NUPINPLỌN 38
Nọ Yọ́n Pinpẹn Nunina Ogbẹ̀ Tọn
Onú dagbedagbe susu lẹ wẹ mí sọgan wà bosọ duvivi yetọn na mí togbẹ̀ wutu. Etlẹ yin to whenue mí to pipehẹ nuhahun lẹ, mí gbẹ́ sọgan nọ duvivi nudelẹ tọn to gbẹ̀mẹ. Nawẹ mí sọgan dohia dọ mí yọ́n pinpẹn nunina ogbẹ̀ tọn gbọn? Podọ whẹwhinwhẹ́n titengbe hugan tẹwẹ mí tindo nado nọ wàmọ?
1. Naegbọn mí dona nọ yọ́n pinpẹn ogbẹ̀ tọn?
Mí dona nọ yọ́n pinpẹn ogbẹ̀ tọn na nunina de wẹ e yin sọn Otọ́ owanyinọ mítọn Jehovah dè. Ewọ wẹ “asisa ogbẹ̀ tọn,” yèdọ mẹhe dá nutogbẹ̀ lẹpo. (Salmu lẹ 36:9) “Ewọ lọsu wẹ nọ na gbẹtọ lẹpo ogbẹ̀, gbọfufu po nulẹpo po.” (Owalọ lẹ 17:25, 28) Jehovah nọ na mí nuhe sin hudo mí do nado to gbẹnọ zọnmii lẹ. Ṣigba hugan mọ, e sọ wleawuna onú enẹlẹ to aliho voovo mẹ na gbẹninọ nido yin awuvivinu na mí.—Hia Owalọ lẹ 14:17.
2. Nawẹ mí gán dohia Jehovah dọ mí nọ yọ́n pinpẹn ogbẹ̀ he e na mí tọn gbọn?
Sọn whenue gbọ́n a gbẹ́ to adọ̀ onọ̀ towe tọn mẹ wẹ Jehovah nọ penukundo gowe. To gbọdo glọ, Davidi he yin dopo to sinsẹ̀n-basitọ Jiwheyẹwhe tọn lẹ mẹ dọna ẹn dọmọ: “Nukun towe lẹ tlẹ mọ mi to whenue n’gbẹ́ pò to adọ̀mẹ.” (Salmu lẹ 139:16) Ogbẹ̀ towe họakuẹ taun to nukun Jehovah tọn mẹ. (Hia Matiu 10:29-31.) E nọ vẹna Jehovah sisosiso eyin mẹdepope desọn ojlo mẹ bo hù mẹdevo, kavi etlẹ yin edetiti. a (Eksọdusi 20:13) Mọdopolọ, homẹ Jehovah tọn ma nọ hùn paali, eyin mí ze ogbẹ̀ mítọn do owù mẹ to aliho he ma yin dandan tọn de mẹ, kavi gbọn vọdonanu dali gboawupo nado basi hihọ́na ogbẹ̀ mẹdevo lẹ tọn. Whenue mí ylọ ogbẹ̀ mítọn dọ nujọnu bosọ nọ na sisi ogbẹ̀ mẹdevo lẹ tọn, mí nọ dohia dọ mí yọ́n pinpẹn ogbẹ̀ họakuẹ he yin nina mí lọ tọn.
DINDONANU DOGỌ
Gbadopọnna aliho delẹ he mẹ a gán nọ dohia dọ a yọ́n pinpẹn nunina ogbẹ̀ tọn lọ tọn te.
3. Nọ penukundo agbasalilo towe go
Klistiani he ko klan yede do wiwe lẹ nọ yí adà gbẹzan yetọn tọn lẹpo zan nado sẹ̀n Jehovah. To linlẹn de mẹ, mí nọ yí agbasa mítọn do basi avọ́sinsan na Jiwheyẹwhe. Hia Lomunu lẹ 12:1, 2, enẹgodo dọhodo kanbiọ ehelẹ ji:
-
Etẹwẹ dona nọ whàn we nado nọ penukundo agbasalilo towe go?
-
Aliho tẹlẹ mẹ wẹ a gán nọ wàmọ te?
4. Nọ ze afọdide he jẹ lẹ ma nado hẹn awugble kavi okú wá
Biblu na mí tuli nado nọ dapana nuyiwa depope he do owù. Hò VIDEO lọ nado mọ nudelẹ he a gán wà nado basi hihọ́na ogbẹ̀ towe po mẹdevo lẹ tọn po.
Hia Howhinwhẹn lẹ 22:3, enẹgodo dọhodo lehe hiẹ po mẹdevo lẹ po sọgan tin to hihọ́ glọ do ji . . .
-
to owhé towe gbè.
-
to azọ́nwatẹn towe.
-
to aihun lanmẹyiya tọn didà whenu.
-
eyin a to mọto mẹ kavi to kẹkẹ ji.
5. Nọ yí nukun nujọnu tọn do pọ́n ogbẹ̀ ovi he pò to adọ̀mẹ de tọn
Davidi yí hogbe milomilo lẹ do basi zẹẹmẹ lehe Jehovah nọ na ayidonugo nujọnu tọn ogbẹ̀ ovi he ma ko yin jiji de tọn gọna lehe ovi-kẹ́n lọ to whinwhẹ́n to ohò onọ̀ etọn tọn mẹ do tọn. Hia Salmu lẹ 139:13-17, enẹgodo dọhodo kanbiọ ehe ji:
-
To nukun Jehovah tọn mẹ, whetẹnu wẹ ogbẹ̀ mẹde tọn nọ bẹjẹeji—to whenue onọ̀ etọn mọhò etọn wẹ ya kavi to whenue e yin jiji godo?
