Wẹnlatọ Ahọluduta Tọn Vivẹ́:

Mí ni dọ dọ hiẹ yin dopo to apọsteli he to ote to Osó Olivie tọn ji lẹ mẹ bọ Jesu sọawuhia to nukọn mìtọn. Tlolo whẹpo e do hẹji yì olọn mẹ, e dọmọ: “Mì na mọ huhlọn yí to whenue gbigbọ wiwe na wá mì ji, podọ mìwlẹ na yin kunnudetọ ṣie to Jelusalẹm, to Jude po Samalia lẹpo po, podọ kaka yì awà he dẹn hugan aigba tọn lẹ ji.” (Owalọ 1:8) Etẹwẹ na yin numọtolanmẹ towe?

Vlavo azọ́ndenamẹ daho enẹ na dobuna we. A sọgan kanse dewe dọ, ‘Nawẹ míwu devi kleun ehelẹ sọgan dekunnu “kaka yì awà he dẹn hugan aigba tọn lẹ ji” gbọn?’ A sọ sọgan flin avase he Jesu na to ozán he jẹnukọnna okú etọn mẹ lọ dọmọ: “Afanumẹ de ma nọ klohu klunọ etọn. Eyin yé ko dohomẹkẹn mi, yé na dohomẹkẹn mì ga; eyin yé ko payi ohó ṣie go, yé na payi mìlọsu tọn go ga. Ṣigba, yé na wà onú ehe lẹpo sọta mì, na oyín ṣie tọn wutu, na yé ma yọ́n Mẹhe do mi hlan lọ wutu.” (Joh. 15:20, 21) To nulinlẹnpọn do hogbe ehelẹ ji godo, a sọgan kanse dewe dọmọ: ‘Nawẹ yẹn sọgan dekunnu mlẹnmlẹn to nukundiọsọmẹ po homẹkẹn mọnkọtọn po glọ gbọn?’

Kanbiọ dopolọ lẹ wẹ nọ duahunmẹna mí to egbehe. Taidi Kunnudetọ Jehovah tọn lẹ, azọ́ndenamẹ mílọsu tọn nọ biọ dọ mí ni dekunnu mlẹnmlẹn “kaka yì awà he dẹn hugan aigba tọn lẹ ji,” podọ na “gbẹtọ lẹ sọn akọta lẹpo mẹ.” (Mat. 28:19, 20) Nawẹ mí sọgan wà azọ́n ehe dotana mahopọnna nukundiọsọmẹ he yin didọdai lọ gbọn?

Owe Owalọ Apọsteli lẹ tọn bẹ kandai ojlofọndotenamẹ tọn hẹn gando lehe Jehovah gọalọna apọsteli lẹ po Klistiani hatọ yetọn lẹ po nado hẹn azọ́ndenamẹ yetọn di to owhe kanweko tintan W.M. mẹ do go. Owe he hia a te ehe yin awuwlena nado gọalọna we na hiẹ nido sọgan gbadopọnna kandai enẹ bo duvivi nujijọ ojlofọndotenamẹ tọn he tin to e mẹ lẹ tọn. E na paṣa we nado mọdọ aliho susu mẹ wẹ nuwiwa devizọnwatọ Jiwheyẹwhe tọn owhe kanweko tintan whenu tọn lẹ tọn taidi omẹ Jiwheyẹwhe tọn lẹ tọn te to egbehe. Hiẹ na mọdọ aliho ehelẹ bẹ azọ́n he wà mí te po lehe mí yin tito-basina nado wà azọ́n lọ do po hẹn. Matin ayihaawe, nulinlẹnpọn do aliho ehelẹ ji na hẹn we kudeji dogọ dọ Jehovah Jiwheyẹwhe wẹ gbẹ́ to anadena adà aigba ji tọn titobasinanu etọn tọn.

Todido mítọn wẹ yindọ dogbigbapọnna owe Owalọ lẹ tọn ni yidogọna jidide towe dọ Jehovah na gọalọna we bọ gbigbọ wiwe etọn nasọ na we huhlọn. Enẹwutu, na ehe ni na we tuli nado zindonukọn to “kunnudide mlẹnmlẹn” gando Ahọluduta Jiwheyẹwhe tọn go podọ to alọgigọna mẹdevo lẹ nado wá aliho ogbẹ̀ tọn ji mẹ.—Owalọ 28:23; 1 Tim. 4:16.