Mímẹpo tindo nudide de. Vlavo mí ni sẹ̀n Jehovah kavi mí ni sẹ̀n Satani po aovi etọn lẹ po. Mí ma sọgan basi awe lẹpo dopọ gba. Lehe e yin nuyọnẹnnú do sọ nado sẹ̀n Jehovah!

Dile mí ko mọ do, aovi lẹ nọ duvivi awugblenamẹ po gbẹtọ lẹ kiklọ po tọn. Jehovah ma tin to mọ gba. Ewọ yiwanna gbẹtọvi lẹ dile otọ́ de nọ yiwanna ovi etọn lẹ do. Ewọ wẹ yin nunamẹtọ “Nunina dagbedagbe po nunina he sọgbe lẹpo” tọn. (Jakobu 1:17) Ewọ ma dọnalọ onu dagbe depope tọn do godo sọn gbẹtọvi lẹ de gba, yedọ eyin etlẹ biọ nuhọakuẹ hugan lẹ sọn e si.—Efesunu lẹ 2:4-7.

Lẹnnupọn dogbọn nuhe yin bibasi to aigba ji gbọn Jesu dali ji, yedọ Ovi Jiwheyẹwhe tọn. Ewọ hẹn ẹn yọnbasi na unbọpẹnnọ lẹ nado dọho bosọ hẹn nukuntọnnọ lẹ mọnu. E hẹn azọ̀ngbọ na pòtọnọ lẹ po sẹkunọ lẹ po. E yàn aovi lẹ sẹ bosọ hẹn azọ̀n alọpa lẹpo gbọ̀. Jesu, gbọn huhlọn Jiwheyẹwhe tọn dali, tlẹ fọ́n oṣiọ lẹ gọwá ogbẹ̀.—Matiu 9:32-35; 15:30, 31; Luku 7:11-15.

Kakati nado dolalo lẹ nado hẹn mí buali, Jiwheyẹwhe nọ saba dọ  nugbo. Ewọ ma klọ mẹdepope pọ́n gbede gba.—Osọha 23:19.

Kẹdẹdile okàn tọgboyẹyẹ tọn nọ hẹn supọ de dote gbanungbanun do, livi susu gbẹtọvi lẹ tọn wẹ yin wiwle dote gbanungbanun gbọn otangblo po lalo lẹ po dali. Yé nọ dibusi oṣiọ lẹ. Yé nọ dibusi aovi lẹ. Yé nọ tindo ayimajai susu dogbọn dẹhodomẹ lẹ, nupliplí lẹ, obo lẹ, po fakinkan lẹ po dali. Yé yin bibla dote gbọn yise lẹ po aṣa lẹ po he sinai do lalo Satani Lẹgba tọn lẹ ji dali. Devizọnwatọ Jiwheyẹwhe tọn lẹ ma nọ jẹ omọ̀ ehelẹ depope mẹ gba.

Huhlọn Jehovah tọn yinukọn talala hugan Satani tọn. Eyin hiẹ sẹ̀n Jehovah, ewọ na họ́ we sọn aovi lẹ si. (Jakobu 4:7) Bogbèsisa lẹ ma na wazọn do ji we gba. Di dohia, to Nigéria, bokọnọ azegán huhlọnnọ atọ̀n sabogbè nado hù Kunnudetọ Jehovah tọn de he gbẹ nado tọ́n sọn otò daho lọ mẹ. To whenuena bogbè lọ gbọvọ, dopo to azegan lọ lẹ mẹ dibu talala, bosọ yì Kunnudetọ lọ de bo vẹvẹ nado mọ lẹblanu yi.

Eyin aovi lẹ vannukundo we, hiẹ sọgan ylọ Jehovah gbọn yínkọ dali podọ ewọ nasọ basi hihọ na we. (Howhinwhẹn lẹ 18:10) Ṣigba na hiẹ nido sọgan tindo hihọ Jiwheyẹwhe tọn, hiẹ dona tún dewe dote mlẹnmlẹn sọn wunmẹ onu depope he tindo kọndopọ po afinyọnnọnuwiwa po gọna sinsẹ̀n-bibasi aovi lẹ tọn. Sinsẹ̀ntọ Jehovah tọn lẹ to otò Efesu hohowhenu tọn mẹ wà mọ. Yé bẹ owe daho afinyọnnọnuwiwa tọn yétọn lẹpo plidopọ bosọ yí miyọn do fiọ yé. (Owalọ lẹ 19:19, 20) Devizọ́n watọ Jiwheyẹwhe tọn lẹ to egbehe dona wà onú dopolọ ga. Klan dewe do ola pete na obó lẹ, obó hihọ basina mẹdetiti tọn lẹ, definfẹn “hihọ” tọn lẹ, ofa lẹ, owe afinyọnnọnuwiwa tọn lẹ, po onú devo depope po he kọndopọ hẹ walọyizan afinyọnnọnuwiwa tọn lẹ po.

Eyin hiẹ jlo nado hẹn homẹ Jiwheyẹwhe tọn hùn, e ma yin  nuhe ko pe nado dapana sinsẹ̀n-bibasi lalo tọn podọ nado doalọtena onú ylankan lẹ bibasi poun gba. Hiẹ dona yin sinsẹ̀ntọ sinsẹ̀n-bibasi he wé ṣeke tọn po zohunhun po. Biblu do nuhe e biọ to mẹsi hia dọmọ:

Satani po aovi lẹ po tindo gbẹtọ lẹ to aigba ji he nọ plọn bosọ nọ yi onú agọ lẹ basi. Ṣigba Jehovah lọsu tindo omẹ etọn lẹ ga. Yéwlẹ wẹ Kunnudetọ Jehovah tọn lẹ. (Isaia 43:10) Lẹdo aihọn pé, nuhugan Kunnudetọ livi donu ṣidopo lẹ wẹ tin. Yémẹpo nọ dovivẹnu sinsinyẹn nado wà onu dagbe lẹ bosọ plọn nugbo gbẹtọ lẹ. To aigba susu lẹ ji, hiẹ sọgan mọ yé to Plitẹnhọ Ahọluduta lọ tọn mẹ, fie yé na do kuavọ na we po zohunhun po te.

Azọ́n yétọn wẹ yin nado gọalọna mẹdevo lẹ nado sẹ̀n Jiwheyẹwhe. Yé na plọn Biblu po hiẹ po to owhé towe gbè, bo gbọnmọ dali do gọalọna we nado plọn lehe hiẹ sọgan basi sinsẹ̀n hlan Jehovah to aliho he jlọ de mẹ do. Hiẹ ma tindo nuhudo nado suahọ na ehe gba. Kunnudetọ lẹ gọna ayajẹ nado plọnmẹ nugbo lọ na yé yiwanna gbẹtọ lẹ podọ yé sọ yiwanna Jehovah Jiwheyẹwhe lọsu ga.