N’whẹ́n to tòdaho Alicante tọn mẹ, to huto whèzẹtẹn Espagne tọn. Na tukla nọ sù to whẹndo mítọn mẹ wutu, n’gbọ bo nọ yí whenu ṣie susu zan to tòhomẹ-liho lẹ ji. Ṣọfu he mẹ yè nọ tlẹ́ agbá mọto po kẹkẹ po tọn te de sẹpọ owhé mítọn gbè. To finẹ, n’jihọntọn hẹ José María he yin dopo to mẹhe nọ wazọ́n to finẹ lẹ mẹ. E jọmẹ taun bo nọ na mi ayidonugo nujọnu tọn, ehe hagbẹ whẹndo ṣie tọn lẹ ma nọ na mi. To ojlẹ ayimajai tọn lẹ whenu, e nọ yinuwa hẹ mi taidi mẹdaho, yèdọ họntọn nugbo mahopọnna dọ owhe 20 plipli wẹ e do hú mẹho mi.

José María ko to Biblu plọn hẹ Kunnudetọ Jehovah tọn lẹ. E yiwanna Owe-wiwe lẹ, bo nọ saba dọhodo nugbo Biblu tọn lẹ ji hẹ mi. N’nọ dotoaina ẹn po sisi po, ṣigba n’ma nọ tindo ojlo to nuhe dọ e te mẹ sọmọ. Na taidi jọja aflanmẹ de, whẹho devo lẹ wẹ nọ duahunmẹna mi. Ṣigba, nulẹ wá diọ to nukọn mẹ.

N’ma nọ yiwanna nado dọho susu gando asidan aliji tọn ehe go. Nuhe n’sọgan dọ poun wẹ yindọ n’yinuwa taidi nulunọ podọ to aliho yamakinanu tọn mẹ. Gbẹzan ṣie blebu diọ to gbèdopo poun. Yẹn mẹhe yin jọja aflanmẹ huhlọnnọ de wá hò plibọ bo yin ginglọndo dotowhé. Ninọmẹ lọ ma bọawuna mi depope. N’nọ to kinkanse dee mapote dọ, ‘Etẹ sin gbẹ̀ wẹ n’te?’

José María wá dla mi pọ́n, podọ e sọ yawu basi tito bọ Kunnudetọ Jehovah tọn he to agun lẹdo lọ tọn mẹ lẹ nọ wá pọ́n mi to dotowhé. Dlapọn he yé nọ basi na mi whẹwhẹ enẹlẹ yinuwado ji e. Tlolo he ninọmẹ ṣie jẹ tepọn ji, n’jẹ Biblu plọn ji. N’wá mọnukunnujẹ nuhewutu gbẹtọvi lẹ do nọ jiya bo nọ kú po nuhewutu Jiwheyẹwhe jotẹnna nuylankan lẹ nado nọ jọ po mẹ. N’sọ plọnnu gando opagbe Jiwheyẹwhe tọn lẹ na sọgodo go, to whenue aigba blebu na gọ́ na gbẹtọvi pipé lẹ bọ mẹdepope ma to nasọ dọmọ: “Yẹn to azọ̀njẹ” gbede ba. (Isaia 33:24) Whla tintan die to gbẹzan ṣie mẹ he todido jiawu de yin zizedonukọnna mi.

To whenue n’tọ́n sọn dotowhé, n’zindonukọn po awuyiya po to Biblu pinplọn ṣie mẹ. N’tlẹ nọ yí kẹkẹ sẹkunọ lẹ tọn vonọtaun de zan nado yì delẹ to opli Kunnudetọ Jehovah tọn lẹ tọn mẹ bosọ nọ tindo mahẹ to azọ́n yẹwhehodidọ tọn yetọn mẹ. To 5 novembre 1988, to whenue n’tindo owhe 20, n’yí baptẹm to sinhẹnnú daho de mẹ. Jehovah Jiwheyẹwhe gọalọna mi nado tindo pọndohlan dagbe gando ogbẹ̀ go. Ṣigba, etẹwẹ n’sọgan wà nado do pinpẹn-nutọn-yinyọnẹn ṣie hia?

