HOSỌ HE JẸNUKỌN | BE MẸHE KÚ SỌGAN GỌWÁ NỌGBẸ̀ YA?
Be Todido de Tin Na Oṣiọ lẹ Ya?
Be oṣiọ lẹ sọgan gọwá nọgbẹ̀ ya?
GBLỌNDO BIBLU TỌN: “Ojlẹ lọ ja, to ehe mẹ mẹhe to yọdò oflin tọn lẹ mẹ lẹpo na sè ogbè [Jesu tọn] bo tọ́njẹgbonu.”—Johanu 5:28, 29.
Gbọnmọ dali, Jesu dọ dọdai gando ojlẹ sọgodo tọn de go, whenue Yọdò lẹpo na jẹvọ́ to gandudu Ahọluduta etọn tọn whenu. Fernando he go mí donù to hosọ he wayi mẹ dọmọ: “Whla tintan he n’hia Johanu 5:28, 29, awuji mi taun. Wefọ ehe gọalọna mi nado tindo todido nujọnu tọn, bọ n’jẹ pọndohlan he sọgbe tindo ji gando sọgodo go.”
To hohowhenu, dawe nugbonọ lọ Job yọnẹn dọ to okú emitọn godo, Jiwheyẹwhe na wá fọ́n emi. Job kanse dọ: “Eyin mẹde kú, be ewọ nasọ nọgbẹ̀ ba?” Enẹgodo, e yí nujikudo do na gblọndo dọmọ: “Azán sinsẹ̀n ṣie tọn lẹpo gbè wẹ yẹn nado [nọte to Yọdò mẹ], kaka diọdo ṣie nado wá. Hiẹ na ylọ yẹn nasọ siọ we.”—Job 14:14, 15.
Fọnsọnku Lazalọsi tọn na mí jide gando todido sọgodo tọn go
Fọnsọnku ma yin nuyọyọ de na Malta nọviyọnnu Lazalọsi tọn. To whenue Lazalọsi kú, Jesu dọna Malta dọmọ: “Nọvisunnu towe na fọ́n.” Malta gblọn dọmọ: “Yẹn yọnẹn dọ e na fọ́n to fọnsọnku whenu to azán godo tọn gbè.” Jesu sọ dọna ẹn dọmọ: “Yẹn wẹ fọnsọnku po ogbẹ̀ po. Ewọ he do yise hia to yẹn mẹ, eyin ewọ tlẹ kú, e na gọwá ogbẹ̀.” (Johanu 11:23-25) Enẹgodo, Jesu fọ́n Lazalọsi sọnku to afọdopolọji! Kandai ojlofọndotenamẹ tọn ehe do nujijọ ayidego tọn he na wá aimẹ to nukọn mẹ lẹ hia to kleun mẹ. Yí nukun homẹ tọn do pọ́n lehe gbẹtọ lẹ na to yinyin finfọnsọnku lẹdo aihọn pé do!
Be mẹdelẹ na yin finfọn do olọn mẹ wẹ ya?
GBLỌNDO BIBLU TỌN: Biblu dohia dọ fọnsọnku Jesu tọn gbọnvona fọnsọnku ṣinatọ̀n he go Biblu donù lẹ. Omẹ ṣinatọ̀n enẹlẹ gọwá nọgbẹ̀ to aigba ji fi. Ṣigba, gando fọnsọnku Jesu tọn go, mí hia dọmọ: “Jesu Klisti. . . tin to adusilọ Jiwheyẹwhe tọn mẹ, na e ko yì olọn mẹ.” (1 Pita 3:21, 22) Gbọnvona Jesu, be mẹdevo lẹ na yin finfọnsọnku do olọn mẹ ya? Jesu dọna devi etọn lẹ jẹnukọn dọmọ: “Eyin yẹn yì bo wleawu otẹn de tọn na mì, yẹn na lẹkọwa bo na yí mì do whégbè do dee dè, na fihe yẹn te mìlọsu nido to finẹ.”—Johanu 14:3.
Klisti yì olọn mẹ bo wleawudaina wiwá devi etọn delẹ tọn. Sọha mẹhe na yin finfọnsọnku do olọn mẹ lẹ tọn wẹ 144 000. (Osọhia 14:1, 3) Ṣigba, etẹ wà gbé wẹ hodotọ Jesu tọn ehelẹ jei to olọn mẹ?
