• OWHE HE MẸ N’YIN JIJI: 1941

• OTÒ HE MẸ N’WÁ SỌN: BÉNIN

• OTÀN ṢIE: N’BẸ ASI SUSU DÀ, BO NỌ DIỌNUKUNSỌ KUNNUDETỌ JEHOVAH TỌN LẸ

NUHE N’YIN DAI:

Tòdaho Cotonou tọn mẹ wẹ n’nọ nọ̀ to Bénin. Sinsẹ̀n Katoliki tọn mẹ wẹ n’yin pinplọn whẹ́n te, amọ́ n’ma nọ yì ṣọṣi do mọ de. To lẹdo ṣie mẹ, sinsẹ̀nvi Katoliki tọn susu wẹ nọ bẹ asi dà, na osẹ́n ma jẹagọdo asi susu bibẹpli to ojlẹ lọ mẹ wutu. To nukọn mẹ, yẹnlọsu dà asi ẹnẹ.

To whenue ojlẹ gufinfọn tọn kavi Ehuzu wá otò mítọn mẹ to owhe 1970 lẹ gblamẹ, n’lẹndọ enẹ na wà dagbe na otò ṣie. N’ze dee jo pete na ogbẹ́ Ehuzu tọn lọ bo nọ doalọ to tonudidọ mẹ. Mẹhe to ogbẹ́ gufinfọn tọn enẹ mẹ lẹ ma yiwanna Kunnudetọ Jehovah tọn lẹ paali, na Kunnudetọ lẹ nọ nọ̀ kada mlẹnmlẹn na tonudidọ wutu. N’yin dopo to mẹhe dohomẹkẹn yé lẹ mẹ. Whenue mẹdehlan Kunnudetọ lẹ tọn lẹ yin yinyàn sọn otò lọ mẹ to 1976, n’kudeji dọ yé ma na lẹkọwa gbede ba.

LEHE BIBLU DIỌ GBẸZAN ṢIE DO:

Ojlẹ Ehuzu tọn lọ wá vivọnu to 1990. E paṣa mi nado mọdọ mẹdehlan Kunnudetọ lẹ tọn lẹ vọ́ lẹkọwa. N’jẹ linlẹn to dee mẹ ji dọ e yọnbasi dọ Jiwheyẹwhe to awhàn omẹ ehelẹ tọn mẹ. To ojlẹ enẹ mẹ, n’ko jẹ azọ́n devo wà ji niyẹn. Dopo to azọ́nwatọgbẹ́ yọyọ ṣie lẹ mẹ yin Kunnudetọ, bo nọ to hodọna mẹlẹ mapote gando nuyise etọn lẹ go. E hia wefọ Biblu tọn delẹ na mi he dohia dọ Jehovah yin Jiwheyẹwhe owanyinọ de bosọ nọ dawhẹ dodo. (Deutelonomi 32:4; 1 Johanu 4:8) Jẹhẹnu Jiwheyẹwhe tọn enẹlẹ dọ̀n mi taun. Na n’sọ jlo na yọ́n nususu dogọ gando Jehovah go wutu, n’yigbe dọ ni plọn Biblu hẹ mi.

E madẹn bọ n’jẹ opli Kunnudetọ Jehovah tọn lẹ tọn lẹ yì ji. Owanyi ahundopo tọn he yé nọ dohia ode awetọ yinuwado ji e sisosiso—yé ma nọ ṣinyan akọ̀ kavi homẹnukuntapọn paali. Lehe n’to gbẹdo hẹ Kunnudetọ lẹ sọ, mọ wẹ e to wunhọ́n na mi dogọ do niyẹn dọ yewlẹ wẹ hodotọ nugbo Jesu tọn lẹ.—Johanu 13:35.

N’wá basi dide dọ eyin n’jlo na sẹ̀n Jehovah janwẹ, e na biọ dọ ma tọ́n sọn Ṣọṣi Katoliki tọn mẹ. Mọwiwà ma bọawu, na n’to budi gando nuhe mẹdevo lẹ na lẹn go. E yì whenu susu to asi e, amọ́ po alọgọ Jehovah tọn po, n’wá wleawuna adọgbigbo bo jo ṣọṣi enẹ do.

