1, 2. (a) Naegbọn hosise dogbọn mẹhe diyin de dali ma zẹẹmẹdo dọ hiẹ ko yọ́n mẹlọ nugbonugbo gba? (b) Linlẹn voovo tẹwẹ gbẹtọ lẹ tindo gando Jesu go?

GBẸTỌ he diyin susu wẹ tin to aihọn mẹ. Mẹdelẹ yin yinyọnẹn taun to lẹdo, tòdaho, kavi to otò yetọn titi mẹ. Mẹdevo lẹ yin yinyọnẹn lẹdo aihọn pé. Ṣigba, yinkọ mẹhe diyin de tọn yinyọnẹn poun ma zẹẹmẹdo dọ hiẹ ko yọ́n mẹlọ nugbonugbo gba. E ma zẹẹmẹdo dọ hiẹ yọ́n zẹẹmẹ gigọ́ gando ninọmẹ etọn po gbẹtọ he nkọtọn ewọ yin taun po go gba.

² Gbẹtọ lẹ lẹdo aihọn pé ko sè nude gando Jesu Klisti go, dile etlẹ yindọ ewọ ko nọgbẹ̀ to nudi owhe 2 000 die. Etomọṣo, linlẹn voovo wẹ gbẹtọ lẹ tindo gando mẹhe nkọtọn Jesu yin taun go. Mẹdelẹ nọ dọ dọ gbẹtọ dagbe de poun wẹ ewọ yin. Mẹdevo lẹ nọ dọ dọ yẹwhegán de poun wẹ ewọ. Ṣogan mẹdelẹ yise dọ Jiwheyẹwhe wẹ Jesu yin bo dona yin sinsẹ̀n-basina. Be nugbo wẹ dọ ewọ dona yin sinsẹ̀n-basina ya?

3. Naegbọn e do yin onú titengbe de na we nado yọ́n nugbo lọ dogbọn Jesu dali?

³ Onú titengbe de wẹ e yin dọ hiẹ ni yọ́n nugbo lọ gando Jesu go. Etẹwutu? Na Biblu dọmọ: ‘Ehe wẹ ogbẹ̀ madopodo, dọ yé ni yọ́n hiẹ ṣokẹdẹ Jiwheyẹwhe nugbo, podọ ewọ mẹhe hiẹ dohlan, yèdọ Jesu Klisti.’ (Johanu 17:3) Mọwẹ, nugbo lọ yinyọnẹn gando Jehovah Jiwheyẹwhe po Jesu Klisti po go  sọgan dekọtọn do ogbẹ̀ madopodo to paladisi aigba ji tọn de mẹ. (Johanu 14:6) Humọ, Jesu ze apajlẹ dagbe dai na mí gando lehe mí sọgan nọgbẹ̀ bo na nọ yinuwa hẹ mẹdevo lẹ do go. (Johanu 13:34, 35) To weta tintan owe ehe tọn mẹ, mí dọhodo nuhe yin nugbo lọ taun gando Jiwheyẹwhe go ji. Todin mì gbọ mí ni gbadopọnna nuhe Biblu plọn mí taun gando Jesu Klisti go.

4. Etẹwẹ tẹnmẹ-yinkọ lọ lẹ “Mẹssia” podọ “Klisti” zẹẹmẹdo?

⁴ Ojlẹ dindẹn whẹpo Jesu do yin jiji wẹ Biblu ko dọ dọdai wiwá mẹhe Jiwheyẹwhe na dohlan taidi Mẹssia, kavi Klisti tọn. Tẹnmẹ-yinkọ lọ lẹ “Mẹssia”  (heyin hogbe Heblugbe tọn) podọ “Klisti” (heyin hogbe Glẹkigbe tọn) zẹẹmẹdo “Mẹyiamisisadode.” Mẹhe yin opagbe etọn do ehe na yin yiyiamisisadode, enẹ wẹ nado yin dide gbọn Jiwheyẹwhe dali do otẹn vonọtaun de mẹ. To weta owe ehe tọn he na bọdego lẹ mẹ mí na wá plọn nususu dogọ gando otẹn titengbe Mẹssia lọ tọn to hẹndi dọdai Jiwheyẹwhe tọn lẹ tọn mẹ go. Mí nasọ plọnnu dogbọn dona he Jesu sọgan hẹnwa na mí todin lẹ dali. Ṣigba, whẹpo Jesu do yin jiji, e họnwun dọ mẹsusu na ko nọ kanse dọ, ‘Mẹnu wẹ na wá yin Mẹssia lọ?’