Azọ́n susu wẹ to tepọn yé! Owe-wiwe lẹ dọna mí dọmọ: “Ayajẹnọ podọ wiwe wẹ mẹdepope he tindo mimá to fọnsọnku tintan lọ mẹ; omẹ ehelẹ ji wẹ okú awetọ ma tindo aṣẹ depope do, ṣigba yé na yin yẹwhenọ Jiwheyẹwhe tọn lẹ podọ Klisti tọn lẹ, yé nasọ duahọlu hẹ ẹ na owhe fọtọ́n.” (Osọhia 20:6) Mẹhe na yin finfọnsọnku do olọn mẹ lẹ na dugán do aigba ji taidi ahọlu po yẹwhenọ lẹ po hẹ Klisti.
Mẹnu lẹ wẹ nasọ yin finfọnsọnku?
GBLỌNDO BIBLU TỌN: Mí hia hodidọ apọsteli Paulu tọn ehelẹ to Owe-wiwe gbọdo lẹ mẹ dọmọ: “Yẹn tindo todido to Jiwheyẹwhe mẹ, yèdọ todido he omẹ ehelẹ lọsu tindo, dọ fọnsọnku dodonọ lẹ po mawadodonọ lẹ tọn po de na tin.”
Ohó Jiwheyẹwhe tọn na mí jide dọ gbẹtọ liva susu he kú lẹ na gọwá nọgbẹ̀
Mẹnu lẹ wẹ pipli he Paulu to alọdlẹndo taidi “dodonọ lẹ” lọ na bẹhẹn? Lẹnnupọndo apajlẹ de ji. Jehovah dọna dawe nugbonọ lọ Daniẹli ojlẹ vude jẹnukọnna okú etọn dọmọ: “Hiẹ na gbọjẹ, bosọ ṣite to tẹnmimọ towe mẹ, to opodo azán lẹ lọ tọn.” (Daniẹli 12:13) Fie wẹ Daniẹli na fọ́n sọn amlọn okú tọn mẹ te? “Dodonọ wẹ na dugu aigba tọn, bo nasọ nọ nọ̀ e mẹ kakadoi.” (Psalm 37:29) Podọ Jesu dọ dọdai dọmọ: “Ayajẹnọ wẹ homẹmimiọnnọ lẹ, na yé na dugu aigba tọn.” (Matiu 5:5) Daniẹli gọna sunnu po yọnnu nugbonọ devo lẹ po na yin finfọnsọnku nado nọgbẹ̀ to aigba ji whladopo dogọ, podọ kakadoi.
Mẹnu lẹ wẹ pipli he Paulu to alọdlẹndo taidi “mawadodonọ lẹ” lọ na bẹhẹn? Yewlẹ wẹ gbẹtọ liva susu he nọgbẹ̀ pọ́n bo kú, yèdọ mẹhe ma tindo dotẹnmẹ hundote nado plọn nugbo Biblu tọn bo yí i do yizan mẹ lẹ. To fọnsọnku yetọn godo, yé na tindo dotẹnmẹ hundote nado yọ́n Jehovah * po Jesu po bo do pinpẹn-nutọn-yinyọnẹn hia yé. (Johanu 17:3) Mẹhe basi dide nado sẹ̀n Jiwheyẹwhe lẹpo na tindo todido nado nọgbẹ̀ kakadoi taidi Jehovah.
Mẹhe basi dide nado sẹ̀n Jiwheyẹwhe lẹpo na tindo todido nado nọgbẹ̀ kakadoi to ayajẹ po agbasalilo pipé po mẹ
Etẹlẹ wẹ na jọ to aigba ji to whenẹnu?
GBLỌNDO BIBLU TỌN: Jiwheyẹwhe “nasọ súnsún dasin lẹpo sẹ̀ sọn nukun yetọn mẹ, okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba.” (Osọhia 21:4) “Yé na gbá ohọ̀, bosọ nọ nọ̀ yé mẹ, yé na do vẹngle, bosọ dù sinsẹ́n yetọn.”—Isaia 65:21.
Yí nukun homẹ tọn do pọ́n lehe hiẹ po mẹvivẹ towe he yin finfọnsọnku lẹ po na to gbẹnọ to ninọmẹ mọnkọtọn mẹ do! Ṣigba, kanbiọ he pò to ote wẹ, Nawẹ a sọgan wagbọn do kudeji dọ fọnsọnku na tin?
^ huk. 15 Jehovah wẹ yinkọ Jiwheyẹwhe tọn dile Biblu dohia do.