Etomọṣo, diọdo daho devo gbẹ́ to tepọn mi. N’plọn to Biblu mẹ dọ Jiwheyẹwhe gbẹwanna asi susu didà. (Jenẹsisi 2:18-24; Matiu 19:4-6) Yọnnu tintan he n’dà kẹdẹ wẹ Jiwheyẹwhe nọ mọ di asi ṣie. Enẹwutu, n’yì basi kandai alọwle ṣie tọn hẹ yọnnu enẹ to ahọlu-whé, bo gbẹ́ asi he pò lẹ dai. Amọ́ n’hẹn ẹn diun dọ yé ma jẹdò nude tọn. To nukọn mẹ, awe to asi ṣie he n’ko gbẹ́ dai lẹ mẹ wá lẹzun Kunnudetọ Jehovah tọn lẹ ga.

ALE HE N’MỌYI LẸ:

Dile etlẹ yindọ asi ṣie uwọ ma jo sinsẹ̀n Katoliki tọn do, e nọ na sisi nudide ṣie nado sẹ̀n Jehovah. Mí omẹ awe lẹ wẹ kọngbedopọ dọ n’lẹzun asu dagbe de dogọ.

N’nọ lẹn dai dọ mahẹ tintindo to tonudidọ mẹ na zọ́n bọ n’na hẹn ninọmẹ mẹhe to lẹdo ṣie mẹ lẹ tọn pọnte, amọ́ vivẹnudido enẹ lẹpo wẹ wá lẹzun osin bado pápá nẹgbé. Todin, n’yọnẹn dọ Ahọluduta Jiwheyẹwhe tọn kẹdẹ wẹ na de nuhahun gbẹtọvi tọn lẹpo sẹ̀. (Matiu 6:9, 10) N’dopẹ̀ dọ Jehovah do lehe n’gán zan gbẹzan ṣie nado tindo ayajẹ nujọnu tọn do hia mi.

• OWHE HE MẸ N’YIN JIJI: 1977

• OTÒ HE MẸ N’WÁ SỌN: BRÉSIL

• OTÀN ṢIE: AGUNGÁN ṢỌṢI PENTECÔTISTE TỌN DE

NUHE N’YIN DAI:

N’yin pinplọn whẹ́n to lẹdo tòdaho Itu tọn he dẹn taun de mẹ, to agbegbe São Paulo tọn mẹ. Lẹdo enẹ diyin taun na danuwiwa sinsinyẹn he nọ jọ to finẹ lẹ wutu.

Danuwatọ akonka wẹ n’yin bosọ nọ doalọ to fẹnnuwiwa mẹ. Humọ, n’nọ sà amasin adínọ. To nukọn mẹ, n’wá mọdọ eyin n’ma doalọtena gbẹzan he zan n’te, be gànpamẹ kavi yọdò mẹ janwẹ na wá fó do, enẹwutu n’de ofẹ̀n sọn aṣa enẹlẹ mẹ. Enẹgodo, n’biọ Ṣọṣi Pentecôtiste tọn mẹ, bosọ wá lẹzun agungán de to nukọn mẹ.

N’nọ lẹndọ n’gán gọalọna gbẹtọ lẹ nugbonugbo po sinsẹ̀nzọn he n’nọ wà to ṣọṣi mẹ po. N’tlẹ nọ ze tito sinsẹ̀n lọ tọn de donukọnna mẹlẹ to ladio lẹdo lọ tọn de ji, ehe zọ́n bọ mẹsusu wá yọ́n mi to lẹdo lọ mẹ. Etomọṣo, vudevude n’wá mọdọ dagbemẹninọ sinsẹ̀nvi lẹ tọn ma nọ duahunmẹna nukọntọ ṣọṣi lọ tọn lẹ, mọdopolọ gbégbigbòna Jiwheyẹwhe ma tlẹ nọ duahunmẹna yé. N’lẹndọ onú dopo gee he go ṣọṣi lọ nọ gbòkan do wẹ nado bẹ akuẹ susu pli. N’basi nudide bo tọ́n sọn ṣọṣi lọ mẹ.

