NUPINPLỌN 34
Nawẹ Mí Sọgan Do Owanyi Mítọn Na Jehovah Hia Gbọn?
Be a mọdọ emi dọnsẹpọ Jiwheyẹwhe dogọ sọn whenue gbọ́n a jẹ Biblu plọn ji ya? Be e na jlo we nado to haṣinṣan towe hẹ ewọ hẹn sinyẹn deji zọnmii ya? Eyin mọ wẹ, flindọ lehe Jehovah mọdọ owanyi he a tindo na ewọ to jijideji sọ, mọ wẹ ewọ na yiwanna we bo nasọ penukundo gowe dogọ do niyẹn. Nawẹ a sọgan dohia ẹ dọ a yiwanna ẹn gbọn?
1. Nawẹ mí nọ dohia Jehovah dọ mí yiwanna ẹn gbọn?
Mí nọ do owanyi mítọn na Jehovah hia gbọn tonusisena ewọ dali. (Hia 1 Johanu 5:3.) E ma nọ hẹn mẹde po huhlọn po nado setonuna ẹn. Kakatimọ, e nọ na dotẹnmẹ dopodopo mítọn lẹ nado de eyin mí na setonuna ẹn kavi lala. Etẹwutu? Na Jehovah jlo dọ mí ni nọ ‘setonuna ẹn sọn ahun mẹ’ wutu. (Lomunu lẹ 6:17) To hogbe devo mẹ, e jlo dọ a ni setonuna emi, e ma yin na a dona wàmọ wutu gba, amọ́ na owanyi he a do na ẹn wutu. Nuhe adà 3tọ po 4tọ po owe ehe tọn bẹhẹn lẹ na gọalọna we nado do owanyi towe na Jehovah hia gbọn nuhe nọ hẹn homẹhun in lẹ wiwà gọna nuhe nọ hẹn homẹgble e lẹ didapana dali.
2. Naegbọn e sọgan vẹawu nado do owanyi mítọn na Jehovah hia?
“Susu wẹ awusinyẹn dodonọ tọn.” (Salmu lẹ 34:19) Mímẹpo wẹ nọ diahi hẹ awugbopo mítọn lẹ. Podọ, mí sọgan pehẹ nuhahun akuẹzinzan tọn lẹ, mawadodo gọna nuhahun devo lẹ. Whenue mí pehẹ awusinyẹnnamẹnu lẹ, e gán vẹawuna mí nado wà nuhe Jehovah biọ to mí si lẹ. Whẹwhinwhẹ́n lọ wẹ yindọ nuhe ma sọgbe wiwà wẹ nọ saba di nuhe bọawu hugan. Ṣigba, eyin a gbọn nugbonọ-yinyin dali wà nuhe Jehovah dọna we lẹ, a na dohia dọ a yiwanna ẹn hugan nudevo depope. Podọ a nasọ dohia dọ a yin nugbonọ na ewọ. Taidi kọdetọn de, ewọ lọsu na yin nugbonọ na we. E ma na jo we do gbede.—Hia Salmu lẹ 4:3.
DINDONANU DOGỌ
Gbadopọnna nuhewutu tonusise towe do yin nujọnu na Jehovah, gọna nuhe sọgan gọalọna we nado to nugbonọ yin na ewọ zọnmii.
3. Whẹho de he gando gowe
Sọgbe hẹ owe Jobu tọn to Biblu mẹ, Satani sawhẹ de dokọna Jobu po mẹhe jlo na sẹ̀n Jehovah lẹpo po. Hia Jobu 1:1, 6–2:10, enẹgodo dọhodo kanbiọ ehelẹ ji:
-
Sọgbe hẹ nuhe Satani dọ, naegbọn Jobu do nọ setonuna Jehovah?—Pọ́n Jobu 1:9-11.
-
Owhẹ̀ tẹwẹ Satani sadokọna gbẹtọvi lẹpo kakajẹ hiẹ lọsu ji?—Pọ́n Jobu 2:4.
Hia Jobu 27:5b, enẹgodo dọhodo kanbiọ ehe ji:
-
Nawẹ Jobu dohia dọ emi yiwanna Jehovah nugbonugbo gbọn?
Jobu do owanyi etọn na Jehovah hia gbọn nugbonọ-yinyin na ewọ dali
Mí nọ do owanyi mítọn na Jehovah hia to whenue mí yin nugbonọ na ẹn
4. Nọ hẹn homẹ Jehovah tọn hùn
Hia Howhinwhẹn lẹ 27:11, enẹgodo dọhodo kanbiọ ehelẹ ji:
-
Nawẹ e nọ ṣí na Jehovah eyin a yin nuyọnẹntọ bo nọ setonuna ẹn? Etẹwutu?
