Dọdai 4. Owanyi Jọwamọ Tọn Ma Na Tin

“Gbẹtọ lẹ na [tin] matin owanyi hẹnnumẹ tọn.”​—2 TIMOTI 3:1-3, Biblu Gun-Alada

● Chris nọ wazọ́n na pipli de he nọ hoavùn sọta danuwadomẹgo to whẹndo mẹ, to agewaji otò he nọ yin Galles tọn. E dọmọ: “N’flindọ nawe de he wá mí dè gbèdopo bọ yè ko ṣì i hò, sọmọ bọ n’mọ ẹn bo dẹ́n ẹn.” Chris yidogọ dọ: “Yọnnu devo lẹ nọ yin awugblena sinsinyẹn to numọtolanmẹ-liho, sọmọ bọ winyan nọ hù yé nado jlọkọ̀ pọ́nmẹ nukun-sọ-nukun.”

ETẸWẸ KUNNUDENU LẸ DOHIA? To otò Aflika tọn de mẹ, nudi yọnnu 1 to 3 ji wẹ ko yin zinzanhẹ gánnugánnu to ovu whenu. Dodinnanu de he yin bibasi to otò enẹ dopolọ mẹ dohia dọ hugan mado-atọ̀n sunnu lẹ tọn wẹ mọdọ nude ma ylan to e mẹ dọ yè ni hò asi mẹtọn. Ṣigba, e ma yin yọnnu lẹ kẹdẹ wẹ nọ jiya danuwadomẹgo to whẹndo mẹ tọn. Di apajlẹ, to Canada, nudi sunnu 3 to 10 ji wẹ asi yetọn lẹ ko hò kavi ko wadanu do yé go.

LINLẸN TẸWẸ GBAYIPE? Danuwadomẹgo to whẹndo mẹ ma yin egbé sin nude. Nulọ poun wẹ yindọ mẹlẹ to ayidonugo na ẹn to egbehe hugan ojlẹ he wayi lẹ wẹ.

BE NUGBO WẸ ENẸ YA? To owhe agọe tọn lẹ mẹ, mẹsusu dogọ ko wá mọdona owù he danuwadomẹgo to whẹndo mẹ bẹhẹn lẹ. Amọ́, be ehe ko zọ́n bọ aṣa ylankan enẹ depò wẹ ya? Paali, e ma depò. Owanyi jọwamọ tọn fọ́n bo to bubusẹ dogọ.

ETẸWẸ A LẸN? Be nuhe 2 Timoti 3:1-3 dọ lẹ to hẹndi mọ ya? Be mẹsusu nọ ba owanyi he hẹnnumẹ yetọn lẹ dona dohia yé to jọwamọ-liho pò ya?

Todin, aigba he ji mí te wẹ go dọdai atọ́ntọ he sin hẹndi a to mimọ po nukun towe lẹ po lọ gando. Pọ́n nuhe Biblu dọ gando whẹho ehe uwọ go.

[Nudọnamẹ tangan lẹ]

“Kunnudenu lẹ dohia dọ danuwadomẹgo to whẹndo mẹ yin dopo to sẹ́nhẹngba sinsinyẹn he gbẹtọ lẹ ma nọ yawu degbà lẹ mẹ. Yọnnu de sọgan ko yin yasana whla 35 gbọn asu etọn dali, whẹpo do wayi jẹwhẹ na ponọ lẹ.”—HOYIDỌTỌ AZỌ́NWATẸN HE MẸHE JIYA DANUWADOMẸGO TO WHẸNDO MẸ TỌN LẸ NỌ TẸKAN HLAN TỌN, TO OTÒ GALLES TỌN MẸ.