LEHE BIBLU DIỌ GBẸZAN ṢIE DO:

Whenue n’jẹ Biblu plọn ji hẹ Kunnudetọ Jehovah tọn lẹ, wẹ n’mọ to afọdopolọji dọ yé gbọnvona sinsẹ̀n he pò lẹ. Onú awe wẹ yinuwado ji e. Tintan, Kunnudetọ Jehovah tọn lẹ ma nọ vivi-nù poun gando owanyi tintindo na Jiwheyẹwhe po kọmẹnu mẹtọn po go; yelọsu nọ wàmọ wẹ. Awetọ, yé ma nọ doalọ to tonudidọ kavi awhànfunfun mẹ. (Isaia 2:4) Onú awe ehelẹ wẹ hẹn mi kudeji dọ n’ko mọ sinsẹ̀n nugbo lọ, yèdọ aliho jinján he nọ planmẹ yì ogbẹ̀ madopodo mẹ lọ.—Matiu 7:13, 14.

N’wá mọnukunnujẹemẹ dọ eyin n’jlo na hẹn homẹ Jiwheyẹwhe tọn hùn, e na biọ dọ ma basi diọdo vonọtaun delẹ. N’dona nọ na ayidonugo whẹndo ṣie ganji dogọ. N’sọ dona nọ whiwhẹ dee dogọ. E ma bọawuna mi nado basi diọdo he jẹ lẹ, amọ́ po alọgọ Jehovah tọn po, e pà mi. E paṣa asi ṣie taun dọ n’penugo nado basi diọdo ehelẹ. Ewọ ko jẹ Biblu pinplọn ji jẹnukọnna mi, amọ́ todin e zindonukọn to oplọn etọn mẹ po awuyiya po. E madẹn bọ e họnwun na mí omẹ awe lẹ dọ mí jlo na lẹzun dopo to Kunnudetọ Jehovah tọn lẹ mẹ. Mí sọ yí baptẹm to azán dopolọ ji.

ALE HE N’MỌYI LẸ:

Ayajẹnu wẹ e yin dọ yẹn po asi ṣie po penugo nado gọalọna ovi mítọn atọ̀n lẹ bọ yelọsu wleawuna haṣinṣan dagbe de hẹ Jehovah. Whẹndo mítọn gọ́ na ayajẹ taun. N’dopẹ̀ dọ Jehovah dọ̀n mi nado wá yọ́n nugbo he tin to Ohó etọn Biblu mẹ. Biblu nọ diọ gbẹzan mẹtọn nugbo! N’yin kunnudenu jọnun enẹ tọn dopo.

• OWHE HE MẸ N’YIN JIJI: 1957

• OTÒ HE MẸ N’WÁ SỌN: AUSTRALIE

• OTÀN ṢIE: N’JIYA TAUN TO OVU WHENU

NUHE N’YIN DAI:

N’whẹ́n to tòdaho Newcastle tọn mẹ, ehe tin to Nouvelle-Galles du Sud. Yẹn wẹ yin ovi tintan to ovi ṣinawe he mẹjitọ ṣie lẹ ji lẹ mẹ, podọ otọ́ ṣie yin danuwatọ bosọ nọ nùahànmú taun, bọ onọ̀ ṣie lọsu yin danuwatọ. Onọ̀ ṣie nọ hò mi bo nọ gbleawuna mi bosọ nọ zùn mi gli. E nọ to didọna mi mapote dọ mẹylankan wẹ n’yin podọ n’na jiya to zòmẹ. Adánsin-namẹ etọn lẹ nọ dobuna mi taun.

