WEYỌNẸNTỌ Hollande-nu de he nọ yin Spinoza wlan dọmọ: “Kakati ma nọ ṣàn nuyiwa gbẹtọ lẹ tọn kò, bọ yé na nọ do apọ̀ na mi, kavi dọ yé na nọ doadihomẹna mi, n’ko dovivẹnu nado nọ mọnukunnujẹ yé mẹ.” Taidi mẹplọntọ lẹ, e gán nọ vẹawuna mì nado mọnukunnujẹ pọndohlan, ninọmẹ, gọna nuyise wehọmẹvi mìtọn lẹ tọn mẹ, ehe bẹ ovi Kunnudetọ Jehovah tọn lẹ tọn hẹn. To whedelẹnu, wehọmẹvi enẹlẹ gán nọ yinuwa to aliho he taidi nuhe gbọnvo pete na mẹdevo lẹ tọn to whẹho delẹ mẹ. Amọ́, eyin e họnwun dọ nujinọtedo sinsẹ̀n tọn po walọ dagbe tọn lẹ po wẹ whàn wehọmẹvi de nado yinuwa to aliho mọnkọ mẹ, be e na biọ dọ mì ni na ayidonugo nuyiwa etọn. Kunnudetọ Jehovah tọn lẹ wẹ de wema ehe tọ́n. Etẹwutu? Na e nido gọalọna mì nado mọnukunnujẹ wehọmẹvi he yin Kunnudetọ lẹ go dogọ. Todido mítọn wẹ yindọ, mì na dín whenu bo hia ẹ po sọwhiwhe po.

Nukunnumimọjẹ nuyise sinsẹ̀n tọn mẹde tọn lẹ mẹ ma zẹẹmẹdo nado kẹalọyi yé kavi biọ sinsẹ̀n mẹlọ tọn mẹ gba, podọ nudọnamẹ lẹ nina mẹde ma yin nudopolọ hẹ linlẹn didiọ na mẹlọ nado biọ sinsẹ̀n de mẹ. Nuhewutu mí de alọnuwe ehe tọ́n ma yin nado zín pọndohlan sinsẹ̀n tọn Kunnudetọ lẹ tọn do mìwlẹ kavi wehọmẹvi mìtọn lẹ ji gba. Ojlo mítọn poun wẹ nado hẹn nujinọtedo po nuyise he mẹjitọ wehọmẹvi mìtọn delẹ tọn ko plọn yé lẹ po zun yinyọnẹn na mì, na e nido bọawuna mì dogọ nado mọnukunnujẹ ovi Kunnudetọ lẹ tọn go bosọ wazọ́n dopọ hẹ yé. Nado dọ hójọhó, ovi lẹ gán nọma yinuwa sọgbe hẹ nuhe yin pinplọn yé lẹ to whelẹponu, na ovi dopodopo wẹ to pinplọn nado nọ basi nudide na ede.

Taidi suhugan mẹjitọ lẹ tọn, Kunnudetọ Jehovah tọn lẹ nọ jlo dọ wehọmẹ-yìyì ni hẹn ale wá na ovi yetọn lẹ to gigọ́ mẹ. Enẹwutu, yé nọ plọn ovi yetọn lẹ nado kọngbedopọ hẹ mẹplọntọ yetọn lẹ. Podọ, mẹjitọ Kunnudetọ lẹ po ovi yetọn lẹ po nọ yọ́n pinpẹn etọn eyin mẹplọntọ lẹ nọ mọnukunnujẹ yé go bosọ nọ yinuwa hẹ yé po sisi po.

Kunnudetọ Jehovah tọn lẹ yin Klistiani lẹ he yin yinyọnẹn lẹdo aihọn pé. Amọ́ to whedelẹnu, mẹlẹ ma nọ mọnukunnujẹ nuyiwa yetọn lẹ mẹ. Enẹwutu, mí lẹndọ wema ehe na gọalọna mì nado mọnukunnujẹ ovi Kunnudetọ lẹ tọn he go mì to nukunpedo lẹ go dogọ. Na taun tọn, ojlo mítọn wẹ yindọ mì ni yọ́n nuhewutu to ninọmẹ tangan delẹ mẹ, ovi lọ lẹ gán nọ jlo dọ mì ni kẹalọyi jlọjẹ yetọn nado nọ yinuwa to aliho he gbọnvo mẹ.