To Osó Olivie Tọn Ji
OTÀN 98
To Osó Olivie Tọn Ji
JESU die to Osó Olivie tọn ji. Apọsteli etọn lẹ wẹ dawe ẹnẹ he to e dè lẹ. Yewlẹ wẹ Andle po Pita po he yin nọvi-nọvi lẹ, gọna Jakọbu po Johanu po he sọ yin nọvi-nọvi lẹ ga. Tẹmpli Jiwheyẹwhe tọn he tin to Jelusalẹm lọ wẹ a to mimọ hlan niyẹn.
E ko yì azán awe todin sọn whenue Jesu kùn kẹtẹkẹtẹvu lọ biọ Jelusalẹm. Tlatagbe (mardi) de wẹ. Jesu tin to tẹmpli lọ mẹ to afọnnu fuu. To finẹ, yẹwhenọ lẹ tẹnpọn nado wle Jesu bo hù i. Ṣigba, yé to budi nado wà ehe na gbẹtọ lẹ yiwanna Jesu wutu.
Jesu ylọ nukọntọ sinsẹ̀n tọn enẹlẹ dọ, ‘Mì odàn po ovi odàn tọn lẹ po.’ Jesu sọ dọna yé dọ Jiwheyẹwhe na sayana yé na onú ylankan he yé ko wà lẹpo wutu. To enẹgodo, Jesu wá Osó Olivie tọn ji, podọ finẹ wẹ apọsteli ẹnẹ ehelẹ jẹ kanbiọ lẹ kanse e ji te. Be hiẹ yọ́n nuhe yé to kinkanse Jesu ya?
Apọsteli lẹ to nukanbiọ gando nuhe na jọ to sọgodo lẹ go. Yé yọnẹn dọ Jesu na hẹn opodo wá na ylanwiwa lẹpo to aigba ji. Ṣigba yé jlo na yọ́n whenue ehe na jọ. Whetẹnu wẹ Jesu na lẹkọwa nado dugán taidi Ahọlu?
Jesu yọnẹn dọ hodotọ emitọn he tin to aigba ji lẹ ma na yinukundomọ emi to whenue emi na lẹkọwa gba. Ehe yinmọ na e na tin to olọn mẹ, bọ e ma na yọnbasi na yé nado mọ ẹn to finẹ. Enẹwutu, Jesu dọ delẹ to nuhe na jọ to aigba ji lẹ mẹ to whenue ewọ na jẹ gandu ji taidi Ahọlu to olọn mẹ na apọsteli etọn lẹ. Etẹwẹ yin delẹ to onú ehelẹ mẹ?
Jesu dọ dọ awhàn dahodaho lẹ na tin, gbẹtọ susu na to awutu jẹ bọ huvẹ nasọ to yé hù, sẹnhẹngba na sudeji, podọ aigba sisọsisọ daho lẹ nasọ tin. Jesu sọ dọ dọ yẹwheho wẹndagbe ahọluduta Jiwheyẹwhe tọn na yin didọ gbọn filẹpo to aigba ji. Be míwlẹ ma to nujijọ ehelẹ mọ to ojlẹ mítọn mẹ ya? Mọwẹ! Enẹwutu, mí sọgan deji dọ Jesu ko to gandu to olọn mẹ todin. Podọ to madẹnmẹ, ewọ na hẹn opodo wá na ylanwiwa lẹpo to aigba ji.
A Gán Sọ Pọ́n Hosọ Ehelẹ
JESU—ALIHO LỌ, NUGBO LỌ PO OGBẸ̀ PO
Apọsteli lẹ Biọ Ohia De
Dọdai etọn mọ hẹndi tintan to owhe kanweko tintan whenu. Be e gbẹ́ sọgan wá tindo hẹndi he gbloada de to nukọn mẹ ya?
