Biblu dọ dọ Satani to “aihọn lẹpo klọ.” (Osọhia 12:9) Satani po aovi etọn lẹ po ma jlo dọ mí ni yi Oho Jiwheyẹwhe tọn, Biblu sè gba. Yé nọ tẹnpọn nado hẹn gbẹtọvi lẹ yise dọ oṣiọ lẹ tin to ogbẹ̀ to fidevo to lẹdo gbigbọnọ de mẹ. Mì gbọ mí ni pọn lehe yé nọ wà mọ gbọn.

Sinsẹ̀n susu lẹ nọ plọnmẹ dọ gbẹtọvi lẹpo tindo alindọn de he nọ juyì lẹdo gbigbọnọ de mẹ to okú agbasalan tọn de godo. Yé nọ dọ dọ agbasa lọ nọ kú ṣigba alindọn ma nọ kú gba. Humọ, yé zinnudeji dọ alindọn ma sọgan kú gba, dọ jọmaku de wẹ e yin.

Ṣigba Oho Jiwheyẹwhe tọn ma plọnmẹ enẹ gba. Biblu dohia dọ omẹ lọ lọsu na ede wẹ yin alindọn lọ, e ma yin onú devo depope to omẹ lọ homẹ gba. Di dohia, to zẹẹmẹ bibasi do dida Adam tọn ji, Biblu dọmọ: “Oklunọ [“Jehovah,” NW] Jiwheyẹwhe do gbẹtọ sọn kógudu aigba tọn mẹ: bo gbọ̀ do awọ̀ntinslo etọn lẹ mẹ gbigbọ ogbẹ̀ tọn: gbẹtọ sọ lẹzùn alindọn gbẹ̀tenọ.” (Gẹnẹsisi 2:7) Enẹwutu Adam ma yin nina alindọn de gba; ewọ lọsu wẹ alindọn de.

Kanlin lẹ lọsu yin yiylọ dọ alindọn lẹ ga.—Gẹnẹsisi 1:20, 21, 24, 30.

 To whenuena hogbe Biblu tọn lọ “alindọn” zẹẹmẹdo omẹ lọ lọsu, e ma dona paṣa mí nado plọn dọ alindọn lẹ sọgan kú podọ nọ kú gba. Owe wiwe lẹ dọmọ:

• “Alindọn he wàylando, é na kú.”—Ezekiẹli 18:4.

• “Podọ Samsọni sọ zindonukọn nado dọmọ: ‘Gbọ alindọn ṣie ni kú po Filistini lẹ po. NW’”—Whẹdatọ 16:30.

• “Be é jẹ nado wà dagbe to gbọjẹzángbè, kavi nado wà oylan? nado whlẹn ogbẹ̀ (Alindọn NW ) de kavi nado hù i sudo?”—Malku 3:4.

Wefọ devo lẹ dohia dọ alindọn lẹ sọgan yin hùhùsudo (Gẹnẹsisi 17:14), yin hùhù gbọn ohi dali (Joṣua 10:37), doalọ gbigbọ tọn te (Job 7:15), kútọ (Jona 2:5). Gbọnmọ, alindọn nọ kú.

Eyin hiẹ hia Biblu sọn bẹjẹeji jẹ vivọnu, hiẹ ma na mọ hodidọ lọ “jọmaku alindọn tọn” gbede pọ́n gba. Alindọn gbẹtọvi lẹ tọn ma yin gbigbọ de gba. Nuplọnmẹ jọmaku-yinyin alindọn tọn mayin nuplọnmẹ Biblu tọn de gba. Nuplọnmẹ Satani po aovi etọn lẹ po tọn wẹ. Jehovah gbẹwanna lalo sinsẹ̀n tọn lẹpo.—Howhinwhẹn lẹ 6:16-19; 1 Timoti 4:1, 2.

