ADÀ 5

Sọn Kanlinmọgbenu to Babilọni jẹ Adó Jelusalẹm Tọn lẹ Vivọgbá Whenu

Dile Islaelivi lẹ to Kanlinmọgbenu to Babilọni, yé pehẹ whlepọn yise tọn susu. Ṣadlaki, Mẹṣaki po Abẹdinẹgo po yin zizedlan zòhọ miyọ́n tọn he hlá taun de mẹ, ṣigba Jiwheyẹwhe hẹn yé dogbẹ̀. To nukọn mẹ, to whenuena Medianu po Pẹlsianu lẹ po gbawhàn Babilọni tọn godo, Daniẹli yin zizedlan odò kinnikinni lẹ tọn mẹ, ṣigba Jiwheyẹwhe basi hihọ́na ẹn gbọn onù kinnikinni lẹ tọn bibọdo dali.

To godo mẹ, ahọlu Pẹlsia tọn Kilusi tún Islaelivi lẹ dote. Yé lẹkọyi otò yetọn titi mẹ to owhe 70 pẹpẹ godo to whenue yé yin bibẹ yì kanlinmọgbenu to Babilọni. Dopo to onú tintan he yé basi to whenue yé lẹkọyi Jelusalẹm lẹ mẹ wẹ nado gbá tẹmpli Jehovah tọn. Ṣigba to ojlẹ kleun de godo, kẹntọ lẹ hẹnalọtena azọ́n yetọn. Enẹwutu, diblayi owhe 22 to whenuena yé lẹkọyi Jelusalẹm godo wẹ yé dotana tẹmpli lọ gbigbá.

Bọdo ehe go, mí na plọnnu gando gbejizọnlin Ẹzla tọn yì Jelusalẹm nado doaṣọ́na tẹmpli lọ go. Ehe jọ owhe 47 to tẹmpli lọ gbigbá godo. To owhe 13 to gbejizọnlin Ẹzla tọn godo wẹ Nẹhemia gọalọ nado vọ́ adó Jelusalẹm tọn he ko yin hihọliai lẹ gbá. Adà ATỌ́NTỌ lọ bẹ otàn owhe 152 tọn hẹn.