To owhe tintan ovu whenu ṣie tọn lẹ mẹ, whẹndo ṣie nọ lẹdo de mẹ he sẹpọ Leipzig, to Whèzẹtẹn-waji Allemagne tọn, fie ma dẹn do dogbó otò Tchèque po Pologne po tọn lẹ. Whenue n’do owhe ṣidopo, azọ́n ze otọ́ ṣie yì tògodo bọ whẹndo lọ blebu sẹtẹn hẹ ẹ—jẹnukọn mí yì Brésil, enẹgodo Équateur.

Whenue n’do owhe 14, n’yin didohlan wehọmẹ de he nọ wleawu núdùdù po adọtẹn po tọn na wehọmẹvi lẹ to Allemagne. Na fie mẹjitọ ṣie lẹ te to Hùwaji Amelika tọn dẹn do mi taun wutu, e nọ biọ dọ yẹnlọsu ni vánkan nado penukundo dee go. N’wá to jlòkoko bo nọ ganjẹ dee go taun. N’ma tlẹ nọ kiyana kọdetọn he nuyiwa ṣie lẹ nọ hẹnwa mẹdevo lẹ ji.

Whenue n’do owhe 17, mẹjitọ ṣie lẹ lẹkọwa Allemagne. To bẹjẹeji, n’nọpọ́ hẹ yé to whégbè. Amọ́, na n’nọ dín na nọ jlòkoko wutu, e vẹawuna mi nado gbọṣi anademẹ mẹjitọ ṣie lẹ tọn glọ. Whenue n’do owhe 18, n’tọ́n sọn owhé lọ gbè.

N’wá do magbọjẹ na dee pete bo ma nọ do pekọ, na n’jlo dọ gbẹzan ṣie ni do lẹndai de wutu. Whenue n’ko yí whenu zan do gbeje aliho gbẹninọ tọn po ogbẹ́ voovo lẹ po pọ́n godo, n’wá kudeji dọ nudagbe hugan he n’gán yí ogbẹ̀ ṣie do wà wẹ nado disa yì fi voovo lẹ to planẹti whanpẹnọ ehe pete ji whẹpo gbẹtọvi lẹ ni hù i sudo.

N’tọ́n sọn Allemagne, bo họ̀ zokẹkẹ de bosọ dedo Aflika. Amọ́, e ma dẹn bọ n’dona sọ lẹkọyi Europe nado vọ́ kẹkẹ ṣie jlado. Ojlẹ vude to enẹgodo, n’wá yí huto Portugal tọn de. To finẹ, n’basi dide nado jo zokẹkẹ zinzan do, bo do tọjihun.

N’kọnawudopọ hẹ pipli jọja lẹ tọn de, he to awuwle nado zọ̀n bato he yè nọ kẹ́ alà na de mẹ do dasa Ohù Atlantique tọn. To pipli enẹ mẹ wẹ n’dukosọna Laurie te, he wá lẹzun asi ṣie. Tintan whẹ́, yẹn po e po kùn tọjihun yì lopo Caraïbes tọn lẹ ji. Enẹgodo, mí yì Porto-Rico bo nọ finẹ na ojlẹ de, whẹpo do gọwá Europe. Mí to linlẹn nado mọ bato he yè nọ kẹ́ alà na de bo diọ ẹ zun tọjihun he mẹ mí na nọ nọ̀ poun de. Amọ́, to whenue mí ko dín in na osun atọ̀n poun godo, to ajiji mẹ tito mítọn doalọte whẹ́. N’yin yiylọ nado biọ awhànpa Allemagne tọn mẹ.

Osun 15 wẹ n’yizan hẹ awhànfuntọ tọji tọn Allemagne tọn lẹ. To ojlẹ enẹ mẹ wẹ yẹn po Laurie po wlealọ, bosọ wleawu nado zindonukọn to tito sadidi tọn mítọn mẹ. Ojlẹ vude whẹpo n’do biọ awhànzọ́n mẹ, mí họ̀ bato de he adà delẹ ma to homẹ na. Whenue n’ko to awhànzọ́n wà godo, wẹ vudevude mí wá wleawuna adà he whè to bato lọ go lẹ, bo diọ ẹ zun bato alànọ pẹvi de. Tito mítọn wẹ nado nọ nọ̀ e mẹ bosọ yí i zan na sadidi nado pọ́n planẹti dagbedagbe he ji mí te. To ojlẹ enẹ mẹ pẹẹ—enẹ wẹ whenue n’ko doalọtena awhànzọ́n godo amọ́ bọ bato pẹvi mítọn ma ko sọgbe—wẹ mí dukosọna Kunnudetọ Jehovah tọn lẹ bosọ jẹ Biblu plọn ji.

To tintan whenu, n’ma mọdọ e biọ dọ ma diọ onú kaka de to gbẹzan ṣie mẹ. N’ko wlealọ dai hẹ yọnnu he po yẹn po topọ, bo ko sọ doalọtena azọ̀-nùnù. (Efesunu lẹ 5:5) Gando tito sadidi lẹdo aihọn pé tọn mítọn go, n’lẹndọ gbẹzan mítọn yiyizan nado pọ́n nudida jiawu Jiwheyẹwhe tọn lẹ yin yanwle he sọgbe de.

