Kanbiọ Sinai Do Biblu Ji
Be angẹli lẹ sọgan gọalọna mí ya?
Dile angẹli lẹ gọalọna devizọnwatọ nugbonọ Jiwheyẹwhe tọn Daniẹli do, mọ wẹ yé nọ gọalọna gbẹtọvi lẹ do to egbehenado mọaleyi sọn wẹndagbe lọ mẹ
Jehovah Jiwheyẹwhe dá angẹli livilivi lẹ ojlẹ dindẹn whẹpo do wá dá gbẹtọvi lẹ. (Job 38:4, 7) Angẹli ehelẹ yin nudida gbigbọ tọn lẹ he tindo huhlọn taun bo nọ wadevizọn na Jiwheyẹwhe. To whedelẹnu Jiwheyẹwhe nọ do yé hlan nado deanana omẹ etọn he to aigba ji lẹ podọ nado basi hihọ́na yé. (Psalm 91:10, 11) To egbehe, angẹli lẹ to alọgọna gbẹtọ lẹ nado mọaleyi sọn wẹndagbe he hodotọ Jesu tọn lẹ to lilá lọ mẹ.—Hia Osọhia 14:6, 7.
Be mí dona nọ hodẹ̀ hlan angẹli lẹ nado biọ alọgọ yetọn wẹ ya? Lala. Odẹ̀ yin nuwiwa sinsẹ̀n-bibasi tọn de he Jiwheyẹwhe kẹdẹ jẹna. (Osọhia 19:10) Na angẹli lẹ yin devizọnwatọ Jiwheyẹwhe tọn lẹ wutu, anademẹ etọn lẹ wẹ yé nọ hodo, kakati nido yin gbẹtọvi lẹ tọn. Enẹwutu, Jiwheyẹwhe kẹdẹ wẹ mí dona nọ hodẹ̀ hlan gbọn Jesu gblamẹ.—Hia Psalm 103:20, 21; Matiu 26:53.
Be angẹli ylankan lẹ tin ya?
Taidi gbẹtọvi lẹ, angẹli lẹ lọsu yin didá po nugopipe lọ po nado nọ basi dide nado wà dagbe kavi oylan. Amọ́ e blawu dọ angẹli susu wẹ ṣiatẹ sọta Jiwheyẹwhe. (2 Pita 2:4) Satani wẹ yin angẹli tintan he wàmọ, podọ angẹli devo lẹ hopódona ẹn bo lẹzun aovi lẹ. To ojlẹ mítọn mẹ, Satani po aovi etọn lẹ po yin yinyan sọn olọn mẹ wá aigba ji.—Hia Osọhia 12:7-9.
Kanyinylan po danuwiwa po he fọ́n bo to agayi sọn 1914 dohia dọ Jiwheyẹwhe na doalọtena nuyiwa Satani po aovi etọn lẹ po tọn to madẹnmẹ. Enẹgodo, Jiwheyẹwhe na gọ̀ aigba wá ninọmẹ dagbe mẹ.—Hia Osọhia 12:12; 21:3, 4.
A Gán Sọ Pọ́n Hosọ Ehelẹ
ATỌ̀HỌ̀-NUHIHỌ́ LỌ TỌN
Lehe Angẹli lẹ Sọgan Gọalọna We Do
Jiwheyẹwhe ko do nudida gbigbọnọ lẹ hlan nado dádo whẹho gbẹtọvi lẹ tọn mẹ to ninọmẹ susu mẹ.