Awufiẹsa apà he onọ̀ ṣie nọ do go e lẹ tọn nọ zọ́n bọ wehọmẹ yìyì nọ glo mí to whedelẹnu. Whenue n’do owhe 11, aṣẹpatọ lẹ plan mi sọn mẹjitọ ṣie lẹ dè, bo ze mi jẹnukọn whẹ́ do nọtẹn de he gandudu otò lọ tọn wleawuna, enẹgodo do opá yẹwhenọ-yọnnu lẹ tọn de mẹ. Whenue n’do owhe 14, n’họ̀n sọn opá lọ mẹ. Na n’ma jlo na lẹkọyi whégbè wutu, n’dọ́ alipá to Kings Cross, yèdọ lẹdo Sydney tọn he dẹn taun de.

Whenue n’gbẹ́ yin gbévun de, n’nọ nù amasin adínọ po ahàn sinsinyẹn lẹ po, nọ ze dee jo nado wleawuna yẹdide po video gblewa tọn lẹ po, bosọ yí galilọ do dó ajọ́. Nude jọ to gbèdopo he hẹn mi jọsi taun. N’nọ nọpọ́ hẹ dawe de he do wedutẹn zánmẹ tọn de. To zánmẹ dopo he yẹn po e po to họ̀nu he mẹ mí nọ nọ̀ mẹ, dawe awe devo lẹ wá e dè, bọ e dọna mi dọ ma yì abò mẹ. Amọ́, n’penugo bo sè hodọdopọ yetọn. Dawe he sin họmẹ n’nọ nọ̀ lọ to wéde dopọ hẹ omẹ awe diẹ lẹ nado sà mi na yé. Yé to linlẹn nado whlá mi do bato de mẹ bo kùn mi yì Japon, na ma do wazọ́n to ahànnutẹn de. Obu di mi, bọ n’lọ́n tọ́n gbọn fleṣe-nu bo họnyi nado dín mẹbọtọ de.

N’pé dawe de he disa wá tòdaho Sydney tọn mẹ, bo dọ adán he to gbigbò mi na ẹn po linlẹn lọ po dọ e na na mi akuẹ vude. Kakatimọ, e biọ to asi e nado hodo e yì fie e nọ nọ̀, na ma do sọgan lawu bosọ dù nude. Podọ n’wá gbọṣi apá etọn pete. To owhe dopo godo, mí wlealọ.

LEHE BIBLU DIỌ GBẸZAN ṢIE DO:

Whenue n’jẹ Biblu plọn ji hẹ Kunnudetọ Jehovah tọn lẹ, numọtolanmẹ susu lẹ wẹ dotukla mi. Homẹgble mi taun whenue n’plọn dọ Satani wẹ yin adọ̀ nuylankan he nọ jọ lẹ tọn; nuhe yè plọn mi dai wẹ yindọ Jiwheyẹwhe wẹ nọ hẹn oyà wá mí ji. E miọnhomẹna mi taun nado plọn dọ Jiwheyẹwhe ma nọ sayana mẹde to zòmẹ, na nuyise enẹ ko to budona mi din e ma pọ́.

Awú nọ ji mi eyin n’mọ aliho he mẹ Kunnudetọ lẹ nọ ze nudide yetọn lẹpo sinai do Biblu ji do. Yé ma nọ dọ poun dọ emi yin yisenọ, amọ́ nuyiwa yetọn lẹ sọ nọ do enẹ hia. N’ma yin làn-bibọ dai paali, etomọṣo mahopọnna nudepope he n’nọ dọ kavi wà, Kunnudetọ lẹ nọ yí owanyi po sisi po do yinuwa hẹ mi.

Avùnnukundiọsọmẹnu daho hugan he n’wá pannukọn wẹ numọtolanmẹ nuvọ́nọ-yinyin tọn ṣie. N’nọ mọdọ ma vó nude, podọ numọtolanmẹ enẹlẹ gbẹ́ dotukla mi na ojlẹ dindẹn etlẹ yin to whenue n’ko yí baptẹm bo lẹzun Kunnudetọ Jehovah tọn godo. N’yọnẹn dọ n’yiwanna Jehovah, amọ́ n’kudeji dọ e ma gán yiwanna gbẹtọ yẹn nkọ pọ́n gbede.

