1. Odẹ̀ he gbayipe taun tẹ ji wẹ mí na dọhodo todin?

GBẸTỌ livi susu wẹ yọ́n odẹ̀ he gbayipe taun lọ he nọ yin yiylọdọ Otọ́ Mítọn He Tin to Olọn Mẹ kavi Odẹ̀ Oklunọ Tọn. Jesu yí odẹ̀ ehe do plọn dẹ̀hiho devi etọn lẹ. Etẹwẹ e biọ to odẹ̀ ehe mẹ? Podọ naegbọn odẹ̀ ehe do yin nujọnu na mí to egbehe?

2. Onú titengbe atọ̀n tẹlẹ wẹ Jesu plọn mí nado nọ biọ to odẹ̀ mẹ?

² Jesu dọmọ: “Lehe mìwlẹ dona nọ hodẹ̀ do die: ‘Otọ́ mítọn he tin to olọn mẹ, na oyín towe ni yin kinklandowiwe. Na Ahọluduta towe ni wá. Na ojlo towe ni yin wiwà, kẹdẹdi to olọn mẹ, mọdopolọ to aigba ji.’” (Hia Matiu 6:9-13.) Etẹwutu Jesu do plọn mí nado nọ biọ onú atọ̀n enẹlẹ to odẹ̀ mẹ?—Pọ́n Nudọnamẹ Dogọ 20tọ.

3. Etẹlẹ wẹ e jẹ dọ mí ni yọnẹn gando Ahọluduta Jiwheyẹwhe tọn go?

³ Mí ko plọn dọ oyín Jiwheyẹwhe tọn wẹ Jehovah. Mí ko sọ dọhodo nuhe yin ojlo Jiwheyẹwhe tọn na gbẹtọvi lẹ podọ na aigba ji. Ṣigba, etẹ na dọ wẹ Jesu te to whenue e dọ dọ: “Na Ahọluduta towe ni wá”? Gbọ mí ni plọnnu gando nuhe Ahọluduta Jiwheyẹwhe tọn yin, nuhe e na wà po lehe e na klan oyín Jiwheyẹwhe tọn do wiwe do po go.

4. Etẹwẹ Ahọluduta Jiwheyẹwhe tọn yin, podọ mẹnu wẹ yin Ahọlu etọn?

⁴ Jehovah ze Ahọluduta olọn mẹ tọn de dai bo de Jesu  taidi Ahọlu etọn. Biblu ylọ gandudu ehe dọ Ahọluduta Jiwheyẹwhe tọn. Jesu wẹ “Ahọlu mẹhe to gandu taidi ahọlu lẹ tọn podọ Oklunọ mẹhe to gandu taidi oklunọ lẹ tọn.” (1 Timoti 6:15) Jesu penugo nado wà nudagbe susu hú dehe gbẹtọvi gandutọ depope sọgan wà, podọ e dohuhlọn taun hú gbẹtọvi he to gandu lẹpo to pọmẹ.

5. Fie wẹ gandudu Jiwheyẹwhe tọn na dugán sọn? Etẹ ji wẹ e na dugán do?

⁵ Azán 40 to fọnsọnku Jesu tọn godo, e lẹkọyi olọn mẹ. To nukọn mẹ, Jehovah wá de e taidi Ahọlu Ahọluduta lọ tọn. (Owalọ lẹ 2:33) Gandudu Jiwheyẹwhe tọn na dugán do aigba ji sọn olọn mẹ. (Osọhia 11:15) Enẹwutu wẹ Biblu do nọ ylọ Ahọluduta Jiwheyẹwhe tọn dọ “Ahọluduta olọn tọn.”—2 Timoti 4:18.

6, 7. Etẹwẹ zọ́n bọ Jesu do pegan hugan gbẹtọvi he yin ahọlu lẹpo?

⁶ Biblu dọ dọ Jesu klohu gbẹtọvi he yin ahọlu lẹpo, na ewọ “kẹdẹ wẹ tindo jọmaku.” (1 Timoti 6:16) Gbẹtọvi gandutọ lẹpo wẹ nọ wá kú to godo mẹ, ṣigba Jesu ma na kú gbede. Nudagbe he Jesu na wà na mí lẹpo wẹ na nọ aimẹ kakadoi.

