1, 2. Kanbiọ tẹlẹ wẹ mẹlẹ nọ saba kanse?

YỌPỌVU lẹ nọ kanhose taun. Eyin a tlẹ basi zẹẹmẹ nude tọn na yé, yé gbẹ́ nọ kanse dọ, ‘Etẹwutu?’ Eyin a sọ tẹnpọn nado na gblọndo de, yé gán gbẹ́ kanse dọ, ‘Bọ etẹwutu e do yinmọ?’

² Vlavo mí yin yọpọ kavi mẹho, mímẹpo wẹ kanbiọ delẹ nọ duahunmẹna. Mí gán tindo kanbiọ delẹ gando nuhe mí na dù, avọ̀ he mí na do, kavi nuhe mí na họ̀ lẹ go. Kavi kanbiọ titengbe delẹ sọgan nọ duahunmẹna mí gando gbẹzan mítọn po sọgodo po go. Ṣigba, eyin mí ma mọ gblọndo dagbe lẹ na kanbiọ ehelẹ, mí sọgan hònúpla bo doalọtena kanbiọ lẹ kinkanse.

3. Naegbọn mẹsusu nọ lẹndọ yé ma sọgan mọ gblọndo na kanbiọ titengbe he nọ duahunmẹna yé lẹ?

³ Be gblọndo kanbiọ titengbe he mí nọ kanse lẹ tọn tin to Biblu mẹ ya? Mẹdelẹ sọgan lẹnmọ, amọ́ yé nọ mọdọ Biblu vẹawu gbau nado mọnukunnujẹemẹ. Yé sọgan nọ lẹndọ mẹplọntọ lẹ kavi yẹwhenọ lẹ kẹdẹ wẹ yọ́n gblọndo lọ lẹ. Na mẹdevo lẹ tọn, winyan nọ hù yé gbau nado yigbe dọ yé ma yọ́n gblọndo lọ lẹ. Hiẹ lo, etẹwẹ a lẹn?

4, 5. Kanbiọ titengbe tẹlẹ wẹ nọ duahunmẹna we? Naegbọn a dona to gblọndo lẹ dín zọnmii?

⁴ E yọnbasi dọ hiẹ lọsu na ko to gblọndo dín na kanbiọ delẹ taidi: Etẹwutu n’do tofi taun? Etẹwẹ na jọ do go e eyin n’kú? Omẹ nankọ wẹ Jiwheyẹwhe yin? Jesu, Mẹplọntọ he diyin lọ, dọmọ: “Mì to bibiọ zọnmii, e nasọ yin nina mì;  mì to dindin zọnmii, mì nasọ mọ; mì to họ̀nhúhú zọnmii, e nasọ yin hùnhùn na mì.” (Matiu 7:7) Kaka a nado mọ gblọndo he go a sọgan dejido lẹ, ma hònúpla gbede blo.

⁵ Mọwẹ, eyin a to “dindin zọnmii,” a na mọ gblọndo he jẹ lẹ to Biblu mẹ. (Howhinwhẹn lẹ 2:1-5) Gblọndo lọ lẹ ma vẹawu gbau nado mọnukunnujẹemẹ. Nuhe a na plọn lẹ na hẹn gbẹzan towe gọ́ na ayajẹ todin bọ a nasọ tindo todido jiawu de na sọgodo. Gbọ mí ni dọhodo kanbiọ he ko hẹn mẹsusu biọ bẹwlu mẹ de ji.

6. Etẹwutu mẹdelẹ nọ lẹndọ oyà he ji yé te ma nọ duahunmẹna Jiwheyẹwhe?

⁶ Mẹsusu nọ lẹndọ Jiwheyẹwhe ma nọ hò mítọn pọ́n. Yé nọ mọdọ eyin Jiwheyẹwhe nọ hò mítọn pọ́n dai wẹ, ninọmẹ aihọn tọn ma na ko ylan dole. Fide ma pò bọ awhàn, wangbẹna po awufiẹsa po ma to nuhẹngble te. Gbẹtọ lẹ nọ jẹazọ̀n bo nọ jiya bosọ nọ kú. Mẹdelẹ nọ kanse yede dọ, ‘Eyin Jiwheyẹwhe nọ hò mítọn pọ́n nugbo, naegbọn e ma do doalọtena yajiji ehe lẹpo?’

7. (a) Nawẹ sinsẹ̀ngán lẹ ko plọn mẹlẹ dọ Jiwheyẹwhe yin kanylantọ gbọn? (b) Naegbọn mí sọgan kudeji dọ e ma yin Jiwheyẹwhe wẹ mí na dowhẹ na nuylankan he to jijọ lẹ?

