NUPINPLỌN 22
Nawẹ A Gán Tindo Mahẹ to Wẹndagbe lọ Lilá mẹ Gbọn?
Dile a to nugbo Biblu tọn lẹ plọn, a gán nọ dọna dewe dọ, ‘Mẹlẹpo wẹ dona yọ́n onú ehelẹ be!’ Nugbo wẹ, mẹlẹpo wẹ dona yọnẹn! Etomọṣo, a gán nọ hanú gando nuhe a plọn lẹ didọna mẹdevo lẹ go. Gbọ mí ni gbadopọnna lehe a gán duto obu enẹ ji bo yí ayajẹ do jẹ wẹndagbe he to Biblu mẹ lẹ lá na mẹdevo lẹ ji do.
1. Nawẹ a gán lá nuhe a plọn lẹ na mẹyinyọnẹn towe lẹ gbọn?
Devi Jesu tọn lẹ dọmọ: “Mí ma sọgan nọma dọ nuhe mí ko mọ bosọ sè lẹ.” (Owalọ lẹ 4:20) Yé yọ́n pinpẹn nugbo lọ tọn sọmọ bọ yé jlo na má ẹn hẹ mẹsusu dile e sọgan yọnbasi do. Be mọ wẹ e te na hiẹ lọsu ya? Eyin mọ wẹ, nọ dín dotẹnmẹ hundote lẹ, he mẹ a gán yí sisi do dọ nuhe a ko plọn lẹ na hagbẹ whẹndo tọn po họntọn towe lẹ po te.—Hia Kolosinu lẹ 4:6.
Aliho delẹ nado bẹjẹeji
-
To whenue a to hodọ hẹ hagbẹ whẹndo tọn lẹ, donù hosọ Biblu tọn de go gbọn didọ dali dọ: “N’plọn onú titengbe de to osẹ ehe mẹ.”
-
Nọ hia wefọ tulinamẹ tọn de na họntọn he to azọ̀njẹ kavi he to magbọjẹ mẹ de.
-
Eyin azọ́nwatọgbẹ́ lẹ kàn lehe osẹ lọ yì do sè we, a gán dọhona yé gando nuhe a plọn to Biblu pinplọn towe whenu kavi to opli agun tọn de ji go.
-
Nọ do nọtẹn Intẹnẹt tọn lọ jw.org hia họntọn towe lẹ.
-
Nọ ylọ mẹdevo lẹ wá Biblu pinplọn towe tẹnmẹ, kavi dohia yé lehe yé gán kanwehlan mí nado biọ plọnmẹ Biblu de do to jw.org ji.
2. Naegbọn kunnudide hẹ agun lọ do yin yanwle dagbe de?
Devi Jesu tọn lẹ wà nususu hú wẹndagbe lọ lilá na mẹyinyọnẹn yetọn lẹ poun. Jesu “do yé hlan awe-awe jẹnukọnna ẹn yì tòdaho” lẹ mẹ nado dọyẹwheho. (Luku 10:1) Azọ́n yẹwhehodidọ tọn he yin tito-basina enẹ nọ hùn dotẹnmẹ dote na mẹsusu dogọ nado sè wẹndagbe lọ. Humọ, yẹwhehodidọ to pọmẹ sọ hẹn ayajẹ wá na devi lọ lẹ. (Luku 10:17) Be hiẹ lọsu gán yí do basi yanwle nado dọyẹwheho to pọmẹ hẹ agun lọ ya?
DINDONANU DOGỌ
Gbadopọnna lehe a gán duto obu ji bo duvivi ayajẹ he wẹndagbe lọ lilá nọ hẹnwa tọn do.
3. Jehovah na tin hẹ we
Mẹdelẹ he jlo na dọyẹwheho gán nọ hanú gando lehe yé na yinuwa do kavi nukun he mẹdevo lẹ na yí do pọ́n yé go.
-
Be nuhe a plọn lẹ mimá hẹ mẹdevo lẹ nọ dobuna we wẹ ya? Etẹwutu?
Hò VIDEO lọ, enẹgodo dọhodo kanbiọ he bọdego ji.
-
Nawẹ jọja Kunnudetọ ehelẹ duto obu yetọn ji gbọn?
Hia Isaia 41:10, enẹgodo dọhodo kanbiọ ehe ji:
-
Eyin obu to dìdì we gando yẹwhehodidọ go, nawẹ odẹ̀ na gọalọna we gbọn?
Be a yọnẹn ya?
Kunnudetọ Jehovah tọn susu wẹ nọ lẹn dai dọ yé ma gán lá wẹndagbe lọ na mẹdevo lẹ pọ́n gbede. Di apajlẹ, Sergey nọ mọ ede di nuvọ́nọ, bo nọ mọdọ e na vẹawuna emi nado dọhodopọ hẹ mẹdevo lẹ. Whenue e wá plọn Biblu, e dọmọ: “Mahopọnna dọ n’nọ dibu, n’jẹ hodọ ji hẹ mẹdevo lẹ gando nuhe plọn n’te lẹ go. E paṣa mi dọ, hodidọ na mẹdevo lẹ do Biblu ji zọ́n bọ n’nọ yinuwa po nujikudo po todin. E sọ zọ́n bọ nuyise yọyọ enẹlẹ doadọ̀do to ahun ṣie mẹ.”
