NUPINPLỌN 46
Nuhewutu Klandowiwe po Baptẹm po Do Yin Nujọnu
Nado klan dewe do wiwe na Jehovah, e na biọ dọ a ni hodẹ̀ hlan ẹn bo dopà nado sẹ̀n ewọ kẹdẹ bo ze ojlo etọn wiwà do otẹn tintan mẹ to gbẹzan towe mẹ. (Salmu lẹ 40:8) To enẹgodo, a na yí baptẹm. Gbọnmọ dali, a na dohia mẹdevo lẹ dọ a ko basi klandowiwe. Nudide titengbe hugan he mí nọ basi to gbẹ̀mẹ wẹ nado klan míde do wiwe na Jehovah. Etẹwẹ gán whàn we nado basi nudide vonọtaun he nọ diọ gbẹzan mẹtọn enẹ?
1. Etẹwẹ nọ whàn mẹde nado basi klandowiwe?
Owanyi wẹ nọ whàn mí nado klan míde do wiwe na Jehovah. (1 Johanu 4:10, 19) Biblu dotuhomẹna mí dọmọ: “Yí ahun towe lẹpo, alindọn towe lẹpo, ayiha towe lẹpo, podọ huhlọn towe lẹpo do yiwanna Jehovah Jiwheyẹwhe towe.” (Malku 12:30) Mí nọ dohia dọ mí yiwanna Jiwheyẹwhe, e ma yin gbọn nuhe mí nọ dọ lẹ kẹdẹ dali, ṣigba gbọn nuhe mí nọ wà lẹ dali ga. Kẹdẹdile sunnu po yọnnu po he yiwanna yede nugbonugbo lẹ nọ wá wlealọ do, mọ wẹ owanyi mítọn na Jehovah nọ whàn mí nado klan míde do wiwe na ẹn bo yí baptẹm do niyẹn.
2. Dona tẹlẹ wẹ Jehovah nọ na mẹhe yí baptẹm bo lẹzun Kunnudetọ etọn lẹ?
To whenue a yí baptẹm, a na lẹzun hagbẹ whẹndo ayajẹnọ Jehovah tọn. Gbọnmọ dali, a na duvivi owanyi he e tindo na we tọn to aliho susu mẹ, podọ a nasọ dọnsẹpọ ewọ dogọ hú gbede pọ́n. (Hia Malaki 3:16-18.) Gbọnvona dọ Jehovah na lẹzun Otọ́ towe, a nasọ mọ dewe to whẹndo gbigbọmẹ tọn de mẹ he bẹ mẹmẹsunnu po mẹmẹyọnnu lẹ po hẹn lẹdo aihọn pé he yiwanna ewọ bosọ yiwanna we. (Hia Malku 10:29, 30.) Na nugbo tọn, afọdide delẹ tin he a dona ze whẹpo do yí baptẹm. A dona plọnnu gando Jehovah go, plọn nado yiwanna ẹn bosọ do yise hia to Visunnu etọn mẹ. Gbọngodo, a dona klan gbẹzan towe do wiwe na Jehovah. Eyin a ze afọdide voovo ehelẹ bo yí baptẹm, ehe na hùn dotẹnmẹ dote na we nado duvivi ogbẹ̀ tọn kakadoi. Ohó Jiwheyẹwhe tọn dọmọ: “Baptẹm . . . sọ to mì whlẹngán todin ga.”—1 Pita 3:21.
DINDONANU DOGỌ
Gbadopọnna nuhewutu e do yin nujọnu dọ a ni klan dewe do wiwe na Jehovah bo yí baptẹm.
3. Mímẹpo wẹ dona de mẹhe mí na sẹ̀n
To Islaeli hohowhenu tọn, mẹdelẹ lẹndọ yé sọgan sẹ̀n Jehovah po yẹwhe lalo lọ Baali po to ojlẹ dopolọ mẹ. Amọ́, Jehovah do yẹwhegán etọn Elija hlan nado vọ́ pọndohlan agọ̀ yetọn jlado. Hia 1 Ahọlu lẹ 18:21, enẹgodo dọhodo kanbiọ ehe ji:
-
Nudide tẹwẹ Islaelivi lẹ dona basi?
Taidi Islaelivi lẹ, mílọsu dona de mẹhe mí na sẹ̀n. Hia Luku 16:13, enẹgodo dọhodo kanbiọ ehelẹ ji:
-
Naegbọn mí ma gán to Jehovah sẹ̀n bosọ to mẹdevo kavi nudevo de sẹ̀n to ojlẹ dopolọ mẹ?
-
Nawẹ mí nọ dohia Jehovah gbọn dọ ewọ wẹ mí de nado sẹ̀n?
4. Nọ lẹnayihamẹpọn do owanyi he Jehovah tindo na we ji
Jehovah na mí nuhọakuẹ susu. Etẹ míwlẹ gán na ẹn? Hò VIDEO lọ.
Etẹwẹ yin delẹ to aliho he mẹ Jehovah ko do owanyi etọn hia we te lẹ mẹ? Hia Salmu lẹ 104:14, 15 gọna 1 Johanu 4:9, 10, enẹgodo dọhodo kanbiọ ehelẹ ji:
-
Nunina Jehovah tọn tẹlẹ wẹ nọ whàn we nado dopẹna ẹn?