5. Etẹwẹ devi Jesu tọn lẹ yọnẹn hezeheze dọ ewọ yin?

⁵ To owhe kanweko tintan W.M., devi Jesu Nazalẹti tọn lẹ yọnẹn hezeheze dọ ewọ wẹ yin Mẹssia dopagbe lọ. (Johanu 1:41) Dopo to devi lọ lẹ mẹ, he nọ yin Simọni Pita, dọna Jesu to gbangba dọmọ: “Hiẹ wẹ Klisti lọ.” (Matiu 16:16) Etomọṣo, nawẹ devi enẹlẹ—podọ mílọsu he to gbẹnọ todin lẹ sọgan—kudeji dọ Jesu wẹ Mẹssia dopagbe lọ nugbo gbọn?

6. Na apajlẹ de nado do lehe Jehovah ko gọalọna nugbonọ lẹ nado yọ́n Mẹssia lọ gbọn hia.

⁶ Yẹwhegán Jiwheyẹwhe tọn he nọgbẹ̀ jẹnukọnna aigba ji wiwá Jesu tọn lẹ dọ dọdai nususu tọn gando Mẹssia lọ go. Zẹẹmẹ gigọ́ ehelẹ na gọalọna mẹdevo lẹ nado yawu yọ́n ewọ. Mí sọgan basi nuyijlẹdonugo lọ to aliho ehe mẹ: Mí ni dọ dọ hiẹ yin didohlan mọto-glintẹn kavi pinpán-glintẹn kavi agahun-jlẹtẹn de nado yì plan mẹhe hiẹ ma ko yọnẹn pọ́n gbede de. Be e ma na bọawu hugan eyin mẹde basi zẹẹmẹ kleun de na we gando mẹlọ go ya? Mọdopolọ, Jehovah gbọn yẹwhegán etọn lẹ dali bo basi zẹẹmẹ gigọ́ gando nuhe Mẹssia lọ na wà po nuhe ewọ na tindo numimọ etọn lẹ po go. Hẹndi dọdai susu ehelẹ tọn na gọalọna nugbonọ lẹ nado yọ́n ewọ hezeheze.

7. Dọdai awe tẹlẹ go wẹ hiẹ sọgan donù to dọdai he yin hinhẹndi to kọndopọmẹ hẹ Jesu lẹ mẹ?

⁷ Lẹnnupọndo apajlẹ awe poun ji. Tintan, hugan owhe 700  jẹnukọn, yẹwhegán Mika dọ dọdai dọ Mẹssia dopagbe lọ na yin jiji to Bẹtlẹhẹm, heyin tòpẹvi de to aigba Juda tọn ji. (Mika 5:2) Fie wẹ Jesu yin jiji te taun? Matin ayihaawe, to tòpẹvi enẹ lọ mẹ wẹ. (Matiu 2:1, 3-9) Awetọ, to owhe kanweko susu jẹnukọn, dọdai lọ heyin kinkàndai to Daniẹli 9:25 mẹ dlẹnalọdo owhe lọ taun he mẹ Mẹssia lọ na sọawuhia te—enẹ wẹ owhe 29 W.M. * Hẹndi dọdai ehelẹ po devo lẹ po tọn dohia dọ Jesu wẹ yin Mẹssia dopagbe lọ.

8, 9. Kunnudenu he do Jesu hia taidi Mẹssia lọ tẹwẹ sọawuhia hezeheze to baptẹm etọn whenu?