⁷ Whedelẹnu, sinsẹ̀ngán lẹ lọsu wẹ nọ hẹn mẹlẹ nado lẹndọ Jiwheyẹwhe yin kanylantọ. Eyin nuylankan de jọ, yé nọ dọ dọ ojlo Jiwheyẹwhe tọn wẹ. Yé nọ dọ dọ ewọ lọsu wẹ jlo bọ e do jọ. Whenue yé to ehe dọ, whẹ̀do Jiwheyẹwhe wẹ yé te. Ṣigba, nuhe Biblu plọn mí wẹ yindọ Jiwheyẹwhe ma nọ hẹn oylan wá gbede. Jakọbu 1:13 dọna mí dọ Jiwheyẹwhe ma nọ yí nuylankan do whlé mẹdepope pọ́n. Wefọ lọ dọ: “To whenuena mẹde tin to whlepọn glọ, mì dike e dọ dọ: ‘Jiwheyẹwhe wẹ to whiwhle mi pọ́n’ blo.  Na Jiwheyẹwhe ma sọgan yin whiwhlepọn po nuylankan lẹ po, mọjanwẹ ewọ lọsu ma nọ whlé mẹdepope pọ́n to aliho enẹ mẹ.” Ehe dohia dọ dile etlẹ yindọ Jiwheyẹwhe ma nọ glọnalina nuylankan lẹ todin, ewọ lọsu ma nọ hẹn yé wá gbede. (Hia Jobu 34:10-12.) Mí ni yí apajlẹ dopo.

8, 9. Naegbọn e ma na sọgbe nado dowhẹ Jiwheyẹwhe na nuhahun mítọn lẹ? Na apajlẹ de.

⁸ Mí ni dọ dọ dẹpẹ de nọ nọ̀ owhé mẹjitọ etọn lẹ tọn gbè. Baba etọn yiwanna ẹn taun bo plọn ẹn lehe e na nọ basi nudide dagbe lẹ do. Amọ́, dẹpẹ lọ wá fọngu do baba etọn ji bo gbọ bo yì jẹ fidevo. E jẹ nuhe ma sọgbe lẹ wà ji bo biọ nuhahun mẹ. Be baba lọ wẹ a na dowhẹ, na e ma glọnalina visunnu etọn nado bẹ agbàn yì jẹ fidevo wutu ya? Paali! (Luku 15:11-13) Taidi baba enẹ, Jiwheyẹwhe ma glọnalina gbẹtọvi lẹ to whenue yé de nado fọngu bo jẹ nuylankan lẹ wà ji. Enẹwutu eyin nuylankan de jọ, mí dona nọ flindọ e ma yin Jiwheyẹwhe wẹ hẹn ẹn wá. E ma na sọgbe nado dowhẹ Jiwheyẹwhe.

⁹ Whẹwhinwhẹ́n dagbe de wutu wẹ Jiwheyẹwhe ma ko glọnalina nuylankan lẹ nado jọ kakajẹ din. To Weta 11tọ mẹ, a na wá mọ nuhe Biblu dọ gando ehe go. Ṣigba, a sọgan deji dọ Jiwheyẹwhe yiwanna mí podọ e ma yin ewọ wẹ mí na dowhẹ na nuhahun mítọn lẹ. Nado dọ hójọhó, ewọ kẹdẹ wẹ sọgan didẹ nuhahun mítọn lẹ.—Isaia 33:2.

10. Etẹwutu mí sọgan deji dọ Jiwheyẹwhe na vọ́ nuhe mẹylankan lẹ ko hẹngble lẹpo jlado?

¹⁰ Wiwe wẹ Jiwheyẹwhe. (Isaia 6:3) Nuhe e nọ wà lẹpo wẹ wé-ṣeke bosọ yin dagbe. Enẹwutu, mí gán dejido ewọ go. Mí ma gán dọ nudopolọ gando gbẹtọ lẹ go. Yé nọ wà nuylankan lẹ to whedelẹnu. Podọ gandutọ he yin nugbonọ hugan lọsu ma tlẹ tindo huhlọn nado vọ́ nuhe mẹylankan  lẹ nọ hẹngble lẹpo jlado. Mẹde ma dohuhlọn sọ Jiwheyẹwhe. Ewọ sọgan vọ́ nuhe mẹylankan lẹ ko hẹngble lẹpo jlado, podọ e na wàmọ. E na de oylan lẹpo sẹ̀ kakadoi.—Hia Salmu lẹ 37:9-11.

