Tito Nupinplọn Tọn Lẹ
Kunnudetọ Jehovah tọn lẹ yin yinyọnẹn lẹdo aihọn pé na azọ́n Biblu pinplọnmẹ tọn yetọn.
NA KUNNUDETỌ lẹ nọ ylọ azọ́n Biblu pinplọnmẹ tọn yetọn dọ nujọnu wutu, mẹdelẹ gán nọ lẹndọ yé ma yiwanna wehọmẹ-yìyì. Amọ́, e ma yinmọ. Nado plọn mẹdevo lẹ, mẹplọntọ lọ dona plọnnu jẹnukọn, podọ ehe nọ biọ dọ ewọ ni mọ azọ́nplọnmẹ po nuplọnmẹ he sọgbe po yí. Enẹwutu, gbọnvona dọ Kunnudetọ Jehovah tọn lẹ yiwanna wehọmẹ-yìyì, sọn owhe susu lẹ die wẹ yé ko sọ to alemọyi sọn tito nupinplọn tọn voovo gọna wehọmẹ he mẹhe nọ deanana yé lẹ zedai lẹ mẹ. Ehelẹ ko gọalọna Kunnudetọ lẹ po mẹdevo lẹ po nado hẹn aliho nulẹnpọn tọn, walọyizan po gbigbọnọ-yinyin yetọn po pọnte dogọ.
Di apajlẹ, to otò susu mẹ Kunnudetọ lẹ ko pannukọn nuhahun sinsinyẹn de—enẹ wẹ lehe yé na plọnnu mẹhe ma yì wehọmẹ susu kavi ma tlẹ yì paali, bo ma yọ́n wehia kavi ma yọ́n wekan lẹ do. Nado súdo nuhudo ehe tọn, yé ko basi tito yọnhia-yọnkàn tọn.
Di apajlẹ to Nigéria, Kunnudetọ Jehovah tọn lẹ ko bayi tito wehọmẹ ehe nkọ lẹ tọn sọn 1949. Klasi ehelẹ ko zọ́n bọ to Nigéria, gbẹtọ fọtọ́n susu lẹ ko yọ́n wehia. Sọhayinanú de dohia dọ hugan 90 to kanweko ji Kunnudetọ he to Nigéria lẹ tọn wẹ yọ́n wehia bosọ yọnkàn, to whenuena e yindọ tòvi otò lọ tọn he yọ́n wehia bosọ yọnkàn lẹ ma pé 50 to kanweko ji. To Mexique, Kunnudetọ lẹ ko ze wehọmẹ yọnhia-yọnkàn tọn lẹ dai sọn 1946. To owhe dopo gblamẹ, gbẹtọ 6500 linlán wẹ plọn nado hiawe bosọ yọnkàn. Na taun tọn, hugan gbẹtọ 100000 wẹ yè ko gọalọna nado yọ́n wehia bosọ yọnkàn. Tito yọnhia-yọnkàn tọn sọ yin bibayi to owhe lẹ gblamẹ to otò devo lẹ mẹ, taidi Bolivie, Cameroun, Népal po Zambie po. Kunnudetọ lẹ ko zín vọkan alọnuwe lọ Yí Dewe Zan na Wehihia po Wekinkan Po tọn hugan livi ṣinawe jẹgbonu to ogbè 100 linlán mẹ.
To otò he mẹ tito yọnhia-yọnkàn tọn yin bibayi te lẹ, aṣẹpatọ he nọ penukundo wepinplọn go lẹ nọ saba kẹalọyi yé. Di apajlẹ, to Mexique ahọluzọnwatọ de wlan dọmọ: “N’yọ́n pinpẹn gbekọndopọ mìtọn tọn, podọ to oyín aṣẹpatọ lẹ tọn mẹ, mí to nudọdo mì po ahundopo po na azọ́n dagbe he mì to wiwà na dagbe tòvi lẹ tọn, dile mì to alọgọna mẹhe ma yì wehọmẹ lẹ nado mọnukunnujẹnumẹ. . . . Odẹ̀ mítọn wẹ yindọ mì ni tindo kọdetọn dagbe to azọ́n mẹpinplọn tọn ehe kọ̀n.”
Azọ́nplọnmẹ Devo Lẹ
Kunnudetọ lẹ nọ mọ azọ́nplọnmẹ yí nado hiawe bosọ dọho to gbangba
Kunnudetọ lẹ nọ yí nukun nujọnu tọn do pọ́n azọ́n Biblu pinplọnmẹ tọn yetọn. Nue zọ́n niyẹn bọ yé nọ dovivẹnu nado hẹn nugopipe yetọn lẹ pọnte dogọ na nuhe dù zẹẹmẹ bibayi na mẹlẹ do nuplọnmẹ Biblu tọn lẹ ji. Di apajlẹ, to agun he hugan 119000 lẹ dopodopo mẹ lẹdo aihọn pé, Kunnudetọ lẹ nọ mọ azọ́nplọnmẹ yí nado hiawe bosọ dọho to gbangba. Ovi flinflin lẹ lọsu sọgan ze yinkọ dai nado mọ azọ́nplọnmẹ ehe yí tlolo he yé yọ́n wehia, podọ ehe ko sọ hẹn ale wá na yé to adà gbẹzan yetọn tọn devo lẹ mẹ, etlẹ yin to wehọmẹ ga. Mẹplọntọ susu wẹ ko dọ dọ e nọ bọawuna wehọmẹvi he yin Kunnudetọ lẹ nado dọ linlẹn yetọn lẹ tọ́n.
To agun yetọn lẹ mẹ, yé nọ yin tulina whẹwhẹ nado nọ hianu, podọ whẹndo dopodopo sọ nọ yin tulina nado do wesẹdotẹn whẹndo tọn de he bẹ owe voovo he yọ́n-na-yizan lẹ hẹn
Humọ, agun Kunnudetọ Jehovah tọn lẹ tọn dopodopo ko yin tulina nado tindo wesẹdotẹn de he bẹ owe sinai do Biblu ji lẹ, wezẹhomẹ lẹ, po owe alọdlẹndonu tọn devo lẹ po hẹn, to Plitẹnhọ yetọn lẹ mẹ kavi to fie yé nọ pli te lẹ. Mẹhe nọ wá pli to Plitẹnhọ Ahọluduta lọ tọn mẹ lẹpo wẹ sọgan yí wesẹdotẹn ehe zan. To agun yetọn lẹ mẹ, yé nọ yin tulina whẹwhẹ nado nọ hianu, podọ whẹndo dopodopo sọ nọ yin tulina nado do wesẹdotẹn whẹndo tọn de he bẹ owe voovo he yọ́n-na-yizan na yọpọvu po mẹho lẹ po hẹn.
Azọ́nplọnmẹ Yinukọn Dogọ
Kunnudetọ Jehovah tọn lẹ sọ ze wehọmẹ lẹ dai nado plọnazọ́n sunnu po yọnnu lẹ po nado lẹzun mẹdehlan, podọ wehọmẹ devo lẹ nado plọnazọ́n mẹhe tindo azọngban to agun mẹ lẹ. Wehọmẹ ehelẹ sọ yin kunnudenu dogọ dọ Kunnudetọ Jehovah tọn lẹ nọ yí nukun nujọnu tọn do pọ́n wepinplọn.