5. A sọgan yin nugbonọ na Jehovah
Owanyi mítọn na Jehovah nọ whàn mí nado dọhona mẹdevo lẹ gando ewọ go. Mí nọ wàmọ etlẹ yin to whenue e ma bọawu, na mí jlo na yin nugbonọ na ẹn wutu. Hò VIDEO lọ, enẹgodo dọhodo kanbiọ he bọdego lẹ ji.
-
Be e ko vẹawuna we pọ́n nado dọhona mẹdevo lẹ gando Jehovah go wẹ ya?
-
To video lọ mẹ, etẹwẹ gọalọna Nupo nado duto obu etọn ji?
E nọ bọawu nado yin nugbonọ na Jehovah eyin mí yiwanna nuhe ewọ yiwanna bo gbẹwanna nuhe ewọ gbewanna lẹ. Hia Salmu lẹ 97:10, enẹgodo dọhodo kanbiọ he bọdego lẹ ji:
-
Sọgbe hẹ nuhe a plọn lẹ, etẹwẹ yin delẹ to nuhe Jehovah yiwanna lẹ mẹ? Etẹwẹ yin delẹ to nuhe e gbẹwanna lẹ mẹ?
-
Nawẹ a sọgan plọn nado yiwanna nuhe yin dagbe bo gbẹwanna nuhe yin ylankan lẹ gbọn?
6. Tonusisena Jehovah nọ hẹn ale wá na mí
Tonusisena Jehovah nọ hẹn ale wá janwẹ. Hia Isaia 48:17, 18, enẹgodo dọhodo kanbiọ ehelẹ ji:
-
Be a deji nugbo dọ Jehovah nọ yọ́n nuhe na hẹn ale wá na mí lẹ to whepoponu ya? Etẹwutu?
-
Nawẹ nuhe a ko plọn sọn Biblu mẹ podọ gando Jiwheyẹwhe nugbo lọ, Jehovah go lẹ ko hẹn ale wá na we gbọn?
MẸDELẸ NỌ DỌ DỌ: “Nuyiwa ṣie lẹ ma nọ dọ nude na Jiwheyẹwhe.”
-
Wefọ tẹwẹ a gán yizan nado dohia dọ nuhe wà mí te lẹ nọ yinuwado Jehovah ji?
BLADOPỌ
A sọgan do owanyi towe na Jehovah hia gbọn tonusise po nugbonọ-yinyin na ewọ po dali mahopọnna avùnnukundiọsọmẹnu lẹ.
Dogbapọn
-
Etẹwẹ a plọn sọn apajlẹ Jobu tọn mẹ?
-
Nawẹ a na do owanyi towe na Jehovah hia gbọn?
-
Etẹwẹ na gọalọna we nado yin nugbonọ na Jehovah zọnmii?
PỌ́N NUDỌNAMẸ DEVO LẸ
Pọ́n lehe a sọgan yin nugbonọ na Jehovah po agun lọ po do.
“Na Mẹhe Yin Nugbonọ Hiẹ Nọ Yinuwa po Nugbonọ-Yinyin Po” (16:49)
Gbadopọnna nususu dogọ gando owhẹ̀ he Satani sadokọna gbẹtọvi lẹ go.
“Jobu Hẹn Tenọgli Etọn Go” (Biblu—Owẹ̀n Tẹwẹ E Bẹhẹn? adà 6tọ)
Gbadopọnna lehe yọpọvu lẹ sọgan do owanyi yetọn na Jehovah hia do.
Nawẹ jọja de sọgan hẹn nugbonọ-yinyin etọn na Jiwheyẹwhe go gbọn eyin hagbẹ lẹ to kọgbidina ẹn?
A Gán Sọ Pọ́n Hosọ Ehelẹ
KANBIỌ HE MẸSUSU NỌ KANSE LẸ
Tito Biblu Pinplọn Tọn Tẹwẹ Kunnudetọ Jehovah Tọn lẹ Do?
Vọnu wẹ tito Biblu pinplọn tọn Kunnudetọ Jehovah tọn lẹ tọn, podọ a gán zan lẹdogbedevomẹ Biblu tọn depope. Voawu nado ylọ whẹndo towe blebu po họntọn towe depope po wá nupinplọn lọ tẹnmẹ.
