WETA 15
Nọ Duvivi Azọ́n Towe Tọn
“Mẹdopodopo ni nọ . . . mọ awuvivi sọn azọ́n sinsinyẹn etọn lẹpo mẹ.”—YẸWHEHODỌTỌ 3:13.
1-3. (a) Numọtolanmẹ tẹwẹ mẹsusu nọ tindo gando agbasazọ́n yetọn go? (b) Kanbiọ tẹlẹ wẹ mí na gbadopọnna to weta ehe mẹ?
LẸDO aihọn pé, gbẹtọ lẹ nọ wazọ́n sinsinyẹn nado penukundo yede po whẹndo yetọn po go. Mẹsusu ma yiwanna agbasazọ́n yetọn, podọ azọ́nmẹ yìyì egbesọegbesọ tlẹ nọ gbàhundona mẹdelẹ. Eyin numọtolanmẹ he a nọ tindo niyẹn, etẹwẹ a sọgan wà nado duvivi agbasazọ́n towe tọn dogọ? Nawẹ a gán wagbọn do yiwanna azọ́n towe?
2 Jehovah dọna mí dọmọ: “Mẹdopodopo ni nọ dù bo nọ nù bosọ nọ mọ awuvivi sọn azọ́n sinsinyẹn etọn lẹpo mẹ. Nunina Jiwheyẹwhe tọn wẹ e yin.” (Yẹwhehodọtọ 3:13) Jehovah dá mí po nuhudo gọna ojlo lọ po nado nọ wazọ́n. E jlo dọ mí ni nọ mọ awuvivi to azọ́nwiwa mẹ.—Hia Yẹwhehodọtọ 2:24; 5:18.
3 Eyin mọ wẹ, etẹwẹ gán gọalọna mí nado nọ duvivi azọ́n mítọn tọn? Azọ́n wunmẹ tẹlẹ wẹ Klistiani lẹ dona dapana? Nawẹ mí sọgan nọ jlẹkaji to agbasazọ́n mítọn po sinsẹ̀n-bibasi mítọn hlan Jehovah po ṣẹnṣẹn gbọn? Podọ etẹwẹ yin azọ́n titengbe hugan he mí sọgan wà?
AZỌ́NWATỌ DAHO HUGAN AWE LẸ
4, 5. Nukun tẹwẹ Jehovah nọ yí do pọ́n azọ́nwiwa?
4 Jehovah lọsu yiwanna azọ́nwiwa. Jenẹsisi 1:1 dọmọ: “To bẹjẹeji Jiwheyẹwhe dá olọn lẹ po aigba po.” To whenue Jiwheyẹwhe ko dá aigba po nuhe to e ji lẹpo po godo, e dọ dọ nudida etọn lẹ “yọ́n tlala.” (Jenẹsisi 1:31) Mẹdatọ mítọn mọ homẹhunhun to nuhe e wà lọ mẹ.—1 Timoti 1:11.
5 Jehovah ma doalọtena azọ́nwiwa pọ́n gbede. Jesu dọmọ: “Otọ́ ṣie zindonukọn to azọ́nwiwa mẹ kakajẹ din.” (Johanu 5:17) Dile etlẹ yindọ mí ma yọ́n nujiawu he Jehovah ko to wiwà sọn whenẹnu lẹpo, mí yọ́n delẹ to yé mẹ. E ko to mẹhe na dugán hẹ Visunnu etọn Jesu Klisti to Ahọluduta lọ mẹ lẹ ṣinyan. (2 Kọlintinu lẹ 5:17) Jehovah sọ to anadena gbẹtọvi lẹ bo to nukunpedo yé go to gbesisọ mẹ. Na azọ́n yẹwhehodidọ tọn he to yinyin wiwà lẹdo aihọn pé wutu, gbẹtọ livi susu ko wá yọ́n Jehovah bo tindo todido nado nọgbẹ̀ kakadoi to paladisi aigba ji tọn de mẹ.—Johanu 6:44; Lomunu lẹ 6:23.
6, 7. Azọ́nwatọ nankọ wẹ Jesu yin?
