1, 2. Naegbọn a do yiwanna Jehovah Jiwheyẹwhe?

BE A yiwanna Jiwheyẹwhe ya? Vlavo a yiwanna ẹn sọmọ bọ a ko klan dewe do wiwe na ẹn. A sọgan nọ mọ ẹn taidi Họntọn towe vivẹ́ hugan. Amọ́, whẹpo a tlẹ do jẹ wanyina Jehovah ji wẹ ewọ ko yiwanna we. Biblu dọna mí dọ: “Mí tindo owanyi, na ewọ whẹ́ wẹ yiwanna mí wutu.”​—1 Johanu 4:19.

² Lẹnnupọndo aliho he mẹ Jehovah ko do owanyi hia mí te lẹpo ji. E ko na mí aigba dagbedagbe ehe nado nọ nọ̀ e ji gọna nuhe sin hudo mí tindo nado duvivi ogbẹ̀ tọn lẹpo. (Matiu 5:43-48; Osọhia 4:11) E jlo dọ mí ni jihọntọn hẹ emi, podọ e ko hẹn ẹn yọnbasi na mí nado nọ plọnnu gando ewọ go. Eyin mí to Biblu hia, mí nọ dotoaina Jehovah. Podọ, eyin mí to dẹ̀ho, ewọ nọ dotoaina mí. (Salmu lẹ 65:2) E nọ yí huhlọn gbigbọ wiwe etọn tọn do deanana mí bo hẹn mí lodo. (Luku 11:13) E tlẹ sọ do Visunnu vivẹ́ etọn hlan aigba ji nado tún mí dote sọn ylando po okú po si.​—Hia Johanu 3:16; Lomunu lẹ 5:8.

3. Nawẹ mí sọgan hẹn haṣinṣan dagbe de go hẹ Jehovah gbọn?

³ Yiagbọji bo lẹnnupọndo họntọn vivẹ́ towe dopo ji, yèdọ mẹde he ko nọ apá towe to ojlẹ ayajẹ tọn po ojlẹ  awubla tọn lẹ po mẹ. E nọ biọ vivẹnudido nado hẹn haṣinṣan pẹkipẹki mọnkọtọn lodo. Nudopolọ wẹ gando họntọnjiji mítọn hẹ Jehovah go, yèdọ Họntọn dagbe hugan he mí sọgan tindo. Mí sọgan yin họntọn etọn kakadoi. Enẹwutu, Biblu dọna mí dọmọ: “Mì . . . hẹn mìde do owanyi Jiwheyẹwhe tọn mẹ.” (Juda 21) Nawẹ mí sọgan wàmọ gbọn? Biblu na gblọndo dọmọ: “Nuhe owanyi Jiwheyẹwhe tọn zẹẹmẹdo die, dọ mí ni yìn gbedide etọn lẹ; ṣogan gbedide etọn lẹ ma pẹnagbànmẹ.”​—1 Johanu 5:3.

4, 5. (a) Etẹwẹ hogbe lọ “owanyi Jiwheyẹwhe tọn” zẹẹmẹdo? (b) Nawẹ a wá jẹ wanyina Jehovah ji vudevude gbọn?

⁴ Etẹ na dọ wẹ Biblu te to whenue e dọho gando “owanyi Jiwheyẹwhe tọn” go? Hogbe ehe ma to alọdlẹndo owanyi he Jiwheyẹwhe tindo na mí, ṣigba owanyi he mí tindo na ẹn wẹ e to alọdlẹndo. Be a flin whenue a jẹ wanyina Jehovah ji ya?

⁵ Flin numọtolanmẹ he a tindo whla tintan he a sè dọ Jehovah jlo dọ a ni nọgbẹ̀ kakadoi to aihọn yọyọ etọn mẹ. A plọnnu gando nuhe e ko wà nado hẹn ehe yọnbasi lẹpo go bọ a wá mọ lehe nunina he Jehovah na mí to whenue e do Visunnu etọn titi hlan aigba ji họakuẹ sọ. (Matiu 20:28; Johanu 8:29; Lomunu lẹ 5:12, 18) To whenue a wá mọ obá he mẹ Jehovah yiwanna we jẹ, enẹ yinuwado ji we yì ahun mẹ bọ hiẹ lọsu jẹ wanyina ẹn ji.​—Hia 1 Johanu 4:9, 10.