⁷ Dọdai Biblu tọn dọ dọ Jesu na yin Ahọlu dodonọ podọ awuvẹmẹtọ de. Mí hia dọmọ: “Gbigbọ Jehovah tọn nasọ jẹ do e ji, yèdọ gbigbọ nuyọnẹn po nukunnumọjẹnumẹ po tọn, gbigbọ ayinamẹ po huhlọn po tọn, gbigbọ oyọnẹn po budisi Jehovah po tọn. Ewọ nasọ nọ mọ awuvivi to budisi Jehovah mẹ. E ma na nọ dawhẹ sọgbe hẹ awusọhia nukunta tọn, kavi wọhẹmẹ to dodonu nuhe e sè poun lẹ tọn ji. E na nọ dawhẹ jijlọ na agbátọnọ [kavi wamọnọ].” (Isaia 11:2-4) Be e ma yin ahọlu he nkọ dín a te niyẹn ya?

8. Nawẹ mí wagbọn do yọnẹn dọ mẹdevo lẹ na dugán hẹ Jesu?

⁸ Jiwheyẹwhe ko ṣinyan gbẹtọvi delẹ nado dugán hẹ  Jesu to gandudu olọn mẹ tọn lọ mẹ. Di apajlẹ, apọsteli Paulu dọna Timoti dọmọ: “Eyin mí zindonukọn to akọndonanu mẹ, mí nasọ dugán taidi ahọlu lẹ dopọ.” (2 Timoti 2:12) Omẹ nẹmu wẹ na duahọlu hẹ Jesu?

9. Omẹ nẹmu wẹ na dugán hẹ Jesu? Whetẹnu wẹ Jiwheyẹwhe jẹ dide yé ji?

⁹ Dile mí ko plọn to Weta 7tọ mẹ do, apọsteli Johanu mọ Jesu to numimọ de mẹ bọ e to gandu to olọn mẹ di Ahọlu to pọmẹ hẹ ahọlu 144 000 devo lẹ. Mẹnu lẹ wẹ yin omẹ 144 000 lọ lẹ? Johanu basi zẹẹmẹ dọ “yè kàn oyín [Jesu tọn] po Otọ́ etọn tọn po do nukọn na” yé. E sọ yidogọ dọ: “Omẹ ehelẹ wẹ nọ to hihodo Lẹngbọvu lọ [enẹ wẹ, Jesu] yì fidepope he e yì. Yewlẹ wẹ yin hihọ̀ sọn gbẹtọvi lẹ mẹ.” (Hia Osọhia 14:1, 4.) Gbẹtọ 144 000 lọ lẹ yin Klistiani nugbonọ lẹ he Jiwheyẹwhe ko de nado “duahọlu do aigba ji” hẹ Jesu. Eyin yé kú, yé nọ yin finfọnsọnku do olọn mẹ. (Osọhia 5:10) Sọn ojlẹ apọsteli lẹ tọn mẹ wẹ Jehovah ko jẹ Klistiani nugbonọ delẹ de ji, na yé nido wá tin to pipli ahọlu 144 000 lọ lẹ tọn mẹ.

10. Naegbọn e do yin dohia owanyi tọn dọ Jesu po gbẹtọ 144 000 lẹ po wẹ Jehovah de nado dugán do gbẹtọvi lẹ ji?

¹⁰ Jehovah nọ hò mítọn pọ́n sọmọ bọ e basi tito na gbẹtọvi delẹ nido dugán hẹ Jesu. Jesu na yin ahọlu dagbe, na e mọnukunnujẹ ninọmẹ mítọn mẹ. E yọ́n nuhe e zẹẹmẹdo nado yin gbẹtọvi podọ nado jiya. Paulu dọ dọ Jesu nọ ze ede do otẹn mítọn mẹ, e sọgan “vẹawu madogán mítọn lẹ,” podọ e “ko yin tintẹnpọn to adà lẹpo mẹ taidi mílọsu lẹ.” (Heblu lẹ 4:15; 5:8) Gbẹtọ 144 000 lọ lẹ lọsu yọ́n nuhe e zẹẹmẹdo nado yin gbẹtọvi. Yelọsu ko diahi hẹ mape po azọ̀n po. Enẹwutu, mí sọgan deji dọ gbọnvona dọ Jesu po gbẹtọ 144 000 lọ lẹ po na  mọnukunnujẹ numọtolanmẹ mítọn lẹ mẹ, yé nasọ yọ́n nuhahun he mí nọ pehẹ lẹ ganji.