6 Kẹdẹdi Otọ́ etọn, Jesu lọsu yiwanna azọ́nwiwa. Whẹpo Jesu do wá aigba ji, ewọ wẹ “azọ́nwatọgan” Jiwheyẹwhe tọn, yèdọ mẹhe gọalọna ẹn nado dá nulẹpo to olọn mẹ podọ to aigba ji. (Howhinwhẹn lẹ 8:22-31; Kolosinu lẹ 1:15-17) To whenue Jesu tin to aigba ji, e zindonukọn to azọ́n sinsinyẹn wiwà mẹ. To jọja whenu etọn, e plọnazọ́n bo lẹzun whlẹpatọ azọ́nyọnẹntọ de bo sọgan ko nọ basi oján lẹ kavi gbá ohọ̀ lẹ. Jesu yọ́n azọ́n etọn wà sọmọ bọ e yin yinyọnẹn taidi “whlẹpatọ lọ.”—Malku 6:3.
7 Etomọṣo, azọ́n titengbe hugan he Jesu wà to aigba ji wẹ nado dọyẹwheho wẹndagbe lọ tọn bo plọnnu gbẹtọ lẹ gando Jehovah go. Owhe atọ̀n daa wẹ e tindo nado dotana lizọnyizọn etọn, enẹwutu e nọ wazọ́n sinsinyẹn sọn afọnnu fuu kakajẹ zánhomẹ. (Luku 21:37, 38; Johanu 3:2) Jesu zinzọnlin na kilomẹtlu kanweko susu lẹ gbọn aliho he gọ́ na afínfín lẹ ji bo má wẹndagbe lọ hẹ mẹsusu dile e yọnbasi do.—Luku 8:1.
8, 9. Naegbọn Jesu do yiwanna azọ́n etọn?
8 Na Jesu, azọ́n Jiwheyẹwhe tọn wiwà nọ taidi núdùdù nkọ. Azọ́n ehe nọ na ẹn huhlọn bo nọ dozolanmẹna ẹn. Jesu wazọ́n sinsinyẹn to azán delẹ gbè sọmọ bọ e ma tlẹ mọ whenu nado dùnú. (Johanu 4:31-38) E yí dotẹnmẹ hundote lẹpo zan nado plọnnu mẹdevo lẹ gando Otọ́ etọn go. Nuhe zọ́n niyẹn bọ e sọgan dọna Jehovah dọ: “N’ko pagigona we to aigba ji, na n’ko dotana azọ́n he hiẹ na mi nado wà.”—Johanu 17:4.
9 E họnwun dọ Jehovah po Jesu po nọ wazọ́n sinsinyẹn taun, podọ yé nọ mọ ayajẹ po pekọ po to azọ́n yetọn mẹ. Mí jlo na “hodo apajlẹ Jiwheyẹwhe tọn,” podọ mí jlo na “hodo afọdòmẹ [Jesu tọn] lẹ pẹkipẹki.” (Efesunu lẹ 5:1; 1 Pita 2:21) Enẹ wẹ zọ́n bọ mí nọ tẹnpọn nado wazọ́n sinsinyẹn bo nọ vánkan to nudepope he wà mí te kọ̀n.
NUKUN TẸWẸ MÍ DONA NỌ YÍ DO PỌ́N AZỌ́N MÍTỌN?
10, 11. Etẹwẹ sọgan gọalọna mí nado tindo pọndohlan dagbe gando agbasazọ́n mítọn go?
10 Taidi omẹ Jehovah tọn lẹ, mí nọ wazọ́n sinsinyẹn nado penukundo míde po whẹndo mítọn po go. Mí jlo na nọ mọ awuvivi to azọ́n mítọn mẹ, amọ́ ehe gán vẹawu to whedelẹnu. Enẹwutu, etẹwẹ mí gán wà eyin mí ma yiwanna agbasazọ́n mítọn?
Pọndohlan dagbe tintindo sọgan hẹn azọ́n depope zun awuvivinu dogọ
11 Tindo pọndohlan dagbe. Mí sọgan nọma penugo nado diọ fihe mí nọ wazọ́n te kavi obá he mẹ mí nọ wazọ́n jẹ, amọ́ mí gán diọ pọndohlan mítọn. Nukunnumimọjẹ nuhe Jehovah nọ donukun sọn mí si mẹ sọgan gọalọ. Di apajlẹ: Jehovah nọ donukun dọ tatọ́ whẹndo tọn de ni penukundo nuhudo whẹndo etọn tọn lẹ go sọgbe hẹ nugopipe etọn lẹpo. Na nugbo tọn, Biblu dọ dọ mẹhe gboawupo nado wleawudaina whẹndo etọn “ylanhu mayisenọ.” (1 Timoti 5:8) Eyin tatọ́ whẹndo tọn de wẹ a yin, a na ko nọ wazọ́n sinsinyẹn nado penukundo whẹndo towe go. Vlavo a yiwanna azọ́n wunmẹ he wà a te kavi lala, a yọnẹn dọ dile a to nukunpedo whẹndo towe go, a sọ to homẹ hẹn hùn Jehovah.