⁸ Kunnudenu dogọ lẹ he dohia dọ Jesu wẹ yin Mẹssia lọ sọawuhia hezeheze sẹpọ vivọnu owhe 29 W.M. tọn. Owhe enẹ mẹ wẹ Jesu yì Johanu Baptizitọ dè nado yin bibaptizi to Otọ̀ Jọdani tọn mẹ. Jehovah ko dopagbe ohia de tọn na Johanu he na gọalọna ẹn nado yọ́n Mẹssia lọ. Johanu mọ ohia lọ to baptẹm Jesu tọn whenu. Lehe Biblu dọ nuhe jọ lọ gbọn die: “Podọ Jesu, whenuena yè ko baptizi na ẹn, e tọ́n jẹage to afọdoponẹji sọn osin mẹ: bo pọ́n, olọn hùn hlan ẹn, e mọ [gbigbọ] Jiwheyẹwhe tọn jẹte di apoe bo jẹ do e ji: bo pọ́n, ogbè de sọn olọn lẹ mẹ, didọmọ, Ehe wẹ Visunnu ṣie; Mẹvivẹ ṣie, mẹhe mẹ homẹ ṣie vivi te tlala.” (Matiu 3:16, 17) To whenuena Johanu mọ bosọ sè nuhe jọ, e họnwun na ẹn hezeheze dọ Jiwheyẹwhe dè wẹ Jesu wá sọn. (Johanu 1:32-34) To ojlẹ he mẹ gbigbọ Jiwheyẹwhe tọn, kavi huhlọn yido wazọ́n etọn, yin kinkọ̀n jẹgbonu do e ji, to gbènẹgbè wẹ Jesu lẹzun Mẹssia, kavi Klisti, mẹlọ heyin dide nado yin Nukọntọ podọ Ahọlu.—Isaia 55:4.

⁹ Hẹndi dọdai Biblu tọn lẹ tọn po kunnudenu Jehovah Jiwheyẹwhe lọsu titi tọn po dohia hezeheze dọ Jesu wẹ Mẹssia dopagbe lọ. Ṣigba Biblu na gblọndo kanbiọ titengbe awe devo lẹ tọn gando Jesu Klisti go: Fie wẹ e wá sọn podọ omẹ nankọtọn wẹ ewọ yin?

10. Etẹwẹ Biblu plọn mí dogbọn tintin Jesu tọn whẹpo e do wá aigba ji dali?

¹⁰ Biblu plọn mí dọ Jesu ko nọgbẹ̀ pọ́n to olọn mẹ whẹpo do wá aigba ji. Mika dọ dọdai dọ Mẹssia na yin jiji to Bẹtlẹhẹm bosọ dọ dọ Ewọ wá sọn ojlẹ “hoho” tọn mẹ. (Mika 5:2) To nujijọ susu whenu, Jesu lọsu dọ dọ emi ko nọgbẹ̀ to olọn mẹ pọ́n whẹpo do yin jiji di gbẹtọvi de. (Johanu 3:13; 6:38, 62; 17:4, 5) Taidi nudida gbigbọnọ de to olọn mẹ, Jesu tindo haṣinṣan vonọtaun de hẹ Jehovah.

11. Nawẹ Biblu dohia dọ Jesu wẹ yin Ovi họakuẹ hugan Jehovah tọn gbọn?

¹¹ Jesu wẹ yin Ovi Jehovah tọn he họakuẹ hugan—podọ kunnudenu lẹ do enẹ hia. Ewọ yin yiylọdọ “ovi plọnji to yé he yè dá lẹpo mẹ,” na ewọ wẹ yin nudida Jiwheyẹwhe tọn tintan. * (Kọlọsinu lẹ 1:15) Onú devo tin he sọ hẹn ẹn yin Ovi vonọtaun. Ewọ wẹ yin “Ovi detọ́n etọn dopo akàn” lọ. (Johanu 3:16) Ehe dohia dọ Jesu kẹdẹ wẹ yin didá tlọlọ gbọn Jiwheyẹwhe dali. Podọ Jesu dopo kẹdẹ wẹ Jiwheyẹwhe yizan to whenuena E dá onú devo he pò lẹpo. (Kọlọsinu lẹ 1:16) Podọ ga, Jesu yin yiylọdọ “Ohó lọ.” (Johanu 1:14) Ehe dohia dọ ewọ yin hoyidọtọ Jiwheyẹwhe tọn, matin ayihaawe ewọ nọ yin yiyizan nado dowẹn bo na nudọnamẹ ovi Otọ́ lọ tọn devo lẹ, yèdọ ovi gbigbọmẹ tọn lẹ po gbẹtọvi lẹ po.

