Jesu to Jipa Mẹ
OTÀN 100
Jesu to Jipa Mẹ
TO WHENUE Jesu po apọsteli etọn lẹ po tọ́n sọn abò petlezìn lọ tọn mẹ godo, yé yì jipa Gẹtsemani tọn mẹ. Yé ko nọ wá finẹ dai. Todin, Jesu dọna yé nado gbọṣi nukle bosọ hodẹ̀. Enẹgodo, e yì nukọn pẹẹde, bo ṣinyọ́n nukunmẹ odò nado hodẹ̀.
To godo mẹ, Jesu lẹkọwa fihe apọsteli lẹ tin te. Etẹwẹ hiẹ lẹndọ yé to wiwà? Yé ko damlọn! Whla atọ̀n wẹ Jesu dọna yé dọ yé dona to alihọ́, ṣigba to ojlẹ he mẹ e lẹkọwa yé dè lẹpo mẹ, e nọ mọ yé to amlọndọ. To whenue e lẹkọwa gbọngodo, e dọna yé dọmọ: ‘Etẹwutu wẹ mìwlẹ to amlọndọ to ojlẹ ehe nkọtọn mẹ? Ojlẹ lọ ko wá bọ yé na yí mi do alọ kẹntọ ṣie lẹ tọn mẹ.’
To ojlẹ enẹ lọ mẹ pẹpẹ wẹ yé sè awhágbe gbẹtọgun daho de tọn. Pọ́n! Dawe lọ lẹ ja bo hẹn owhán po opò po! Yé sọ hẹn miyọ́ngbán lẹ nado mọnú. To whenuena yé sẹpọ, mẹde tọ́n sọn gbẹtọgun lọ mẹ bo dlí yì Jesu dè. E donùnùgo na ẹn dile a sọgan mọ do tofi. Dawe lọ wẹ Juda Iskaliọti! Naegbọn e do donùnùgo na Jesu?
Jesu kanse e dọmọ: ‘Juda, be nùdonùgo wẹ hiẹ yí do de mi hia ya?’ Nugbo wẹ, nùdonùgo lọ yin ohia de. Enẹ zọ́n bọ dawe he hodo Juda lọ lẹ yọnẹn dọ Jesu, mẹhe dín yé te lọ die. Enẹwutu, kẹntọ Jesu tọn lẹ dlí donukọn nado wle e. Ṣigba Pita ma dikena yé ni wle Jesu sọyi domọ poun gba. E de ohí etọn tọ́n bo lì dawe he sẹpọ ẹ de. Pẹẹde wẹ e pò na ota dawe lọ tọn, ṣigba e sán otó etọn adusiwhé tọn lọ dlan. Jesu sọ doalọ otó dawe lọ tọn go bo hẹn ẹn jẹgangan.
Jesu sọ dọna Pita dọmọ: ‘Gọ̀ ohí towe do otẹn etọn mẹ. Be hiẹ ma lẹndọ yẹn sọgan biọ Otọ́ ṣie angẹli fọtọ́n susu lẹ nado whlẹn mi wẹ ya?’ Mọwẹ, e sọgan biọ! Ṣigba Jesu ma biọ Jiwheyẹwhe nado do angẹli depope hlan ẹn gba, na ewọ yọnẹn dọ ojlẹ lọ ko sọ̀ na kẹntọ etọn lẹ nado wle e. Enẹwutu, e yigbe na yé nido wle e sọyi. Gbọ mí ni pọ́n nuhe wá jọ do Jesu go todin.
A Gán Sọ Pọ́n Hosọ Ehelẹ
JESU—ALIHO LỌ, NUGBO LỌ PO OGBẸ̀ PO
Dẹ̀hiho to Awubla Sinsinyẹn Mẹ
Naegbọn Jesu do hodẹ̀ dọmọ: “De kọfo ehe sọn dè e”? Be ota de sọn e mẹ wẹ e te ma nado hẹn azọngban etọn lọ nado kú taidi ofligọ de di ya?
JESU—ALIHO LỌ, NUGBO LỌ PO OGBẸ̀ PO
Klisti Yin Didehia bo Yin Wiwle
Juda penugo nado mọ Jesu dile etlẹ yindọ zánhomẹ pete wẹ.
