N’yin jiji to lẹdo Bilbao tọn he ma hunnukun sọmọ de mẹ to agewaji Espagne tọn. Yẹn wẹ yin awetọ to viyọnnu ẹnẹ he mẹjitọ ṣie lẹ ji lẹ mẹ. Katoliki akonka wẹ mí yin, podọ egbesọegbesọ wẹ n’nọ yì Amísa. To whenue n’tindo owhe 23, n’lẹzun mẹplọntọ, yèdọ azọ́n de he n’yiwanna taun bo wà na owhe 40. Azọ́n he n’yiwanna hugan to nuhe n’nọ plọnmẹ lẹ mẹ wẹ nado plọnmẹ nuhe gando sinsẹ̀n Katoliki tọn go lẹ. To whèjai lẹ, n’nọ plọnnu viyọnnu he jlo na yí communion lẹ.

To whenue n’ko duvivi alọwle ayajẹnọ de tọn na owhe 12 godo, asu ṣie wá kú bo jo yẹn po viyọnnu ẹnẹ mítọn lẹ po do. Owhe 33 poun wẹ n’tindo to ojlẹ lọ mẹ. N’tẹnpọn nado dín homẹmimiọn to sinsẹ̀n Katoliki tọn he n’nọ yì lọ mẹ, ṣigba kanbiọ delẹ gbẹ́ nọ dotukla mi. N’nọ kanse dee dọ, ‘Eyin Klisti wá whlẹn mí, naegbọn gbẹtọvi lẹ gbẹ́ nọ kú? Eyin mẹdagbe lẹ nọ yì olọn mẹ, naegbọn mí sọ nọ hodẹ̀ dọ Ahọluduta Jiwheyẹwhe tọn ni wá?’ Podọ hú popolẹpo, n’sọ nọ kanse dee dọ: ‘Eyin Jiwheyẹwhe nọ dawhẹna mí to whenue mí kú, naegbọn whẹdida godo tọn nasọ tin na mí to whenue mí ko yì olọn mẹ, lẹwezomẹ kavi zòmẹ godo?’

N’kàn kanbiọ ehelẹ sè yẹwhenọ delẹ. Dopo to yé mẹ gblọn dọmọ: “Yẹnlọsu ma yọnẹn. Yì kanse biṣọpu mítọn. Amọ́, naegbọn enẹ do to ahunmẹduna we? A yí Jiwheyẹwhe sè maa, kavi? Wọnji kanbiọ enẹlẹ go.” Etomọṣo, n’gbẹ́ zindonukọn nado to gblọndo dín na kanbiọ enẹlẹ. To nukọn mẹ, n’yì dotoaina hodidọ Jésuite, Pentecôtiste po Gnostique lẹ po tọn, amọ́ depope to yé mẹ ma na mi gblọndo he sọgbe.

To whenue n’tindo owhe 60, wehọmẹvi yọnnu owhe ṣinawe mẹvi de basi oylọna mi wá opli Kunnudetọ Jehovah tọn lẹ tọn de. Nuhe n’mọ bo sè lẹ jẹ ṣie ji taun, amọ́ na alọnu ṣie nọ ján taun wutu, n’masọ tindo hodọdopọ de hẹ Kunnudetọ lẹ to ojlẹ lọ mẹ ba. To owhe awe godo, Juan po Maite po he yin Kunnudetọ asu po asi po de wá húhúhọ̀n na mi. Na osun atọ̀n, n’kàn kanbiọ sisosiso voovo lẹ sè yé bọ yé na mi gblọndo, podọ enẹ zọ́n bọ n’wá jẹ Biblu plọn hẹ yé ji to godo mẹ.

N’nọ to jejeji na nupinplọn dopodopo. N’nọ yí sọwhiwhe do  dindona nuhe plọn n’te lẹpo gbọn lẹdogbedevomẹ Biblu tọn voovo atọ̀n yiyizan dali nado hẹn ẹn diun dọ nuplọnmẹ Kunnudetọ Jehovah tọn lẹ tọn yin nugbo. To ojlẹ vude godo, n’wá mọnukunnujẹemẹ dọ sinsẹ̀n ko hẹn mi buali na owhe susu. To whenue n’mọ vogbingbọn daho he tin to nuyise ṣie hoho lẹ po nuhe plọn n’te to Biblu mẹ lẹ po ṣẹnṣẹn, n’jẹflumẹ taun. Ninọmẹ lọ ma bọawuna mi paali, na nuyise ṣie hoho lẹ jijodo taidi atin he doadọ̀do taun de hinhọ̀n.