6. Etẹwẹ e zẹẹmẹdo nado yiwanna mẹde? Etẹwẹ owanyi he a tindo na Jiwheyẹwhe ko whàn we nado wà?

⁶ Amọ́, bẹjẹeji de poun wẹ numọtolanmẹ owanyi tọn he a tindo na Jiwheyẹwhe enẹ yin. Di apajlẹ, eyin  mí yiwanna mẹde, mí nọ wà nususu hú nado dọ poun dọ “N’yiwanna we.” Owanyi nọ hẹn mí tindo ojlo nado wà nuhe na hẹn homẹ mẹlọ tọn hùn. To aliho dopolọ mẹ, owanyi he a tindo na Jehovah nọ hẹn we tindo ojlo nado nọgbẹ̀ to aliho he na hẹn homẹ etọn hùn mẹ. Dile owanyi enẹ to jijideji, vlavo a ko wá klan dewe do wiwe na ẹn bo yí baptẹm. Gbọnmọ dali, a dopà nado sẹ̀n Jehovah kakadoi. (Hia Lomunu lẹ 14:7, 8.) Nawẹ a sọgan hẹn opà enẹ di gbọn?

7. Eyin mí yiwanna Jehovah, etẹwẹ mí na nọ wà? Etẹwẹ yin delẹ to gbedide etọn lẹ mẹ?

⁷ Na mí yiwanna Jehovah wutu, “mí [nọ] yìn gbedide etọn lẹ.” Gbọnna? Mí nọ setonuna ẹn. Biblu do gbẹzan he nkọ Jehovah jlo dọ mí ni zan hia mí. Di apajlẹ, e dọna mí dọ e ma sọgbe nado nọ nùahànmú, jẹajo kavi dolalo, tindo kọndopọ zanhẹmẹ tọn hẹ mẹhe ma yin alọwlemẹ mítọn, kavi nado nọ sẹ̀n mẹdevo kavi nudevo depope gbọnvona ewọ.​—1 Kọlintinu lẹ 5:11; 6:18; 10:14; Efesunu lẹ 4:28; Kolosinu lẹ 3:9.

8, 9. Nawẹ mí nọ wagbọn do yọ́n nuhe Jehovah jlo dọ mí ni wà to whenue osẹ́n tangan de ma tin to Biblu mẹ gando ninọmẹ de go? Na apajlẹ de.

⁸ Ṣigba, nado hẹn homẹ Jehovah tọn hùn, tonusisena gbedide etọn lẹ kẹdẹ ma ko pé. Jehovah ma slẹ osẹ́n he mí dona nọ yìn to ninọmẹ dopodopo mẹ to gbẹzan mítọn mẹ lẹpo. Enẹwutu, e na nọ wá jọ bọ mí ma na nọ mọ osẹ́n tangan de to Biblu mẹ gando nuhe mí dona wà go. To whelọnu lo, nawẹ mí na basi nudide dagbe lẹ gbọn? (Efesunu lẹ 5:17) To Biblu mẹ, mí nọ mọ nunọwhinnusẹ́n lẹ, enẹ wẹ nugbo dodonu tọn lẹ he nọ do pọndohlan  Jehovah tọn hia mí. Podọ dile mí to Biblu hia, mí nọ wá yọ́n Mẹhe nkọ Jehovah yin to gigọ́ mẹ. Mí nọ yọ́n aliho he mẹ e nọ lẹnnupọn te, gọna nuhe e yiwanna po dehe e gbẹwanna lẹ po.​—Hia Salmu lẹ 97:10; Howhinwhẹn lẹ 6:16-19; pọ́n Nudọnamẹ Dogọ 1.

⁹ Di apajlẹ, nawẹ mí na wagbọn do yọ́n nuhe mí na pọ́n to televiziọn ji kavi to Intẹnẹt ji lẹ? Jehovah ma dọ nuhe mí dona wà pẹẹ na mí. Amọ́, nunọwhinnusẹ́n he e na mí lẹ na gọalọna mí nado basi nudide dagbe. Ayidedai susu wẹ gọ́ na danuwiwa po fẹnnuwiwa zanhẹmẹ tọn po to egbehe. To Biblu mẹ, Jehovah dọna mí dọ “ewọ gbẹwanna mẹdepope he yiwanna danuwiwa” podọ ewọ “na dawhẹna mẹhe nọ joawuna fẹnnuwiwa zanhẹmẹ tọn lẹ.” (Salmu lẹ 11:5; Heblu lẹ 13:4) Nawẹ nunọwhinnusẹ́n ehelẹ sọgan gọalọna mí nado basi nudide dagbe lẹ gbọn? Eyin mí yọnẹn dọ Jehovah gbẹwanna nude kavi nọ pọ́n ẹn hlan taidi onú mawé, mí dona nọ dapana ẹn.

10, 11. Naegbọn mí nọ setonuna Jehovah?