Amọ́ nado dọ hójọhó, e gbẹ́ biọ dọ ma basi diọdo delẹ, titengbe gando gbẹtọ-yinyin ṣie go. Na n’nọ yigo bosọ nọ ganje dee titi go taun wutu, n’ma yọ́n nudevo de zẹ̀ nugopipe ṣie lẹ po nuhe n’nọ wadotana lẹ po go. Onú dee tọn janwẹ nọ duahunmẹna mi.

To gbèdopo, n’hia Yẹwhehodidọ Osó ji tọn Jesu tọn he diyin lọ. (Matiu, weta 5-7) Tlolo, e dotukla mi taun nado mọ omẹ voovo he Jesu slẹ di ayajẹnọ lẹ. Di apajlẹ, e dọ dọ ayajẹnọ wẹ mẹhe huvẹ po nugbla po to hùhù lẹ. (Matiu 5:6) N’kanse dee lehe mẹhe to nuhudo mẹ de sọgan sọ yin ayajẹnọ do. Dile n’zindonukọn nado to nuplọn, n’wá mọdọ mímẹpo wẹ do nuhudo gbigbọmẹ tọn de, amọ́ mí dona gbọn whiwhẹ dali kẹalọyi dọ mí tindo nuhudo mọnkọ whẹpo do sọgan sùdo etọn. Abajọ Jesu dọ dọ: “Ayajẹnọ wẹ mẹhe yọnẹn dọ yé tindo nuhudo gbigbọmẹ tọn lẹ.”—Matiu 5:3.

To whenue mí ko jẹ Biblu plọn ji to Allemagne godo, yẹn po Laurie po wá sẹtẹn yì France, podọ to nukọn mẹ mí yì Italie. Mí nọ dín Kunnudetọ Jehovah tọn lẹ mọ to fidepope he mí jẹ. Owanyi ahundopo tọn he yé nọ dohia ode awetọ po pọninọ yetọn po yinuwado ji e sisosiso. N’mọdọ whẹndo mẹmẹsunnu tọn de wẹ Kunnudetọ lẹ yin lẹdo aihọn pé nugbonugbo. (Johanu 13:34, 35) To nukọn mẹ, yẹn po Laurie po yí baptẹm bo lẹzun dopo to Kunnudetọ Jehovah tọn lẹ mẹ.

To baptẹm yíyí godo, n’zindonukọn nado to gbẹtọ-yinyin ṣie hẹn pọnte dogọ. Yẹn po Laurie po basi dide nado kùn tọjihun kaka yì huto Aflika tọn, podọ enẹgodo nado gbọn Ohù Atlantique tọn ji yì États-Unis. Dile mí omẹ awe lẹ kẹdẹ to yìyì to bato pẹvi lọ mẹ—to ohù daho he to wlala enẹ ṣẹnṣẹn—wẹ n’mọ obá he mẹ n’whè taun sọ yijlẹdo Mẹdatọ daho mítọn go. Na alọnu ṣie nọ vò taun wutu (to whenuena e yindọ onú kaka de ma tin he yè gán wà to ohù daho enẹ ṣẹnṣẹn), n’yí whenu susu zan do hia Biblu. Kandai he gando gbẹzan Jesu tọn to aigba ji go lẹ wẹ whàn mi to aliho vonọtaun mẹ. Ewọ yin gbẹtọvi pipé de he tindo nugopipe susu hugan nue n’tlẹ gán lẹn, etomọṣo e ma ze ede daga gbede. E ma dín gigo edetiti tọn to gbẹzan etọn mẹ, amọ́ gigo Otọ́ etọn he tin to olọn mẹ tọn.

Whenue n’lẹnayihamẹpọn do apajlẹ he Jesu zedai ji, n’mọdọ yẹnlọsu dona ze Ahọluduta Jiwheyẹwhe tọn do otẹn tintan mẹ to gbẹzan ṣie mẹ, kakati nado nọ lẹn ẹn do haji hẹ yanwle devo he n’jlo na doafọna lẹ poun. (Matiu 6:33) To godo mẹ, yẹn po Laurie po wá jẹ États-Unis, podọ mí magbe nado gbọṣi finẹ bo ze sinsẹ̀n-bibasi mítọn hlan Jiwheyẹwhe do otẹn tintan mẹ.

To dai he n’nọ yigo bosọ nọ ganjẹ dee titi go zẹjlẹgo, e nọ vẹawuna mi nado basi nudide dopo. Amọ́ todin, n’ko mọ asisa nuyọnẹn tọn dejidego de he gán deanana mi. (Isaia 48:17, 18) Gbẹzan ṣie sọ do lẹndai dagbe de todin hugan gbede pọ́n—na n’to Jiwheyẹwhe sẹ̀n bosọ nọ gọalọna mẹdevo lẹ nado plọnnu gando ewọ go.

Nunọwhinnusẹ́n Biblu tọn lẹ yíyí-do-yizan mẹ ko zọ́n bọ yẹn po Laurie po hẹn alọwle mítọn lodo dogọ. Jehovah sọ dona mí bọ mí ji viyọnnu whanpẹnọ de, he mí ko plọn whẹ́n nado yọ́n Jehovah bosọ yiwanna ẹn.

E ma yindọ nulẹpo to yìyì linsinlinsin na mí, taidi tọjihun he yè kẹ́ alà etọn lẹ bọ e to yìyì po awubibọ po de wẹ gba. Amọ́ mí magbe wẹ, dọ po alọgọ Jehovah tọn po, mí ma na hònúpla kavi doalọtena jidide do ewọ go pọ́n gbede.—Howhinwhẹn lẹ 3:5, 6.