Aliho devo he mẹ Satani nọ hẹn gbẹtọvi lẹ buali te wẹ yin gbọn kẹnsinuwiwa lẹ dali. Kẹnsinọ de wẹ yin mẹde he tindo nugopipe nado mọ wẹndomẹ lẹ yí tọlọlọ sọn lẹdo gbigbọnọ de mẹ. Sọha suhugan gbẹtọ lẹ tọn, gọna kẹnsinnọ lẹ lọsu ga, yise dọ wẹndomẹ ehe lẹ nọ wá sọn gbigbọ oṣiọ lẹ tọn de. Ṣigba dile mí ko mọ do sọn Biblu mẹ, ehe ma yọnbasi gba.—Yẹwhehodọtọ 9:5, 6, 10.

To whelọnu lo, mẹnu de wẹ owẹ̀ndomẹ ehelẹ nọ wá sọn? Aovi lẹ lọsu de wẹ! Aovi lẹ penugo nado gbadopọnna mẹde to whenuena ewọ gbẹsọ tin to ogbẹ̀; yé yọ́n lehe omẹ lọ nọ dọho do, awusọhia etọn, nuhe e nọ wà, po nuhe ewọ yọnẹn po. Enẹwutu é bọawu na yé nado hodo apajlẹ mẹhe ko kú de tọn.—1 Samuẹli 28:3-19.

Aliho devo he mẹ Satani nọ ze lalo daga dogbọn oṣiọ lẹ dali wẹ yin dogbọn otàn lalo lẹ gblamẹ. Otàn mọnkọtọn lẹ nọ saba klan gbẹtọ lẹ dovo sọn nugbo Biblu tọn mẹ.—2 Timoti 4:4.

To mẹyugbeji (Afrique) otan gblo susu lẹ wẹ tin dogbọn gbẹtọ  lẹ dali he yè mọ to ogbẹ̀ to okú yétọn godo. E họnwun dọ, omẹ mọnkọtọn lẹ nọ yin mimọ to fie dẹn talala do fie omẹ lọ nọ nọ. Ṣigba kanse dewe: ‘Be e sọgbehẹ lẹnpọn dagbe dọ eyin omẹ de tindo huhlọn nado lẹkọwá sọn okú mẹ, ewọ na lẹkọyi nọtẹn de he dẹn talala do whẹndo etọn po họntọn etọn lẹ po mẹ ya?’

Humọ, be e ma na yindọ omẹ he yin mimọ lọ taidi mẹhe di omẹ he ko kú lọ poun ya? Di dohia, dezọ́nwatọ Klistiani awe he to yẹwhehodọ to awa otò de tọn ji doayi dawe yọnhonọ de he hodo yé na ganhiho delẹ go. To whenuena yé kanhosè é, yé yin hinhẹn nado mọnukunjẹ e go dọ dawe lọ lẹndọ dopo to devizọnwatọ lọ lẹ mẹ yin nọvisunnu etọn he ko kú to owhe delẹ mẹ wayi wẹ sin. Na nugbo tọn, nuhe dọ é te ma sọgbe gba, ṣigba é gbẹ nado yise dọ nuhe emi lẹn jẹagọ. Lẹnnupọn do otan he dawe yọnhonọ lọ na dọ hlan họntọn etọn lẹ po kọmẹnu etọn lẹpo ji!

Matin ayihaawe hiẹ yọnẹn dogbọn nudabla lẹ he gbẹtọ lẹ ko mọ, sè, kavi kudlọ deji dali. Numimọ he hugan huhlọn gbẹ tọvi tọn nẹlẹ nọ saba dobuna enẹnọ he tindo yé lẹ. Marein, mẹhe nọ Wheyihọ mẹyugbeji (Afrique) tọn, nọ saba se ogbè onọdahó etọn he ko kú tọn he nọ to yiylọ ẹ to ozanmẹ. Po obú po, Marein na dawha, bo fọ́n whédo etọn lẹpo do nukle. To agọgbọnẹnmẹ, ewọ hẹn agbasalilo etọn bú.

