Dọdai 5. Aigba Huhusudo

“[Jiwheyẹwhe na] husudo mẹhe to aigba husudo lẹ.”​—OSỌHIA 11:18.

● Mẹdaho Pirri yin atàn-pàtọ de he nọ nọ̀ gbétatò Kpor tọn mẹ to Nigéria. Ajọ́ etọn jai pete to whenue amì gbigble de kọ̀n do Tọ̀sisa Niger mẹ. E dọmọ: “E hù whèvi mítọn lẹ, hẹn agbasa mílọsu tọn gble, bosọ hẹn otọ̀ mítọn lẹ gble. N’masọ yọ́n fie n’na gbọn do mọ dùdù po nùnù po ba.”

ETẸWẸ KUNNUDENU LẸ DOHIA? Weyọnẹntọ delẹ dọ dọ to whemẹwhemẹ, dihónu tọnu livi 6 daa wẹ nọ yin kinkọ̀n do ohù lẹ mẹ. Linlin lẹ dohia dọ 50 to kanweko ji dihónu enẹlẹ tọn wẹ nọ yin lọba lẹ, ehe nọ yí owhe kanweko susu lẹ whẹpo do nọ dù bo nọ busẹ sọn aimẹ. Gbọnvona dọ gbẹtọ lẹ to aigba lọ hẹnflu, yé sọ to adọkunnu jọwamọ tọn he e bẹhẹn lẹ zan do apà mẹ bọ e to didepo po awuyiya po. Dodinnanu lẹ dohia dọ e gbẹ́ nọ yí owhe dopo e lán osun atọ́n to aigba si, whẹpo ewọ nido vọ́ awuwlena adọkunnu he gbẹtọ lẹ na zan na owhe dopo. Linlin Australie tọn lọ Sydney Morning Herald dọmọ: “Eyin sọha gbẹtọ lẹ tọn gọna nuhe yé na dù tọn fọ́n bo to jijideji, be kakajẹ 2035 mí na do hudo Aigba awe tọn nado hẹn mẹlẹpo.”

LINLẸN TẸWẸ GBAYIPE? Gbẹtọvi lẹ ma nọ ba ayiha de pò. Mí sọgan mọ pọngbọ na nuhahun he tin lẹ bo whlẹn aigba lọ gán.

BE NUGBO WẸ ENẸ YA? Mẹsusu gọna pipli susu lẹ wẹ ko vánkan nado dọ̀n ayidonugo mẹlẹ tọn wá nuhahun he to lẹdo hẹngble lẹ ji. Etomọṣo, gbẹtọ lẹ gbẹ́ to aigba hẹnflu to aliho he ylan dogọ mẹ.

ETẸWẸ A LẸN? Be e biọ dọ Jiwheyẹwhe ni dademẹ bo whlẹn planẹti mítọn he to yinyin huhusudo lọ—kẹdẹdile ewọ dopà nado wà do ya?

Gbọnvona dọdai atọ́n he mí ṣẹṣẹ gbadopọnna lẹ, Biblu sọ dọ dọdai nujijọ dagbedagbe delẹ tọn he gando azán godo tọn lẹ go. Pọ́n apajlẹ dopo to dọdai ṣidopotọ he bọdego mẹ.

[Nudọnamẹ tangan lẹ]

“E di na mi dọ n’yí jipa whanpẹnọ he to asi e, do diọ lẹdo de he gọ́ na dihónu lẹ wẹ nkọ.”—ERIN TAMBER, HE NỌ NỌ̀ CÔTE DU GOLFE, TO ÉTATS-UNIS, TO HODỌ GANDO AMÌ HE HẸNNUGBLE TO 2010 TO GOLFE DU MEXIQUE LỌ GO.

[Apotin]

Be Jiwheyẹwhe Wẹ Zọ́n Ya?

Na Biblu ko dọ jẹnukọn dọ ninọmẹ ylankan he mí to mimọ to egbehe lẹ na wá aimẹ wutu, be enẹ dohia dọ Jiwheyẹwhe wẹ zọ́n bọ onú ehelẹ do to jijọ ya? Be ewọ wẹ nọ hẹn yajiji wá mí ji ya? A sọgan mọ gblọndo he họnwun lẹ na kanbiọ ehelẹ to weta 11tọ owe lọ Etẹwẹ Biblu Plọn Mí Taun? tọn mẹ, ehe Kunnudetọ Jehovah tọn lẹ zinjẹgbonu.

 [Asisa Yẹdide lẹ Tọn]

États-Unis Coast Guard photo