1, 2. Etẹwẹ mí gán wà nado hẹn míde do owanyi Jiwheyẹwhe tọn mẹ?

MÍMẸPO wẹ nọ jlo na nọ jogún-jogún bo ló to agbasa mẹ. Enẹwutu, mí nọ dù núdùdù dagbe bo nọ daihun lanmẹyiya tọn whẹwhẹ bosọ nọ penukundo míde go. Dile etlẹ yindọ ehe nọ biọ vivẹnudido, mí nọ duvivi kọdetọn he e nọ hẹnwa lẹ tọn, enẹwutu mí ma nọ jogbe. Amọ́, mí sọ dona nọ jogún-jogún bo ló to aliho devo mẹ.

² Dile etlẹ yindọ mí ko jẹ vivẹnudo ji nado yọ́n Jehovah, mí dona to haṣinṣan he mí tindo hẹ ẹ hẹn lodo zọnmii. Whenue Juda na tuli Klistiani lẹ nado “hẹn [yede] do owanyi Jiwheyẹwhe tọn mẹ,” e sọ dọ lehe yé gán wàmọ gbọn. E dọna yé dọmọ: “Mì hẹn mìde lodo to dodonu yise mìtọn he wé hugan lọ tọn ji.” (Juda 20, 21) Nawẹ mí gán hẹn yise mítọn lodo gbọn?

3-5. (a) Numọtolanmẹ tẹwẹ Satani na jlo dọ a ni tindo gando nujinọtedo Jehovah tọn lẹ go? (b) Nukun tẹwẹ a nọ yí do pọ́n osẹ́n po nunọwhinnusẹ́n Jehovah tọn lẹ po?

³ Nujọnu wẹ e yin dọ a ni kudeji to ahun towe mẹ dọ aliho Jehovah tọn lẹ wẹ yọ́n hugan. Satani jlo dọ a ni  lẹndọ nujinọtedo Jiwheyẹwhe tọn lẹ vẹawu gbau nado hodo podọ dọ a na tindo ayajẹ hugan eyin hiẹ lọsu nọ de nuhe yin dagbe po oylan po na dewe. Sọn jipa Edẹni tọn mẹ gbọ́n wẹ Satani ko tẹnpọn nado hẹn gbẹtọ lẹ yí ehe sè. (Jenẹsisi 3:1-6) Podọ e gbẹ́ to tintẹnpọn taun nado wàmọ kakajẹ din.

⁴ Be owhẹ̀ Satani tọn whẹ́n ya? Be nujinọtedo Jehovah tọn lẹ nọ glọnalina mí zẹjlẹgo wẹ ya? Lala. Di dohia, mí ni dọ dọ a to zọnlinzin gbọn jipa dagbedagbe de mẹ. A doayi pákàn he yiaga de go he gbò lẹdo kleun de dovo. Vlavo a gán lẹndọ, ‘Etẹ wà wẹ pákàn ehe te to aliji na mi?’ Ṣigba to ojlẹ enẹ mẹ pẹẹ wẹ a sè bọ kinnikinni de gbó to pákàn lọ godo dọ́n. Nukun tẹwẹ a na yí do pọ́n pákàn lọ todin? A na dopẹ́ dọ e to finẹ nado basi hihọ́na we, na kinnikinni lọ nikaa tlẹ́n we dù! Nunọwhinnusẹ́n Jehovah tọn lẹ tin taidi pákàn enẹ, bọ kinnikinni lọ nọtena Lẹgba. Ohó Jiwheyẹwhe tọn na mí avase dọmọ: “Mì gbọṣi lẹnpọn dagbenọ-yinyin mẹ, mì nọ aṣeji! Kẹntọ mìtọn Lẹgba to dindanpe di kinnikinni de he to lìlì bo to mẹhe e na tlẹndu dín.”​—1 Pita 5:8.

⁵ Jehovah jlo dọ ogbẹ̀ mítọn ni yọ́n. E ma jlo dọ Satani ni doyẹklọ mí. Enẹwutu wẹ e do na mí osẹ́n po nunọwhinnusẹ́n lẹ po nado basi hihọ́na mí bo hẹn mí tindo ayajẹ. (Efesunu lẹ 6:11) Jakọbu wlan dọmọ: “Mẹhe zín nukun do osẹ́n pipé he yin mẹdekannujẹ tọn lọ mẹ bo zindonukọn to e mẹ . . . nasọ yin ayajẹnọ to nuhe wà e te mẹ.”​—Jakọbu 1:25.