4. Nọ do sisi hia
Whenue a to wẹndagbe lọ lá, nọ lẹnnupọndo nuhe a na dọ, po lehe a na dọ ẹ do po ji. Hia 2 Timoti 2:24 po 1 Pita 3:15 po, enẹgodo dọhodo kanbiọ ehelẹ ji:
-
Nawẹ a gán yí nuhe wefọ ehelẹ dọ do yizan mẹ gbọn to whenue a to hodọ hẹ mẹdevo lẹ gando Biblu go?
-
Eyin e wá jọ bọ hagbẹ whẹndo tọn kavi họntọn delẹ ma kọngbedopọ hẹ we, etẹwẹ a gán wà? Nawẹ a ma dona yinuwa gbọn?
-
Naegbọn e na yọ́n nado nọ yí zinzin do kàn kanbiọ delẹ sè kakati nado nọ zín nuhe dọ a te lẹ do mẹdevo lẹ ji?
5. Wẹndagbe lilá nọ namẹ ayajẹ
Jehovah deazọ́nna Jesu nado lá wẹndagbe lọ. Nukun tẹwẹ Jesu nọ yí do pọ́n azọ́n enẹ? Hia Johanu 4:34, enẹgodo dọhodo kanbiọ ehelẹ ji:
-
Núdùdù hunsindagbe tọn lẹ dùdù nọ hẹn mí dogbẹ̀ bosọ nọ na mí ayajẹ. Naegbọn Jesu do yí ojlo Jiwheyẹwhe tọn wiwà, ehe bẹ wẹndagbe lọ lilá hẹn, jlẹdo núdùdù go?
-
Dona tẹlẹ wẹ a lẹndọ wẹndagbe lọ lilá gán hẹnwa na we?
Ayinamẹ delẹ die
-
To opli osẹ ṣẹnṣẹn tọn whenu, nọ dín aliho delẹ he mẹ a gán bẹ hodọdopọ jẹeji te.
-
Dọho hẹ mẹhe to nuplọn hẹ we gando lehe a gán ze yinkọ dai taidi wehọmẹvi to opli osẹ ṣẹnṣẹn tọn lẹ ji do go. Azọ́ndenamẹ wehọmẹvi tọn lẹ gán gọalọna we nado nọ voawu dogọ dile a to nuhe a plọn lẹ má hẹ mẹdevo lẹ.
-
Nọ yí adà lọ “Mẹdelẹ Nọ Dọ Dọ” kavi “Mẹde Sọgan Kanse Dọ” he to nupinplọn lọ lẹ mẹ zan, nado pọ́n lehe a gán nọ na gblọndo na kanbiọ he mẹlẹ nọ saba kanse lẹ kavi duto hodidọ aliglọnnamẹ tọn lẹ ji do.
MẸDE SỌGAN KANSE DỌ: “Nawẹ, nude ma tin wẹ ya?”
-
Nawẹ a gán yí dotẹnmẹ hundote ehe zan nado dọhona mẹlọ gando nuhe a plọn to Biblu pinplọn towe whenu lẹ go gbọn?
BLADOPỌ
Wẹndagbe lọ lilá na mẹdevo lẹ nọ hẹn ayajẹ wá, podọ e sọgan bọawu to bẹjẹeji hú lehe a lẹn do.
Dogbapọn
-
Naegbọn wẹndagbe lọ dona yin lilá na mẹdevo lẹ?
-
Nawẹ a gán yí sisi do lá owẹ̀n lọ gbọn?
-
Nawẹ a gán duto nuhe nọ dobuna we gando yẹwhehodidọ go lẹ ji gbọn?
PỌ́N NUDỌNAMẸ DEVO LẸ
Gbadopọnna aliho kleunkleun ẹnẹ delẹ he mẹ a gán yí kalti jw.org tọn zan nado lá wẹndagbe lọ te.
Plọnnu gando jẹhẹnu ẹnẹ delẹ go he gán gọalọna we nado lá wẹndagbe lọ.
“Be A Ko Wleawufo Nado Lẹzun Whèhutọ Gbẹtọ lẹ Tọn Ya?” (Atọ̀họ̀-Nuhihọ́ lọ Tọn, septembre 2020 tọn)
Pọ́n lehe apajlẹ Biblu tọn de gán na mí adọgbigbo nado lá wẹndagbe lọ do, eyin mí tlẹ yin yọpọvu.
Gbadopọnna lehe a gán dọhodo Biblu ji hẹ hagbẹ whẹndo tọn towe he ma ko plọnnu gando Jehovah go lẹ do.
“Lehe Mí Sọgan Jẹ Ahun Hẹnnumẹ Mayisenọ lẹ Tọn mẹ Do” (Atọ̀họ̀-Nuhihọ́ lọ Tọn, 15 mars 2014 tọn)
A Gán Sọ Pọ́n Hosọ Ehelẹ
KANBIỌ HE MẸSUSU NỌ KANSE LẸ
Tito Biblu Pinplọn Tọn Tẹwẹ Kunnudetọ Jehovah Tọn lẹ Do?
Vọnu wẹ tito Biblu pinplọn tọn Kunnudetọ Jehovah tọn lẹ tọn, podọ a gán zan lẹdogbedevomẹ Biblu tọn depope. Voawu nado ylọ whẹndo towe blebu po họntọn towe depope po wá nupinplọn lọ tẹnmẹ.