12. Nawẹ mí wagbọn do yọnẹn dọ Ovi plọnji lọ ma sọzẹn hẹ Jiwheyẹwhe?

¹² Be Ovi plọnji lọ sọzẹn hẹ Jiwheyẹwhe, dile mẹsusu yise do wẹ ya? E ma yin nuhe Biblu plọn mí niyẹn gba. Dile mí mọ to hukan he jẹnukọn mẹ do, Ovi lọ lọsu yin didá wẹ. Enẹwutu, e họnwun dọ ewọ tindo bẹjẹeji, ṣigba Jehovah  Jiwheyẹwhe ma tindo bẹjẹeji kavi opodo gba. (Psalm 90:2) Ovi plọnji dopo akàn lọ ma tẹnpọn pọ́n gbede nado sọzẹn hẹ Otọ́ etọn gba. Biblu plọn mí to aliho he họnwun mẹ dọ Otọ́ lọ klohu Ovi lọ. (Johanu 14:28; 1 Kọlintinu lẹ 11:3) Jehovah dopo kẹdẹ wẹ yin “Jiwheyẹwhe Ganhunupo.” (Gẹnẹsisi 17:1) Enẹwutu, mẹdepope ma sọzẹn hẹ ewọ gba. *

13. Etẹ dọ wẹ Biblu te to whenuena e dlẹnalọdo Ovi lọ taidi “apajlẹ Jiwheyẹwhe tọn he yè ma mọ”?

¹³ Jehovah po Ovi plọnji etọn po ko duvivi haṣinṣan pẹkipẹki de tọn na owhe liva susu—yèdọ ojlẹ dindẹn whẹpo olọn he gọ́ na sunwhlẹvu lẹ po aigba po do yin didá. Lehe owanyi he yé tindo na ode awetọ na ko siso do sọ! (Johanu 3:35; 14:31) Ovi yiwanna ehe tin taidi Otọ́ etọn. Enẹ wẹ zọ́n bọ Biblu dlẹnalọdo Ovi lọ taidi “apajlẹ Jiwheyẹwhe tọn he yè ma mọ.” (Kọlọsinu lẹ 1:15) Dile ovi de sọgan di otọ́ etọn to aliho voovo lẹ mẹ, mọwẹ Ovi olọn mẹ tọn ehe do jẹhẹnu Otọ́ etọn tọn lẹ hia to gigọ́mẹ do.

14. Nawẹ Ovi dopo akàn Jehovah tọn wá yin jiji taidi gbẹtọ de gbọn?

¹⁴ Ovi dopo akàn Jehovah tọn desọn ojlo mẹ nado tọ́nsọn olọn mẹ bo wá aigba ji bosọ nọgbẹ̀ taidi gbẹtọ de. Ṣigba hiẹ sọgan kanse dọ, ‘Nawẹ e yọnbasi na nudida gbigbọnọ de nado yin jiji taidi gbẹtọ de gbọn?’ Nado sọgan basi ehe, Jehovah wà azọ́njiawu de. E diọtẹnna ogbẹ̀ Ovi plọnji etọn tọn sọn olọn mẹ do vidọ̀ awhli alọji Juvi de he nọ yin Malia tọn mẹ. Otọ́ gbẹtọvi tọn depope ma yin yiyizan gba. Gbọnmọ dali Malia ji visunnu pipé de bo ylọ oyín etọn dọ Jesu.—Luku 1:30-35.

15. Naegbọn mí sọgan dọ dọ gbọn Jesu dali wẹ mí wá yọ́n Jehovah taun?

¹⁵ Nuhe Jesu dọ bo wà to whenuena e tin to aigba ji lẹ gọalọna mí nado yọ́n ewọ ganji. Humọ, gbọn Jesu dali wẹ mí wá  yọ́n Jehovah taun. Naegbọn e do yinmọ? Flindọ Ovi ehe yin apajlẹ pipé Otọ́ etọn tọn. Enẹ wẹ zọ́n bọ Jesu dọna dopo to devi etọn lẹ mẹ dọmọ: “Ewọ he ko mọ mi ko mọ Otọ́.” (Johanu 14:9) Owe Biblu tọn ẹnẹ heyin yiylọdọ owe Wẹndagbe tọn lẹ—Matiu, Malku, Luku, po Johanu po—dọ nususu na mí gando ogbẹ̀, nuwiwa, po jẹhẹnu Jesu Klisti tọn lẹ po go.

