JESU nọ saba plọnnumẹ gando dẹ̀hiho go. Whenue e to aigba ji, nukọntọ sinsẹ̀n Ju tọn lẹ nọ hodẹ̀ to “aliklan alihogbó lẹ tọn” ji. Etẹwutu? “Nado yin mimọ gbọn gbẹtọ lẹ dali.” Matin ayihaawe, yé nọ jlo dọ gbẹtọ lẹ ni doayi e go dọ emi yin Jiwheyẹwhe-sẹ̀ntọ akonka lẹ. Mẹsusu wẹ nọ yí gànhiho susu do hodẹ̀ bo nọ to nudopolọ lẹ vọ́ dọ mapote, taidi dọ dandan wẹ dọ yé ni ‘dọ ohó susu’ whẹpo odẹ̀ yetọn nido yin sisè wẹ nkọ. (Matiu 6:5-8) Jesu dohia to aliho he họnwun mẹ dọ aṣa mọnkọ lẹ ma yin nujọnu, bo gbọnmọ dali gọalọna gbẹtọ ahunjijlọnọ lẹ nado yọ́n nuhe yé dona nọ dapana to dẹ̀hiho whenu lẹ. Ṣigba, e ma yin lehe yè ma dona nọ hodẹ̀ do kẹdẹ ji wẹ e plọnnumẹ do gba.

Jesu plọn mí dọ odẹ̀ mítọn lẹ dona nọ dohia dọ mí jlo vẹkuvẹku dọ oyín Jiwheyẹwhe tọn ni yin kinklandowiwe, dọ Ahọluduta Etọn ni wá, podọ ojlo Etọn ni yin wiwà. Jesu sọ plọn mí dọ e sọgbe nado nọ biọ Jiwheyẹwhe dọ ni gọalọna mí nado didẹ whẹho mítọn titi lẹ. (Matiu 6:9-13; Luku 11:2-4) Gbọn apajlẹ voovo lẹ dali, Jesu dohia dọ e nọ biọ linsinsinyẹn, yise po whiwhẹ po nado mọ gblọndo na odẹ̀ mítọn lẹ. (Luku 11:5-13; 18:1-14) Humọ, apajlẹ he ewọ lọsu zedai lẹ zọ́n bọ nuplọnmẹ etọn lẹ nọ whànmẹ sisosiso dogọ.—Matiu 14:23; Malku 1:35.

E họnwun dọ anademẹ ehelẹ na ko gọalọna devi Jesu tọn lẹ nado nọ hodẹ̀ to aliho dagbe mẹ dogọ. Etomọṣo, Jesu nọte kakajẹ ozán godo tọn he e yizan to aigba ji mẹ, whẹpo do dọ nuhe yin nujọnu hugan gando odẹ̀ go lọ na devi etọn lẹ.

Diblayin ozán godo tọn etọn blebu wẹ Jesu yizan nado na tuli apọsteli nugbonọ etọn lẹ. Ojlẹ he sọgbe de wẹ e yin nado hẹn nuyọyọ de zun yinyọnẹn na yé. Jesu dọna yé dọ: “Yẹn wẹ aliho lọ, nugbo lọ po ogbẹ̀ po. Mẹdepope ma nọ wá Otọ́ dè adavo gbọn yẹn gblamẹ.” To godo mẹ, e dopagbe jidevọnamẹ tọn ehe na yé dọmọ: “Nudepope he mì biọ to oyín ṣie mẹ, yẹn na wà ẹ, na Otọ́ nido sọgan yin gigopana gbọn Visunnu lọ gblamẹ. Eyin mì biọ nudepope to oyín ṣie mẹ, yẹn na wà ẹ.” Jei vivọnu hodọdopọ lọ tọn, e dọmọ: “Kakajẹ din, mì ma ko biọ onú dopo tata to oyín ṣie mẹ. Mì biọ, mì nasọ mọyi, na ayajẹ mìtọn nido sọgan yin hinhẹn gọ́.”—Johanu 14:6, 13, 14; 16:24.

Hodidọ ehelẹ siso bosọ jẹna ayidego. Owe he nọ basi zẹẹmẹ do Biblu ji de dọ dọ, ehe yin “onú yọyọ pete de gando dẹ̀hiho go to whenuho mẹ.” Jesu ma to didọ dọ odẹ̀ he dona yin hihò hlan Jiwheyẹwhe lẹ, ni yin hihò hlan emilẹ gba. Kakatimọ, aliho yọyọ de wẹ e to hùnhùn dote na gbẹtọ lẹ nado nọ dọnsẹpọ Jehovah Jiwheyẹwhe.

