Hlan mẹhe yiwanna Jehovah Jiwheyẹwhe po Ohó etọn Biblu po lẹ:

Jesu dọmọ: “Mìwlẹ nasọ yọ́n nugbo lọ, nugbo lọ nasọ hẹn mì jẹ mẹdekannu.” (Johanu 8:32) Lẹnnupọndo numọtolanmẹ he a tindo to whenue a ṣẹṣẹ mọ nugbo Biblu tọn ji! E vivi na we taun nado yọnẹn dọ mí gán gbẹ́ mọ nugbo lọ to aihọn he mẹ lalo gbayipe te ehe mẹ.​—2 Timoti 3:1.

Jehovah Jiwheyẹwhe jlo dọ mí ni yọ́n nugbo lọ. Podọ na mí yiwanna gbẹtọ lẹ wutu, mí nọ jlo na dọhona yé gando nugbo lọ go. Amọ́, Jiwheyẹwhe sinsẹ̀n ma nọte do enẹ kẹdẹ ji. Mí dona wà nuhe go mí pé lẹpo nado nọgbẹ̀ taidi Klistiani, na mí nọ ylọ nunọwhinnusẹ́n Jehovah tọn lẹ dọ nujọnu wutu. Jesu donù aliho titengbe de go he mẹ mí sọgan dohia Jiwheyẹwhe te dọ mí yiwanna ẹn. E dọmọ: “Eyin mì nọ yìn gbedide ṣie lẹ, mì na gbọṣi owanyi ṣie mẹ, kẹdẹdile yẹn ko yìn gbedide Otọ́ ṣie tọn lẹ bo gbọṣi owanyi etọn mẹ do.”​—Johanu 15:10.

Jesu yiwanna Otọ́ etọn taun bosọ nọ wà nuhe Otọ́ etọn biọ to e si lẹpo. Eyin mí nọ hodo apajlẹ Jesu tọn to gbẹzan mítọn mẹ, Jehovah na yiwanna mí bọ mí nasọ tindo ayajẹ nujọnu tọn. Kẹdẹdile Jesu dọ do, “eyin mìwlẹ yọ́n onú ehelẹ, ayajẹnọ wẹ mì eyin mì nọ basi yé.”​—Johanu 13:17.

Todido mítọn wẹ yindọ owe ehe ni gọalọna we nado nọgbẹ̀ sọgbe hẹ nugbo Biblu tọn bo lẹzun họntọn Jiwheyẹwhe tọn. Odẹ̀ mítọn wẹ yindọ owanyi towe na Jiwheyẹwhe ni sudeji, na a nido hẹn dewe do “owanyi Jiwheyẹwhe tọn mẹ . . . to todido mẹ na ogbẹ̀ madopodo.”​—Juda 21.