NUPINPLỌN 37
Nuhe Biblu Dọ Gando Azọ́n po Akuẹ po Go
Be whẹho azọ́n po akuẹ po tọn ko do magbọjẹ na we pọ́n ya? Nukunpipedo nuhudo mítọn lẹ go gọna sinsẹ̀n-bibasi he jẹ nina Jehovah sọgan kàn dẹpẹ biọ. Amọ́, Biblu bẹ ayinamẹ yọ́n-na-yizan he gán gọalọna mí lẹ hẹn.
1. Etẹwẹ Biblu dọ gando azọ́n go?
Jiwheyẹwhe jlo dọ mí ni duvivi azọ́n mítọn tọn. Biblu dọ dọ “nude ma yọ́n na gbẹtọ hú nado . . . mọ awuvivi to azọ́n sinsinyẹn etọn mẹ.” (Yẹwhehodọtọ 2:24) Jehovah nọ wazọ́n sinsinyẹn. Eyin mí nọ hodo apajlẹ etọn bo yin azọ́n sinsinyẹnwatọ, mí nọ hẹn homẹ etọn hùn bosọ nọ tindo ayajẹ.
Azọ́nwiwa yin nujọnu. Amọ́, mí ma dona dike ni yitẹn sọn sinsẹ̀n-bibasi mítọn hlan Jehovah si gbede. (Johanu 6:27) E dopà dọ eyin mí ze ojlo etọn wiwà do otẹn tintan mẹ, emi na penukundo nuhudo agbasa tọn mítọn lẹ go.
2. Pọndohlan jlẹkaji tọn tẹwẹ mí dona tindo gando akuẹ go?
Dile etlẹ yindọ Biblu dohia dọ “akuẹ yin hihọ́ de,” e sọ na avase dọ akuẹ kẹdẹ ma sọgan na mí ayajẹ. (Yẹwhehodọtọ 7:12) Enẹwutu, mí yin tulina ma nado yiwanna akuẹ, ṣigba nado nọ ‘tindo pekọ po nuhe mí tindo lẹ po.’ (Hia Heblu lẹ 13:5.) Eyin mí nọ do pekọ to nuhe mí tindo lẹ mẹ, mí na dapana magbọjẹ he afọdidona nususu dogọ nọ hẹnwa. Mí ma nasọ tlọ míde do ahọ́ he ma yin dandan tọn lẹ mẹ. (Howhinwhẹn lẹ 22:7) Podọ mí na dapana owù he akọ̀hiho gọna ayikinkan nado jẹ adọkun to zánto dopo mẹ nọ bẹhẹn lẹ.
3. Nawẹ mí sọgan nọ tlúalọ to akuẹzinzan-liho gbọn?
Jehovah yin Jiwheyẹwhe alọtlútọ de, podọ mí na hodo apajlẹ etọn eyin mí “yin alọtlútọ bo wleawu nado mánamẹ.” (1 Timoti 6:18) Mí sọgan nọ tlúalọ to akuẹzinzan-liho nado nọgodona agun lọ podọ nado gọalọna mẹhe to hudo mẹ lẹ, titengbe sinsẹ̀n-basitọ hatọ mítọn lẹ. E ma yin akuẹ nẹmu he mí na wẹ nọ yin nujọnu hugan na Jehovah, kakatimọ nuhe whàn mí nado basi nunina lọ wẹ. Eyin mí nọ yí alọtútlú do nanúmẹ sọn ahun mẹ, mí na tindo ayajẹ bo nasọ hẹn homẹ Jehovah tọn hùn.—Hia Owalọ lẹ 20:35.
DINDONANU DOGỌ
Pọ́n ale he pọndohlan dagbe tintindo gando azọ́n go po pekọ tintindo po nọ hẹnwa lẹ.
4. Dike aliho he mẹ a nọ wazọ́n te ni nọ gbògbéna Jehovah
Haṣinṣan mítọn hẹ Jehovah dona nọ yinuwado pọndohlan mítọn gando azọ́n go ji. Hò VIDEO lọ, enẹgodo dọhodo kanbiọ he bọdego lẹ ji.
-
To video lọ mẹ, etẹwẹ yinuwado jiwe gando pọndohlan Dotu tọn po nuyiwa etọn to azọ́nmẹ po go?
-
Etẹwẹ gọalọna ẹn nado tindo pọndohlan he sọgbe gando azọ́n go?
Hia Kolosinu lẹ 3:23, 24, enẹgodo dọhodo kanbiọ ehe ji:
-
Naegbọn pọndohlan he mí nọ tindo gando azọ́n go do yin nujọnu?
Azọ́nwiwa yin nujọnu. Amọ́, mí ma dona dike ni yitẹn sọn sinsẹ̀n-bibasi mítọn hlan Jehovah si gbede
5. Pekọ tintindo nọ hẹn ale wá na mí
Mẹsusu lẹ wẹ nọ tẹnpọn nado bẹ akuẹ susu pli na yede dile e yọnbasi do. Amọ́, e ma yin nuhe Biblu na mí tuli nado wà niyẹn. Hia 1 Timoti 6:6-8, enẹgodo dọhodo kanbiọ ehe ji:
-
Etẹwẹ Biblu na mí tuli nado wà?