Nugbo wẹ dọ jẹnukọnna ehe, Jiwheyẹwhe ko nọ dotoaina odẹ̀ devizọnwatọ nugbonọ etọn lẹ tọn. (1 Samuẹli 1:9-19; Salmu lẹ 65:2) Etomọṣo, bẹsọn whenue Islaeli lẹzun akọta dide Jiwheyẹwhe tọn gbọn alẹnu de gblamẹ, mẹhe jlo dọ odẹ̀ yetọn lẹ ni yin sisè lẹ dona kẹalọyi whẹ́ dọ Islaeli wẹ akọta he Jiwheyẹwhe ko de lọ. Podọ to nukọn mẹ, bẹsọn ojlẹ Sọlomọni tọn mẹ, e biọ dọ yé ni nọ kẹalọyi whẹ́ dọ tẹmpli lọ wẹ nọtẹn he Jiwheyẹwhe de na avọ́sinsan lẹ. (Deutelonomi 9:29; 2 Otànnugbo lẹ 6:32, 33) Ṣigba, aliho sinsẹ̀n-bibasi tọn ehe tin na ojlẹ gli de poun. Dile apọsteli Paulu kàn do, Osẹ́n he yin nina Islaeli po avọ́sinsan lẹ bibasi to tẹmpli mẹ po yin “oyẹ̀ nudagbe he ja lẹ tọn, ṣigba bọ e ma yin nulọ lẹ lọsu jọnun.” (Heblu lẹ 10:1, 2) Oyẹ̀ nude tọn nọ wá jotẹnna nulọ lọsu jọnun. (Kolosinu lẹ 2:17) Bẹsọn owhe 33 W.M., haṣinṣan mẹde tọn hẹ Jehovah masọ sinai do Osẹ́n Mose tọn yìnyìn ji ba. Kakatimọ, e sinai do tonusisena mẹhe Osẹ́n lọ dlẹnalọdo ji, yèdọ—Klisti Jesu.—Johanu 15:14-16; Galatianu lẹ 3:24, 25.

Jesu ze dodonu he yiaga hugan de dai he ji mí sọgan nọ dọnsẹpọ Jehovah te, podọ e do ede hia di họntọn huhlọnnọ de he nọ hùnali na odẹ̀ mítọn lẹ nado yin sisè gbọn Jiwheyẹwhe dali bosọ mọ gblọndo. Etẹwẹ hẹn Jesu penugo nado sọgan nọ yinuwado ota mítọn mẹ to aliho ehe mẹ?

Na mímẹpo wẹ yin jiji to ylando mẹ wutu, azọ́n de ma tin he mí gán wà podọ avọ́sinsan de ma tin he mí gán basi nado sọgan de oblọ ehe sọn míde go kavi nado vọ́ haṣinṣan dagbe de tindo hẹ Jiwheyẹwhe mítọn wiwe lọ, Jehovah. (Lomunu lẹ 3:20, 24; Heblu lẹ 1:3, 4) Ṣigba, Jesu yí ogbẹ̀ gbẹtọvi pipé tọn etọn do sanvọ́ bo suahọ ylando lẹ tọn na gbẹtọvi he sọgan yin fifligọ wá Jiwheyẹwhe dè lẹ. (Lomunu lẹ 5:12, 18, 19) Gbọnmọ dali, mẹhe jlo todin dọ ylando yetọn lẹ ni yin súnsúnsún sẹ̀ lẹpo sọgan yin pinpọnhlan gbọn Jehovah dali di mẹhe wé bo sọgan tindo “awuvivo hodidọ tọn” to Jiwheyẹwhe nukọn—ṣigba ehe ma gán yọnbasi, adavo yé do yise hia to avọ́sinsan Jesu tọn mẹ bosọ nọ hodẹ̀ to oyín etọn mẹ.—Efesunu lẹ 3:11, 12.

Whenue mí hodẹ̀ to oyín Jesu tọn mẹ, mí nọ gbọnmọ dali do yise hia to nuhe ewọ wà nado nọgodona hẹndi lẹndai Jiwheyẹwhe tọn lẹ mẹ, e whè gbau to adà atọ̀n delẹ mẹ: (1) Ewọ wẹ “Lẹngbọvu Jiwheyẹwhe tọn lọ,” he yin yíyí do sanvọ́ bo lẹzun dodonu de na jona ylando lẹ tọn. (2) Ewọ yin finfọnsọnku gbọn Jehovah dali bo to nuyiwa todin taidi “yẹwhenọ daho” nado hẹn gbẹtọ lẹ mọaleyi sọn ofligọ lọ mẹ. (3) Ewọ kẹdẹ wẹ yin “aliho lọ” he gblamẹ mí sọgan dọnsẹpọ Jehovah te to odẹ̀ mẹ.—Johanu 1:29; 14:6; Heblu lẹ 4:14, 15.

