ yẹnlọsu ni dindona nuhe Biblu plọnmẹ taun.

 Nususu wẹ n’kẹalọyi to nuyise sinsẹ̀n Mormon tọn lẹ mẹ, ṣigba n’ma yọnẹn eyin Owe-wiwe lẹ nọgodona nuyise enẹlẹ. Nafẹ ṣie do vọkan Réveillez-vous! 8 novembre 1995 tọn he Kunnudetọ Jehovah tọn lẹ zinjẹgbonu dopo hlan mi, ehe hosọ etọn delẹ dọhodo nuyise sinsẹ̀n Mormon tọn lẹ ji. N’wá mọdọ n’ma tlẹ jẹakọ hẹ nuplọnmẹ sinsẹ̀n Mormon tọn lẹ ganji dai. Enẹ whàn mi nado basi dodinnanu to nọtẹn Intẹnẹt tọn sinsẹ̀n Mormon tọn ji nado dindona eyin nuhe yin didọ to Réveillez-vous! lọ mẹ lẹ yin nugbo. N’mọdọ nuhe owe lọ dọ lẹ yin nugbo, podọ nugbo enẹlẹ sọ họnwun dogọ to whenue n’yì dla onú hoho-sẹdotẹn sinsẹ̀n Mormon tọn pọ́n to Utah.

N’ma lẹn pọ́n gbede dọ Owe Mormon tọn sọgan jẹagọdo Biblu. Ṣigba, to whenue n’jẹ Biblu hia ji po sọwhiwhe po, n’doayi e go dọ nuplọnmẹ sinsẹ̀n Mormon tọn lẹ jẹagọdo nuhe yin didọ to Biblu mẹ lẹ. Di apajlẹ, Biblu dọ to Ezekiẹli 18:4 mẹ dọ alindọn nọ kú. Ṣigba, Owe Mormon tọn dọ to Alma 42:9 mẹ dọmọ: “Alindọn ma sọgan kú pọ́n gbede.”

Gbọnvona dọ nuplọnmẹ owe awe ehelẹ tọn jẹagọdo yede, nudevo he paṣa mi wẹ yindọ Mormon lẹ nọ plọnmẹ nado yiwanna akọta mẹtọn. Di apajlẹ, Mormon lẹ yise dọ Comté de Jackson to Missouri, États-Unis wẹ jipa Edẹni tọn nọ dai. Podọ nukọntọ ṣọṣi lọ tọn lẹ plọnmẹ dọ to whenue “Ahọluduta Jiwheyẹwhe tọn na jẹ gandu ji, gandudu États-Unis tọn wẹ e na yizan nado dugán do aigba blebu ji.”

Nuhe nọ duahunmẹna mi wẹ yin nuhe Mormon lẹ nọ plọnmẹ dọ e na jọ do otò devo lẹ taidi otò he mẹ n’yin jiji te go. To whèjai gbèdopo, n’fọ́n whẹho ehe dote to whenue n’to hodọdopọ to alokan ji hẹ jọja Mormon de he to azọ́nplọnmẹ mọyi nado lẹzun mẹdehlan. N’kanse e tlọlọ eyin e na yigbe nado hoavùn hẹ hagbẹ sinsẹ̀n Mormon tọn devo lẹ to whenue otò yetọn na to awhànfun hẹ otò etọn. E paṣa mi to whenue e dọ mọwẹ! N’basi dodinnanu dogọ gando nuplọnmẹ sinsẹ̀n ṣie tọn lẹ go bosọ dọho hẹ nukọntọ Ṣọṣi Mormon tọn he go yè sọgan dejido lẹ. Yé dọna mi dọ gblọndo kanbiọ ṣie lẹ tọn bẹ nudabla lẹ hẹn, ehe na wá họnwun to gbèdopo dile hinhọ́n lọ na to wunhọ́n dogọ.

Gblọndo yetọn hẹn mi jẹflumẹ, enẹwutu n’lẹnnupọn sisosiso do dee po nuhewutu n’jlo na lẹzun mẹdehlan sinsẹ̀n Mormon tọn po ji. N’mọdọ nado nọ gọalọna mẹdevo lẹ wutu wẹ n’do jlo na lẹzun mẹdehlan de. Whẹwhinwhẹ́n devo wẹ yindọ n’jlo nado mọ sisi he nọ yin nina mẹdehlan lẹ yí. Ṣigba, n’ma yọ́n nususu gando Jiwheyẹwhe go. Dile etlẹ yindọ n’ko gbadopọnna Biblu whlasusu to ojlẹ he wayi lẹ mẹ, na nugbo tọn, n’ma yọ́n nuhọakuẹ nuhe e plọnmẹ lẹ tọn. N’ma yọ́n nudepope gando lẹndai Jiwheyẹwhe tọn na aigba kavi na gbẹtọvi lẹ go.

ALE HE N’MỌYI LẸ: To Biblu pinplọn hẹ Kunnudetọ Jehovah tọn lẹ whenu, nuhe n’plọn delẹ wẹ, yinkọ Jiwheyẹwhe tọn, nuhe nọ jọ do mí go to whenue mí kú po azọngban Jesu tọn to lẹndai Jiwheyẹwhe tọn hinhẹndi mẹ po. To godo mẹ, n’wá jẹakọ hẹ owe vonọtaun ehe, podọ homẹ ṣie nọ hùn nado má nugbo he n’to pinplọn lẹ hẹ mẹdevo lẹ. N’yọnẹn ganji dọ Jiwheyẹwhe tin, ṣigba todin n’sọgan dọho hẹ ewọ to odẹ̀ mẹ taidi Họntọn ṣie vivẹ́. N’yí baptẹm taidi dopo to Kunnudetọ Jehovah tọn lẹ mẹ to 12 juillet 2004, podọ to osun ṣidopo godo n’biọ sinsẹ̀nzọn whenu-gigọ́ tọn mẹ.

N’wazọ́n na owhe atọ́n to tatọ́-tẹnnọ Kunnudetọ Jehovah tọn lẹ tọn to Brooklyn, New York. Homẹ ṣie hùn taun dọ n’tindo lẹblanulọkẹyi nado gọalọ to fihe yè nọ zín Biblu po owe sinai do Biblu ji he nọ hẹn ale wá na gbẹtọ livi susu lẹdo aihọn pé te, podọ alọgigọna mẹdevo lẹ nado plọnnu gando Jiwheyẹwhe go gbẹ́ nọ hẹn ayajẹ wá na mi.