16. Owẹ̀n tẹ ji wẹ Jesu zinnudo jẹnukọn, podọ fie wẹ nuplọnmẹ etọn lẹ wá sọn?

¹⁶ Jesu yin yinyọnẹn taun taidi “Mẹplọntọ.” (Johanu 1:38; 13:13) Etẹwẹ ewọ plọnmẹ? Jẹnukọn whẹ́, owẹ̀n etọn yin “wẹndagbe ahọludu tọn”—enẹ wẹ, Ahọluduta Jiwheyẹwhe tọn, gandudu olọn mẹ tọn he na dugán do aigba blebu ji bo na hẹn dona susugege wá na gbẹtọvi tonusetọ lẹ. (Matiu 4:23) Owẹ̀n mẹnu tọn wẹ e plọnmẹ? Jesu lọsu dọmọ: “Nuplọnmẹ ṣie ma yin ṣie gba, ṣigba mẹhe do mi hlan tọn wẹ,” podọ mẹlọ wẹ Jehovah. (Johanu 7:16) Jesu yọnẹn dọ ojlo Otọ́ etọn tọn wẹ yindọ gbẹtọ lẹ ni sè wẹndagbe Ahọluduta lọ tọn. Mí na plọnnu susu dogọ gando Ahọluduta Jiwheyẹwhe tọn po nuhe e na wà na mí lẹ po go to Weta 8tọ mẹ.

17. Ofi tẹlẹ wẹ Jesu plọnmẹ te, podọ naegbọn e do yí ede zan tlala nado plọnnu mẹdevo lẹ?

¹⁷ Fie wẹ Jesu plọn gbẹtọ lẹ te? Fidepope he e mọ yé te—to tòhò lẹ mẹ podọ to tòdaho lẹ mẹ, to gbétatò lẹ mẹ, to ahi lẹ mẹ, podọ to owhé yetọn lẹ gbè. Jesu ma nọ donukun dọ gbẹtọ lẹ ni wá emi dè. Ewọ wẹ nọ yì yé dè. (Malku 6:56; Luku 19:5, 6) Naegbọn Jesu yí ede zan jẹ obá enẹ mẹ bo yí whenu etọn susu zan nado to yẹwhehodọ bosọ to mẹplọn? Na nuhe Jiwheyẹwhe jlo dọ e ni wà lọ niyẹn. Jesu nọ wà ojlo Otọ́ etọn tọn to whepoponu. (Johanu 8:28, 29) Ṣigba whẹwhinwhẹ́n devo tin he wutu e do dọyẹwheho. E nọ tindo awuvẹmẹ na gbẹtọgun he wá e dè lẹ. (Matiu 9:35, 36) Nukọntọ sinsẹ̀n tọn yetọn lẹ he dona to nugbo lọ plọn yé gando Jiwheyẹwhe po lẹndai etọn lẹ po go lẹ ko gbẹ́ yé dai. Jesu yọnẹn dọ gbẹtọ lẹ tindo nuhudo taun nado sè owẹ̀n Ahọluduta lọ tọn.

18. Jẹhẹnu Jesu tọn tẹlẹ wẹ hiẹ yiwanna taun?

 ¹⁸ Jesu yin homẹdagbenọ bo nọ vẹawumẹ taun. Enẹ zọ́n bọ mẹdevo lẹ nọ mọdọ ewọ yọ́n dọnsẹpọ bosọ jọmẹ. Ovi lẹ tlẹ nọ voawu eyin yé to e dè. (Malku 10:13-16) Jesu ma nọ homẹnukuntapọ́n. E gbẹwanna oklọ po mawadodo po. (Matiu 21:12, 13) To ojlẹ de mẹ he sisi ma nọ yin nina yọnnu lẹ bọ yé masọ nọ tindo jlọjẹ sọmọ, ewọ yinuwa hẹ yé po yẹyi po. (Johanu 4:9, 27) Whiwhẹnọ taun wẹ Jesu yin. To nujijọ de whenu, e klọ́ afọ na apọsteli etọn lẹ, yèdọ devizọn de he afanumẹ lẹ wẹ nọ saba wà.