Enẹgodo, asu awetọ he n’dà wá jẹazọ̀n sinsinyẹn bo kú. Diblayin ojlẹ enẹ mẹ wẹ n’biọ gbọjẹ whenu gaa tọn mẹ bo sẹtẹn sọn Bilbao na ojlẹ de. Juan po Maite po lọsu sẹtẹn. E blawu dọ Biblu pinplọn ṣie doalọte. Amọ́, to ahun ṣie mẹ, n’yọnẹn dọ n’ko mọ adọkunnu de. N’ma wọnji enẹ go pọ́n gbede.

To owhe 20 godo, to whenue n’tindo owhe 82, Juan po Maite po lẹkọwa Bilbao, podọ yé wá dla mi pọ́n. Homẹ ṣie hùn taun nado vọ́ yé mọ! N’wá mọdọ Jehovah ma wọn mi, podọ n’gọ̀ jẹ Biblu plọn ji. Mahopọnna dọ n’nọ to kanbiọ dopolọ lẹ vọ́ kanse, Juan po Maite po fahomẹ hẹ mi taun. Na nuyise ṣie tintan lẹ ko doadọ̀do taun to ahun mẹ na mi wutu, yè dona to kunnudenu Biblu tọn he dohia dọ nuplọnmẹ enẹlẹ ma sọgbe lẹ vọ́ dọna mi gbọzangbọzan. Gbọnvona enẹ, n’sọ jlo na pegan mlẹnmlẹn nado sọgan nọ basi zẹẹmẹ nugbo Biblu tọn lẹ tọn na họntọn po hẹnnumẹ ṣie lẹ po.

To whenue n’tindo owhe 87, n’yí baptẹm to plidopọ Kunnudetọ Jehovah tọn lẹ tọn de whenu. Azán enẹ wẹ yin azán ayajẹ tọn hugan to gbẹzan ṣie mẹ. Klistiani he yin mẹho agun tọn de na hodidọ sinai do Biblu ji de he yin awuwlena titengbe na mẹhe jlo na yí baptẹm lẹ. Hodidọ lọ whàn mi sọmọ bọ dasin wayi do mi. N’dotoaina hodidọ lọ taidi dọ Jehovah wẹ to hodọna mi tlọlọ nkọ. To baptẹm ṣie godo, Kunnudetọ susu wẹ wá dọnudo mi dile etlẹ yindọ suhugan yetọn lẹ ma ko yọ́n mi dai.

N’ko yọnẹn dọ Jesu Klisti wẹ “aliho lọ.” (Johanu 14:6) Ṣigba, nuhe n’plọn to Biblu mẹ lẹ gọalọna mi nado wá yọ́n Jehovah, mẹhe dè Jesu nọ deanana mí wá. Todin, n’sọgan hodẹ̀ hlan Jiwheyẹwhe taidi Otọ́ podọ Họntọn vivẹ́ ṣie. Owe Dọnsẹpọ Jehovah * hihia yinuwado ji e taun. Zánto dopo mẹ wẹ n’hia ẹ te whla tintan. Lehe Jehovah yin lẹblanunọ do sọ whàn mi taun.

Eyin n’lẹnnupọndo whenu susu he e yí to asi e nado dín sinsẹ̀n nugbo lọ mọ ji, n’nọ flin hogbe Jesu tọn lẹ dọmọ: “Mì to bibiọ zọnmii, e nasọ yin nina mì; mì to dindin zọnmii, mì nasọ mọ; mì to họ̀nhúhú zọnmii, e nasọ yin hùnhùn hlan mì.” (Matiu 7:7) Todin he n’ko mọ gblọndo na kanbiọ he to ahunmẹduna mi dai lẹ, ayajẹnu daho wẹ e nọ yin na mi nado má nugbo enẹlẹ hẹ mẹdevo lẹ.

Mahopọnna dọ n’ko tindo owhe 90, n’gbẹ́ tindo nususu nado plọn gando Jehovah go. Opli he n’nọ yì to Plitẹnhọ Ahọluduta tọn mẹ lẹpo wẹ nọ yin awuvivinu daho de na mi, na yé nọ hùn dotẹnmẹ dote na mi nado tindo oyọnẹn họakuẹ de podọ nado duvivi owanyi po gbẹdido yisenọ hatọ ṣie lẹ po tọn. Ojlo vẹkuvẹku ṣie wẹ nado yin mẹplọntọ whladopo dogọ to Paladisi aigba ji tọn he Jiwheyẹwhe dopagbe etọn lọ mẹ. (Osọhia 21:3, 4) Na taun tọn, n’to nukọnpọnhlan nado mọ mẹyiwanna ṣie he ko kú lẹ to whenue yé na gọwá ogbẹ̀ bọ n’na tindo dotẹnmẹ hundote lọ nado plọn yé nugbo Biblu tọn. (Owalọ lẹ 24:15) Lehe n’to jejeji nado basi zẹẹmẹ na yé gando nunina họakuẹ he Jehovah na mi to yọnhowhe mẹ lọ go do sọ!