ADÀ 6

Bẹsọn Jiji Jesu Tọn jẹ Okú Etọn Whenu

Angẹli Gabliẹli yin didohlan yọnnu whanpẹnọ de he nọ yin Malia dè. E dọna ẹn dọ ewọ na ji visunnu de he na duahọlu kakadoi. Ovi lọ, Jesu, yin jiji to kanlinpa de mẹ fihe lẹngbọhọtọ lẹ yì pọ́n ẹn te. To godo mẹ, sunwhlẹvu de deanana sunnu delẹ sọn Whèzẹtẹn yì ovi pẹvi lọ dè. Mí na plọnnu gando mẹhe hẹn yé nado mọ sunwhlẹvu enẹ po lehe Jesu yin whinwhlẹngán sọn vivẹnu he yin dido nado hù i lẹ po mẹ do go.

Bọdo enẹ go, mí na mọ Jesu dile e to hodọ hẹ mẹplọntọ lẹ to tẹmpli mẹ to whenue e tindo owhe 12. To owhe fọtọ̀n-nukunatọ̀n godo, Jesu yin bibaptizi podọ to enẹgodo, e bẹ azọ́n yẹwhehodidọ Ahọluduta lọ tọn po mẹpinplọn tọn po he Jiwheyẹwhe do e hlan nado wà to aigba ji lọ jẹeji. Jesu de sunnu 12 he lẹzun apọsteli etọn lẹ nado gọalọna ẹn to azọ́n ehe mẹ.

Jesu sọ wà azọ́njiawu susu lẹ. E yí whèvi flinflin vude po akla pẹvi de po do na núdùdù gbẹtọ fọtọ́n susu lẹ. E hẹnazọ̀ngbọna awutunọ lẹ bo tlẹ sọ fọ́n oṣiọ lẹ. To godo mẹ, mí na plọnnu gando nususu he jọ do Jesu go to azán godo tọn he e yizan to aigba ji, po lehe e yin hùhù do po go. Jesu dọyẹwheho na nudi owhe atọ̀n daa nkọ, enẹwutu, ADÀ 6tọ bẹ ojlẹ owhe 34 e lán vude tọn hẹn.