Osẹ́n he Jehovah na akọta Islaeli hohowhenu tọn nọ basi hihọ́na onọ̀ lẹ po ovi he pò to adọ̀mẹ lẹ po. Hia Eksọdusi 21:22, 23, enẹgodo dọhodo kanbiọ ehelẹ ji:
-
Sọgbe hẹ wefọ ehelẹ, nawẹ e nọ ṣí na Jehovah eyin to mayọnẹn mẹ mẹde hẹn okú wá na ovi he pò to adọ̀mẹ de?
-
Etẹwẹ a lẹndọ e na yin numọtolanmẹ Jehovah tọn, eyin mẹde yọnẹn gàn-an bo wàmọ? b
-
Etẹwẹ a lẹn gando nukun he Jiwheyẹwhe nọ yí do pọ́n whẹho ehe go?
Etlẹ gán wá jọ bọ yọnnu de he nọ na sisi ogbẹ̀ taun na mọdọ hòdide wẹ yin pọngbọ dopo gee he emi do. Hia Isaia 41:10, enẹgodo dọhodo kanbiọ ehelẹ ji:
-
Eyin yè to yọnnu de hẹn gánnugánnu nado dehò, mẹnu dè wẹ e sọgan mọ alọgọ yí te? Naegbọn a do dọ mọ?
MẸDELẸ NỌ DỌ DỌ: “Yọnnu he dehò ma hùwhẹ de, agbasa etọn wẹ.”
-
Etẹwẹ hẹn we kudeji dọ ogbẹ̀ onọ̀ de po ovi he to homẹ na ẹn po tọn họakuẹ to nukun Jehovah tọn mẹ?
BLADOPỌ
Biblu plọn mí nado nọ yiwanna ogbẹ̀ he Jehovah na mí, nọ yọ́n pinpẹn etọn bosọ nọ basi hihọ́na ẹn. Mí dona nọ wàmọ na ogbẹ̀ mítọn titi po mẹdevo lẹ tọn po.
Dogbapọn
-
Naegbọn ogbẹ̀ gbẹtọvi tọn do họakuẹ to nukun Jehovah tọn mẹ?
-
Nawẹ e nọ ṣí na Jehovah eyin mẹde desọn ojlo mẹ bo hù gbẹtọvi hatọ etọn?
-
Naegbọn a mọdọ a dona nọ dopẹ́ na ogbẹ̀ he yin nina we?
PỌ́N NUDỌNAMẸ DEVO LẸ
Aliho tẹ mẹ wẹ mí sọgan nọ dopẹna Jehovah te na ogbẹ̀ he e na mí?
Be Jiwheyẹwhe na jona yọnnu he ko dehò pọ́n de ya? Pọ́n gblọndo kanbiọ ehe tọn.
Pọ́n lehe pọndohlan Jiwheyẹwhe tọn nkọ tintindo gando ogbẹ̀ go dona gọalọna mí nado nọ de ayidedai mítọn lẹ do.
“‘Aihundida Lanmẹyiya Tọn He Zẹ̀pá lẹ’—Be A Dona Nọ Tẹ́n Yé Pọ́n Wẹ Ya?” (Fọ́n!, 8 octobre 2000 tọn)
Etẹwẹ mẹde sọgan wà eyin e nọ lẹn nado hù ede? Gbadopọnna lehe Biblu gán gọalọna ẹn do.
“N’Jlo Na Kú—Be Biblu Gán Gọalọna Mi Eyin N’Nọ Lẹn Nado Hù Dee Ya?” (Hosọ Intẹnẹt ji tọn)
a Jehovah nọ tindo awuvẹmẹ sisosiso na mẹhe ahun yetọn jẹflumẹ lẹ. (Salmu lẹ 34:18) E nọ mọnukunnujẹemẹ dọ awufiẹsa sinsinyẹn gán zọ́n bọ mẹde na lẹn nado hù ede, podọ e jlo na gọalọna omẹ mọnkọ lẹ. Nado mọ lehe ewọ nọ gọalọnamẹ nado duto ojlo ylankan mọnkọ lẹ ji do, hia hosọ lọ “N’Jlo Na Kú—Be Biblu Gán Gọalọna Mi Eyin N’Nọ Lẹn Nado Hù Dee Ya?,” he yin sislẹ to adà lọ Pọ́n Nudọnamẹ Devo Lẹ glọ to nupinplọn ehe mẹ.
b Mẹhe ko dehò pọ́n lẹ ma dona nọ to whẹgbledo yede zẹjlẹgo, na Jehovah sọgan jona yé. Nado mọ nudọnamẹ susu dogọ, pọ́n hosọ lọ “Etẹwẹ Biblu Dọ Gando Hòdide Go?” to adà lọ Pọ́n Nudọnamẹ Devo Lẹ glọ to nupinplọn ehe mẹ.
A Gán Sọ Pọ́n Hosọ Ehelẹ
KANBIỌ HE MẸSUSU NỌ KANSE LẸ
Tito Biblu Pinplọn Tọn Tẹwẹ Kunnudetọ Jehovah Tọn lẹ Do?
Vọnu wẹ tito Biblu pinplọn tọn Kunnudetọ Jehovah tọn lẹ tọn, podọ a gán zan lẹdogbedevomẹ Biblu tọn depope. Voawu nado ylọ whẹndo towe blebu po họntọn towe depope po wá nupinplọn lọ tẹnmẹ.