11. Naegbọn Jesu do plọn devi etọn lẹ nado nọ hodẹ̀ dọ ojlo Jiwheyẹwhe tọn ni yin wiwà to olọn mẹ?

¹¹ Jesu plọn devi etọn lẹ nado nọ hodẹ̀ dọ ojlo Jiwheyẹwhe tọn ni yin wiwà to olọn mẹ. Etẹwutu? Mí plọn to Weta 3tọ mẹ dọ Satani Lẹgba ṣiatẹ sọta Jehovah. To atẹṣiṣi Satani tọn godo, Jehovah na dotẹnmẹ ewọ po angẹli he ma yin nugbonọ lẹ kavi aovi lẹ po nado gbọṣi olọn mẹ na ojlẹ de. E dohia dọ e ma yin mẹhe to olọn mẹ lẹpo wẹ to ojlo Jiwheyẹwhe tọn wà to whenẹnu. To Weta 10tọ mẹ, mí na plọn nususu dogọ gando Satani po aovi lẹ po go.

12. Nujijọ titengbe awe tẹlẹ ji wẹ Osọhia 12:10 dọhodo?

¹² Biblu dọ dọ ojlẹ vude to whenue Jesu na yin zizedo ofìn ji taidi Ahọlu Ahọluduta Jiwheyẹwhe tọn godo, e na funawhàn hẹ Satani. (Hia Osọhia 12:7-10.) Wefọ 10tọ dọhodo nujijọ titengbe awe ji. Ahọluduta Jiwheyẹwhe tọn jẹ gandu ji to anademẹ Jesu Klisti tọn glọ taidi Ahọlu bọ Satani yin dindlan sọn olọn mẹ do aigba ji. Dile mí na wá mọ do, nujijọ ehelẹ ko wá aimẹ.

13. Etẹwẹ jọ to olọn mẹ to whenue Satani yin dindlan do odò?

¹³ Biblu do lehe angẹli nugbonọ lẹ jaya to whenue Satani po aovi etọn lẹ po yin dindlan sọn olọn mẹ do hia. Mí hia dọmọ: “Mì jaya, mì olọn lẹ po mì mẹhe nọ nọ̀ e mẹ lẹ po!” (Osọhia 12:12) Todin, mẹhe to olọn mẹ lẹpo wẹ vò bo tin to kọndopọ mẹ, na yemẹpo wẹ to ojlo Jiwheyẹwhe tọn wà.

14. Etẹwẹ to jijọ to aigba ji, na Satani yin yinyan sọn olọn mẹ wutu?

¹⁴ Ṣigba, ninọmẹ lọ gbọnvo taun to aigba ji. Nuylankan lẹ nọ jọ, “na Lẹgba ko jẹte wá . . . po homẹgble daho  po, na e yọnẹn dọ whenu gli de wẹ emi tindo wutu.” (Osọhia 12:12) Satani to adi ji taun. E ko yin yinyan sọn olọn mẹ, e sọ yọnẹn dọ emi na yin vivasudo to madẹnmẹ. E to nuhe go e pé lẹpo wà nado hẹn tukla, awufiẹsa po yajiji po wá lẹdo aihọn pé.

15. Etẹwẹ yin ojlo Jiwheyẹwhe tọn na aigba?

¹⁵ Ṣigba, ojlo Jiwheyẹwhe tọn na aigba ma diọ. Ojlo etọn wẹ gbẹ́ yindọ gbẹtọvi pipé lẹ ni nọgbẹ̀ kakadoi to paladisi mẹ to aigba ji. (Salmu lẹ 37:29) Eyin mọ wẹ, nawẹ Ahọluduta Jiwheyẹwhe tọn na hẹn ehe yọnbasi gbọn?

16, 17. Etẹwẹ Daniẹli 2:44 dọna mí gando Ahọluduta Jiwheyẹwhe tọn go?

¹⁶ Dọdai Daniẹli 2:44 tọn dọmọ: “To ojlẹ ahọlu enẹlẹ tọn mẹ wẹ Jiwheyẹwhe olọn tọn na ze ahọluduta de dai he ma na yin vivasudo gbede. Ahọluduta ehe ma nasọ yin jijodo na akọta devo depope. E na gídí ahọluduta ehe lẹpo bo na hẹn yé wá opodo, bọ ewọ kẹdẹ wẹ na nọte kakadoi.” Etẹwẹ dọdai ehe plọn mí gando Ahọluduta Jiwheyẹwhe tọn go?