12. Nawẹ azọ́n sinsinyẹn wiwà po nugbodidọ po nọ hẹn ale wá na mí gbọn?
12 Nọ wazọ́n sinsinyẹn bo nọ dọ nugbo. Ehe sọgan hẹn ẹn bọawuna we nado duvivi azọ́n towe tọn. (Howhinwhẹn lẹ 12:24; 22:29) Di apajlẹ, mẹhe yí we do azọ́nmẹ na nọ dejido gowe. Azọ́ngán lẹ nọ yọ́n pinpẹn azọ́nwatọ he nọ dọ nugbo lẹ tọn, na yé ma nọ fìn akuẹ, azọ́nwanu kavi azọ́n-gànmẹ wutu. (Efesunu lẹ 4:28) Dehe tlẹ sọ yin nujọnu hugan wẹ yindọ Jehovah nọ yọnẹn eyin a yin azọ́n sinsinyẹnwatọ bo nọ dọ nugbo. A sọgan tindo “ayihadawhẹnamẹnu dagbe de,” na a yọnẹn dọ emi to homẹ Jiwheyẹwhe he emi yiwanna lọ tọn hẹn hùn wutu.—Heblu lẹ 13:18; Kolosinu lẹ 3:22-24.
13. Kọdetọn devo tẹwẹ nugbodidọ to azọ́nmẹ sọgan hẹnwa?
13 Yọnẹn dọ walọ he a nọ zan to azọ́nmẹ sọgan hẹn pipà wá na Jehovah. Whẹwhinwhẹ́n devo niyẹn nado yiwanna azọ́n mítọn. (Titu 2:9, 10) E tlẹ sọgan wá jọ bọ dopo to azọ́nwatọgbẹ́ towe lẹ mẹ na yigbe nado plọn Biblu na apajlẹ dagbe towe wutu.—Hia Howhinwhẹn lẹ 27:11; 1 Pita 2:12.
AGBASAZỌ́N TẸWẸ N’DONA DE?
14-16. Etẹ ji wẹ mí dona lẹnnupọndo whẹpo do de agbasazọ́n de?
14 Biblu ma slẹ agbasazọ́n he Klistiani de dona kẹalọyi kavi lala lẹpo gba. Amọ́, e bẹ nunọwhinnusẹ́n delẹ hẹn he sọgan gọalọna mí nado basi nudide dagbe gando azọ́n go. (Howhinwhẹn lẹ 2:6) Mí sọgan nọ yí nunọwhinnusẹ́n Biblu tọn lẹ zan bo nọ kàn kanbiọ he bọdego lẹ sè míde.
Dín azọ́n he ma na jẹagọdo nujinọtedo Jehovah tọn lẹ
15 Be azọ́n ehe na biọ dọ ma wà nuhe Jehovah jẹagọdo de wẹ ya? Mí ko plọnnu do walọ he Jehovah gbẹwanna lẹ ji, taidi ajojijẹ po lalodido po. (Eksọdusi 20:4; Owalọ lẹ 15:29; Efesunu lẹ 4:28; Osọhia 21:8) Enẹwutu, mí nọ payi nado dapana azọ́n depope he jẹagọdo nujinọtedo Jehovah tọn lẹ.—Hia 1 Johanu 5:3.
16 Be azọ́n ehe na nọgodona kavi na tuli walọ he Jehovah jẹagọdo de wẹ ya? Di apajlẹ, etẹwẹ a na wà eyin a mọ azọ́n taidi mẹhe na nọ dokuavọna mẹlẹ to dotowhé he yè nọ dehò namẹ te de? Nude ma ylan to e mẹ nado wazọ́n di mẹhe nọ dokuavọna mẹlẹ to azọ́nwhé de. Amọ́, a yọ́n pọndohlan Jehovah tọn gando hòdide go. Enẹwutu, dile etlẹ yindọ hiẹ lọsu ma na dehò namẹ tlọlọ, be a ma mọdọ owhẹ̀ na to okọ̀ na hiẹ lọsu sọn pọndohlan Jehovah tọn mẹ ya?—Eksọdusi 21:22-24.