Linlẹn enẹ he n’nọ tindo wá diọ pete nudi owhe 15 to baptẹm ṣie godo. To hodidọ de whenu to Plitẹnhọ Ahọluduta tọn Kunnudetọ Jehovah tọn lẹ tọn de mẹ, hodọtọ lọ hia Jakọbu 1:23, 24. Wefọ enẹlẹ yí Ohó Jiwheyẹwhe tọn jlẹdo mẹpọ́nnu de go, ehe mẹ mí gán nọ mọ míde te dile Jehovah nọ mọ mí do. N’jẹ kinkanse dee ji eyin lehe n’nọ mọ dee do gbọnvona lehe Jehovah nọ mọ mi do. To tintan whenu, n’ma jlo na pọ́n nulẹ hlan to aliho enẹ mẹ. N’gbẹ́ nọ mọdọ e ma sọgbe hẹ lẹnpọn dagbe nado donukun dọ Jehovah ni yiwanna mi.

To azán vude godo, n’hia wefọ de he diọ gbẹzan ṣie. Isaia 1:18 wẹ, fie Jehovah dọ te dọmọ: “Todin, mì wá na mí ni dọwhẹgbọ to míde ṣẹnṣẹn, . . . “Dile etlẹ yindọ ylando mìtọn lẹ divẹẹ ṣẹ́ṣẹ́, yé na yin hinhẹn zun wewe di osin-agó.” E di na mi dọ Jehovah to hodọna mi tlọlọ wẹ dọ: “Wá, Vicky, na mí ni dọwhẹgbọ to míde ṣẹnṣẹn. N’yọ́n we, n’yọ́n ylando towe lẹ, n’yọ́n nuhe to ahun towe mẹ lẹ—n’sọ yiwanna we.”

Amlọn gbẹ́ mi to ozán enẹ mẹ. E gbẹ́ vẹawuna mi janwẹ nado yise dọ Jehovah gán yiwanna mi, amọ́ n’wá jẹ nulẹnpọn ji do avọ́sinsan ofligọ tọn Jesu tọn ji. To ajiji mẹ, n’doayi e go dọ Jehovah ko fahomẹ hẹ mi na ojlẹ dindẹn, bo gbọnmọ dali dohia mi dọ emi yiwanna mi to aliho susu mẹ. Amọ́, e taidi dọ n’to didọna ẹn dọ: “Mahopọnna lehe owanyi towe klo sọ, yẹn uwọ ma gán duvivi etọn. Avọ́sinsan Visunnu towe tọn ma dohuhlọn sọmọ nado whlẹn yẹn.” E di dọ n’yí alọ ṣie lẹ do to ofligọ lọ gọ̀ sisẹ́ hlan Jehovah wẹ nkọ. Amọ́ to godo mẹ, n’wá lẹnayihamẹpọn do ofligọ he yin nina mí lọ ji, bọ vudevude n’jẹ mimọ ji dọ Jehovah yiwanna mi.

ALE HE N’MỌYI LẸ:

N’jo gbẹzan gblezọn ṣie dai tọn do bosọ to vivi ogbẹ̀ tọn dù. Haṣinṣan yẹn po asu ṣie po tọn pọnte dogọ, podọ homẹ ṣie nọ hùn dọ n’gán yí numimọ he n’tindo lẹ do gọalọna mẹdevo lẹ. Todin, n’mọdọ n’vẹ́ taun hẹ Jehovah.

• OWHE HE MẸ N’YIN JIJI: 1974

• OTÒ HE MẸ N’WÁ SỌN: RUSSIE

• OTÀN ṢIE: N’YIWANNA NUHIHO ZINGIDINỌ LỌ HEAVY-METAL

NUHE N’YIN DAI:

N’yin jiji to Votkinsk, yèdọ tòdaho he mẹ ohàn-pàtọ he diyin lọ Pyotr Tchaikovsky lọsu yin jiji te. Whẹndo wamọnọ de mẹ wẹ n’wá sọn. Otọ́ ṣie do jijọ dagbe susu, amọ́ nue ylan to ohó etọn mẹ wẹ yindọ e nọ nùahànmù bo nọ to núdosin to whégbè to whelẹponu.