11. Numọtolanmẹ tẹwẹ Jiwheyẹwhe nọ tindo gando oyà he ji a te go?

¹¹ Numọtolanmẹ tẹwẹ Jiwheyẹwhe nọ tindo eyin e mọ nuhe to jijọ to aihọn lọ mẹ lẹ po nuhe pehẹ a te lẹ po? Biblu plọn mí dọ Jiwheyẹwhe “yiwanna whẹdida dodo.” (Salmu lẹ 37:28) Enẹwutu, dagbe po oylan po nọ duahunmẹna ẹn taun. Homẹ etọn ma nọ hùn eyin gbẹtọ lẹ to yaji. Biblu dọ dọ e “doadi na ẹn to ahun etọn mẹ” to whenue e mọdọ aihọn gọ́ na oylan to hohowhenu. (Jenẹsisi 6:5, 6) Jiwheyẹwhe ma ko diọ. (Malaki 3:6) Biblu dọ dọ Jiwheyẹwhe nọ hò towe pọ́n nugbonugbo.—Hia 1 Pita 5:7.

12, 13. (a) Etẹwutu mí do nọ yiwanna mẹdevo lẹ bo nọ hò yetọn pọ́n, podọ numọtolanmẹ tẹwẹ mí nọ tindo gando yajiji he to aihọn lọ mẹ go? (b) Naegbọn mí sọgan deji dọ Jiwheyẹwhe na de yajiji po whẹdida mawadodo po sẹ̀ mlẹnmlẹn?

¹² Biblu sọ dọ dọ Jiwheyẹwhe dá mí to apajlẹ ede tọn mẹ. (Jenẹsisi 1:26) Ehe zẹẹmẹdo dọ Jiwheyẹwhe dá mí po jẹhẹnu dagbe he nkọ ewọ lọsu tindo lẹ po. Enẹwutu, eyin e nọ biọlanmẹna we whenue a mọ bọ homẹvọnọ lẹ to yaji, be e dona nọ biọlanmẹna Jiwheyẹwhe humọ! Etẹwutu mí gán dọ mọ?

¹³ Biblu plọn mí dọ “Jiwheyẹwhe wẹ owanyi.” (1 Johanu 4:8) Nuhe e nọ wà lẹpo wẹ nọ sinai do owanyi ji. Enẹwutu eyin mí to owanyi dohia, na Jiwheyẹwhe lọsu nọ wàmọ wutu wẹ. Lẹnnupọndo ehe ji: Eyin a tindo nugopipe etọn, be a ma na de yajiji po whẹdida mawadodo po sẹ̀  mlẹnmlẹn sọn aihọn mẹ ya? E họnwun dọ a na wàmọ, na a yiwanna hatọ towe lẹ wutu. Bọ Jiwheyẹwhe uwọ lo? E tindo nugopipe lọ, podọ na e yiwanna mí wutu, e na de yajiji po whẹdida mawadodo po sẹ̀ mlẹnmlẹn. A sọgan deji dọ opagbe Jiwheyẹwhe tọn he yin nùdego to bẹjẹeji owe ehe tọn lẹpo wẹ na mọ hẹndi! Ṣigba nado sọgan dejido opagbe ehelẹ go, a dona plọn nususu dogọ gando Jiwheyẹwhe go.

14. Nawẹ Jiwheyẹwhe nọ yin, podọ nawẹ mí wagbọn do yọnẹn dọ mí dona nọ yí oyín enẹ zan?

¹⁴ Eyin a jlo na jihọntọn hẹ mẹde, etẹwẹ yin onú tintan he a nọ saba dọna mẹlọ? Oyín towe, kavi? Be Jiwheyẹwhe tindo oyín de ya? Sinsẹ̀n susu nọ dọ dọ Jiwheyẹwhe kavi Oklunọ wẹ e nọ yin, ṣigba hogbe ehelẹ ma yin yinkọ. Tẹnmẹ-yinkọ lẹ poun wẹ yé yin, taidi “ahọlu” kavi “togán.” Jiwheyẹwhe dọna mí dọ Jehovah wẹ emi nọ yin. Salmu lẹ 83:18 dọ: “Gbọ gbẹtọ lẹ ni yọnẹn dọ hiẹ, mẹhe oyín towe nọ yin Jehovah, hiẹ dopo kẹdẹ wẹ yin Gigogán to aigba lẹpo ji.” Mẹhe kàn Biblu lẹ yí oyín Jiwheyẹwhe tọn zan whla fọtọ́n susu lẹ. Jehovah jlo dọ a ni yọ́n oyín emitọn bo  nọ yí i zan. E dọ oyín etọn na we, na a nido sọgan jihọntọn hẹ ẹ.