6. Nawẹ mí gán wá kudeji dọ aliho Jiwheyẹwhe tọn lẹ wẹ yọ́n hugan gbọn?

⁶ Eyin mí hodo anademẹ Jehovah tọn, gbẹzan mítọn nọ pọnte bọ haṣinṣan he mí tindo hẹ ẹ nọ lodo dogọ.  Di apajlẹ, mí nọ mọaleyi eyin mí kẹalọyi oylọ-basinamẹ etọn nado nọ hodẹ̀ hlan ẹn whẹwhẹ. (Matiu 6:5-8; 1 Tẹsalonikanu lẹ 5:17) Mí nọ gọ́ na ayajẹ to whenue mí setonuna anademẹ etọn nado nọ pli dopọ do basi sinsẹ̀n hlan ẹn bo na tuli ode awetọ, podọ to whenue mí tindo mahẹ gigọ́ to azọ́n yẹwhehodidọ po mẹpinplọn po tọn lọ mẹ. (Matiu 28:19, 20; Galatianu lẹ 6:2; Heblu lẹ 10:24, 25) Dile mí to nulẹnpọn do lehe onú ehelẹ ko gọalọna mí nado hẹn yise mítọn lodo do ji, mí nọ wá kudeji vudevude dọ aliho Jehovah tọn lẹ wẹ yọ́n hugan.

7, 8. Etẹwẹ na gọalọna mí nado dapana nuhiha gando whlepọn he gán wá fọ́n to nukọn mẹ lẹ go?

⁷ Mí gán nọ hanú dọ mí na wá pehẹ whlepọn yise tọn he sẹhundaga lẹ to nukọn mẹ. Eyin a tindo numọtolanmẹ  enẹ janwẹ, flin hogbe Jehovah tọn ehelẹ: “Yẹn Jehovah wẹ Jiwheyẹwhe towe, Mẹhe nọ plọn we nado zan gbẹzan he na hẹn ale wá na we, Mẹhe nọ deanana we to aliho he ji hiẹ dona zinzọnlin gbọn. Eyin hiẹ na yìn gbedide ṣie lẹ wẹ! To whenẹnu, jijọho towe na wá taidi tọ̀sisa de bọ dodowiwa towe na wá taidi agbówhẹn ohù tọn lẹ.”​—Isaia 48:17, 18.

⁸ Eyin mí setonuna Jehovah, jijọho mítọn na taidi tọ̀sisa de he ma na hú gbede, bọ dodowiwa mítọn na taidi agbówhẹn ohù tọn lẹ he nọ to hihò kọnyin huto mapote! Eyin ogbẹ̀ mítọn tlẹ jẹ depope, mí gán gbẹ́ yin nugbonọ. Biblu dopagbe dọ: “Ze agbàn pinpẹn towe dlan Jehovah ji, ewọ nasọ penukundo gowe. Ewọ ma na dike dodonọ ni jai gbede.”​—Salmu lẹ 55:22.

9, 10. Etẹwẹ e zẹẹmẹdo nado whèwhín?

⁹ Dile a to haṣinṣan towe hẹ Jehovah hẹn lodo, a na “lẹzun mẹhe whèwhín.” (Heblu lẹ 6:1) Etẹwẹ e zẹẹmẹdo nado whèwhín?

