Nuhewutu Davidi Dona Họ̀n
OTÀN 59
Nuhewutu Davidi Dona Họ̀n
TO WHENUE Davidi hù Goliati godo, Abneli awhàngán Islaeli tọn plan ẹn wá Sauli dè. Homẹhun Sauli taun do Davidi go. E sọ yí i do basi ogán de to awhànpa etọn mẹ bosọ kẹalọyi i nado nọ nọ̀ owhé ahọlu tọn gbè.
To godo mẹ, whenuena awhànfuntọ lọ lẹ lẹkọ sọn awhànfunfun hẹ Filistininu lẹ mẹ, yọnnu lẹ jihàn dọmọ: ‘Sauli ko hù fọtọ́n lẹ, ṣigba Davidi hù fọtọ́n donu ao lẹ.’ Ehe hẹn Sauli nado whànwu, na gbẹtọ lẹ pà Davidi hugan Sauli wutu. Ṣigba, Jonatani visunnu Sauli tọn ma whànwu. E yiwanna Davidi taun, podọ Davidi lọsu sọ yiwanna ẹn. Enẹwutu, yé omẹ awe lẹ dopagbe na ode awetọ yetọn dọ yé na to họntọn yin kakadoi.
Ajalẹn-hotọ dagbe de wẹ Davidi yin, podọ Sauli sọ yiwanna ohàn etọn lẹ taun. Ṣigba to gbèdopo, awuwhàn Sauli tọn sisẹ́ ẹ nado wà nuylankan de. Dile Davidi to ajalẹn lọ hò, Sauli ze owhán etọn bo yìn do e, bosọ dọmọ: ‘Yẹn na whè Davidi do adó go!’ Ṣigba, Davidi vì bọ owhán lọ gbọ e go. Enẹgodo, owhán Sauli tọn sọ gbọ Davidi go to whedevonu. Enẹwutu, Davidi wá yọnẹn todin dọ emi dona tin to aṣeji taun.
Be hiẹ flin opagbe he Sauli do lọ ya? E dọ dọ emi na na viyọnnu emitọn di asi hlan mẹdepope he na hù Goliati. To godo mẹ, Sauli wá dọna Davidi dọ, whẹpo ewọ na dà viyọnnu emitọn Mikali, e dona hù kẹntọ Filistininu 100. Lẹnnupọndo enẹ ji! Na nugbo tọn, nuhe Sauli lẹn wẹ yindọ Filistininu lẹ na hù Davidi. Ṣigba, yé ma penugo nado hù Davidi, podọ Sauli wá yí viyọnnu etọn na ẹn taidi asi.
To gbèdopo, Sauli dọna Jonatani po devizọnwatọ etọn lẹpo po dọ emi jlo na hù Davidi. Ṣigba Jonatani dọna otọ́ etọn dọmọ: ‘Ma gbleawuna Davidi blo. Ewọ ma wà nuylankan depope do we pọ́n. Kakatimọ nuhe ewọ ko wà lẹpo wẹ gọalọna we taun. E ze ogbẹ̀ etọn do owù mẹ to whenue e hù Goliati, podọ ehe hẹn homẹ towe hùn taun.’
Sauli dotoaina visunnu etọn, bo dopà ma nado gbleawuna Davidi. Yé plan Davidi lẹkọwa, bọ e sọ jẹ devizọnwa na Sauli ji to owhé etọn gbè dile e ko nọ wà do dai. Ṣigba, to gbèdopo he Davidi to hànjinu etọn hò, Sauli sọ yìn owhán etọn do Davidi. Davidi vì bọ owhán lọ yì sọ́ adó. Whla atọ̀ntọ die! Davidi wá mọ todin dọ emi dona họnyi!
To ozán enẹ mẹ, Davidi yì owhé ewọ lọsu tọn gbè. Ṣigba Sauli do sunnu delẹ hlan nado hù i. Mikali yọ́n nuhe otọ́ etọn to linlẹn nado wà. Enẹwutu e dọna asu etọn dọmọ: ‘Eyin hiẹ ma họnyi to ozán ehe mẹ, yé na hù we whẹpo ai na họ́n.’ To ozán enẹ mẹ, Mikali gọalọna Davidi nado họ̀n gbọn fleṣe nù. Na nudi owhe ṣinawe nkọ, Davidi dona nọ họ̀n sọn fide jẹ fide na Sauli ni ma do mọ ẹn blo.
A Gán Sọ Pọ́n Hosọ Ehelẹ
VIDEO LẸ
Davidi
Davidi ṣinuwa to gbẹzan etọn mẹ bosọ pehẹ nuhahun susu, ṣigba e ma doalọtena Jiwheyẹwhe sinsẹ̀n gbede. Apajlẹ dagbe etọn sọgan gọalọna we nado gbọṣi nugbonọ-yinyin mẹ.