Eyin mí ma tlẹ do onú kaka de, mí gán gbẹ́ do ayajẹ. Hò VIDEO lọ, enẹgodo dọhodo kanbiọ he bọdego ji.
-
Mahopọnna dọ whẹndo lọ lẹ ma do alọnu sọmọ, etẹwẹ hẹn yé tindo ayajẹ?
Amọ́, etẹwẹ lo eyin nuhe mí do ma whè bọ mí gbẹ́ sọ jlo na tindo susu dogọ? Jesu na apajlẹ de nado do owù he demẹ hia. Hia Luku 12:15-21, enẹgodo dọhodo kanbiọ ehe ji:
-
Etẹwẹ a plọn sọn apajlẹ he Jesu na lọ mẹ? —Pọ́n wefọ 15.
Hia Howhinwhẹn lẹ 10:22 po 1 Timoti 6:10 po, bo yí wefọ lọ lẹ jlẹdo yede go. Enẹgodo dọhodo kanbiọ ehelẹ ji:
-
To họntọnjiji hẹ Jehovah po akuẹ susu bibẹpli po mẹ, detẹ wẹ a lẹndọ e yin nujọnu hugan? Naegbọn a do dọ mọ?
-
Nuhahun tẹlẹ wẹ wezunhinhọn to akuẹ godo nọ hẹnwa?
6. Jehovah na hẹn pekọ wá na nuhudo mítọn lẹ
Nuhahun he nọ gando azọ́n po akuẹ po go lẹ sọgan tẹ́n yise mítọn to Jehovah mẹ pọ́n. Hò VIDEO lọ nado mọ lehe mí sọgan duto whlepọn yise tọn mọnkọ lẹ ji do, enẹgodo dọhodo kanbiọ he bọdego lẹ ji.
-
To video lọ mẹ, nuhahun tẹlẹ wẹ mẹmẹsunnu lọ pehẹ?
-
Etẹwẹ e wà nado duto nuhahun lọ lẹ ji po kọdetọn dagbe po?
Hia Matiu 6:25-34, enẹgodo dọhodo kanbiọ ehe ji:
-
Etẹwẹ Jehovah dopà dọ emi na wà na mẹhe ze ojlo etọn wiwà do otẹn tintan mẹ lẹ?
MẸDELẸ NỌ DỌ DỌ: “N’dona vánkan do azọ́n go nado penukundo whẹndo ṣie go. Enẹwutu, opli agun tọn lẹ yìyì to osẹ lẹpo mẹ ma gán pà mi.”
-
Wefọ tẹwẹ hẹn we kudeji dọ sinsẹ̀n-bibasi Jehovah tọn zizedo otẹn tintan mẹ wẹ yin nudide dagbe hugan lọ?
BLADOPỌ
Nujọnu wẹ agbasazọ́n po akuẹ po yin, amọ́ yé ma dona glọnalina mí gbede nado sẹ̀n Jehovah.
Dogbapọn
-
Etẹwẹ sọgan gọalọna we nado tindo pọndohlan he sọgbe gando azọ́n go?
-
Nawẹ pekọ tintindo sọgan hẹn ale wá na we gbọn?
-
Nawẹ a sọgan dohia dọ a dejido opagbe Jehovah tọn nado penukundo omẹ etọn lẹ go gbọn?
PỌ́N NUDỌNAMẸ DEVO LẸ
Pọ́n eyin Biblu dọ dọ akuẹ yin nuylankan.
“Be Akuẹ Wẹ Yin Adọ̀ Walọ Ylankan Lẹpo Tọn Ya?” (Hosọ Intẹnẹt ji tọn)
Gbadopọnna nunamẹ wunmẹ he nọ hẹn homẹ Jiwheyẹwhe tọn hùn lẹ.
Be aihundida he ma do owù de wẹ akọ̀hiho yin ya?
“Etẹwẹ Biblu Plọnmẹ Gando Akọ̀hiho Go?” (Fọ́n!, mars 2015 tọn)
Pọ́n nuhe whàn dawe akọ̀hotọ he sọ yin jaguda de nado diọ gbẹzan etọn.
“To Dai, N’Yiwanna Agbàwhinwhlẹn Osọ́ Tọn Taun” (Atọ̀họ̀-Nuhihọ́ lọ Tọn, janvier-mars 2012 tọn)
A Gán Sọ Pọ́n Hosọ Ehelẹ
KANBIỌ HE MẸSUSU NỌ KANSE LẸ
Tito Biblu Pinplọn Tọn Tẹwẹ Kunnudetọ Jehovah Tọn lẹ Do?
Vọnu wẹ tito Biblu pinplọn tọn Kunnudetọ Jehovah tọn lẹ tọn, podọ a gán zan lẹdogbedevomẹ Biblu tọn depope. Voawu nado ylọ whẹndo towe blebu po họntọn towe depope po wá nupinplọn lọ tẹnmẹ.