Todin, eyin oṣiọ lẹ na taun tọn tin to ogbẹ̀ wẹ, be onú he sọgbe hẹ lẹnpọn dagbe de wẹ e yin dọ yé ni dobú na mẹyiwanna yétọn lẹ ya? Na nugbo tọn lala. Asisa owẹ̀ndomẹ awugblenamẹ tọn mọnkọtọn lẹ wẹ aovi lẹ.

Ṣigba etẹwẹ dogbọn owẹ̀ndomẹ lẹ he nọ sọawuhia taidi alọgọnamẹnu po kọfanamẹ tọn lẹ po dali? Di dohia, Gbassay, sọn Sierra Leone, to azọ̀njẹ. Yọnnu lọ kudlọ to ehe mẹ otọ́ etọn he ko kú sọawuhia ẹ́ te. E dọ hlan ẹn nado yì atin wunmẹ de kọ̀n, bo kẹ́n amató dopo bo kúsú i po osin po, bosọ nù in. E ma dona dọho na mẹdepope whẹpo do wà mọ gba. Ewọ wà mọ bosọ jẹ gangan.

Yọnnu devo dọdọ asu emitọn sọawuhia emi to ozanto dopo mẹ to okú etọn godo. Ewọ dọ dọ é yọnwhanpẹ talala bo sọ yi avọ̀ dagbedagbe lẹ ṣinyọn na ede.

Wẹ̀ndomẹ mọnkọtọn lẹ po numimọ mọnkọtọn lẹ po nọ sọawuhia taidi onu dagbe po alọgọnamẹnu de po. Be Jiwheyẹwhe dè  wẹ yé sọn wá ya? Lala, yé ma yin mọ gba. Jehovah yin “Jiwheyẹwhe nugbo tọn” de. (Psalm 31:5) Gbede pọ́n ewọ ma na kẹalọyi nado bá mí dù kavi klọ mí gba. Aovi lẹ kẹdẹ wẹ nọ wà mọ.

Ṣigba be aovi dagbe lẹ tin wẹ ya? Lala. Dile etlẹ yindọ yé sọgan yinuwa to whedelẹnu taidi alọgọnamẹtọ de, yémẹpo wẹ ylan. To whenuena Lẹgba dọho hẹ Evi, e yinuwa taidi họntọn de. (Gẹnẹsisi 3:1) Ṣigba etẹ mẹ wẹ e dekọtọn do na yọnnu lọ to didotóai hlan ẹn bosọ yi nuhe ewọ dọ basi godo? Yọnnu lọ kú.

Mì yọnẹn dọ e ma yin nubajonọmẹ na omẹ ylankan de nado yinuwa di họntọn de hlan enẹnọ he ewọ tindo ojlo nado doyẹklọ kavi badu lẹ gba. “Adú wewe ahunkẹn yúu,” wẹ howhinwhẹn mẹyuu lẹ tọn dọ. Podọ Oho Jiwheyẹwhe tọn dọmọ: “Satani lọsu nọ diọadazùn angẹli hinhọ́n tọn.”—2 Kọlintinu lẹ 11:14.

Jiwheyẹwhe ma gbẹsọ po to hodọ hẹ gbẹtọ lẹ to aigba ji gbọn yizan odlọ lẹ, numimọ lẹ, kavi ogbè lẹ sọn aihọn gbigbọnọ lẹ mẹ ba. E nọ deanana yé bosọ nọ plọn yé gbọn Biblu gblamẹ, he sọgan hẹn mẹde “sọgbe mlẹnmlẹn hlan azọ́n dagbe lẹpo.”—2 Timoti 3:17.

Gbọnmọ dali, to whenuena Jehovah gbẹnuna mí sọta wlẹnwin Lẹgba tọn lẹ, ewọ wà mọ na é yiwanna mí wutu wẹ. Ewọ yọnẹn dọ kẹntọ owùnọ wẹ aovi lẹ yin.