Nukun He Kunnudetọ Jehovah Tọn lẹ Nọ Yí Do Pọ́n Wehọmẹ-Yìyì
Taidi mẹjitọ lẹpo, sọgodo ovi Kunnudetọ Jehovah tọn lẹ tọn nọ duahunmẹna yé. Enẹwutu yé nọ yí nukun nujọnu tọn do pọ́n wepinplọn. “Wehọmẹ dona gọalọna gbẹtọ lẹ nado yọ́n nude wà na dagbe mẹhe lẹdo yé lẹ tọn. E sọ dona gọalọna yé nado mọnukunnujẹ aṣa he mẹ yé wá sọn lẹ mẹ, podọ nado do ayajẹ dogọ to gbẹ̀mẹ.”—The World Book Encyclopedia
DILE hodidọ ehe dohia do, dopo to nue zọ́n bọ ovi lẹ nọ yì wehọmẹ lẹ mẹ wẹ nado plọn lehe yè nọ nọgbẹ̀ do egbesọegbesọ, na yé nido yọ́n lehe yé na penukundo hudo whẹndo de tọn lẹ go do to sọgodo. Kunnudetọ Jehovah tọn lẹ yọnẹn dọ azọngban titengbe de wẹ ehe yin. Biblu lọsu dọmọ: “Na nugbo tọn, eyin mẹdepope ma wleawudaina mẹhe yin etọn titi lẹ, podọ titengbe na mẹhe yin hagbẹ whédo etọn tọn lẹ, ewọ ko mọ́n yise lọ bosọ ylanhu mayisenọ.” (1 Timoti 5:8) Owhe he ovi lẹ nọ yizan to wehọmẹ lẹ nọ wleawuna yé nado wá didá azọngban lẹ to gbẹzan yetọn mẹ. Abajọ Kunnudetọ lẹ nọ mọdọ yè dona nọ yí nukun nujọnu tọn do pọ́n wehọmẹ-yìyì.
“Wehọmẹ dona gọalọna gbẹtọ lẹ nado yọ́n nude wà na dagbe mẹhe lẹdo yé lẹ tọn. E sọ dona gọalọna yé nado mọnukunnujẹ aṣa he mẹ yé wá sọn lẹ mẹ, podọ nado do ayajẹ dogọ to gbẹ̀mẹ.”—The World Book Encyclopedia
Kunnudetọ lẹ nọ tẹnpọn nado hodo gbedide Biblu tọn lọ he dọmọ: “Nudepope he mì to wiwà, mì nọ wà ẹ po alindọn lẹpo po taidi na Jehovah, e ma yin na gbẹtọ lẹ.” (Kolosinu lẹ 3:23) Ayinamẹ ehe gando adà gbẹzan egbesọegbesọ tọn lẹpo go, etlẹ yin to wehọmẹ lọsu. Enẹwutu, Kunnudetọ lẹ nọ na tuli jọja yetọn lẹ nado plọnwe ganji bosọ ylọ azọ́n he yin didena yé to wehọmẹ lẹ dọ nujọnu.
“Nudepope he mì to wiwà, mì nọ wà ẹ po alindọn lẹpo po taidi na Jehovah, e ma yin na gbẹtọ lẹ.”—Kolosinu lẹ 3:23
Biblu sọ plọnmẹ nado nọ litaina osẹ́n otò he mẹ yè te tọn lẹ. Enẹwutu, eyin osẹ́n biọ dọ ovi lẹ ni yì wehọmẹ kakajẹ whenue yé do owhe tangan de, Kunnudetọ lẹ nọ setonuna osẹ́n enẹ.—Lomunu lẹ 13:1-7.
Gbọjẹyíyí, nuhiho, aihundida lanmẹyiya tọn, dlapọn bibayi sọyi wesẹdotẹn po onú hoho sẹdotẹn lẹ po, ehe lẹpo wẹ nọ yí adà titengbe de wà to wepinplọn he to jlẹkaji de mẹ
Dile etlẹ yindọ Biblu ma nọ yí nukunpẹvi do pọ́n azọ́nplọnmẹ he mí nọ mọyi nado wá hẹn míde to osọ, e dohia dọ ehe ma yin yanwle dopo akàn lọ kavi yanwle titengbe hugan wehọmẹ-yìyì tọn. Wepinplọn dagbe de dona gọalọna ovi de nado do ayajẹ to gbẹ̀mẹ bo lẹzun mẹde he nọ nọ̀ jlẹkaji. Enẹwutu, Kunnudetọ lẹ kọngbedopọ dọ nujọnu taun wẹ e yin nado yí sọwhiwhe do de nuwiwa wehọmẹ godo tọn lẹ. Yé yọnẹn dọ gbọjẹyíyí, nuhiho, aihundida lanmẹyiya tọn, wesẹdotẹn gọna onú hoho sẹdotẹn lẹ didlapọn, po mọmọ po sọyi, nọ yí adà titengbe de wà to wepinplọn he tin to jlẹkaji de mẹ. Humọ, yé nọ plọn ovi yetọn lẹ nado nọ na sisi mẹhe wà mẹho na yé lẹ, podọ nado nọ dín dotẹnmẹ lẹ nado yilizọn na yé.