¹⁰ Naegbọn mí nọ setonuna Jehovah? Mí ma nọ wàmọ nado dapana yasanamẹ kavi nuhahun he nudide ylankan lẹ nọ hẹnwa poun. (Galatianu lẹ 6:7) Kakatimọ, mí nọ setonuna Jehovah na mí yiwanna ẹn wutu. Kẹdẹdile ovi lẹ nọ jlo nado hẹn homẹ otọ́ yetọn tọn hùn do, mí jlo na hẹn homẹ Otọ́ olọn mẹ tọn mítọn tọn hùn. Nude ma yọ́n hú nado yọnẹn dọ homẹ Jehovah tọn nọ hùn do mí go!​—Salmu lẹ 5:12; Howhinwhẹn lẹ 12:2; pọ́n Nudọnamẹ Dogọ 2.

¹¹ E ma yin whenue e bọawu kavi whenue aliho devo de masọ tin kẹdẹ wẹ mí nọ setonuna Jehovah. Podọ e ma yin mílọsu wẹ nọ de osẹ́n po nujinọtedo etọn he  mí jlo na setonuna lẹ po. (Deutelonomi 12:32) Kakatimọ, mí nọ setonuna ẹn mlẹnmlẹn, kẹdẹdi salmu-kantọ lọ he dọ: “N’yiwanna gbedide towe lẹ sisosiso, mọwẹ, n’yiwanna yé taun.” (Salmu lẹ 119:47; Lomunu lẹ 6:17) Mí jlo na taidi Noa, mẹhe do owanyi etọn na Jehovah hia gbọn nuhe Jehovah ko degbe etọn na ẹn lẹpo wiwà dali. Biblu dọ dọ Noa “wà domọ pẹpẹ.” (Jenẹsisi 6:22) Be a jlo dọ Jehovah ni dọ nudopolọ gando gowe ya?

12. Nawẹ mí sọgan hẹn homẹ Jehovah hùn gbọn?

¹² Numọtolanmẹ tẹwẹ Jehovah nọ tindo eyin mí setonuna ẹn? Mí nọ hẹn ‘homẹ etọn hùn.’ (Howhinwhẹn lẹ 11:20; 27:11) Lẹnnupọn pẹẹde do enẹ ji! Mí nọ hẹn homẹhun Didatọ wẹkẹ lọ tọn to whenue mí setonuna ẹn. Amọ́, e ma nọ hẹn mí po huhlọn po gbede nado wàmọ. Kakatimọ, e na mí mẹdekannujẹ nudide bibasi tọn. Ehe zẹẹmẹdo dọ mí vò nado de eyin mí na wà dagbe kavi oylan. Jehovah jlo dọ owanyi he mí tindo na emi ni whàn mí nado basi nudide dagbe lẹ, na ogbẹ̀ mítọn nido yọ́n.​—Deutelonomi 30:15, 16, 19, 20; pọ́n Nudọnamẹ Dogọ 3.

13, 14. Nawẹ mí wagbọn do yọnẹn dọ gbedide Jiwheyẹwhe tọn lẹ ma vẹawu gbau nado yìn? Na apajlẹ de.

¹³ Etẹwẹ lo eyin mí nọ lẹndọ gbedide Jehovah tọn lẹ ko vẹawu gbau nado yìn kavi dọ tonusisena yé na hò mẹdekannujẹ mítọn yí? Biblu dọ hezeheze dọ: “Gbedide etọn lẹ ma pẹnagbànmẹ.” (1 Johanu 5:3) Hogbe Glẹkigbe tọn he yin lilẹdo “pẹnagbànmẹ” zẹẹmẹdo “pẹnzin.” To wefọ devo lẹ mẹ, hogbe ehe yin yiyizan nado dlẹnalọdo osẹ́n he ma sọgbe hẹ lẹnpọn dagbe  lẹ kavi mẹhe nọ tẹnpọn nado deanana mẹdevo lẹ bo gbleawuna yé. (Matiu 23:4; Owalọ lẹ 20:29, 30) Lẹdogbedevomẹ Biblu tọn devo dọ ẹ dole: “Osẹ́n etọn lẹ ma vẹawu yìnyìn.” (Mawuhówema Fọngbe tọn) Osẹ́n kavi gbedide Jehovah tọn lẹ ma “pẹnzin,” enẹ wẹ yindọ yé ma vẹawu gbau bọ mí ma gán yìn yé. Nuhe sọgbe hẹ lẹnpọn dagbe wẹ e nọ donukun sọn mí si to whepoponu.