19. Apajlẹ tẹwẹ dohia dọ nuhudo mẹdevo lẹ tọn nọ duahunmẹna Jesu?

¹⁹ Nuhudo mẹdevo lẹ tọn nọ duahunmẹna Jesu. Ehe sọawuhia hezeheze to whenuena e hẹnazọ̀ngbọna gbẹtọ lẹ to azọ́njiawu-liho gbọn huhlọn gbigbọ Jiwheyẹwhe tọn gblamẹ. (Matiu 14:14) Di apajlẹ, dawe he to pòzọ̀n jẹ de wá Jesu dè bo dọmọ: “Eyin hiẹ jlo, hiẹ sọgan hẹn mi zun wiwe.” Jesu lọsu titi sè vivẹ́ awufiẹsa po yajiji dawe ehe tọn po to  lanmẹ. Lẹblanu whàn Jesu bọ e dlẹnalọ etọn bo doalọ dawe lọ go, bo dọmọ: “Yẹn jlo, hiẹ ni zun wiwe.” Podọ dawe lọ sọ jẹgangan! (Malku 1:40-42) Be hiẹ sọgan yí nukun homẹ tọn do pọ́n numọtolanmẹ he dawe enẹ na ko tindo ya?

20, 21. Nawẹ Jesu ze apajlẹ tonusise mlẹnmlẹn na Jiwheyẹwhe tọn dai gbọn?

²⁰ Jesu ze apajlẹ dagbe hugan dai to tonusise mlẹnmlẹn na Jiwheyẹwhe mẹ. E gbọṣi nugbonọ-yinyin mẹ hlan Otọ́ olọn mẹ tọn etọn to ninọmẹ alọpa lẹpo mẹ mahopọnna nukundiọsọmẹ po yajiji wunmẹ lẹpo po. Jesu gbọn nujikudo dali bo tindo kọdetọn dagbe to avunteninọ sọta mẹwhlepọn Satani tọn lẹ mẹ. (Matiu 4:1-11) To ojlẹ de mẹ, delẹ to hẹnnumẹ Jesu tọn lẹ mẹ ma tindo yise to ewọ mẹ, yé tlẹ dọ dọ “tamẹ etọn gble”. (Malku 3:21) Ṣigba Jesu ma na dotẹnmẹ yé nado hẹn ẹn gbọjọ; e tẹdo azọ́n Jiwheyẹwhe tọn wiwà go. Mahopọnna danú didọ po mẹzunzun ehe lẹpo po, Jesu yin mawazẹjlẹgonọ, bo ma tẹnpọn nado  gbleawuna agọjẹdomẹtọ etọn lẹ pọ́n gbede.—1 Pita 2:21-23.

²¹ Jesu yin nugbonọ kakajẹ okú—yèdọ okú kanyinylan po awufiẹsa tọn po to alọ kẹntọ etọn lẹ tọn mẹ. (Filippinu lẹ 2:8) Lẹnnupọndo nuhe ewọ doakọnna to azán he gbọngodo to gbẹzan etọn taidi gbẹtọvi de mẹ lẹ ji. Ewọ yin wiwle, kunnudetọ lalonọ lẹ sawhẹdokọna ẹn, whẹdatọ mawadodonọ lẹ gblewhẹdo e, gbẹtọgun bẹwlunọ de ṣàn ẹn kò, podọ awhànfuntọ lẹ sayana ẹn. E yin whiwhedo atin go, bọ e gbọ̀ gbigbọ etọn godo tọn, bo dawhá jẹgbonu dọmọ: “E vọ̀ [kavi e ko yin wiwadotana].” (Johanu 19:30) Ṣigba, to azán atọ̀ntọ to okú Jesu tọn godo, Otọ́ olọn mẹ tọn etọn fọ́n ẹn do ogbẹ̀ gbigbọmẹ tọn mẹ whladopo dogọ. (1 Pita 3:18) To osẹ kleun delẹ godo, e lẹkọyi olọn mẹ. To finẹ, e “sinai to adusilọ Jiwheyẹwhe tọn mẹ” bo nọtepọn ojlẹ lọ he mẹ huhlọn ahọlu-yinyin tọn na yin nina ẹn.—Heblu lẹ 10:12, 13.

22. Etẹwẹ Jesu wadotana gbọn nugbonọ-yinyin etọn kakajẹ okú dali?

²² Etẹwẹ Jesu wadotana gbọn nugbonọ-yinyin kakajẹ okú etọn dali? Na taun tọn, okú Jesu tọn hùn dotẹnmẹ dote na mí nado tindo ogbẹ̀ madopodo to paladisi mẹ to aigba ji, to kọndopọmẹ hẹ lẹndai dowhenu Jehovah tọn. Lehe okú Jesu tọn hẹn enẹ yọnbasi gbọn na yin hodọdeji to hosọ he bọdego mẹ.