N’ma nọ wazọ́n sọmọ to wehọmẹ, enẹwutu dile owhe lẹ to yìyì n’wá jẹ ovọ́ mẹ mọ na dee ji bo nọ mọdọ mẹdevo lẹ pọnte taun hú mi. N’wá sẹ̀ dee wún bo masọ nọ dejido mẹdevo lẹ go ba. Wehọmẹ yìyì lọsu wá ṣiapọ̀ mi pete. Di apajlẹ, eyin n’dona ze azọ́ndenamẹ de donukọnna klasi lọ, zẹẹmẹ bibasi do nudọnamẹ paa delẹ ji tata nọ glo mi, yèdọ nuhe n’ka gán wà to ojlẹ devo lẹ mẹ. Whenue n’fó owhe ohọ̀ ẹnẹ mẹ tọn to wehọmẹ daho, nuhe yin kinkando linlinwema wehọmẹ tọn ṣie ji wẹ: “Awugbopo nado yọ́n hogbe susu, nugomape nado nọ dọ linlẹn etọn lẹ.” Hogbe enẹlẹ hẹn mi jẹflumẹ sinsinyẹn sọmọ bọ n’do numọtolanmẹ lọ dogọ dọ n’ma vó núdopo. N’wá jẹ nukanse dee ji gando nuhewutu mí to gbẹ̀mẹ taun go.

Whenue n’biọ owhe aflanmẹ tọn lẹ mẹ, n’jẹ ahàn sinsinyẹn lẹ nù ji. To bẹjẹeji, n’mọdọ ahànnunu zọ́n bọ n’nọ vò sọn ayiha mẹ. Amọ́, eyin n’nùmú, ayihadawhẹnamẹnu ṣie nọ dotukla mi. Ogbẹ̀ ṣie ma do ota de. Apọ̀ jẹ ṣìṣì mi ji dogọ, sọmọ bọ afọ ṣie ma tlẹ nọ tọ́n sọn whégbè na azán susu. N’sọ jẹ linlẹn ji nado hù dee.

Whenue n’do owhe 20, n’mọ aliho de nado miọnhomẹna dee, amọ́ e ma yin na whenu dindẹn. Nuhiho zingidinọ heavy-metal tọn wẹ. To ojlẹ lọ mẹ, n’mọdọ nuhiho enẹ nọ vọ́ huhlọnna mi, podọ n’dín mẹdevo he nọ yiwanna nuhiho enẹ di yẹn nkọ lẹ mọ. N’jo odà ṣie do bọ e dite gblẹlẹ, n’yì tọ́n otó nado nọ do tómẹnu, bosọ nọ sọ́nu di nuhotọ he n’yiwanna lẹ. Vudevude, n’lẹzun hùnylantọ bo ma nọ pọ́n jẹ mẹde tọn ji ba, bo tlẹ sọ nọ dọjlẹ taun hẹ hagbẹ whẹndo tọn ṣie lẹ.

N’lẹn dai dọ nuhiho zingidinọ lẹ didotó na zọ́n bọ na do ayajẹ, amọ́ e ma yì domọ paali. Ninọmẹ ṣie jẹ yinylan ji dogọ wẹ! Podọ whenue n’sọ wá sè linlin ylankan delẹ gando nuhotọ he diyin bọ n’nọ to tintẹnpọn nado hodo apajlẹ yetọn lẹ go, n’mọdọ n’ko buali pete.

Enẹgodo, n’sọ gọjẹ linlẹn ji nado hù dee—bọ dintọn uwọ sọ sinyẹn taun. Onú dopo gee he glọnalina mi wẹ ogbẹ̀ he mẹ n’na ze onọ̀ ṣie do eyin n’wà onú mọnkọ. E yiwanna mi taun, podọ nuhe e ko wà do ota ṣie mẹ lẹ ma whè. Ninọmẹ lọ do magbọjẹ na mi. N’ma jlo na nọgbẹ̀ ba, yẹn die ma ka gán sọ hù dee niyẹn.