15. Etẹwẹ yinkọ lọ Jehovah zẹẹmẹdo?

¹⁵ Oyín Jiwheyẹwhe tọn, Jehovah, sin zẹẹmẹ gbloada taun. E zẹẹmẹdo dọ Jiwheyẹwhe sọgan hẹn opagbe he e do lẹpo di bo hẹn lẹndai etọn di. Nudepope ma gán glọnalina ẹn. Jehovah kẹdẹ wẹ sọgan tindo yinkọ ehe. *

16, 17. Etẹwẹ tẹnmẹ-yinkọ ehelẹ zẹẹmẹdo (a) “Ganhunupotọ”? (b) “Ahọlu madopodo”? (c) “Mẹdatọ”?

 ¹⁶ Dile mí ko hia do wayi, Salmu lẹ 83:18 dọ gando Jehovah go dọmọ: “Hiẹ dopo kẹdẹ wẹ yin Gigogán.” Humọ, Osọhia 15:3 dọmọ: “Daho po jiawu po wẹ azọ́n towe lẹ, Jehovah Jiwheyẹwhe, Ganhunupotọ. Dodo po nugbo po wẹ aliho towe lẹ, Ahọlu madopodo.” Etẹwẹ tẹnmẹ-yinkọ lọ “Ganhunupotọ” zẹẹmẹdo? E zẹẹmẹdo dọ Jehovah wẹ tindo huhlọn hú mẹlẹpo to wẹkẹ lọ mẹ. Podọ tẹnmẹ-yinkọ lọ “Ahọlu madopodo” zẹẹmẹdo dọ ewọ ma tindo bẹjẹeji. Salmu lẹ 90:2 basi zẹẹmẹ dọ ewọ tin sọn madopodo jẹ madopodo. Be enẹ ma jiawu ya?

¹⁷ Jehovah kẹdẹ wẹ yin Mẹdatọ. Osọhia 4:11 dọmọ: “Jehovah Jiwheyẹwhe mítọn, hiẹ wẹ jẹ nado mọ gigo, gbégbò po huhlọn po yí, na hiẹ wẹ dá nulẹpo, podọ to ojlo towe mẹ wẹ yé do wá aimẹ bosọ do yin didá.” Mọwẹ, sọn  angẹli he to olọn mẹ lẹ ji jẹ sunwhlẹvu he to agahomẹ lẹ ji gọna atin-sinsẹ́n he to atin ji lẹ po whèvi he to ohù mẹ lẹ po—Jehovah wẹ dá nuhe ji a sọgan lẹnnupọndo lẹpo!

18. Naegbọn mẹdelẹ sọgan nọ lẹndọ yé ma gán yin họntọn Jiwheyẹwhe tọn gbede? Etẹwẹ Biblu dọ gando enẹ go?

¹⁸ Eyin mẹdelẹ hia nuhe Biblu dọ gando jẹhẹnu jiawu Jehovah tọn lẹ go, obu nọ jẹ yé ji bọ yé nọ lẹndọ, ‘Jiwheyẹwhe ko dohuhlọn bo yiaga bosọ dẹn do mí gbau, naegbọn e nado hò yẹn tọn pọ́n?’ Ṣigba, be numọtolanmẹ he Jiwheyẹwhe jlo dọ mí ni nọ tindo niyẹn ya? Paali. Jehovah jlo na dọnsẹpọ mí. Biblu dọ dọ Jiwheyẹwhe “ma dẹn do dopodopo mítọn.” (Owalọ lẹ 17:27) Jiwheyẹwhe jlo dọ a ni dọnsẹpọ emi, podọ e dopagbe dọ “ewọ nasọ dọnsẹpọ [we].”—Jakọbu 4:8.

19. (a) Nawẹ a sọgan lẹzun họntọn Jiwheyẹwhe tọn gbọn? (b) Detẹ to jẹhẹnu Jehovah tọn lẹ mẹ wẹ a yiwanna hugan?