¹⁴ Di apajlẹ, mí ni dọ dọ a to alọgọna họntọn de nado bẹ agbàn jẹ owhé yọyọ de gbè. E ko doagban etọn lẹpo do pali lẹ mẹ. Delẹ to pali lọ lẹ mẹ fua bo bọawu hinhẹn, amọ́ devo lẹ pẹnzin sọmọ bọ omẹ awe janwẹ sọgan ze. Be họntọn towe na biọ to asi we dọ hiẹ ṣo ni ze pali he pẹnzin taun de wẹ ya? Gbede pọ́n! Etẹwutu? Na e ma jlo dọ a ni gbleawu wutu. Taidi họntọn enẹ, Jehovah ma na biọ to mí si gbede nado wà nuhe vẹawu zẹjlẹgo de. (Deutelonomi 30:11-14) Jehovah yọ́n mí ganji. E “yọ́n lehe mí yin didá do hezeheze, bosọ nọ flindọ kọ́gudu wẹ mí.”​—Salmu lẹ 103:14.

15. Naegbọn mí sọgan kudeji dọ gbedide Jehovah tọn lẹ tin na dagbe mítọn?

¹⁵ Mose dọna akọta Islaeli tọn dọ gbedide Jehovah tọn lẹ na “yin dagbe na [yé] kakadoi” podọ eyin yé setonu, yé na “nọgbẹ̀ zọnmii.” (Deutelonomi 5:28-33; 6:24) Mọjanwẹ e gbẹ́ te do to egbé. Nuhe Jehovah nọ biọ to mí si lẹpo wẹ na hẹn gbẹzan mítọn pọnte. (Hia Isaia 48:17.) Otọ́ mítọn, Jehovah, nọ yọ́n nuhe na wà dagbe na mí hugan to whelẹponu. (Lomunu lẹ 11:33) Biblu dọna mí dọ: “Jiwheyẹwhe wẹ owanyi.” (1 Johanu 4:8) Ehe zẹẹmẹdo dọ nuhe Jehovah nọ dọ kavi wà lẹpo wẹ nọ sinai do owanyi ji.

16. Nawẹ mí wagbọn do yọnẹn dọ mí sọgan setonu mahopọnna dọ mí yin mapenọ bo to gbẹnọ to aihọn ylankan de mẹ?

 ¹⁶ E ma nọ bọawu to whelẹponu nado setonuna Jiwheyẹwhe. Mí to gbẹnọ to aihọn ylankan de mẹ, ehe Lẹgba to anadena. Ewọ nọ tẹnpọn nado sisẹ́ gbẹtọ lẹ nado wà nuylankan lẹ. (1 Johanu 5:19) Mí sọ dona hoavùn sọta linlẹn po numọtolanmẹ mape tọn mítọn titi lẹ po, na yé gán hẹn mí nado vẹtolina Jiwheyẹwhe. (Lomunu lẹ 7:21-25) Amọ́, owanyi he mí tindo na Jehovah nọ na mí huhlọn nado wà nuhe sọgbe. Ewọ nọ mọ vivẹnu he do mí te nado setonuna ẹn bo nọ gọalọna mí gbọn huhlọn gbigbọ wiwe etọn tọn nina mí dali. (1 Samuẹli 15:22, 23; Owalọ lẹ 5:32) Gbigbọ wiwe nọ gọalọna mí nado wleawuna jẹhẹnu he na hẹn tonusisena Jiwheyẹwhe bọawuna mí lẹ.​—Galatianu lẹ 5:22, 23.

17, 18. (a) Etẹwẹ mí na plọn to owe ehe mẹ? (b) Etẹ ji wẹ mí na dọhodo to weta he bọdego mẹ?

¹⁷ To owe ehe mẹ, mí na plọn lehe mí sọgan nọgbẹ̀ to aliho he na hẹn homẹ Jehovah tọn hùn mẹ do. Mí nasọ plọn lehe mí na nọ yí nunọwhinnusẹ́n po nujinọtedo walọ dagbe tọn etọn lẹ po zan to gbẹzan mítọn mẹ do. Flindọ, Jehovah ma nọ hẹn mí po huhlọn po nado setonuna ẹn gbede. Eyin mí de nado setonuna ẹn, ogbẹ̀ mítọn na pọnte bọ sọgodo mítọn na yọ́n. Hú popolẹpo, tonusise mítọn na dohia Jiwheyẹwhe obá he mẹ mí yiwanna ẹn jẹ.​—Pọ́n Nudọnamẹ Dogọ 4.

¹⁸ Nado gọalọna mí, na mí nido nọ yọ́n dagbe gbọnvona oylan, Jehovah ko na dopodopo mítọn ayihadawhẹnamẹnu de. Eyin mí plọn ayihadawhẹnamẹnu mítọn, e gán gọalọna mí nado nọ “yìn gbedide etọn lẹ.” Eyin mọ wẹ, etẹwẹ nọ yin ayihadawhẹnamẹnu, podọ nawẹ mí gán plọn ẹn gbọn? Gbọ mí ni pọ́n.