17. Etẹwẹ sọgan gọalọna mí nado basi nudide he na hẹn homẹ Jiwheyẹwhe tọn hùn lẹ?
17 Gbọn nunọwhinnusẹ́n Biblu tọn lẹ yiyizan dali, mí sọgan lẹzun gbẹtọ wunmẹ he Heblu lẹ 5:14 basi zẹẹmẹ etọn, yèdọ “mẹhe ko plọn huhlọn wuntuntun tọn yetọn gbọn yíyí i zan dali nado nọ yọ́n vogbingbọn to dagbe po oylan po ṣẹnṣẹn.” Kanse dewe dọ: ‘Eyin n’kẹalọyi agbasazọ́n ehe, be e na hẹn mẹdevo lẹ dahli wẹ ya? Be azọ́n ehe na biọ dọ ma jo alọwlemẹ ṣie po ovi ṣie lẹ po do nado yì nọ tògodo wẹ ya? Nawẹ enẹ na yinuwado yé ji gbọn?’
“MỌDONA NUHE YIN NUJỌNU HUGAN LẸ”
18. Naegbọn e sọgan vẹawu nado ze sinsẹ̀n-bibasi mítọn do otẹn tintan mẹ?
18 E sọgan vẹawu nado ze sinsẹ̀n-bibasi mítọn hlan Jehovah do otẹn tintan mẹ to “ojlẹ awusinyẹn tọn he vẹawu nado pehẹ” ehelẹ mẹ. (2 Timoti 3:1) Agbasazọ́n de mimọ bo hẹn e go sọgan kàn dẹpẹ biọ taun. Mí dona penukundo whẹndo mítọn go, amọ́ mí yọnẹn dọ sinsẹ̀n-bibasi mítọn wẹ dona to otẹn tintan mẹ. Mí ma gán dike agbasanu lẹ ni lẹzun nujọnu zẹjlẹgo to gbẹzan mítọn mẹ. (1 Timoti 6:9, 10) Bọ nawẹ mí gán “mọdona nuhe yin nujọnu hugan lẹ” bosọ penukundo whẹndo mítọn go to ojlẹ dopolọ mẹ gbọn?—Filipinu lẹ 1:10.
19. Nawẹ jidide do Jehovah go nọ gọalọna mí nado nọ jlẹkaji gando agbasazọ́n mítọn go gbọn?
19 Dejido Jehovah go mlẹnmlẹn. (Hia Howhinwhẹn lẹ 3:5, 6.) Mí yọnẹn dọ Jehovah yọ́n nuhudo mítọn lẹ bosọ nọ hò mítọn pọ́n taun. (Salmu lẹ 37:25; 1 Pita 5:7) Ohó etọn dọna mí dọ: “Mì gbọ aliho gbẹninọ tọn mìtọn ni tin matin wanyina akuẹ, na mì ni tindo pekọ po nuhe mì tindo lẹ po. Na [Jiwheyẹwhe] ko dọmọ: ‘Yẹn ma na jo mì do gbede podọ yẹn ma na gbẹ́ mì dai gbede.’” (Heblu lẹ 13:5) Jehovah ma jlo dọ mí ni nọ to nuhà mapote gando awuwiwledaina whẹndo mítọn go. E ko dohia whlasusu dọ ewọ penugo nado penukundo nuhudo omẹ etọn lẹ tọn go. (Matiu 6:25-32) Depope he ninọmẹ agbasazọ́n mítọn tọn sọgan yin, mí nọ plọn Ohó Jiwheyẹwhe tọn bo nọ dọyẹwheho wẹndagbe lọ tọn bosọ nọ yì opli Klistiani tọn lẹ to gbesisọ mẹ.—Matiu 24:14; Heblu lẹ 10:24, 25.