¹⁰ E ma yin mẹhowhe wẹ nọ zọ́n bọ mí nọ lẹzun Klistiani he whèwhín. Nado whèwhín, mí dona yí Jehovah do basi Họntọn vivẹ́ mítọn bo dovivẹnu nado nọ pọ́n nulẹ hlan dile e nọ wà do. (Johanu 4:23) Paulu wlan dọmọ: “Yé he to gbẹnọ to kọndopọ mẹ hẹ agbasalan nọ ze ayiha yetọn do onú agbasalan tọn lẹ ji, ṣigba yé he to gbẹnọ to kọndopọ mẹ hẹ gbigbọ, do onú gbigbọ tọn lẹ ji.” (Lomunu lẹ 8:5) Mẹhe whèwhín ma nọ ze gbẹdudu kavi agbasanu lẹ do otẹn tintan mẹ. Kakatimọ, Jehovah sinsẹ̀n wẹ e nọ zedo otẹn tintan mẹ bo nọ basi nudide nuyọnẹn tọn lẹ. (Howhinwhẹn lẹ 27:11; hia Jakọbu 1:2, 3.) E ma nọ dike nude ni sisẹ́ ẹ  nado waylan. Mẹhe whèwhín nọ yọ́n nuhe sọgbe bo nọ magbe nado wà ẹ.

11, 12. (a) Etẹwẹ Paulu dọ gando “huhlọn wuntuntun tọn” Klistiani lẹ tọn go? (b) Nawẹ aliho he mẹ Klistiani de nọ wá whèwhín te sọgan yin yiyijlẹdo lehe mẹde nọ lẹzun wezundotọ do go gbọn?

¹¹ E nọ biọ vivẹnudido nado lẹzun mẹhe whèwhín. Apọsteli Paulu wlan dọmọ: “Núdùdù sinsinyẹn yin mẹhe ko whẹ́n lẹ tọn, mẹhe ko plọn huhlọn wuntuntun tọn yetọn gbọn yíyí i zan dali nado nọ yọ́n vogbingbọn to dagbe po oylan po ṣẹnṣẹn.” (Heblu lẹ 5:14) Hogbe lọ “plọn” sọgan hẹn mí lẹnnupọndo lehe wezundotọ de nọ plọnazọ́n ede do ji.

¹² Eyin mí mọ wezundotọ he bikan taun de, mí nọ yọnẹn dọ whenu po azọ́npinplọn susu po wẹ e na ko biọ to e si nado bikan sọmọ. E ma yin jiji taidi wezundotọ. Whenue viyẹyẹ de yin jiji, e ma ko nọ yọ́n lehe e na yí awà po afọ etọn lẹ po zan do taun. Amọ́ dile ojlẹ to yìyì, e nọ plọn nado hẹn núgo podọ nado zinzọnlin. Po azọ́nplọnmẹ po, e gán wá lẹzun wezundotọ he bikan de. Mọdopolọ, e nọ biọ whenu po azọ́npinplọn po nado lẹzun Klistiani he whèwhín.

13. Etẹwẹ na gọalọna mí nado nọ lẹnnupọn dile Jehovah nọ wà do?

¹³ To owe ehe mẹ, mí ko mọ lehe mí sọgan nọ lẹnnupọn bo nọ pọ́n nulẹ hlan dile Jehovah nọ wà do. Mí ko plọn nado nọ yọ́n pinpẹn nujinọtedo Jehovah tọn lẹ tọn bosọ yiwanna yé. Eyin mí jlo na basi nudide de, mí nọ kanse míde dọ: ‘Osẹ́n kavi nunọwhinnusẹ́n Biblu tọn tẹlẹ wẹ gando ninọmẹ ehe go? Nawẹ n’sọgan yí yé zan gbọn? Etẹwẹ Jehovah na jlo dọ ma wà?’​—Hia Howhinwhẹn lẹ 3:5, 6; Jakọbu 1:5.

14. Etẹwẹ mí dona wà nado hẹn yise mítọn lodo?

¹⁴ Mí ma nọ doalọtena yise mítọn to Jehovah mẹ hinhẹn  lodo gbede. Dile núdùdù hunsindagbe tọn nọ gọalọna mí nado ló to agbasa mẹ do, nupinplọn gando Jehovah go nọ gọalọna mí nado ló to yise mẹ. Whenue mí jẹ Biblu plọn ji, mí plọn nugbo dodonu tọn delẹ gando Jehovah po aliho etọn lẹ po go. Amọ́ dile ojlẹ to yìyì, mí dona mọnukunnujẹ onú sisosiso lẹ mẹ. Nuhe dọ Paulu te niyẹn to whenue e dọ: “Núdùdù sinsinyẹn yin mẹhe ko whẹ́n lẹ tọn.” Eyin mí to nuhe mí plọn lẹ yizan, mí nọ wá tindo nuyọnẹn. Biblu dọna mí dọ: “Nuyọnẹn wẹ yin nujọnu hugan.”​—Howhinwhẹn lẹ 4:5-7; 1 Pita 2:2.

