NUHEWUTU alọnuwe ehe yin didetọn ma yin nado gbadopọnna nuyise Kunnudetọ lẹ tọn to gigọ́ mẹ. Amọ́, mí dovivẹnu bo basi zẹẹmẹ anademẹ he mí nọ hodo delẹ tọn. Mí sọ do ninọmẹ whẹndo tọn he nọ yinuwado wehọmẹvi de ji hia hezeheze, eyin mẹjitọ etọn awe lẹ kavi dopo yin Kunnudetọ.

Kunnudetọ Jehovah tọn lẹ nọ ylọ whinwhẹ́n gbigbọmẹ tọn ovi yetọn lẹ tọn dọ nujọnu taun. Podọ, yé kudeji dọ ehe nọ yidogọna nukọnyiyi ovi yetọn lẹ tọn to adà devo lẹ mẹ ga. Nuyise he yé kẹalọyi lẹ gọna anademẹ he yé nọ hodo lẹ zọ́n bọ yé nọ do ayajẹ to gbẹ̀mẹ, podọ ehe nọ gọalọna yé nado pehẹ nuhahun egbesọegbesọ tọn yetọn lẹ. Humọ, nuyise po anademẹ enẹlẹ po dona whàn yé nado dovivẹnu bo yin wehọmẹvi ayajẹnọ, podọ tòvi dagbe lẹ to gbẹzan yetọn blebu mẹ.

Kunnudetọ lẹ nọ dovivẹnu nado tindo pọndohlan jlẹkaji tọn to gbẹ̀mẹ, enẹwutu yé nọ yí nukun nujọnu tọn do pọ́n wepinplọn. Podọ, ojlo yetọn wẹ nado wazọ́n dopọ hẹ mì jẹ obá he mẹ yé penugo jẹ. Na nuhe dù Kunnudetọ Jehovah tọn lẹ, to owhé yetọn lẹ gbè podọ to nọtẹn sinsẹ̀n-bibasi tọn yetọn lẹ mẹ lẹdo aihọn pé, yé na zindonukọn nado to tulina ovi yetọn lẹ nado yí adà yetọn wà na kọdetọn dagbe nido tin to azọ́nwadopọ ehe mẹ.