¹⁷ Tintan, dọdai lọ dohia dọ Ahọluduta Jiwheyẹwhe tọn na jẹ gandu ji “to ojlẹ ahọlu enẹlẹ tọn mẹ.” Ehe zẹẹmẹdo dọ gandudu devo lẹ na gbẹ́ pò to aigba ji to whenue Ahọluduta lọ na jẹ gandu ji. Awetọ, e dohia dọ Ahọluduta Jiwheyẹwhe tọn na gbọṣi aimẹ kakadoi bọ gandudu devo ma na diọtẹnna ẹn gbede. Podọ atọ̀ntọ, awhàn de na wá aimẹ to Ahọluduta Jiwheyẹwhe tọn po gandudu aihọn ehe tọn lẹ po ṣẹnṣẹn. Ahọluduta Jiwheyẹwhe tọn wẹ na gbawhàn bo na lẹzun gandudu dopo gee he na paṣẹ do aigba ji. To whenẹnu, gbẹtọvi lẹ na duvivi gandudu dagbe hugan he nkọ yé ma ko tindo pọ́n tọn.

18. Nawẹ awhàn godo tọn he na yin fùnfùn to Ahọluduta Jiwheyẹwhe tọn po gandudu aihọn ehe tọn lẹ po ṣẹnṣẹn nọ yin yiylọdọ?

 ¹⁸ Nawẹ Ahọluduta Jiwheyẹwhe tọn na yitẹn sọn gandudu aigba ji tọn lẹ si gbọn? Jẹnukọnna awhàn godo tọn lọ he nọ yin yiylọdọ Amagẹdọni, aovi lẹ na doyẹklọ “ahọlu aigba fininọ lẹpo tọn lẹ . . . nado bẹ yé pli dopọ na awhàn azán daho Jiwheyẹwhe Ganhunupotọ lọ tọn.” Mọwẹ, gandudu gbẹtọvi tọn lẹ na hoavùn sọta Ahọluduta Jiwheyẹwhe tọn.—Osọhia 16:14, 16; pọ́n Nudọnamẹ Dogọ 10tọ.

19, 20. Etẹwutu mí tindo nuhudo dọ Ahọluduta Jiwheyẹwhe tọn ni dugán do aigba ji?

¹⁹ Etẹwutu mí tindo nuhudo Ahọluduta Jiwheyẹwhe tọn? E whè gbau na whẹwhinwhẹ́n atọ̀n wutu wẹ. Tintan, mí yin ylandonọ, enẹwutu mí nọ jẹazọ̀n bo nọ kú. Amọ́, Biblu dọ dọ to Ahọluduta Jiwheyẹwhe tọn glọ, mí na nọgbẹ̀ kakadoi. Na nugbo tọn, Johanu 3:16 dọ: “Jiwheyẹwhe yiwanna aihọn lọ sọmọ bọ e namẹ Visunnu detọ́n dopo akàn etọn, na mẹdepope he do yise hia to ewọ mẹ ma nado yin vivasudo adavo nado tindo ogbẹ̀ madopodo.”

²⁰ Whẹwhinwhẹ́n awetọ he wutu mí do tindo nuhudo Ahọluduta Jiwheyẹwhe tọn wẹ yindọ mẹylankan lẹ kẹdẹ wẹ lẹdo mí pé to egbehe. Mẹsusu nọ dolalo nọ tafumẹ bosọ nọ doalọ to fẹnnuwiwa mẹ. Nude ma tin he mí gán wà nado de yé sẹ̀, amọ́ Jiwheyẹwhe na wàmọ. Mẹhe zindonukọn to nuylankan wiwà mẹ lẹ na yin vivasudo to awhàn Amagẹdọni tọn whenu. (Hia Salmu lẹ 37:10.) Whẹwhinwhẹ́n atọ̀ntọ he wutu mí do tindo nuhudo Ahọluduta Jiwheyẹwhe tọn wẹ yindọ gandudu gbẹtọvi tọn lẹ ko gboawupo bo yin kanylantọ kavi nọ hòmẹdu. Yé ma nọ gọalọna gbẹtọ lẹ nado setonuna  Jiwheyẹwhe. Biblu dọ dọ “gbẹtọ ko dugán do gbẹtọ ji na awugble etọn.”—Yẹwhehodọtọ 8:9.