-
Numọtolanmẹ tẹwẹ nunina ehelẹ nọ hẹn we tindo na ẹn?
Eyin mẹde na mí nude he mí yiwanna, mí nọ jlo na dohia mẹlọ dọ mí yọ́n pinpẹn nuhe e na mí lọ tọn. Hia Deutelonomi 16:17, enẹgodo dọhodo kanbiọ ehe ji:
-
Eyin a lẹnnupọndo nuhe Jehovah ko wà na we lẹpo ji, etẹwẹ enẹ nọ whàn we nado na ewọ?
5. Klandowiwe nọ hẹn dona susu lẹ wá namẹ
Mẹsusu yise dọ yindidi, agbasazọ́n dagbe de, kavi akuẹ wẹ na na yé ayajẹ. Be nugbo wẹ ya? Hò VIDEO lọ, enẹgodo dọhodo kanbiọ he bọdego lẹ ji.
-
Dile etlẹ yindọ aihundatọ lanmẹyiya tọn he yin nùdego to video lọ mẹ yiwanna bọlu hihò, naegbọn e do jo agbasazọ́n etọn do?
-
E magbe ma nado jo ede na bọlu hihò, ṣigba nado klan ede do wiwe na Jehovah. Be nudide etọn sọgbe ya? Etẹwutu?
Whẹpo apọsteli Paulu do lẹzun Klistiani de, agbasazọ́n he pekuẹ de wẹ e to afọdona. E plọn osẹ́n Ju lẹ tọn to mẹplọntọ he diyin de de. Amọ́, e dogodo onú enẹ lẹpo nado lẹzun Klistiani de. Be e wá vẹna Paulu dọ e basi nudide mọnkọ wẹ ya? Hia Filipinu lẹ 3:8, enẹgodo dọhodo kanbiọ ehelẹ ji:
-
Naegbọn Paulu do dọ dọ nuhe e ko wà whẹpo do wá lẹzun Klistiani lẹ yin onú gúgú kavi “ogbó”?
-
Ale tẹwẹ e wá mọyi?
-
To gbẹzan towe yíyí do sẹ̀n Jehovah po yíyí i do wà nudevo de to gbẹ̀mẹ po ṣẹnṣẹn, detẹ wẹ doale hugan?
To whenue Paulu lẹzun Klistiani de, ale he e mọyi lẹ ma gán yin yiyijlẹdo nuhe e jodo godo lẹ go
MẸDELẸ NỌ DỌ DỌ: “Yẹn ma lẹndọ nuyọnẹnnu wẹ e yin dọ mẹde ni ze gbẹzan etọn blebu jo na Jiwheyẹwhe.”
-
Naegbọn a do lẹndọ e sọgbe hẹ lẹnpọn dagbe dọ a ni klan dewe do wiwe na Jehovah?
BLADOPỌ
Owanyi wẹ nọ whàn mí nado klan míde do wiwe na Jehovah bo yí baptẹm.
Dogbapọn
-
Naegbọn e do jẹ dọ mí ni yí ahun lẹpo do yiwanna Jehovah bosọ nọ sẹ̀n ẹn?
-
Nawẹ Jehovah nọ suahọ mẹhe yí baptẹm bo lẹzun Kunnudetọ etọn lẹ gbọn?
-
Be e jlo we nado klan dewe do wiwe na Jehovah ya?
PỌ́N NUDỌNAMẸ DEVO LẸ
Pọ́n nuhe whàn yọnnu nuhotọ, he sọ nọ jihàn de, gọna dawe aihundatọ lanmẹyiya tọn de nado klan yede do wiwe na Jehovah.
Kanbiọ He Jọja lẹ Nọ Kanse—Etẹwẹ N’Na Yí Gbẹzan Ṣie Do Wà?—Nudide He Wayi lẹ Finflin (6:54)
Gbadopọnna whẹwhinwhẹ́n devo lẹ he wutu yè dona klan gbẹzan mẹtọn do wiwe.
“Etẹwutu Hiẹ Dona Klan Dewe Do Wiwe Na Jehovah?” (Atọ̀họ̀-Nuhihọ́ lọ Tọn, 15 janvier 2010 tọn)
To video ohàn tọn ehe mẹ, pọ́n ayajẹ he mẹhe de nado klan yede do wiwe na Jehovah lẹ nọ tindo.
To otàn lọ “Na Owhe Susu N’Nọ Kanse Dee Dọ, ‘Naegbọn Mí Do Togbẹ̀?’” mẹ, doayi nuhe whàn nawe de nado basi vọjlado gando nuhe dona nọ otẹn tintan mẹ na ẹn lẹ go.
“Biblu Nọ Diọ Gbẹzan Mẹtọn” (Alọnuwe Atọ̀họ̀-Nuhihọ́ lọ Tọn, 1er novembre 2012 tọn)
A Gán Sọ Pọ́n Hosọ Ehelẹ
KANBIỌ HE MẸSUSU NỌ KANSE LẸ
Tito Biblu Pinplọn Tọn Tẹwẹ Kunnudetọ Jehovah Tọn lẹ Do?
Vọnu wẹ tito Biblu pinplọn tọn Kunnudetọ Jehovah tọn lẹ tọn, podọ a gán zan lẹdogbedevomẹ Biblu tọn depope. Voawu nado ylọ whẹndo towe blebu po họntọn towe depope po wá nupinplọn lọ tẹnmẹ.