N’magbe ma nado dike ninọmẹ ṣie ni glọnalina mi nado wà nuhe go n’pé lẹpo to sinsẹ̀nzọn Jehovah tọn mẹ. N’jlo na basi nukọnyiyi. (1 Timoti 4:15) E ma bọawuna mi to bẹjẹeji, na whẹndo ṣie jẹagọdo nuyise yọyọ ṣie. Ṣigba n’tindo yisenọ hatọ lẹ, mẹhe yin nọvisunnu po nọviyọnnu ṣie gbigbọmẹ tọn lẹ po. Yé nọ gọalọna mi nado yì opli lẹpo, podọ nado tindo mahẹ gbesisọ tọn to azọ́n yẹwhehodidọ tọn mẹ.

Etomọṣo dile ojlẹ to yìyì, e wá họnwun dọ n’na nọ tindo nuhudo nukunpedego vonọtaun tọn to whelẹponu. To whenue n’ko yí ojlẹ susu zan nado dín fie n’sọgan mọ nukunpedomẹgo mọnkọtọn te godo, n’wá mọ ofi dagbe dopo to tòdaho Valence tọn mẹ, ehe dẹn na kilomẹtlu 160 do agewaji Alicante tọn. Nọtẹn ehe wá lẹzun owhé ṣie gbè.

Mahopọnna dọ n’ma sọgan fọ́n sọn adọzan ṣie ji, n’magbe nado zindonukọn to Jehovah sinsẹ̀n mẹ. N’yí akuẹ he nọ yin nina mẹhe tindo oblọ lẹ po akuẹ devo he yin nina mi lẹ po do họ̀ ọdinatẹẹ de, ehe yin zizedo adọzan ṣie pá. N’sọ họ̀ alokan apòmẹ tọn de. To afọnnu lẹpo, nukunpedomẹgotọ ṣie nọ tá ọdinatẹẹ po alokan ṣie po na mi. Nado zan ọdinatẹẹ lọ, n’nọ yí azọ́nwanu de zan ehe n’nọ deanana po agbakọ ṣie po. Podọ n’sọ tindo opò vonọtaun devo he n’nọ yí onù ṣie do deanana. Opò ehe nọ gọalọna mi nado kanwe to ọdinatẹẹ ji podọ nado zín sọha alokan tọn lẹ to alokan ṣie ji.

Nawẹ nuyizan ehelẹ gọalọna mi gbọn? Tintan whẹ́, yé hùn dotẹnmẹ dote na mi nado nọ yì nọtẹn Intẹnẹt tọn jw.org ji podọ nado nọ yì WESẸDOTẸN INTẸNẸT JI TỌN Watchtower tọn ji. Lehe yé yin azọ́nwanu jiawu na mi do sọ! N’nọ saba yí gànhiho susu zan to azán dopodopo ji nado plọn owe sinai do Biblu ji lẹ bo nọ basi dodinnanu lẹ nado zindonukọn to nupinplọn gando Jiwheyẹwhe po jẹhẹnu jiawu etọn lẹ po go mẹ. Podọ to whedepopenu he n’tindo numọtolanmẹ ṣokẹdẹninọ tọn kavi gbigbọjọ tọn, n’nọ saba mọ nudepope to nọtẹn lọ ji, ehe nọ na mi tuli.

Ọdinatẹẹ ṣie sọ nọ gọalọna mi nado nọ dotoaina opli lẹ bosọ nọ tindo mahẹ to yé mẹ. N’sọgan na gblọndo, hodẹ̀, na hodidọ, bo tlẹ hia Atọ̀họ̀-Nuhihọ́ lọ Tọn eyin yè deazọ́nna mi nado wàmọ. Dile etlẹ yindọ n’ma sọgan yì opli lẹ, n’gbẹ́ nọ mọdọ n’yin apadewhe agun lọ tọn.

Ọdinatẹẹ po alokan ṣie po nọ gọalọna mi nado tindo mahẹ gigọ́ to azọ́n yẹwhehodidọ tọn lọ mẹ. Nugbo wẹ dọ n’ma sọgan nọ yì sọn whédegbè jẹ whédegbè dile suhugan Kunnudetọ Jehovah tọn lẹ tọn nọ wà do. Ṣigba, enẹ ma doalọtena mi. Azọ́nwanu ehelẹ yiyizan ko gọalọna mi nado má nuyise ṣie hẹ mẹdevo lẹ. Na nugbo tọn, n’nọ duvivi hodọdopọ gbọn alokan ji tọn lẹ sọmọ bọ mẹho agun tọn lẹ deazọ́nna mi nado nọ deanana nujijla yẹwhehodidọ gbọn alokan ji tọn lẹ. Nujijla ehelẹ yin alọgọ titengbe de na hagbẹ agun lọ tọn he ma sọgan sẹtẹn sọn whégbè lẹ.

