A BIỌ Plitẹnhọ Ahọluduta tọn mìtọn mẹ bọ e vẹawuna we nado yọ́n nọtẹn lọ. Hiẹ ko nọ doawagun gando nọtẹn ehe go dai. A tlẹ sọgan ko flindọ to owhe delẹ die, a gọalọ to họ̀gbigbá lọ mẹ. Amọ́, nuhe tlẹ sọ hẹn we doawagun todin wẹ yindọ Plitẹnhọ Ahọluduta tọn lọ to yinyin yiyizan to alọnu din taidi nọtẹn alọgọ kọgbọ tọn de. To whenue yujẹhọn de ko yìn to lẹdo towe mẹ to agọe bọ osin hẹnnugble godo, Wedegbẹ́ Alahọ tọn yawu basi tito, na mẹhe go nugbajẹmẹji lọ gando lẹ nido mọ núdùdù, avọ̀, osin nùnù po nudevo lẹ po. Nuhe yin nina lọ lẹ yin tito ganji. Mẹmẹsunnu po mẹmẹyọnnu lẹ po to nado mọ nuhe yé tindo nuhudo etọn yí bọ mẹsusu to dasin ayajẹ tọn lẹ súnsún.

Jesu dọ dọ ohia ayidego tọn he yè na yí do yọ́n omẹ etọn lẹ wẹ owanyi he yé tindo na ode awetọ. (Joh. 13:34, 35) To adà ehe mẹ, mí na gbadopọnna lehe owanyi Klistiani tọn to yinyin didohia do to whenue Kunnudetọ Jehovah tọn lẹ to nọtẹn sinsẹ̀n-bibasi tọn lẹ gbá bo to azọ́n kọgbọ tọn lẹ wà to nugbajẹmẹji lẹ whenu. Owanyi mọnkọtọn yin kunnudenu he họnwun dọ mí to gbẹnọ to gandudu Ahọluduta Jesu tọn glọ.