Odẹ̀

1 Naegbọn E Do Yin nujọnu?

ODẸ̀. Vude poun to hosọ Biblu tọn lẹ mẹ wẹ nọ fọnjlodotenamẹ bosọ nọ fọ́n tlintlindo dindin dote. Lẹnnupọndo kanbiọ ṣinawe delẹ he mẹlẹ nọ saba kanse gando odẹ̀ go ji; enẹgodo gbọ mí ni gbadopọnna gblọndo he Biblu na. Hosọ ehelẹ yin awuwlena nado gọalọna we na dẹ̀hiho—na a nido jẹ dẹ̀ho ji kavi hẹn odẹ̀ towe lẹ pọnte dogọ.

LẸDO aihọn pé, gbẹtọ lẹ sọn akọ̀ lẹpo po sinsẹ̀n lẹpo po mẹ wẹ nọ hodẹ̀. Yé nọ hodẹ̀ whenue yé to yede ṣo; podọ whenue yé to pipli lẹ mẹ. Yé nọ hodẹ̀ to ṣọṣi lẹ, tẹmpli lẹ, sinagọgu lẹ, masalasi lẹ, po ohọ̀ he mẹ numẹsẹ̀n lẹ tin te po lẹ mẹ. Yé nọ yí ozàn dẹ̀hiho tọn wunmẹ de, ojẹ́ (chapelet), boṣiọ kavi yẹdide lẹ, wema dẹ̀hiho tọn lẹ, kavi hogbe odẹ̀ tọn he yè kàn do owhlẹ pẹvipẹvi delẹ ji bo plá do núgo lẹ zan.

Dẹ̀hiho yin dopo to nuhe hẹn gbẹtọvi lẹ gbọnvona nutogbẹ̀ devo he pò to aigba ji lẹpo mẹ. Na nugbo tọn, mí tindo nususu to kọndopọ mẹ hẹ kanlin lẹ. Mí nọ do hudo núdùdù, jẹhọn po osin po tọn taidi kanlin lẹ. Mí sọ nọ yin jiji, nọ nọgbẹ̀ bo nọ kú, dile e nọ yindo na kanlin lẹ. (Yẹwhehodọtọ 3:19) Etomọṣo, míwu gbẹtọvi lẹ kẹdẹ wẹ nọ hodẹ̀. Naegbọn e do yinmọ?

Vlavo gblọndo he bọawu hugan lọ wẹ yindọ na e to dandan mẹ na mí wutu. Na nugbo tọn, mẹsusu nọ pọ́n dẹ̀hiho hlan di aliho de nado biọ kanṣiṣa mẹ hẹ gbigbọ mayinukundomọ lẹ, yèdọ hẹ nude he yé nọ mọ di wiwe, nude he madopodo. Biblu dohia dọ mí yin didá to aliho de mẹ nado nọ tindo ojlo sinsinyẹn na onú mọnkọ lẹ. (Yẹwhehodọtọ 3:11) To gbèdopo, Jesu Klisti dọmọ: “Ayajẹnọ wẹ mẹhe yọnẹn dọ yé tindo nuhudo gbigbọmẹ tọn lẹ.”—Matiu 5:3.

“Nuhudo gbigbọmẹ tọn lẹ”—be whẹwhinwhẹ́n dagbe devo tin he wutu sinsẹ̀nhọ lẹ po nuyizan sinsẹ̀n-bibasi tọn lẹ po yin awuwlena bọ mẹlẹ sọ nọ hodẹ̀ na gànhiho susu ya? Na nugbo tọn, mẹdelẹ nọ ganjẹ yedetiti go kavi gbẹtọvi hatọ devo lẹ go nado hẹn pekọ wá na nuhudo gbigbọmẹ tọn yetọn lẹ. Ṣigba, be a ma doayi e go dọ obá he mẹ gbẹtọvi lẹ sọgan gọalọnamẹ jẹ do dogbó taun ya? Madogánnọ lẹ wẹ mí, bọ ogbẹ̀ mítọn whègli, podọ mí ma gán mọ sọgodo hlan. Enẹwutu, mẹhe do nuyọnẹn taun, bo dohuhlọn hugan bosọ nọ sinyẹnlin hú mí de janwẹ sọgan hẹn pekọ wá na nuhudo mítọn lẹ. Amọ́ nuhudo gbigbọmẹ tọn tẹlẹ wẹ nọ sisẹ́ mí nado hodẹ̀?

Lẹnnupọndo ehe ji: Be a ko dovivẹnu vẹkuvẹku nado mọ anademẹ, nuyọnẹn kavi gblọndo na kanbiọ delẹ he taidi nuhe zẹ̀ nuyọnẹn gbẹtọvi lẹ tọn go pọ́n ya? Be e ko jọ pọ́n bọ a do hudo homẹmiọnnamẹ tọn to whenue omẹ towe de kú, do hudo anademẹ tọn to whenue a pannukọn nudide he sinyẹn taun de, kavi do hudo jonamẹ tọn to whenue numọtolanmẹ whẹhuhu to tuklado we ya?

Sọgbe hẹ Biblu, whẹwhinwhẹ́n dolido de wẹ ninọmẹ ehe lẹpo yin nado hodẹ̀. Biblu wẹ yin owe he do jide hugan na nuhe dù dẹ̀hiho, podọ e bẹ kandai odẹ̀ he sunnu po yọnnu nugbonọ susu lẹ po ko hò lẹ tọn hẹn. Yé hodẹ̀ nado biọ homẹmimiọn, anademẹ, gọna jonamẹ, podọ nado mọ gblọndo na kanbiọ he gẹdẹ taun lẹ.—Salmu lẹ 23:3; 71:21; Daniẹli 9:4, 5, 19; Habakuku 1:3.

Dile etlẹ yindọ odẹ̀ yetọn lẹ ma nọ yin dopolọ, yé nọ tindo nude to kọndopọ mẹ. Omẹ nugbonọ ehelẹ yọ́n onú titengbe de he yé dona wà na odẹ̀ yetọn lẹ nido yin sisè, yèdọ nude he go mẹsusu nọ gbẹkọ kavi nọ yí nukunpẹvi do pọ́n to aihọn lọ mẹ to egbehe. Nulọ wẹ yindọ yé yọ́n mẹhe yé dona nọ hodẹ̀ hlan lọ.