Be mẹvivẹ towe de ko kú jo we do pọ́n ya? To ninọmẹ awufiẹsa tọn mọnkọ mẹ, a gán kanse dewe dọ: ‘Etẹwẹ nọ jọ do mẹde go eyin e kú? Be mí gán donukun dọ mí na vọ́ mẹyiwanna mítọn he kú lẹ mọ ya?’ Gbọ mí ni pọ́n gblọndo homẹmiọnnamẹ tọn he Biblu na na kanbiọ enẹlẹ, to nupinplọn ehe po dehe bọdego po mẹ.

1. Etẹwẹ nọ jọ do mẹde go eyin e kú?

Jesu yí okú jlẹdo amlọn yìkànmẹ de go. Aliho tẹ mẹ wẹ okú yin nudopolọ hẹ amlọndidọ te? Mẹhe damlọn yìkànmẹ ma nọ yọ́n nuhe to jijọ lẹdo e lẹ depope. Mọdopolọ, to whenue mẹde ko kú, e masọ nọ mọ awufiẹsa depope ba. Mahopọnna depope he e tlẹ yiwanna họntọn po hẹnnumẹ etọn lẹ po sọ, e ma gán do numọtolanmẹ lọ dọ emi to emide ṣo. Biblu dọ dọ, “oṣiọ lẹ ma yọ́n nudepope.”—Hia Yẹwhehodọtọ 9:5.

2. Nawẹ nugbo lọ yinyọnẹn gando okú go nọ hẹn ale wá na mí gbọn?

Mẹsusu wẹ nọ dibuna okú—podọ etlẹ yin na oṣiọ lẹ! Amọ́, nuhe Biblu dọ gando okú go sọgan miọnhomẹna we. Jesu dọmọ: “Nugbo lọ [na] hẹn mì jẹ mẹdekannu.” (Johanu 8:32) To vogbingbọn mẹ na nuhe sinsẹ̀n delẹ nọ to didọ, Biblu ma plọnmẹ dọ gbẹtọ do alindọn jọmaku de he nọ to gbẹnọ zọnmii to whenue mẹde ko kú godo. Ehe dohia dọ, mẹhe kú ma nọ to yaji to fide. Humọ, na oṣiọ lẹ ma nọ yọ́n nudepope wutu, yé ma sọgan wadanu de do mí go. Enẹwutu, e ma biọ dọ yè ni nọ sanvọ́ nado miọnhomẹna oṣiọ lẹ kavi basi sinsẹ̀n hlan yé, mọdopolọ e ma biọ dọ mí ni nọ hodẹ̀ na oṣiọ lẹ.

Mẹdelẹ nọ dọ dọ emi sọgan dọhodopọ hẹ oṣiọ lẹ. Amọ́, enẹ ma gán jọ gbede. Dile mí ṣẹṣẹ plọn do, oṣiọ lẹ “ma yọ́n nudepope.” Nado dọ hójọhó, mẹhe nọ lẹndọ emi nọ dọhodopọ hẹ oṣiọ lẹ, ma to hodọ hẹ mẹvivẹ yetọn he ko kú lẹ nugbonugbo gba, amọ́ hẹ aovi lẹ he nọ sọawuhia di mẹhe ko kú lọ lẹ pẹpẹ. Enẹwutu, nugbo lọ yinyọnẹn gando okú go nọ zọ́n bọ mí ma nọ jai jẹ omọ̀ aovi lẹ tọn mẹ. Jehovah na mí avase dọ mí ni ma nọ tẹnpọn nado dọhodopọ hẹ oṣiọ lẹ blo, na e yọnẹn dọ nuwadopọ hẹ aovi lẹ to aliho ehe mẹ na hẹn kọdetọn vẹadi lẹ wá mí ji.—Hia Deutelonomi 18:10-12.

3. Gbadopọnna nugbo lọ gando ninọmẹ oṣiọ lẹ tọn go

Lẹdo aihọn pé, onú voovo wẹ mẹlẹ yise gando nuhe nọ wà gbẹtọ to okú godo go. Nado dọ hójọhó, nuyise enẹ lẹpo ma gán yin nugbo.

• To lẹdo towe mẹ, ninọmẹ tẹ mẹ wẹ mẹsusu nọ dọ dọ oṣiọ lẹ tin te?

 4. Ale he nugbo lọ yinyọnẹn gando okú go nọ hẹnwa na mí

Eyin yè yọ́n nugbo lọ gando okú go, yè ma nọ to sijọsijọ ji na oṣiọ lẹ. Hia Yẹwhehodọtọ 9:10, enẹgodo dọhodo kanbiọ he bọdego ji:

• Be oṣiọ lẹ sọgan wadanu do mí go wẹ ya?

Nugbo Biblu tọn sọ nọ basi hihọ́na mí, ma nado yin yẹdoklọ dọ mí dona nọ sanvọ́ nado miọnhomẹna oṣiọ lẹ kavi tlẹ basi sinsẹ̀n hlan yé. Hia Isaia 8:19 po Osọhia 4:11 po, enẹgodo dọhodo kanbiọ ehe ji:

• Nukun tẹwẹ a lẹndọ Jehovah nọ yí do pọ́n mẹhe nọ basi sinsẹ̀n hlan oṣiọ lẹ kavi nọ biọ alọgọ mẹkúkú de tọn lẹ?

5. Nugbo lọ yinyọnẹn gando okú go nọ miọnhomẹna mí

Yè ko plọn mẹsusu dọ eyin yé kú, yé na wá jiya nuhe yé ṣiwà wayi lẹ tọn. Amọ́, e miọnhomẹna mí nado yọnẹn dọ mẹdepope ma nọ jiya eyin e ko kú godo—kakajẹ mẹhe ko wà nuhe ylan taun lẹ ji. Hia Lomunu lẹ 6:7, enẹgodo dọhodo kanbiọ ehe ji:

• Dile mí hia do todin sọn Biblu mẹ, eyin okú nọ suwhẹna mẹde kavi tún in dote sọn ylando etọn lẹ mẹ, be a lẹndọ mẹhe kú de sọgan gbẹ́ to yaji na ylando he e ko wà wayi lẹ wutu ya?

Lehe mí to pinplọn nado yọ́n Jehovah ganji sọ, mọ wẹ e na họnwun na mí dogọ do niyẹn dọ ewọ ma na dike gbede mẹhe ko kú lẹ nisọ wá yin yasana. Hia Deutelonomi 32:4 gọna 1 Johanu 4:8, enẹgodo dọhodo kanbiọ ehelẹ ji:

• Be a lẹndọ Jiwheyẹwhe he tindo jẹhẹnu voovo he go wefọ ehelẹ donú lẹ, na dike bo sayana mẹhe ko kú lẹ ya?

• Be nugbo he a yọnẹn todin gando okú go miọnhomẹna we ya? Etẹwutu?

 BLADOPỌ

Eyin mẹde kú, ogbẹ̀ etọn nọ doalọte wẹ. Oṣiọ lẹ ma sọgan jiya, mọdopolọ yé ma gán wadanu do mẹhe togbẹ̀ lẹ go.

Dogbapọn

• Etẹwẹ nọ jọ do mẹde go eyin e kú?

• Ale tẹwẹ nugbo lọ yinyọnẹn gando okú go nọ hẹnwa na mí?

• Nawẹ nugbo lọ yinyọnẹn gando okú go nọ miọnhomẹna mí gbọn?