15. Nawẹ owanyi sisosiso tintindo na Jehovah podọ na mẹmẹsunnu po mẹmẹyọnnu mítọn lẹ po yin nujọnu sọ?

¹⁵ Eyin mẹde tlẹ to jogún-jogún bo ló to agbasa mẹ, e nọ yọnẹn dọ whẹpo emi nado nọ mọ zọnmii, emi dona to nukunpedo emide go. Mọdopolọ, mẹhe whèwhín nọ yọnẹn dọ emi dona to vivẹnu vẹkuvẹku do zọnmii nado hẹn haṣinṣan emitọn hẹ Jehovah lodo. Paulu flinnu mí dọ: “Mì nọ tẹ́n mìde pọ́n eyin mì to yise mẹ; mì nọ dindona mìde nado yọ́n mẹhe nkọ mìwlẹ yin.” (2 Kọlintinu lẹ 13:5) Ṣigba, yise he lodo de tintindo kẹdẹ ma ko pé. Owanyi mítọn na Jehovah podọ na mẹmẹsunnu po mẹmẹyọnnu mítọn lẹ po dona to jijideji zọnmii. Paulu dọmọ: “Eyin yẹn tindo . . . oyọnẹn . . ., podọ eyin yise ṣie lodo sọmọ bọ yẹn sọgan sẹtẹnna osó lẹ, ṣigba bo ma tindo owanyi, yẹn ma yin nude.”​—1 Kọlintinu lẹ 13:1-3.

16. Numọtolanmẹ tẹwẹ Satani jlo dọ mí ni nọ tindo?

¹⁶ Satani jlo dọ mí ni lẹndọ mí ma gán penugo nado hẹn homẹ Jehovah tọn hùn pọ́n gbede. Ojlo etọn wẹ yindọ mí ni gbọjọ bo lẹndọ pọngbọ depope ma tin na nuhahun mítọn lẹ. E ma jlo dọ mí ni nọ dejido Klistiani  hatọ mítọn lẹ go kavi dọ mí ni tindo ayajẹ. (Efesunu lẹ 2:2) Satani yọnẹn dọ linlẹn agọ̀ lẹ sọgan hẹnnugble to mí go bo hẹn haṣinṣan mítọn hẹ Jiwheyẹwhe gble. Ṣigba, Jehovah ko na mí nude he na gọalọna mí nado hoavùn sọta linlẹn agọ̀ lẹ. E ko na mí todido.

17. Nawẹ todido yin nujọnu sọ?

¹⁷ To 1 Tẹsalonikanu lẹ 5:8 mẹ, Biblu yí todido mítọn jlẹdo ogangbakun he nọ basi hihọ́na awhànfuntọ de to awhàngbenu go, bo dlẹnalọdo ogangbakun enẹ taidi “todido whlẹngán tọn.” Todido to opagbe Jehovah tọn lẹ mẹ sọgan họ́ ayiha mítọn bo gọalọna mí nado nọavùnte sọta linlẹn agọ̀ lẹ.

18, 19. Nawẹ Jesu mọ huhlọn yí sọn todido etọn mẹ gbọn?

¹⁸ Todido Jesu tọn hẹn ẹn lodo. To ozán godo tọn he e yizan to aigba ji mẹ, e pehẹ ninọmẹ sinsinyẹn susu debọdo-dego. Họntọn vivẹ́ etọn dopo de e hia. Devo mọ́n dọ  emi ma yọ́n ẹn. Mẹhe pò lẹ jo e do bo họnyi. Tòvi otò etọn titi tọn lẹ diọnukunsọ ẹ bo biọ dọ ni yin yasana jẹ okú. Etẹwẹ gọalọna ẹn nado doakọnna awusinyẹnnamẹnu ehe lẹpo? “Na ayajẹ he yin zizedonukọnna ẹn wutu, e doakọnna yatin de, bo ma hò winyan lọ pọ́n, bo ko sọ sinai to adusilọ ofìn Jiwheyẹwhe tọn mẹ.”​—Heblu lẹ 12:2.