20. Nawẹ mí sọgan hẹn gbẹzan mítọn bọawu gbọn?
20 Ze nukun towe do fidopo. (Hia Matiu 6:22, 23.) Ehe zẹẹmẹdo nado hẹn gbẹzan towe bọawu, na a nido sọgan ze ayidonugo do Jehovah sinsẹ̀n ji. Mí yọnẹn dọ nulunu wẹ e na yin nado dike akuẹ, gbẹzan fẹẹmẹninọ tọn kavi núzinzan he to zoji lẹ ni lẹzun nujọnu na mí hú haṣinṣan mítọn hẹ Jiwheyẹwhe. Enẹwutu, etẹwẹ na gọalọna mí nado ze nuhe jẹ lẹ do otẹn tintan mẹ? Mí dona wà nuhe go mí pé lẹpo ma nado nọ duahọ. Eyin ahọ́ de ko to okọ̀ na we, basi tito dagbe nado de e pò kavi sú i pete. Eyin mí ma to aṣeji, agbasanu lẹ sọgan yí whenu po huhlọn mítọn po taun, bọ mí ma nasọ mọ whenu na dẹ̀hiho, nupinplọn kavi yẹwhehodidọ ba. Kakati nado dike agbasanu lẹ ni hẹn gbẹzan mítọn gẹdẹ, mí jlo na plọn nado nọ tindo pekọ to dandannu lẹ mẹ, taidi “núdùdù po avọ̀ po.” (1 Timoti 6:8) Podọ depope he ninọmẹ mítọn yin, e nọ yọ́n nado gbeje míde pọ́n sọn ojlẹ de mẹ jẹ devo mẹ nado pọ́n eyin mí sọgan sọ wà susu dogọ to sinsẹ̀nzọn Jehovah tọn mẹ.
21. Naegbọn mí dona de nuhe na nọ otẹn tintan mẹ to gbẹzan mítọn mẹ?
21 Ze nuhe jẹ lẹ do otẹn tintan mẹ. Mí dona nọ yí whenu, huhlọn gọna nutindo mítọn lẹ zan po nuyọnẹn po. Eyin mí ma to aṣeji, nuhe ma yin nujọnu sọmọ lẹ taidi wepinplọn kavi akuẹ na wá hẹn whenu họakuẹ mítọn gú. Jesu dọmọ: “Mì zindonukọn nado to Ahọluduta lọ . . . dín whẹ́.” (Matiu 6:33) Nudide he mí nọ basi lẹ, aṣa mítọn lẹ gọna nuwiwa egbesọegbesọ tọn po yanwle mítọn lẹ po nọ do nuhe tin to otẹn tintan mẹ to ahun mítọn mẹ lẹ hia.
AZỌ́N TITENGBE HUGAN HE MÍ SỌGAN WÀ
22, 23. (a) Etẹwẹ yin azọ́n titengbe hugan he mí sọgan wà taidi Klistiani? (b) Etẹwẹ na gọalọna mí nado nọ duvivi azọ́n mítọn tọn?
22 Azọ́n titengbe hugan mítọn wẹ nado sẹ̀n Jehovah bo lá wẹndagbe lọ na mẹdevo lẹ. (Matiu 24:14; 28:19, 20) Kẹdẹdi Jesu, mí jlo na wà nuhe go mí pé lẹpo to azọ́n ehe mẹ. Mẹdelẹ ko sẹtẹn nado yì sẹ̀n to fie nuhudo wẹnlatọ lẹ tọn sù te. Mẹdevo lẹ to jonọgbè de plọn nado sọgan dọyẹwheho na mẹhe nọ do ogbè enẹ lẹ. Dọho hẹ mẹhe ko wà onú mọnkọ lẹ bo kàn lehe yé wagbọn sè yé. Yé na dọna we dọ gbẹzan yetọn gọ́ na ayajẹ po pekọ po taun todin hugan dai.—Hia Howhinwhẹn lẹ 10:22.
Sinsẹ̀nzọn wiwà na Jehovah wẹ yin azọ́n titengbe hugan he mí sọgan wà
23 To egbehe, susu mítọn wẹ dona yí gànhiho susu zan to agbasazọ́n dopo kavi etlẹ yin humọ mẹ nado penukundo nuhudo dandan tọn whẹndo mítọn tọn lẹ go. Jehovah yọnẹn domọ bosọ nọ yọ́n pinpẹn nuhe wà mí te nado penukundo whẹndo mítọn go lẹpo tọn. Enẹwutu, mì gbọ mímẹpo ni to apajlẹ Jehovah po Jesu po tọn hodo zọnmii gbọn azọ́n sinsinyẹn wiwà dali, mahopọnna azọ́n wunmẹ he mí nọ wà. Mí ni sọ nọ flindọ azọ́n titengbe hugan mítọn wẹ nado sẹ̀n Jehovah bo dọyẹwheho wẹndagbe Ahọluduta Jiwheyẹwhe tọn. Ehe wẹ na hẹn ayajẹ nujọnu tọn wá na mí.
