Jiwheyẹwhe Dopagbe Paladisi de Tọn
OTÀN 71
Jiwheyẹwhe Dopagbe Paladisi de Tọn
YẸDIDE paladisi tọn he Jiwheyẹwhe na ko dohia yẹwhegán etọn Isaia die. Isaia nọgbẹ̀ ojlẹ vude to okú Jona tọn godo.
Paladisi zẹẹmẹdo “jipa” kavi nọtẹn whanpẹnọ de. Be ehe flin we nude he mí ko plọn wayi to owe ehe mẹ ya? E yọ́npọ́n taun taidi jipa whanpẹnọ he Jehovah Jiwheyẹwhe dá na Adam po Evi po, kavi e ma yin mọ wẹ? Ṣigba, be aihọn lọ pete sọgan wá lẹzun paladisi to gbèdopo ya?
Jehovah dọna yẹwhegán etọn Isaia dọ ni wlanwe dogbọn paladisi yọyọ he ja na omẹ Jiwheyẹwhe tọn lẹ dali. E dọmọ: ‘Ohla po lẹngbọvu po na nọpọ́ to jijọho mẹ. Oyìnvu po kinnikinni ovu po na dùnú dopọ bọ yọpọvu lẹ nasọ hẹn yé dánpe. Yọpọvu de ma na yin awugblena eyin etlẹ daihun sẹpọ odàn adínọ de.’
Mẹsusu wẹ na dọ dọ: ‘Ehe ma sọgan jọ gbede. Na nuhahun ko suhugan to aigba ji mọjanwẹ e ka nasọ te kakadoi.’ Ṣigba, lẹnnupọn pẹẹde bo: Owhé nankọ wẹ Jiwheyẹwhe na Adam po Evi po?
Paladisi de mẹ wẹ Jiwheyẹwhe ze Adam po Evi po do. Na yé vẹtolina Jiwheyẹwhe wutu wẹ zọ́n bọ yé do hẹn owhé whanpẹnọ yetọn bu, bo wá poyọnho bosọ kú. Jiwheyẹwhe dopagbe nado na mẹhe yiwanna ẹn lẹ nuhe Adam po Evi po hẹnbu lẹ pẹpẹ.
To paladisi yọyọ he ja lọ mẹ, nudepope ma na gbleawunamẹ kavi hùmẹ. Jijọho pipé na gbayipe. Mẹlẹpo na tindo agbasalilo po ayajẹ po. Nulẹ na tin dile Jiwheyẹwhe ko jlo do sọn dowhenu. Ṣigba, mí na plọn lehe Jiwheyẹwhe na wà ehe do to nukọn mẹ.
