Be A Sọgan Dejido Sinsẹ̀n Go Na Nuhe Dù Akuẹ Ya?
Be A Sọgan Dejido Sinsẹ̀n Go Na Nuhe Dù Akuẹ Ya?
Estelle a yin ṣọṣi-yitọ gbesisọnọ de he tindo ovi susu. E dọmọ: “N’dọna sinsẹ̀ngán mítọn dọ n’jlo na plọn Biblu.” Amọ́, e ma basi tito gbede nado plọnnu in. To godo mẹ, Estelle jo ṣọṣi yìyì do. E yidogọ dọmọ: “Ṣọṣi-gán lọ lẹ kanwehlan mi dọ eyin n’ma tlẹ sọgan wá, ma saa nọ do akuẹ ṣie hlan. N’lẹn to dee mẹ dọ, ‘Ṣọṣi gingọ̀n ṣie ma tlẹ dọ nude na yé, akuẹ ṣie dín wẹ yé te.’”
Angelina he yin sinsẹ̀nnọ akonka de dọmọ: “To ṣọṣi ṣie mẹ, yé nọ ze ohà gbọn nukọnna mí whla atọ̀n to amísa dopodopo whenu, podọ yé nọ donukun dọ mí dona na akuẹ to whedepopenu he yé ze ohà lọ gbọn nukọnna mí. Akuẹ janwẹ yé nọ to bibiọ. N’wá mọdọ gbigbọ Jiwheyẹwhe tọn ma tin hẹ yé.”
Be sinsẹ̀n he tin to lẹdo towe mẹ lẹ nọ biọ akuẹ tlọlọ kavi nọ zan ayiha wintinwintin nado ṣinyan akuẹ wẹ ya? Be Biblu kẹalọyi enẹ ya?
ETẸWẸ BIBLU PLỌN MÍ?
Jesu, he yin dowatọ sinsẹ̀n Klistiani tọn, dọmọ: “Vọnu wẹ mì mọyi, vọnu wẹ mì ni namẹ.” (Matiu 10:8) Akuẹ ma sọgan họ̀ owẹ̀n Biblu tọn, podọ e dona tin-to-aimẹ na mẹdepope he jlo.
Nawẹ agun Klistiani dowhenu tọn nọ penukundo whẹho akuẹ tọn lẹ go gbọn?
Mẹdopodopo nọ basi nunina “kẹdẹdile e ko magbe etọn to ahun etọn mẹ do, e ma yin po awuwhiwhle po kavi po huhlọn yí do hẹnmẹ po gba, na Jiwheyẹwhe nọ yiwanna nunamẹtọ homẹhunnọ.” (2 Kọlintinu lẹ 9:7) Apọsteli Paulu dọmọ: “Gbọn azọ́nwiwa to ozán po okle po dali wẹ mí dọyẹwheho wẹndagbe . . . tọn.” (1 Tẹsalonikanu lẹ 2:9) Paulu wazọ́n taidi gòhọ-gbátọ nado sọgan penukundo ede go bo zindonukọn to yẹwhehodidọ etọn mẹ.—Owalọ lẹ 18:2, 3.
NAWẸ KUNNUDETỌ JEHOVAH TỌN LẸ NỌ YINUWA GBỌN?
To paa mẹ, Kunnudetọ Jehovah tọn lẹ nọ pli to ohọ̀ he to jlẹkaji lẹ mẹ, he nọ yin yiylọdọ Plitẹnhọ Ahọluduta tọn. Nawẹ yé nọ mọ akuẹ he yé nọ zan gbọn? Yé ma nọ ze agbán gbọn nukọn namẹ gbede kavi má wepò lẹ nado biọ akuẹ. Kakatimọ, mẹdepope he yọ́n pinpẹn tito nuplọnmẹ yetọn tọn sọgan desọn ojlo mẹ bo ze akuẹ do apotin nunina tọn he tin to Plitẹnhọ Ahọluduta tọn mẹ.
E họnwun dọ e nọ biọ akuẹzinzan nado de linlinnamẹwe ehe tọ́n bo má ẹn gbọn otò voovo lẹ mẹ. Etomọṣo, a ma na mọ pọ́n gbede bọ yè na basi ajọjijla kavi basi nulila nado biọ akuẹ na linlinnamẹwe ehe; na yanwle lọ wẹ yindọ nugbo Biblu tọn ni gbayipe.
Etẹwẹ a lẹn: Be aliho he mẹ akuẹ nọ yin mimọ te ehe sọgbe hẹ hogbe Jesu tọn lẹ po apajlẹ agun Klistiani dowhenu tọn po tọn ya?
[Nudọnamẹ odò tọn]
a Yinkọ delẹ ko yin didiọ to hosọ debọdo-dego ehelẹ mẹ.
[Nudọnamẹ tangan lẹ to weda 4]
Nawẹ sinsẹ̀n dona nọ mọ akuẹ he e nọ zan gbọn?