 Ṣigba, gbẹzan ṣie ma sinai do azọ́nwanu enẹlẹ kẹdẹ yiyizan ji. Họntọn vivẹ́ lẹ nọ wá dla mi pọ́n to azán lẹpo gbè. Yé nọ plan hẹnnumẹ po mẹyinyọnẹn he tindo ojlo nado plọn Biblu lẹ po wá. Yé nọ saba biọ dọ ma deanana hodọdopọ sinai do Biblu ji lẹ. To dotẹnmẹ hundote devo lẹ whenu, whẹndo lẹ nọ wá dee bo nọ biọ to asi e nado tindo mahẹ to sinsẹ̀n-bibasi whẹndo tọn yetọn mẹ. Homẹ ṣie nọ hùn, titengbe to whenue yọpọvu lẹ sinai to apá na mi bo to nuhewutu yé do yiwanna Jehovah lẹ dọna mi.

N’yọ́n pinpẹn etọn dọ mẹsusu nọ wá dè e. Họntọn he wá sọn yakẹ podọ fidindẹn lẹ nọ gọ́ abò ṣie mẹ. Dile a sọgan ko lẹn do, mẹtọnhopọn owanyinọ ehe nọ paṣa nukunpedomẹgotọ he nọ wazọ́n to finẹ lẹ. N’nọ dopẹna Jehovah egbesọegbesọ na lẹblanulọkẹyi lọ nado yin dopo to pipli mẹmẹsunnu lẹ tọn ehe mẹ.

Whedepopenu he mẹde dọnudo mi bo kàn lehe n’te do sè mi, n’nọ dọna ẹn dọ, “N’tofi bo gbẹ́ to akọndonanu!” Na nugbo tọn, n’yọnẹn dọ e ma yin yẹn kẹdẹ wẹ to akọndonanu. Mahopọnna ninọmẹ mítọn, Klistiani lẹpo wẹ to avùn de hò, yèdọ “avùn dagbe yise tọn.” (1 Timoti 6:12) Etẹwẹ gọalọna mi nado to avùn ehe hò na owhe susu? N’nọ hodẹ̀ hlan Jehovah egbesọegbesọ bo nọ dopẹna ẹn, na e gọalọna mi bọ gbẹzan ṣie tindo lẹndai. Podọ n’nọ tẹnpọn nado hẹn alọnu ján to Jiwheyẹwhe sinsẹ̀n mẹ dile e yọnbasi do, bo nọ ze nukun do todido he to nukọn lọ ji.

N’nọ lẹnnupọn whẹwhẹ do aihọn yọyọ lọ ji, podọ do lehe nulẹ na yì do to whenue n’na penugo nado lọ́n bo họ̀nwezun whladopo dogọ ji. To whedelẹnu, n’nọ yìn aslan hẹ họntọn vivẹ́ ṣie José María he to plibọzọ̀n jẹ, gando lehe mí na họ̀nwezun dopọ do go. N’nọ kanse e dọ, “Mẹnu wẹ na yì tẹ mẹde?” E nọ gblọn dọ, “Nuhahun lọ ma yin mẹhe na yì tẹ mẹde. Nuhe yin nujọnu lọ wẹ yindọ mí ni tin to Paladisi mẹ nado họ̀nwezun lọ.”

E ma bọawuna mi nado doakọnna ninọmẹ ṣie. N’yọnẹn dọ n’wà nulunu de to jọja whenu ṣie, podọ n’wá jiya etọn taun. Ṣigba, n’dopẹ́ taun dọ Jehovah ma gbẹ́ mi dai. E na mi nususu, enẹ wẹ whẹndo gbigbọmẹ tọn daho de, ojlo lọ nado nọgbẹ̀, ayajẹ he alọgigọna mẹdevo lẹ nọ hẹnwa, po todido jiawu de na sọgodo po. Eyin n’na basi bladopọ numọtolanmẹ ṣie lẹ tọn to hogbe kleun de mẹ, nuhe n’na dọ poun wẹ yindọ Jehovah dona mi hú nuhe n’jẹna.