Nado de ayiha sọn enẹ lẹpo ji, n’jẹ owe ayidego tọn he tin to Russie-gbè mẹ lẹ hia ji. Dopo to owe lọ lẹ mẹ pintàn dawe he diyin de tọn, he wá wazọ́n to ṣọṣi de mẹ. To afọdopolọji, e jlo mi taun dọ yẹnsu ni wà nude na Jiwheyẹwhe po mẹdevo lẹ po. N’hodẹ̀ bo dọ nuhe lẹn n’te lẹpo na Jiwheyẹwhe, whla tintan to gbẹzan ṣie mẹ. N’vẹ̀ Jiwheyẹwhe nado do nuhe n’gán wà bọ gbẹzan ṣie nado do lẹndai de hia mi. Whenue n’to odẹ̀ lọ hò, nujiawu wẹ e yin na mi dọ n’vò to dee mẹ. Amọ́ nue jọ bọdego tlẹ sọ jiawu humọ. To gànhiho awe poun godo, nawe Kunnudetọ Jehovah tọn de húhú ohọ̀n ṣie bo biọ nado plọn Biblu hẹ mi. N’kudeji dọ gblọndo odẹ̀ ṣie tọn die. Gbenẹgbe wẹ n’bẹ gbẹzan yọyọ he gọ́ na ayajẹ de jẹeji.

LEHE BIBLU DIỌ GBẸZAN ṢIE DO:

Dile etlẹ yindọ e ma bọawuna mi paali, n’bẹ nuhe to asi e bo do kanṣiṣa hẹ nuhiho zingidinọ lọ lẹpo dlan. Mahopọnna enẹ, nuhiho enẹ gbọṣi ayiha mẹ na mi na ojlẹ dindẹn. Whedepopenu he n’gbọn fie nuhiho enẹ to nudọ te de, n’nọ flin gbẹzan ṣie hoho tọn lọ to afọdopolọji. N’ma jlo dọ gbẹzan wluwlu he n’zan wayi enẹ finflin ni hẹn nudagbe he n’to dido dó ayiha po ahun ṣie po mẹ todin lẹ gble. Enẹwutu, n’basi nudide ma nado nọ gbọn ofi mọnkọ lẹ ba. Podọ whedepopenu he nude jlo na hẹn mi flin gbẹzan he n’zan wayi, n’nọ hodẹ̀ vivẹvivẹ. Mọwiwà zọ́n bọ n’nọ duvivi “jijọho Jiwheyẹwhe tọn he yiaga hugan nukunnumọjẹnumẹ lẹpo” tọn.—Filipinu lẹ 4:7.

N’plọn to Biblu mẹ dọ Klistiani lẹ to dandannu glọ nado nọ dọhodo nuyise yetọn lẹ ji hẹ mẹdevo lẹ. (Matiu 28:19, 20) Nado dọ hójọhó n’nọ lẹndọ n’ma gán wà enẹ gbede. To ojlẹ dopolọ mẹ, onú yọyọ he plọn n’te lẹ nọ hẹn ayajẹ daho po jijọho ahun mẹ tọn de po wá na mi. E họnwun na mi dọ mẹdevo lẹ dona yọ́n nugbo ehelẹ ga. Mahopọnna dọ obu to didi mi, n’jẹ nuhe plọn n’te lẹ má hẹ mẹdevo lẹ ji. E paṣa mi taun nado mọdọ hodidọna mẹdevo lẹ gando Biblu go gọalọna mi nado wleawuna adọgbigbo dogọ. E sọ zọ́n bọ nuyise yọyọ ṣie lẹ doadọ̀do to ahun ṣie mẹ.

ALE HE N’MỌYI LẸ:

N’ko wlealọ todin bosọ do ayajẹ to alọwle ṣie mẹ, podọ homẹ ṣie sọ hùn dọ n’ko gọalọna gbẹtọ sọha de nado plọn Biblu, ehe bẹ nọviyọnnu ṣie po onọ̀ ṣie po hẹn. Jiwheyẹwhe sinsẹ̀n po alọgigọna mẹdevo lẹ nado wá yọ́n ewọ po zọ́n bọ gbẹzan ṣie do zẹẹmẹ nujọnu tọn de.