21. Nawẹ Ahọluduta lọ na hẹn ẹn diun dọ ojlo Jiwheyẹwhe tọn yin wiwà to aigba ji gbọn?

²¹ To Amagẹdọni godo, Ahọluduta Jiwheyẹwhe tọn na hẹn ẹn diun dọ ojlo Jiwheyẹwhe tọn yin wiwà to aigba ji. Di apajlẹ, e na de Satani po aovi etọn lẹ po sẹ̀. (Osọhia 20:1-3) To godo mẹ, mẹdepope ma nasọ nọ jẹazọ̀n kavi kú ba. Na ofligọ lọ wutu, gbẹtọvi nugbonọ lẹpo na penugo nado nọgbẹ̀ kakadoi to Paladisi mẹ. (Osọhia 22:1-3) Ahọluduta lọ na klan oyín Jiwheyẹwhe tọn do wiwe. Etẹwẹ ehe zẹẹmẹdo? E zẹẹmẹdo dọ whenue gandudu Jiwheyẹwhe tọn na paṣẹ do aigba ji, gbẹtọvi lẹpo wẹ na nọ gbògbéna oyín Jehovah tọn.—Pọ́n Nudọnamẹ Dogọ 21tọ.

22. Nawẹ mí wagbọn do yọnẹn dọ Jesu ma lẹzun Ahọlu to whenue e tin to aigba ji kavi tlolo he e yin finfọnsọnku godo?

²² Jesu plọn hodotọ etọn lẹ nado nọ hodẹ̀ dọ: “Na Ahọluduta towe ni wá.” Enẹ dohia dọ sọgodo wẹ gandudu Jiwheyẹwhe tọn lọ na wá. Jẹnukọn whẹ́, Jehovah na ze gandudu etọn dai bo na yí Jesu do doahọlu do e ji. Be  tlolo he Jesu lẹkọyi olọn mẹ wẹ e lẹzun Ahọlu ya? Lala, e nọte na ojlẹ de whẹ́. Ojlẹ vude to fọnsọnku Jesu tọn godo, Pita po Paulu po hẹn ehe họnwun to whenue yé yí dọdai he tin to Salmu lẹ 110:1 mẹ zan gando Jesu go. To dọdai lọ mẹ, Jehovah dọmọ: “Sinai to adusilọ ṣie mẹ kaka yẹn nado yí kẹntọ towe lẹ do basi tokloafọligbe afọ towe lẹ tọn.” (Owalọ lẹ 2:32-35; Heblu lẹ 10:12, 13) Ojlẹ nẹmu wẹ Jesu na nọte na whẹpo Jehovah nado yí i do doahọlu?

23. (a) Whetẹnu wẹ Jesu jẹ gandu ji taidi Ahọlu Ahọluduta Jiwheyẹwhe tọn? (b) Etẹwẹ mí na plọn to weta he bọdego mẹ?

²³ Owhe susu jẹnukọnna 1914, pipli Klistiani ahundoponọ lẹ tọn de mọnukunnujẹemẹ dọ owhe enẹ na yin owhe ayidego tọn de to dọdai Biblu tọn mẹ. Nuhe to jijọ to aihọn mẹ sọn 1914 lẹ ko dohia dọ nugbo wẹ yé dọ. Jesu jẹ gandu ji taidi Ahọlu to owhe enẹ mẹ. (Salmu lẹ 110:2) Ojlẹ vude to enẹgodo, Satani yin dindlan do aigba ji, podọ todin “whenu gli de wẹ [e] tindo.” (Osọhia 12:12) To weta he bọdego mẹ, mí na mọ kunnudenu susu devo lẹ he dohia dọ ojlẹ enẹ mẹ wẹ mí to gbẹnọ te. Mí nasọ plọn dọ to madẹnmẹ, Ahọluduta Jiwheyẹwhe tọn na hẹn ẹn diun dọ ojlo Jiwheyẹwhe tọn yin wiwà to aigba ji.—Pọ́n Nudọnamẹ Dogọ 22tọ.