Be a tindo yise to opagbe fọnsọnku tọn he Biblu do lọ mẹ ya? * Na taun tọn, todido lọ nado wá vọ́ nọpọ́ hẹ mẹvivẹ mítọn he ko kú lẹ nọ hẹn homẹhun mí taun. Ṣigba, be e sọgbe hẹ lẹnpọn dagbe nado tindo yise to todido enẹ mẹ ya? Nado mọ gblọndo lọ, e na yọ́n dọ mí ni lẹnnupọndo apajlẹ apọsteli Jesu Klisti tọn lẹ tọn ji.

Apọsteli lẹ kudeji dọ fọnsọnku na tin. Etẹwutu? E whè gbau na whẹwhinwhẹ́n awe wutu. Tintan, nugbo titengbe he ji todido yetọn sinai do wẹ yindọ: Jesu lọsu ko yin finfọn sọn oṣiọ lẹ mẹ. Apọsteli lẹ—gọna “hugan mẹmẹsunnu 500 to ojlẹ dopo mẹ”—mọ Jesu he yin finfọnsọnku lọ. (1 Kọlintinu lẹ 15:6) Humọ, mẹsusu wẹ na kunnudenu bosọ kẹalọyi dọ Jesu yin finfọnsọnku nugbonugbo, dile owe Wẹndagbe tọn ẹnẹ lọ lẹ dohia do.—Matiu 27:62–28:20; Malku 16:1-8; Luku 24:1-53; Johanu 20:1–21:25.

Awetọ, apọsteli lẹ mọ bọ Jesu wà e whè gbau azọ́njiawu fọnsọnku tọn atọ̀n—tintan to Naini, enẹgodo to Kapẹlnaumi, podọ atọ̀ntọ to Bẹtani. (Luku 7:11-17; 8:49-56; Johanu 11:1-44) Fọnsọnku atọ̀ntọ lọ, he ko yin hodọdeji to zinjẹgbonu ehe mẹ, gando whẹndo he Jesu vẹ́ hẹ taun de go. Mì gbọ mí ni dọho yinukọn do nujijọ lọ ji.

“Nọvisunnu towe na fọ́n.” Malta, mẹhe nọvisunnu etọn Lazalọsi kú e ko yì azán ẹnẹ, wẹ Jesu dọ ohó enẹ na. E ma mọnukunnujẹ hogbe Jesu tọn enẹlẹ mẹ to tintan whenu. Enẹwutu, e gblọn dọmọ: “Yẹn yọnẹn dọ e na fọ́n,” na linlẹn etọn wẹ yindọ enẹ na wá jọ to ojlẹ de mẹ. Pọ́n lehe awú na ko ji i do sọ to whenue e sè bọ Jesu dọ dọ, “Yẹn wẹ fọnsọnku po ogbẹ̀ po,” podọ to enẹgodo fọ́n nọvisunnu etọn sọnku!—Johanu 11:23-25.

To whenue Lazalọsi kú, fie wẹ e te to azán ẹnẹ he bọdego lẹ gblamẹ? Lazalọsi ma dọ nudepope he sọgan dohia dọ ewọ yì nọgbẹ̀ to fidevo to azán ẹnẹ enẹlẹ gblamẹ gba. Lazalọsi ma tindo alindọn jọmaku de he yì olọn mẹ. To whenue Jesu fọ́n Lazalọsi sọnku, e ma yin olọn mẹ wẹ Lazalọsi te bo to gbẹdu to Jiwheyẹwhe dè bọ Jesu dọ̀n ẹn wá aigba ji gba. Eyin mọ wẹ, fie wẹ Lazalọsi te na azán ẹnẹ enẹlẹ? Na taun tọn, amlọndọ wẹ e te to yọdò mẹ.—Yẹwhehodọtọ 9:5, 10.

Flindọ Jesu yí okú jlẹdo amlọn go, yèdọ amlọn he mẹ yè sọgan yin finfọn sọn gbọn fọnsọnku dali. Kandai lọ dọmọ: “Họntọn mítọn Lazalọsi mlọnai  damlọn; ṣigba yẹn jei, na yẹn nido fọ́n ẹn sọn amlọn mẹ. Enẹwutu nuplọntọ lẹ dọhlan ẹn, dọ, Oklunọ, eyin e mlọnai damlọn wẹ e na jẹgangan. Ṣigba [okú etọn hodọ wẹ Jesu te]; ṣigba yé lẹndọ e to ohó gbọjẹyíyí to amlọn mẹ tọn dọ wẹ. Whenẹnu Jesu dọhlan yé gbangba lo, dọ, Lazalọsi kú.” (Johanu 11:11-14, Biblu Wiwe lọ—Gun Alada) Gbọn Lazalọsi finfọnsọnku dali, Jesu hẹn ẹn gọwá ogbẹ̀ bo hẹn yọnbasi na ẹn nado nọpọ́ hẹ whẹndo etọn whladopo dogọ. Dagbe nankọ die Jesu wà na whẹndo lọ!

Azọ́njiawu fọnsọnku tọn he Jesu wà to aigba ji lẹ yin ohia kleun nuhe ewọ na wà to sọgodo lẹ tọn taidi Ahọlu Ahọluduta Jiwheyẹwhe tọn. * To whenue gandudu olọn mẹ tọn Jesu tọn na dlẹnkan wá aigba ji, ewọ na fọ́n mẹhe to amlọndọ to yọdò paa gbẹtọvi lẹ tọn mẹ lẹ sọnku. Abajọ e do dọmọ: “Yẹn wẹ fọnsọnku.” Homẹ na hùn we taun nado vọ́ mẹvivẹ towe lẹ mọ! Pọ́n lehe homẹ mẹhe yin finfọnsọnku lẹ tọn lọsu na hùn do sọ!—Luku 8:56.

Jesu dọna Malta dọmọ: “Ewọ he do yise hia to yẹn mẹ, eyin ewọ tlẹ kú, e na gọwá ogbẹ̀; podọ mẹdepope he to ogbẹ̀ bo do yise hia to yẹn mẹ ma na kú pọ́n gbede.” (Johanu 11:25, 26) Mẹhe Jesu na fọ́n do ogbẹ̀ to gandudu owhe fọtọ́n tọn etọn whenu lẹ na nọgbẹ̀ kakadoi—dile e na dẹnsọ bọ yé na to yise nujọnu tọn dohia to ewọ mẹ.

To whenue Jesu ko dọ ohó ayidego tọn ehelẹ do fọnsọnku ji godo, ewọ kàn kanbiọ mẹhẹnlẹnnupọn tọn de sè Malta dọmọ: “‘Be hiẹ yí ehe sè ya?’ Malta gblọnna ẹn dọmọ: ‘Mọwẹ, Oklunọ; yẹn yise dọ hiẹ wẹ Klisti lọ, Visunnu Jiwheyẹwhe tọn.’” (Johanu 11:26, 27) Hiẹ lo—be e ma na jlo we nado wleawuna yise he nkọ Malta tindo to todido fọnsọnku tọn mẹ ya? Afọdide tintan wẹ nado yọ́n lẹndai Jiwheyẹwhe tọn na gbẹtọvi lẹ. (Johanu 17:3; 1 Timoti 2:4) Oyọnẹn enẹ sọgan gọalọna we nado tindo yise. Be e ma na yọ́n dọ hiẹ ni biọ to Kunnudetọ Jehovah tọn lẹ si nado do nuhe Biblu plọnmẹ gando whẹho ehe go hia we ya? Homẹ yetọn na hùn nado dọhodopọ hẹ we gando todido jiawu fọnsọnku tọn go.