Jakọbu Tindo Whẹndo Daho De
OTÀN 19
Jakọbu Tindo Whẹndo Daho De
PỌ́N whẹndo daho ehe. Visunnu 12 Jakọbu tọn lẹ niyẹn. E sọ tindo viyọnnu lẹ ga. Be a yọ́n yinkọ delẹ to ovi lọ lẹ mẹ tọn ya? Gbọ mí ni plọn yinkọ mẹdelẹ tọn to yé mẹ.
Lea ji Lẹubeni, Simeọni, Levi po Juda po. Na Laheli ma mọ ovi depope ji wutu, homẹ etọn ma hùn paali. Enẹwutu e ze deviyọnnu etọn Bilha na Jakọbu, bọ Bilha ji visunnu awe he nọ yin Dani po Naftali po. Enẹgodo, Lea lọsu ze deviyọnnu etọn Zilpa na Jakọbu, bọ Zilpa ji Gadi po Aṣeli po. To nukọn mẹ, Lea sọ ji visunnu awe dogọ, yèdọ Isakali po Zebuluni po.
To godo mẹ, Laheli wá penugo nado jivi bo do yinkọ na ẹn dọ Josẹfu. Mí na wá plọn nususu dogọ gando Josẹfu go to nukọn mẹ, na e wá lẹzun omẹ titengbe de. Visunnu 11 he yin jiji na Jakọbu to whenuena e gbẹ́ pò to owhé Labani otọ́ Laheli tọn gbè lẹ niyẹn.
Jakọbu sọ tindo viyọnnu lẹ ga, ṣigba yinkọ dopo poun to yé mẹ tọn wẹ Biblu dọ. Dina wẹ.
E wá yá bọ Jakọbu basi dide nado yì sọn Labani dè bo lẹkọ do Kenani. Enẹwutu e pli whẹndo daho etọn gọna lẹngbọ po oyìn susugege etọn lẹ po, bo bẹ gbejizọnlin gaa lọ jẹeji.
Ojlẹ vude to whenuena Jakọbu po whẹndo etọn po ko lẹkọyi Kenani godo, Laheli sọ ji visunnu devo. Gbejizọnlin de ji wẹ yé te bọ e do ji ovi lọ. Laheli mọ awufiẹsa susu bosọ kú dile e to ovi lọ ji. Ṣigba nude ma wà viyẹyẹ lọ. Jakọbu do yinkọ na ẹn dọ Bẹnjamini.
E jẹ dọ mí ni hẹn yinkọ visunnu 12 Jakọbu tọn lẹ tọn do ayiha mẹ na yewlẹ mẹ wẹ akọta Islaeli tọn blebu wá sọn. Na nugbo tọn, yinkọ visunnu Jakọbu tọn 10 po visunnu Josẹfu tọn awe po tọn wẹ yin didona whẹndo 12 Islaeli tọn lẹ. Isaki nọgbẹ̀ na owhe susu to whenuena visunnu ehelẹ ko yin jiji godo, podọ homẹ etọn na ko hùn nado tindo ovivi susu sọmọ. Ṣigba, gbọ mí ni pọ́n nuhe jọ do ovivi etọn Dina go.