¹⁹ Jesu yọnẹn dọ nugbonọ-yinyin emitọn na hẹn gigo wá na Otọ́ emitọn bo na do Satani hia taidi lalonọ. Todido ehe hẹn ayajẹ daho wá na ẹn. E sọ yọnẹn dọ emi na lẹkọyi Otọ́ emitọn dè to olọn mẹ to madẹnmẹ. Todido ehe wẹ gọalọna ẹn nado doakọnna. Taidi Jesu, mí dona ze ayiha do todido mítọn ji. Enẹ na gọalọna mí nado doakọnnanu mahopọnna nudepope he na to jijọ.

20. Etẹwẹ gán gọalọna we nado hẹn pọndohlan dagbe go?

²⁰ Jehovah nọ mọ yise po akọndonanu towe po. (Isaia 30:18; hia Malaki 3:10.) E dopà nado “na we ojlo ahun  towe mẹ tọn lẹ.” (Salmu lẹ 37:4) Enẹwutu, ze ayiha do todido towe ji. Satani jlo dọ a ni hẹn todido bu bo lẹndọ opagbe Jehovah tọn lẹ ma na mọ hẹndi gbede. Amọ́, ma joawuna nulẹnpọn agọ̀ blo! Eyin a mọdọ todido towe masọ họnwun na we ba, biọ alọgọ Jehovah tọn. Flin hogbe Filipinu lẹ 4:6, 7 tọn lẹ dọmọ: “Mì yin magbọjẹnọ na nudepope blo, ṣigba to nulẹpo mẹ, mì nọ yí odẹ̀, ovẹ̀ po pẹdido po do hẹn obiọ mìtọn lẹ zun yinyọnẹn na Jiwheyẹwhe; jijọho Jiwheyẹwhe tọn he yiaga hugan nukunnumọjẹnumẹ lẹpo nasọ họ́ ahun mìtọn po nugopipe apọ̀nmẹ tọn mìtọn po gbọn Klisti Jesu gblamẹ.”

21, 22. (a) Etẹwẹ yin lẹndai Jiwheyẹwhe tọn na aigba? (b) Etẹwẹ a magbe nado wà?

²¹ Nọ yiagbọji bo nọ lẹnayihamẹpọn do sọgodo jiawu he to nukọn ja lọ ji whẹwhẹ. To madẹnmẹ din, mẹhe togbẹ̀ lẹpo wẹ na nọ sẹ̀n Jehovah. (Osọhia 7:9, 14) Saa yí nukun homẹ tọn do pọ́n ogbẹ̀ he mí na zan to aihọn yọyọ lọ mẹ. E na vivi zẹ̀ nuhe mí sọgan ko donukun lẹpo go! Satani, aovi etọn lẹ po kanyinylan lẹpo po na ko busẹ. A ma nasọ jẹazọ̀n ba, mọ a ma na kú. Kakatimọ, a na nọ fọ́n egbesọegbesọ po agbasalilo dagbe po bo na nọ jaya dọ a togbẹ̀. Mẹlẹpo na wazọ́n dopọ nado diọ aigba zun paladisi. Núdùdù dagbe po adọtẹn dagbe po na tin na mẹlẹpo. Mẹde ma nasọ nọ ylanhùn kavi wadanu ba, kakatimọ mẹlẹpo wẹ na nọ jọmẹ hẹ ode awetọ. To godo mẹ, gbẹtọvi he to aigba ji lẹpo na wá duvivi “mẹdekannujẹ gigonọ he yin ovi Jiwheyẹwhe tọn lẹ tọn.”​—Lomunu lẹ 8:21.

²² Jehovah jlo dọ a ni yí emi do basi Họntọn vivẹ́ towe. Enẹwutu, wà nuhe go a pé lẹpo nado nọ setonuna ẹn bo nọ dọnsẹpọ ẹ egbesọegbesọ. Mọwẹ, mì gbọ mímẹpo ni hẹn míde do owanyi Jiwheyẹwhe tọn mẹ kakadoi!​—Juda 21.