Mahopọnna dọ mì to nuhe go mì pé lẹpo wà nado tindo alọwle po whẹndo ayajẹnọ de po, nujijọ madonukun lẹ sọgan wá jọ bo na hẹn ẹn vẹawuna mì nado hẹn ayajẹ mìtọn go. (Yẹwhehodọtọ 9:11) Jiwheyẹwhe nọ gbọn owanyi dali wleawu alọgọ tọn na mí to whenue mí pehẹ nuhahun lẹ. Eyin hiẹ po whẹndo towe po nọ yí nunọwhinnusẹ́n Owe-wiwe tọn he bọdego ehelẹ do yizan mẹ, mì na penugo nado duto ninọmẹ he tlẹ sinyẹn taun lẹ ji.

NUHE BIBLU DỌ: “Mì to magbọjẹ mìtọn lẹpo bẹ dlan ewọ ji, na e to mìtọn hòpọn wutu.” (1 Pita 5:7) Mì nọ flin to whepoponu dọ e ma yin Jiwheyẹwhe wẹ yin asisa whlepọn mìtọn lẹ tọn gba. (Jakọbu 1:13) Eyin mì dọnsẹpọ ẹ, ewọ na gọalọna mì to aliho he yọ́n hugan mẹ. (Isaia 41:10) “[Mì nọ] kọ̀n ayiha mìtọn jẹgbonu to nukọn etọn.”—Psalm 62:8.

Mì nasọ mọ homẹmiọnnamẹ yí eyin mì nọ hia bo nọ plọn Biblu egbesọegbesọ. Taidi kọdetọn de, mì na mọ lehe Jehovah “nọ miọnhomẹna mí to nukunbibia mítọn lẹpo mẹ” do. (2 Kọlintinu lẹ 1:3, 4; Lomunu lẹ 15:4) Jiwheyẹwhe dopagbe nado na mì “jijọho [Etọn] he yiaga hugan linlẹn lẹpo.”—Filippinu lẹ 4:6, 7, 13.

NUHE A SỌGAN WÀ:

• Mì nọ biọ alọgọ Jehovah tọn to odẹ̀ mẹ nado sọgan duto mìde ji podọ nado lẹnnupọn to aliho he sọgbe mẹ

• Mì nọ lẹnnupọndo onú voovo he mì sọgan wà lẹ ji bo de dehe pọnte hugan

NUHE BIBLU DỌ: “Ayiha zinzintọ tọn tindo nuyọnẹn: otó nuyọnẹntọ tọn nọ dín nuyọnẹn.” (Howhinwhẹn lẹ 18:15) Nọ mọnukunnujẹ nuhe gando whẹho lọ go lẹ mẹ to gigọ́ mẹ. Nọ dindona nuhudo he hagbẹ whẹndo lọ tọn dopodopo tindo. Nọ dọho hẹ yé. Nọ dotoaina yé.—Howhinwhẹn lẹ 20:5.

Etẹwẹ lo, eyin mẹyiwanna de wẹ kú? Winyan ni ma hù we nado do numọtolanmẹ towe lẹ hia blo. Flindọ Jesu lọsu tlẹ “kùn dasin.” (Johanu 11:35; Yẹwhehodọtọ 3:4) Gbọjẹ po amlọn he pemẹnu po sọ yin nujọnu ga. (Yẹwhehodọtọ 4:6) Mọwiwà na hẹn ẹn bọawuna we nado pehẹ ninọmẹ lọ.

NUHE A SỌGAN WÀ:

• Jẹnukọnna nujijọ ylankan lẹ, mì wleawuna aṣa lọ nado nọ dọhodopọ hẹ hagbẹ whẹndo mìtọn tọn lẹ. Whenue nuhahun lẹ na fọ́n, yé na voawu nado dọho hẹ mì

• Mì nọ dọho hẹ mẹhe ko pehẹ ninọmẹ mọnkọtọn pọ́n lẹ

NUHE BIBLU DỌ: “Họntọn nọ yiwannamẹ whepoponu, ṣigba mẹmẹsunnu wẹ yè ji na madodego.” (Howhinwhẹn lẹ 17:17) Họntọn mìtọn lẹ na jlo nado gọalọna mì, ṣigba yé sọgan nọma yọ́n nuhe yé na wà. Enẹwutu, mì ma whleawu nado dọ nuhe sin hudo mì tindo taun na yé blo. (Howhinwhẹn lẹ 12:25) Humọ, mì nọ dín alọgọ gbigbọmẹ tọn sọn mẹhe tindo nukunnumọjẹnumẹ Biblu tọn lẹ dè. Anademẹ he yé na na mì sọn Biblu mẹ lẹ na gọalọna mì.—Jakọbu 5:14.

Eyin mì nọ dogbẹ́ hẹ mẹhe tindo yise nujọnu tọn to Jiwheyẹwhe mẹ bo dejido opagbe etọn go lẹ, mì na mọ godonọnamẹ he sin hudo mì tindo. Mì nasọ mọ homẹmiọnnamẹ daho yí eyin mì nọ na tuli mẹhe tin to nuhahun mẹ lẹ. Mì nọ dọhona yé do yise he mì tindo to Jehovah po opagbe etọn lẹ po mẹ ji. Mì nọ gọalọna mẹhe tindo nuhahun lẹ bo ma nọ klan mìde sọn mẹhe yiwanna mì bo to mìtọn hòpọn lẹ go blo.—Howhinwhẹn lẹ 18:1; 1 Kọlintinu lẹ 15:58.

NUHE A SỌGAN WÀ:

• Mì dọho hẹ họntọn vivẹ́ de bo kẹalọyi alọgọ etọn

• Mì dọ nuhe sin hudo mì tindo na ẹn tlọlọ bo ma whlá nude do e blo