¹⁹ Nawẹ a sọgan lẹzun họntọn Jiwheyẹwhe tọn gbọn? Jesu dọmọ: “Ehe wẹ ogbẹ̀ madopodo, dọ yé ni wá yọ́n hiẹ Jiwheyẹwhe nugbo dopo kẹdẹ lọ, podọ mẹhe hiẹ dohlan, yèdọ Jesu Klisti.” (Johanu 17:3) Zindonukọn nado to nuplọn, a na wá yọ́n Jehovah po Jesu po. Podọ whenẹnu, hiẹ sọgan mọ ogbẹ̀ madopodo yí. Di apajlẹ, mí ko plọn dọ “Jiwheyẹwhe wẹ owanyi.” (1 Johanu 4:16) Ṣigba, e sọ tindo jẹhẹnu dagbedagbe devo lẹ. Biblu dọna mí dọ Jehovah yin “lẹblanunọ podọ awuvẹmẹtọ, mẹhe nọ whleawu nado gblehomẹ bosọ gọ́ na owanyi nugbo po nugbo po.” (Eksọdusi 34:6) Jehovah “yọ́n bo nọ wleawu nado jonamẹ.” (Salmu lẹ 86:5) Jiwheyẹwhe nọ fahomẹ bosọ yin nugbonọ. (2 Pita 3:9; Osọhia 15:4) A na plọn nususu dogọ gando jẹhẹnu dagbedagbe etọn lẹ go dile a na to nuhe Biblu dọ gando ewọ go lẹ hia.

20-22. (a) Nawẹ mí gán dọnsẹpọ Jiwheyẹwhe gbọn eyin mí ma gán mọ ẹn? (b) Etẹwẹ a dona wà eyin mẹdevo lẹ jlo dọ a ni doalọtena Biblu pinplọn?

 ²⁰ Nawẹ a gán dọnsẹpọ Jiwheyẹwhe gbọn eyin a ma gán mọ ẹn? (Johanu 1:18; 4:24; 1 Timoti 1:17) Eyin a nọ hia nuhe Biblu dọ gando Jehovah go lẹ, a na wá yọ́n ewọ taidi Omẹ nujọnu tọn de. (Salmu lẹ 27:4; Lomunu lẹ 1:20) Dile a to nuplọn dogọ gando Jehovah go, owanyi he a tindo na ẹn na jideji bọ a na dọnsẹpọ ẹ dogọ.

²¹ A na wá mọdọ Jehovah wẹ Otọ́ mítọn. (Matiu 6:9) Ewọ wẹ na mí ogbẹ̀, e sọ jlo dọ ogbẹ̀ mítọn ni yọ́n jẹ obá he mẹ e yọnbasi jẹ. Nuhe otọ́ owanyinọ de na jlo na ovi etọn lẹ niyẹn. (Salmu lẹ 36:9) Mọwẹ, Biblu plọn mí dọ a sọgan lẹzun họntọn Jehovah tọn. (Jakọbu 2:23) Pọ́n nuhe enẹ zẹẹmẹdo. Jehovah, yèdọ Didatọ wẹkẹ lọ tọn, jlo dọ hiẹ ni yin họntọn emitọn!

²² Mẹdelẹ sọgan jlo dọ a ni doalọtena Biblu pinplọn. Yé sọgan to budi dọ a na biọ sinsẹ̀n devo mẹ. Ṣigba, a dike mẹde glọnalina we nado lẹzun họntọn Jehovah tọn blo. Ewọ wẹ yin Họntọn dagbe hugan he a sọgan tindo.

23, 24. (a) Naegbọn a dona zindonukọn nado nọ kàn kanbiọ lẹ sè? (b) Etẹ ji wẹ mí na dọhodo to weta he bọdego mẹ?

²³ Dile a to Biblu plọn, nudelẹ na tin he ma na họnwun na we. Ma kuwinyan nado kàn kanbiọ lẹ sè kavi nado biọ alọgọ blo. Jesu dọ dọ mí dona nọ whiwhẹ míde taidi yọpọvu lẹ. (Matiu 18:2-4) Yọpọvu lẹ nọ kanhose taun. Jiwheyẹwhe jlo dọ a ni mọ gblọndo na kanbiọ towe lẹ. Enẹwutu, yiagbọji bo plọn Biblu nado hẹn ẹn diun dọ nuhe plọn a te lẹ yin nugbo.—Hia Owalọ lẹ 17:11.

²⁴ Aliho dagbe hugan lọ nado plọnnu gando Jehovah go wẹ nado nọ plọn Biblu. To weta he bọdego mẹ, mí na mọ nuhewutu Biblu do gbọnvona owe he pò lẹpo.