Etẹwẹ Dogbọn Wepinplọn Yinukọn Dogọ Dali?
Na azọ́n nuyọnẹn wintinwintin tọn fọ́n bo to nukọnyi wutu, nuhe nọ yin bibiọ to mẹhe yè na yí do azọ́nmẹ lẹ si lọsu fọ́n bo to didiọ ga. Enẹ zọ́n bọ jọja susu lẹ wẹ dona wazọ́n he yé ma ko plọn lẹ. Eyin mọ wẹ, lehe yé nọ wazọ́n do po azọ́nplọnmẹ he yé mọyi lẹ po, titengbe nugopipe yetọn nado diọada sọgbe hẹ ninọmẹ lẹ, na gọalọna yé taun. Enẹwutu, dile wekantọ Montaigne dọ do, e pọnte hugan dọ wehọmẹvi lẹ ni whẹ́n bo ‘yọ́n lehe yè nọ yí nuyọnẹn zan do hugan dọ yé ni bẹ nuyọnẹn pli poun.’
Azọ́n mamọ-wà gbayipe to otò adọkunnọ po hẹntọnọ lẹ po mẹ. Ehe gán hẹn ẹn vẹawuna jọja he ma tindo azọ́nyinyọnẹn susu lẹ nado mọ azọ́n. Enẹwutu, eyin e biọ dọ ovi lẹ ni mọ azọ́nplọnmẹ yí dogọ hugan lehe osẹ́n biọ do whẹpo do mọ azọ́n, azọngban mẹjitọ lẹ tọn wẹ nado gọalọna ovi yetọn lẹ nado de eyin yé na plọnwe dogọ kavi lala, bosọ gọalọna yé nado lẹnnupọndo ale he wepinplọn yinukọn dogọ na hẹnwa po avọ́sinsan he e na biọ lẹ po ji.
Amọ́ matin ayihaawe, mì na kọngbedopọ dọ nado do kọdetọn dagbe to gbẹ̀mẹ bẹ nususu hẹn hú adọkunnu lẹ tintindo poun. To ojlẹ agọe tọn lẹ mẹ, sunnu po yọnnu po susu he ze gbẹzan yetọn pete jo na yanwle agbasa tọn lẹ wẹ masọ nọ wá yọ́n nuhewutu yé do togbẹ̀ ba eyin azọ́n gbledo yé. Mẹjitọ delẹ ko yí gbẹzan whẹndo yetọn tọn gọna whenu he yé sọgan ko yizan hẹ ovi yetọn lẹ do sanvọ́, bo ma penugo nado plọn yé whẹ́n ganji, na azọ́n ko yí whenu yetọn lẹpo wutu.
Na nugbo tọn, wepinplọn he to jlẹkaji dona gọalọnamẹ nado yọnẹn dọ ayajẹ nujọnu tọn ma sinai do agbasanu susu tintindo ji. Jesu Klisti dọmọ: “E ko yin kinkan dọ: ‘Gbẹtọ ma nọ nọgbẹ̀ gbọn núdùdù kẹdẹ dali gba, ṣigba gbọn ohó he nọ tọ́n sọn onù Jehovah tọn mẹ lẹpo dali.’” (Matiu 4:4) Taidi Klistiani lẹ, Kunnudetọ Jehovah tọn lẹ yọnẹn dọ nujọnu wẹ e yin nado tẹnpọn bo tindo walọ dagbe po jẹhẹnu Klistiani tọn lẹ po dile yé to pinplọn nado wá penukundo nuhudo agbasa tọn yetọn lẹ go.
A Gán Sọ Pọ́n Hosọ Ehelẹ
WHẸNDO TOWE SỌGAN YIN AYAJẸNỌ
Lehe Mì Sọgan Plọn Ovi Mìtọn Do
Mẹplọnlọdidomẹgo bẹ nususu hẹn hugan osẹ́n zizedai po yasanamẹ po.