Mí nọ gbògbéna Jesu eyin mí hodẹ̀ to yinkọ Jesu tọn mẹ. Ewọ jẹna gbégbò mọnkọ, na ojlo Jehovah tọn wẹ yindọ “to oyín Jesu tọn mẹ, kligonu lẹpo dona nọ dẹ́ yìdo . . . , podọ odẹ́ lẹpo dona yigbe to gbangba dọ Jesu Klisti wẹ Oklunọ hlan gigo Jiwheyẹwhe Otọ́ lọ tọn.” (Filipinu lẹ 2:10, 11) Amọ́, nujọnu hugan lọ wẹ yindọ, dẹ̀hiho to oyín Jesu tọn mẹ sọ nọ pagigona Jehovah, yèdọ mẹlọ he ze Visunnu etọn jo do ota mítọn mẹ na dagbe mítọn.—Johanu 3:16.

Na mí nido sọgan mọnukunnujẹ obá he mẹ otẹn he mẹ Jesu yin zizedo yiaga taun jẹ mẹ, Biblu yí tẹnmẹ-yinkọ gọna yinkọ voovo lẹ zan nado dlẹnalọdo Jesu. Ehe zọ́n bọ e ma nọ paṣa mí dọ mí nọ mọ ale mayọnjlẹ lẹ yí sọn nuhe Jesu ko wà, nuhe e to wiwà gọna nuhe e na wà do ota mítọn mẹ to sọgodo lẹ mẹ. (Pọ́n apotin lọ “ Azọngban Titengbe He Jesu Hẹndi”.) Na nugbo tọn, Jesu mọ “oyín lọ he yiaga hú oyín devo lẹpo” yí. * Aṣẹ lẹpo wẹ ko yin nina ẹn to olọn mẹ podọ to aigba ji.—Filipinu lẹ 2:9; Matiu 28:18.

E họnwun dọ mí dona nọ hodẹ̀ to oyín Jesu tọn mẹ eyin mí jlo dọ Jehovah ni sè odẹ̀ mítọn lẹ. (Johanu 14:13, 14) Ṣigba, mí ma na jlo gbede nado nọ dọ dọvọdọ hogbe lọ “to oyín Jesu tọn mẹ” tọn do mọmọ poun, taidi aṣagbe de gba. Etẹwutu?

Lẹnnupọndo apajlẹ ehe ji. Eyin a mọ wekanhlanmẹ de yí sọn ajọwatọ de dè, e sọgan bẹ hodidọ de hẹn to vivọnu, ehe ajọwhé lọ nọ yizan to paa mẹ nado dotana wekanhlanmẹ etọn lẹ, taidi: “Mì kẹalọyi pinpẹn-nutọn-yinyọnẹn mítọn.” Be a na mọ hodidọ ehe di numọtolanmẹ ahundopo tọn he ajọwatọ lọ tindo hlan we tlọlọ nugbonugbo wẹ ya, kavi a na mọ ẹn di aṣagbe de poun he ajọwhé etọn nọ saba yizan nado kanwehlan mẹlẹ? Na nugbo tọn, yinkọ Jesu tọn yiyizan nado dotana odẹ̀ lẹ dona tindo zẹẹmẹ sisosiso na mí hugan hodidọ mẹpipa tọn paa de he ajọwhé lẹ nọ saba yizan to vivọnu wekanhlanmẹ yetọn lẹ tọn. Dile etlẹ biọ dọ mí ni “nọ hodẹ̀ to whepoponu,” mí dona nọ wàmọ po ‘ahun mítọn lẹpo’ po, e ma yin to aliho mọmọ tọn mẹ.—1 Tẹsalonikanu lẹ 5:17; Salmu lẹ 119:145.

Nawẹ a sọgan wagbọn ma nado nọ yí hodidọ lọ “to yinkọ Jesu tọn mẹ” zan taidi aṣagbe vọ́tọ de poun? Ayihamẹlinlẹnpọn do jẹhẹnu Jesu tọn he nọ dọnmẹ taun lẹ ji sọgan gọalọ. Lẹnnupọndo nuhe ewọ ko wà do ota towe mẹ bosọ to gbesisọ nado wà na we lẹ ji. Nọ hodẹ̀ nado do pinpẹn-nutọn-yinyọnẹn towe hia Jehovah bosọ dopẹna ẹn na aliho dagbe hugan he mẹ ewọ yí Visunnu etọn zan te. Dile a to mọwà, a na tindo nujikudo to hẹndi opagbe Jesu tọn ehe mẹ dogọ, dọ: “Eyin mìwlẹ biọ nudepope Otọ́, ewọ na na ẹn mì to oyín ṣie mẹ.”—Johanu 16:23.