Jehovah biọ to mí si nado nọ “yin nugbonọ.” (1 Kọlintinu lẹ 4:2) Ehe yin nujọnu taun to alọwle mìtọn mẹ, na nugbonọ-mayin nọ zọ́n bọ jide ma nọ tin. Eyin alọwle de na lodo, jidide yin dandan.

To egbehe, nugbonọ-yinyin to bubusẹ sọn alọwle susu mẹ. Nado basi hihọ́na alọwle towe, a dona magbe nado wà onú awe delẹ.

NUHE BIBLU DỌ: Nọ “mọdona nuhe yin nujọnu hugan lẹ.” (Filippinu lẹ 1:10) Dopo to nuhe yin nujọnu hugan to gbẹzan towe mẹ lẹ mẹ wẹ alọwle towe. E dona tin to otẹn tintan mẹ.

Jehovah jlo dọ alọwlemẹ lẹ ni nọ na ayidonugo ode awetọ bo nọ “yí homẹhunhun do nọhẹ” yede. (Yẹwhehodọtọ 9:9) Ewọ dohia hezeheze dọ a ma dona dovọ́na alọwlemẹ towe gbede, kakatimọ, mì omẹ awe lẹ dona nọ dín aliho lẹ nado nọ hẹn homẹhun ode awetọ. (1 Kọlintinu lẹ 10:24) Nọ dohia alọwlemẹ towe dọ emi tindo nuhudo etọn bosọ yọ́n pinpẹn etọn.

NUHE A SỌGAN WÀ:

• Nọ hẹn ẹn diun dọ a nọ yí whenu zan hẹ alọwlemẹ towe whẹwhẹ bosọ nọ na ẹn ayidonugo gigọ́

• Nọ zan hogbe lọ “mí” kakati nido yin “yẹn”

NUHE BIBLU DỌ: “Mẹdepope he zindonukọn nado to yọnnu de pọ́n kaka bo tindo ojlo zogbe de na ẹn ko deayọ hẹ ẹ dote to ahun etọn mẹ.” (Matiu 5:28) Eyin mẹde nọ to nulẹnpọn do onú mawé lẹ ji, to linlẹn de mẹ, ewọ ma to nugbonọ yin na alọwlemẹ etọn.

Jehovah dọ dọ hiẹ dona ‘basi hihọ́na ahun towe.’ (Howhinwhẹn lẹ 4:23; Jelemia 17:9) Mọwiwà na biọ dọ hiẹ ni basi hihọ́na nukun towe lẹ. (Matiu 5:29, 30) Hodo apajlẹ tọgbo Job tọn, yèdọ mẹhe basi alẹnu de hẹ nukun etọn lẹ ma nado pọ́n yọnnu devo po ojlo agọ̀ po pọ́n gbede. (Job 31:1) Magbe ma nado nọ pọ́n yẹdide fẹnnuwiwa tọn lẹ. Humọ, magbe ma nado tindo kanṣiṣa owanyi tọn hẹ mẹdevo depope zẹ̀ alọwlemẹ towe go.

NUHE A SỌGAN WÀ:

• Hẹn ẹn họnwun na mẹdevo lẹ dọ a ko dopà tẹgbẹ tọn de na alọwlemẹ towe

• Nọ hò numọtolanmẹ alọwlemẹ towe tọn lẹ pọ́n bosọ nọ yawu sánkanna haṣinṣan depope he na gbleawuna alọwlemẹ towe